Tinuod nga Pagtuo—Posible pa ba Kini?
Tinuod nga Pagtuo—Posible pa ba Kini?
“Ang pagtuo maoy buhi, walay-kahadlok nga kompiyansa sa grasya sa Diyos, kini segurado ug tino kaayo nga itaya sa magtutuo ang iyang kinabuhi niini sa usa ka libo ka beses.”—MARTIN LUTHER, 1522.
“Kita halos bug-os na nga nahimong usa ka kalibotanong katilingban diin ang Kristohanong pagtuo ug mga panggawi sa dakong bahin halos wala na maglungtad.”—LUDOVIC KENNEDY, 1999.
NAGKADAIYA gayod ang mga panglantaw bahin sa pagtuo. Sa miagi, ang pagtuo sa Diyos maoy naandan. Karong mga adlawa, sa usa ka kalibotan nga may pagduhaduha ug pag-antos, ang tinuod nga pagtuo sa Diyos ug sa Bibliya kusog nga nagakawala.
Tinuod nga Pagtuo
Alang sa daghan, ang “pagtuo” yanong nagpasabot sa pagbaton ug relihiyosong tinuohan o pagsunod sa usa ka matang sa pagsimba. Apan, ingon sa pagkagamit diha sa Bibliya ang “pagtuo” sa paninugdan nagpasabot ug bug-os nga pagsalig—bug-os, dili-matarog nga kompiyansa sa Diyos ug sa iyang mga saad. Kini maoy hiyas nga nagtimaan sa sumusunod ni Jesu-Kristo.
Sa usa ka higayon, si Jesu-Kristo naghisgot bahin sa panginahanglang mag-ampo ug “dili moundang.” Sa paghimo niini, nagpatungha siya ug pangutana kon maglungtad ba ang tinuod nga pagtuo sa atong adlaw. Siya nangutana: ‘Inig-abot sa Anak sa tawo, makakaplag ba gayod siya [niini nga] pagtuo dinhi sa yuta?’ Ngano mang mipatungha siya nianang pangutanaha?—Lucas 18:1, 8.
Nawala nga Pagtuo
Daghang butang ang mahimong hinungdan nga mawad-an ang mga tawo sa bisan unsang pagtuo nga tingali ilang nabatonan. Lakip niini mao ang mga kagul-anan ug mga pagsulay sa adlaw-adlaw nga kinabuhi. Pananglitan, si Propesor Michael Goulder maoy usa ka kura paroko sa Manchester, Inglaterra, panahon sa pagkahagsa sa ayroplano niadtong 1958 sa Munich diin daghang membro sa Manchester United nga tem sa potbol ang nangamatay. Sa usa ka programa sa telebisyon sa BBC, gisaysay sa tigsibya nga si Joan Bakewell nga si Goulder “mibati nga walay mahimo sa dihang iyang nakita ang kadako sa kaguol sa mga tawo.” Ang usa ka resulta mao nga “nawad-an siyag pagtuo sa usa ka Diyos nga mangilabot sa dulnganan sa tawo.” Gipahayag ni Goulder
ang iyang pagtuo nga “ang Bibliya dili kay . . . dili-masayop nga pulong sa Diyos” kondili, hinunoa, “ang masayop nga pulong sa tawo, nga tingali may gamayng pagdasig sa Diyos sa lainlaing mga bahin niini.”Usahay ang pagtuo basta na lang malawos. Mao kanay nahitabo sa kahimtang sa magsusulat ug tigsibya nga si Ludovic Kennedy. Siya miingon nga sukad sa pagkabata ang iyang “mga pagduhaduha ug pagkadili-segurado [bahin sa Diyos] motungha matag karon ug unya ug mitubo ang [iyang] kawalay-pagtuo.” Daw walay usa nga makahatag kaniyag makapatagbaw nga mga tubag sa iyang mga pangutana. Ang pagkamatay sa iyang amahan sa dagat maoy usa ka wala-damhang panghitabo nga grabeng nakapaluya sa iyang pagtuo nga daan nang luya kaayo. Ang mga pag-ampo ngadto sa Diyos nga “panalipdi kami batok sa mga kapeligrohan sa dagat ug batok sa kapintasan sa kaaway” wala tubaga sanglit ang depasaherong barko nga gisakyan sa iyang amahan giatake ug giguba sa mga barkong iggugubat sa Alemanya panahon sa Gubat sa Kalibotan II.—All in the Mind—A Farewell to God.
Ang maong mga kasinatian dili talagsaon. “Ang pagtuo,” matod ni apostol Pablo, “wala mabatoni sa tanang tawo.” (2 Tesalonica 3:2) Unsay imong hunahuna? Ang tinuod nga pagtuo sa Diyos ug sa iyang Pulong posible pa ba diha sa nagkasamot ka maduhaduhaon nga kalibotan? Susiha kon unsay ikaingon sa sunod nga artikulo bahin niining ulohana.