Kami Nagahimo sa Labing Maayo nga Among Maarangan!

“HIMOA ang labing maayo nga imong maarangan.” Kanang praktikal nga tambag gihatag kanhi sa usa ka membro sa Nagamandong Lawas sa mga Saksi ni Jehova ngadto sa usa ka misyonaryo. Apan ngano mang ihatag ang maong paninugdang tambag ngadto sa usa ka eksperyensiyadong ministro? Dili ba kadaghanang mga misyonaryo maoy maisogong mga tawo nga adlaw-adlawng mosagubang sa mga insekto, bitin, kainit, sakit, ug nagkadaiyang mga kalisdanan?

Sa pagkatinuod, ang mga misyonaryo sa mga Saksi ni Jehova maoy ordinaryong mga lalaki ug babaye, mga Kristohanon kansang lalom nga gugma alang kang Jehova ug sa ilang isigkatawo nagpalihok kanila sa pag-alagad sa langyawng kayutaan. Sila naningkamot sa pag-alagad kang Jehova sa ilang labing maayong maarangan, nga nagadangop kaniya alang sa kusog.—Efeso 6:10.

Aron makakat-on pa ug dugang bahin sa misyonaryong buluhaton, atong handurawon nga naggugol kita ug usa ka adlaw sa pagduaw sa usa ka naandang puy-anan sa misyonaryo sa Kasadpang Aprika.

Usa ka Adlaw Diha sa Misyonaryong Buluhaton

Hapit nang mag-alas 7:00 s.b. Igoigo ang among pag-abot sa puy-anan sa misyonaryo aron makigbahin sa panaghisgot sa teksto sa Kasulatan alang sa maong adlaw. Ang napulo ka misyonaryo mainitong nag-abiabi kanamo ug naghatag kanamo ug luna sa talad-kan-anan. Samtang nag-ilaila kami, ang usa sa mga misyonaryo, kinsa nag-alagad diha sa iyang asaynment sulod na sa daghang tuig, nagsugod pag-asoy ug kataw-anang kasinatian nga iyang naeksperyensiyahan diha sa ministeryo. Apan anam-anam nga mihunong ang among pag-estoryahanay sa dihang ang tsirman sa panaghisgot nianang adlawa nagpahinumdom sa malipayong grupo nga panahon na sa pagkonsiderar sa inadlaw nga teksto. Ang panaghisgot himoon sa Pranses nga pinulongan. Bisan pag dili kami mahibalong mosulti niana nga pinulongan, madayag gikan sa paagi sa ilang pagpahayag sa ilang kaugalingon nga ang mga misyonaryo gikan sa laing nasod larino na sa maong pinulongan.

Human sa Kasulatanhong panaghisgot, gihatag ang kinasingkasing nga pag-ampo, ug dayon panahon na aron mamahaw. Samtang gibutangan namo ug daghang cereal ang among panaksan, ang misyonaryo nga naglingkod sa among tapad nag-awhag kanamo nga sagolan kinig mga hiniwang saging. Among gipatin-aw nga dili mi ganahan ug saging, apan mipasalig siya nga mausab ang among hunahuna sa dihang matilawan na namo ang lokal nga produktong saging. Busa among gidugangan ug pipila ka hiwa ang among cereal. Wala gyod siya masayop! Lami ang saging—ingon ka tam-is sa sorbetes! Ug gipasaligan kami nga ang gidalit nga estilo-Pranses nga tinapay giluto sayo nianang buntaga diha sa gamayng panaderya atbang sa puy-anan sa misyonaryo.

Human sa pamahaw, migugol kami ug usa ka adlaw uban sa magtiayong misyonaryo, nga tawgon natog Ben ug Karen. Nakadungog kami bahin sa mabungahong teritoryo niining nasora sa Kasadpang Aprika, ug naikag kaming pamatud-an ang mga taho.

 Pag-abot namo sa hunonganan sa bus, nakita namo ang daghang tawo nga naghulat. Wala madugay, ang among mga kaubang misyonaryo nalangkit sa usa ka bibong panaghisgot bahin sa usa ka topiko sa Bibliya uban sa usa ka babaye ug sa iyang anak nga lalaki. Kay dili kami mahibalong mosultig Pranses, mitindog ra kami didto ug mipahiyom! Igo ra nga gidawat sa babaye ang mga kopya sa Ang Bantayanang Torre ug Pagmata!, ang bus miabot, ug dayon ang tanan halos nagdungan sa pagsaka! Samtang naningkamot kami sa pagsaka, ang nagdugok nga mga tawo nagdutdot kanamo sa likod. Maora kamig matumba samtang nagpaingon sa ulahing bahin sa bus. Sa dihang mipaandar na ang drayber, nangupot mi pag-ayo. Matag karon ug unya, ang bus mokalit ug hunong, ug mas daghan pang tawo ang miukiok pagsakay. Mipahiyom mi sa among kaubang mga pasahero, ug mibalos silag pahiyom. Pagkadako sa among pangandoy nga makakomunikar unta kami kanila!

