Usa ka Leksiyon Gikan sa Kahoyng Palma

“USA ka madanihong korte sa talagsaong katahom.” Ingon niana ang paghubit sa usa ka ensiklopedia sa Bibliya bahin sa palmang datiles. Sa kapanahonan sa Bibliya ug karon, ang mga palmang datiles nagpatahom sa Nile Valley sa Ehipto, ug kini nagtaganag makapahayahay nga landong palibot sa lunhawng mga dapit sa Negeb Desert.

Sama sa kadaghanang espisye sa kahoyng palma, ang palmang datiles adunay makapadaning tul-id nga barog. Ang uban moabot sa gihabogon nga 30 metros ug magpadayon sa pagpamunga sulod sa 150 ka tuig. Oo, ang palmang datiles makapahimuot kaayong tan-awon ug makapahingangha ang kamabungahon niini. Matag tuig mamunga kinig ubay-ubayng mga pungpong sa datiles. Sa usa lamang ka pungpong lagmit adunay kapin sa 1,000 ka datiles. Bahin sa mga datiles, usa ka awtor misulat: “Kadtong kinsa . . . nakatilaw lamang sa gipauga, gipakete nga datiles nga gibaligya diha sa mga tindahan, dili gayod makahanduraw kon unsa ka lami kini sa dihang kan-on nga presko.”

Sa pagkahaom, gipakasama sa Bibliya ang pipila ka tawo sa mga kahoyng palma. Aron mahimong kahimut-anan sa panan-aw sa Diyos, sama sa mabungahong kahoyng palma, ang tawo kinahanglan nga mahimong matul-id sa moral ug kinahanglang magpadayon sa pagpamungag maayong mga buhat. (Mateo 7:17-20) Tungod niini nga katarongan, ang gikulit nga mga larawan sa mga kahoyng palma gigamit ingong dekorasyon sa templo ni Solomon ug sa templo sa panan-awon ni Ezequiel. (1 Hari 6:29, 32, 35; Ezequiel 40:14-16, 20, 22) Busa, aron mahimong dalawaton sa Diyos ang pagsimba sa usa ka tawo, ang usa kinahanglang magbaton sa tilinguhaong mga hiyas sa usa ka palmang datiles. Ang Pulong sa Diyos nagsaysay: “Ang matarong molambo sama sa kahoyng palma.”—Salmo 92:12.