Samtang nagdagan ang among bus, midungaw kami sa bentana sa pagtan-aw sa puliki nga kalihokan diha sa dalan. Duha ka babaye nag-abay sa paglakaw nga naglukdo ug bug-at nga mga karga. Ang usa kanila naglukdo ug dakong palanggana nga may tubig. Usa ka mamugnaong lalaki mibuklad ug habol sa daplin sa dalan ug nagdispley diha niini ug pipila ka pahiyas nga gilaoman niyang mahalin. Bisan diin may mga tawo nga namalit o namaligya sa halos bisan unsa nga mapalit o mabaligya.

Sa kalit lang si Ben, nga nagtindog tapad nako, nakamatikod nga dunay nagtuhak sa iyang bitiis. Unsa kaha kini? Naghuot ang bus, apan mituhak na usab kini. Nakahimo siya sa pagtan-aw sa ubos. Diha sa usa ka bag sa iyang tiilan may buhing pato nga matag karon ug unya mogimaw ang ulo gikan sa bag ug motuhak kaniya! Gipatin-aw ni Ben nga ang tag-iya sa pato lagmit magdala niini sa merkado aron ibaligya.

Pag-abot namo sa teritoryo, nalipay kami sa pagkahibalo nga among duawon ang usa ka komon nga kasilinganan sa Aprika. Sa pagduol sa unang balay, si Ben kusog kaayong mipakpak sa iyang mga kamot aron kuhaon ang atensiyon sa tagbalay. Ingon nianang paagiha ang mga tawo “manuktok sa pultahan” niining bahina sa kalibotan. Migula ang usa ka batan-ong lalaki ug mipatin-aw nga puliki siya ug mihangyo kanamo sa pagbalik pagkataudtaod nianang buntaga.

Sa sunod nga pultahan, nahimamat namo ang usa ka babaye nga nagsultig diyalekto nga dili masabtan ni Ben. Gitawag sa babaye ang iyang anak nga lalaki ug gihangyo siya sa paghubad sa isulti ni Ben. Sa dihang nahuman si Ben, gidawat sa babaye ang usa ka brosyur bahin sa mga tema sa Bibliya, ug ang iyang anak nga lalaki misaad sa pagpatin-aw niini kaniya. Sa ikatulong balay, dihay ubay-ubayng batan-on nga nanglingkod sa tugkaran. Duha kanila dihadihang mihawa sa ilang lingkoranan aron makalingkod ang mga bisita. Gisundan kini sa bibong panaghisgot bahin sa pagsimba sa krus. Mihimog mga kahikayan alang sa dugang panaghisgot sa sunod semana. Panahon na aron duawon pag-usab ang puliki nga batan-ong lalaki nga among nahimamat sa unang balay. Sa usa ka paagi nadungog na niya ang among gihisgotan uban sa mga batan-on didto sa dalan. Duna siyay daghang pangutana sa Bibliya ug mihangyo nga tun-an sa Bibliya. Human masusi ang iyang eskedyul, si Ben misugot nga mobalik sa samang panahon sa sunod semana. Sa pagpauli balik sa puy-anan sa misyonaryo alang sa paniudto, gisaysay ni Ben ug Karen nga kinahanglan nilang planohon ug maayo ang ilang kalihokan sa pagtuon sa Bibliya tungod kay mas daghan silag masugdan nga mga pagtuon sa Bibliya kay sa ilang madumalahan.

Gidayeg namo sila tungod sa ilang pagkalarino sa Pranses nga pinulongan. Misaysay si Ben nga siya ug si Karen nag-alagad ingong mga misyonaryo sulod na sa unom ka tuig, ug medyo sinati na sila sa Pranses nga pinulongan. Miingon sila nga dili sayon ang pagkat-on ug bag-ong pinulongan apan ang paglahutay dunay resulta.

Pagkaalas 12:30 s.h., ang tanang misyonaryo nagtapok sa talad-kan-anan alang sa paniudto. Among nasayran nga kada adlaw, lainlaing misyonaryo ang iasayn aron maghikay sa pamahaw ug paniudto ug manghugas sa mga plato pagkahuman. Karong adlawa, ang usa sa mga misyonaryo naglutog lamiang piniritong manok ug French fries (piniritong patatas), nga  gilakipan ug kamatis nga ensalada—ang espesyal niyang potahe!

Unsay buhaton ni Ben ug Karen sa hapon? Miingon sila nga ang mga tawo dili gustong magbulad sa adlaw gikan ala-1:00 s.h. hangtod alas 3:00 s.h., busa kasagarang gamiton sa mga misyonaryo ang ubang bahin nianang panahona sa pagtuon o sa pagtagpilaw. Wala kami matingala sa dihang gisultihan kami ni Karen nga dali ra kaayong naanad ang bag-ong mga misyonaryo niining maong kostumbre!

Human sa pagtagpilaw, mibalik kami sa pagministeryo sa kanataran. Ang usa ka interesadong lalaki nga makadaghan nang gisulayan ni Ben sa pagkontak wala gihapon sa balay, apan dihay duha ka lalaki nga miabli sa pultahan sa dihang mipakpak si Ben. Gisultihan nila kami nga nakahisgot ang tagbalay bahin sa mga pagduaw ni Ben ug misugyot gayod nga mokuha sila ug tabang sa pagtuon sa Bibliya nga Kahibalo nga Motultol sa Kinabuhing Walay Kataposan. Nalipay kami nga ibilin kanila ang usa ka kopya nianang libroha. Sunod, misakay kamig bus paingon sa dapit diin si Karen magdumalag pagtuon sa Bibliya uban sa usa ka interesadong babaye.

Samtang nagbiyahe kami latas sa mga dalan nga naghuot sa mga tawo, gisultihan kami ni Karen nga iyang nakontak ang babaye usa ka adlaw niana samtang silang duha nagsakay ug taksi uban sa daghan pang ubang mga pasahero. Gihatagan ni Karen ang babaye ug tract nga basahon samtang nagbiyahe. Gibasa sa babaye ang tract ug dayon nangayo ug lain na sab nga tract. Gibasa niya kini uban ang mas dako pang interes. Pag-abot sa destinasyon, si Karen mihimog kahikayan sa pagduaw sa babaye sa iyang balay ug nasugdan ang usa ka mabungahong pagtuon sa Bibliya pinaagi sa brosyur nga Unsay Gikinahanglan sa Diyos Kanato? Karong adlawa, hisgotan ni Karen ang ikalimang leksiyon niana nga brosyur.

Nalipay kaayo kami sa among adlaw sa pag-alagad sa kanataran, apan kami dunay nabiling mga pangutana bahin sa misyonaryong buluhaton. Gipasaligan kami sa among mga tig-abiabi nga inig-abot namo sa balay, mag-andam sila ug meryenda alang kanamo ug tubagon ang among mga pangutana.

Kon sa Unsang Paagi Padayon Nilang Namentinar ang Paso

Samtang nagkaon ug piniritong itlog, tinapayng Pranses, ug keso, nasayod kami ug dugang bahin sa misyonaryong kinabuhi. Ang Lunes maoy kasagarang adlaw nga ang mga misyonaryo mopahulay o mag-atiman sa personal nga mga buluhaton. Ang kadaghanang misyonaryo mogugol ug pipila ka oras nianang adlawa sa pagsulat ngadto sa pamilya ug mga higala. Ang balita gikan sa ilang lugar hinungdanon kaayo kanila, ug ang mga misyonaryo malipayng mopadala ug modawat ug sulat.

Sanglit ang mga misyonaryo magkasalo ug puy-anan ug trabaho, hinungdanon nga huptan nila ang maayong komunikasyon pinaagi sa pagpakig-uban sa ilang mga isigkamisyonaryo ug sa paghisgot ug espirituwal nga mga butang. Sa maong katuyoan, dugang pa sa pagmentinar ug regular nga eskedyul sa personal nga pagtuon sa Bibliya, matag Lunes sa gabii ang mga misyonaryo magtuon sa Bibliya uban sa magasing Bantayanang Torre. Gipasiugda ni Ben nga sa dihang ang mga misyonaryo gikan sa lainlaing mga kagikan magpuyo sa usa lang ka puy-anan, dili kalikayan ang ginagmayng mga kasungian sa opinyon, apan ang espirituwal nga tagana sa pagtuon sa pamilya nagtabang kanila nga mahuptan ang malinawon, nahiusang atmospera. Gipasiugda niya nga makatabang usab kon dili isipon ang kaugalingon nga hinungdanon kaayo.

 Hinungdanon usab ang pagkamapaubsanon. Ang mga misyonaryo ipadala, dili aron alagaran, kondili aron mag-alagad. Namatikdan sa among mga higalang misyonaryo nga ang usa sa kinalisorang isulti diha sa bisan unsang pinulongan mao ang “pasayloa ko,” ilabina kon ang usa ka tawo nangayog pasaylo tungod sa usa ka butang nga iyang gisulti o gibuhat nga wala tuyoa. Gipahinumdom kanamo ni Ben ang panig-ingnan ni Abigail, kinsa nangayog pasaylo tungod sa bastos nga panggawi sa iyang bana ug sa ingon nahusay ang usa ka kahimtang nga mitultol unta sa katalagman. (1 Samuel 25:23-28) Ang katakos “sa pagpuyo nga madaiton” maoy usa ka hinungdanong bahin sa pagkahimong maayo nga misyonaryo.—2 Corinto 13:11.

Makausa sa matag bulan ang mga misyonaryo dunay miting aron hisgotan ang mga butang nga nag-apektar sa pamilya, maingon man usab ang mga kausaban sa eskedyul sa pag-atiman sa puy-anan sa misyonaryo. Pagkahuman, dunay linaing meryenda alang sa tanan. Alang kanamo kini morag mapuslanon kaayo—ug lami—nga kahikayan.

Pagkahuman sa panihapon, misuroy kami makadiyot sa puy-anan sa misyonaryo. Among namatikdan nga, bisan tuod simple ang puy-anan, ang mga misyonaryo nagtambayayongay aron mahuptan kining hinlo kaayo. Dunay repridyeretor, makina sa panglaba, ug kosinilya. Giingnan kami ni Karen nga sa tropikanhong mga nasod, sama niining nasora sa Kasadpang Aprika, dunay mabatonan usab nga air-condition. Ang nahiangayng mga puy-anan, maayong pagkaon, ug yanong mga panagana agig pag-amping sa panglawas nakatabang sa mga misyonaryo nga magpabiling himsog ug mabungahon.

Pagsentro sa Pagtagad Diha sa Positibong mga Butang

Nakadayeg kami sa tanan nga among nakita. Alang kaha kanamo ang misyonaryong buluhaton? Sa unsang paagi kami makaseguro? Gihatagan kami sa among mga tig-abiabi ug pipila ka butang nga hunahunaon.

Una, ila kaming gisultihan nga ang Kristohanong mga misyonaryo wala mangitag adbentura. Sila nangitag matinud-anog-kasingkasing nga mga tawo nga gustong makakat-on bahin sa kahibulongang mga saad sa Diyos. Ang mga misyonaryo naggugol ug labing menos 140 ka oras kada bulan sa pag-alagad sa kanataran, busa ang gugma alang sa ministeryo hinungdanon kaayo.

‘Apan,’ kami naghunahuna, ‘komosta ang bahin sa mga bitin, tabili, ug mga insekto?’ Nag-ingon si Ben nga bisan tuod makaplagan kini diha sa daghang misyonaryong mga teritoryo, ang mga misyonaryo naanad ra niini sa ngadtongadto. Siya midugang nga ang matag misyonaryong asaynment dunay kaugalingong katahom niini, ug sa ngadtongadto, ang mga misyonaryo nagsentro sa ilang pagtagad diha sa positibong mga bahin sa ilang asaynment. Ang mga kahimtang nga sa sinugdan ilang giisip nga “lahi” sa dili madugay maandan na, ug sa pipila ka kahimtang makapalipay pa gani. Usa ka misyonaryo nga nag-alagad sa Kasadpang Aprika sulod sa daghang tuig una pa napugos sa pagpauli tungod sa personal nga mga obligasyon miingon nga mas lisod alang kaniya ang pagbiya sa iyang asaynment kay sa pagbiya sa iyang kaugalingong nasod daghang tuig kanhi. Ang iyang misyonaryong asaynment giisip na niya nga iyang yutang natawhan.

Ikaw ba Andam Na?

Ang gisulti ni Ben ug Karen nakapahunahuna gayod kanamo. Komosta ka usab? Nakahunahuna ka ba sukad nga mag-alagad ingong misyonaryo sa usa ka langyawng teritoryo? Kon mao, mahimong mas duol ka na sa maong tumong kay sa imong gihanduraw. Usa sa pangunang mga butang nga gikinahanglan mao ang pagbaton ug gugma alang sa bug-os-panahong ministeryo ug pagkalipay sa buluhaton sa pagtabang sa mga tawo. Hinumdomi, ang mga misyonaryo dili talagsaong mga tawo kondili ordinaryong mga lalaki ug babaye. Sila naghimo sa ilang labing maayong maarangan sa pagtuman sa usa ka hinungdanon kaayong buluhaton.

[Mga hulagway sa panid 27]

Ang matag adlaw sugdan pinaagig panaghisgot sa usa ka teksto sa Bibliya

[Mga hulagway sa panid 28, 29]

Mga talan-awon sa Aprika

[Hulagway sa panid 29]

Ang kinabuhi ingong usa ka misyonaryo mahimong makapatagbaw kaayo