Kinsa ang Magabulag Kanato Gikan sa Gugma sa Diyos?
Kinsa ang Magabulag Kanato Gikan sa Gugma sa Diyos?
“Bahin kanato, kita nahigugma, tungod kay siya unang nahigugma kanato.”—1 JUAN 4:19.
1, 2. (a) Nganong hinungdanon kanato ang pagkahibalo nga kita gihigugma? (b) Kang kinsang gugma ang labaw natong gikinahanglan?
UNSA ka hinungdanon kanimo ang pagkahibalo nga ikaw gihigugma? Gikan sa pagkamasuso hangtod sa pagkahamtong, ang mga tawo nabuhi tungod sa gugma. Namatikdan ba nimo ang usa ka gamayng bata nga mahigugmaong gikugos sa iyang inahan? Kasagaran, bisan unsay nagakahitabo sa iyang palibot, samtang ang bata motutok sa mapahiyomong mga mata sa iyang inahan, siya mobating relaks, malinawon diha sa mga bukton sa usa ka inahan nga nahigugma kaniya. O nahinumdoman ba nimo kon unsay imong kahimtang niadtong usahay magubot nga katuigan sa pagkadalagita o pagkaulitawhay? (1 Tesalonica 2:7) Usahay, wala ka tingali mahibalo kon unsay imong gusto o wala ka gani makasabot kon unsay imong gibati, apan pagkahinungdanon ang pagkahibalo nga ang imong amahan ug inahan nahigugma kanimo! Dili ba nakatabang ang pagkahibalo nga makaduol ka kanila uban ang bisan unsang problema o pangutana? Sa pagkatinuod, sa tibuok kinabuhi, usa sa atong kinadak-ang mga panginahanglan mao ang pagbating gihigugma. Ang maong gugma nagpasalig kanato nga kita bililhon.
2 Ang malungtarong gugma sa mga ginikanan sa usa tinong adunay hinungdanong bahin sa hustong pagtubo ug pagkatimbang. Apan, ang pagkamasaligon nga ang atong langitnong Amahan, si Jehova, nahigugma kanato mas hinungdanon sa atong espirituwal ug emosyonal nga kaayohan. Ang ubang mga magbabasa niining magasina wala tingaliy mga ginikanan nga tinuod nga nagtagad kanila. Kon tinuod kana sa imong kaso, magmadasigon. Bisan pag wala o kulang ang gugma sa ginikanan, ang maunongong gugma sa Diyos maoy mopuli niana.
3. Sa unsang paagi gipasaligan ni Jehova ang iyang katawhan sa iyang gugma alang kanila?
3 Pinaagi sa iyang manalagnang si Isaias, gipunting ni Jehova nga ang usa ka inahan “makalimot” sa iyang masuso, apan dili niya kalimtan ang iyang katawhan. (Isaias 49:15) Sa susama, si David masaligong miingon: “Kon ugaling biyaan ako sa akong amahan ug sa akong inahan, si Jehova mismo magsagop kanako.” (Salmo 27:10) Pagkamakapadasig! Bisan unsay imong sirkumstansiya, kon ikaw nakadangat sa usa ka napahinungod nga relasyon uban kang Jehova nga Diyos, angay gayong hinumdoman nimo nga ang iyang gugma alang kanimo molabaw pa nianang iya ni bisan kinsang tawo!
Pagpabilin Diha sa Gugma sa Diyos
4. Sa unsang paagi ang unang-siglong mga Kristohanon gipasaligan sa gugma sa Diyos?
4 Kanus-a nimo unang nahibaloan ang gugma ni Jehova? Lagmit, ang imong kasinatian medyo kaamgid nianang sa mga Kristohanon sa unang siglo. Matahom nga pagkahubit sa ika-5ng kapitulo sa sulat ni Pablo ngadto sa mga taga-Roma kon sa unsang paagi ang mga makasasala, nga kanhi nahimulag sa Diyos, nakasinati sa gugma ni Jehova. Sa bersikulo 5, atong mabasa: “Ang gugma sa Diyos gibubo man nganhi sa atong mga kasingkasing pinaagi sa balaang espiritu, nga gihatag kanato.” Sa bersikulo 8, midugang si Pablo: “Ang Diyos nagrekomendar sa iyang kaugalingong gugma kanato sa pagkaagi nga, samtang kita mga makasasala pa, si Kristo namatay alang kanato.”
5. Unsay nakatabang kanimo sa pagkasabot ug pagpasalamat sa gidak-on sa gugma sa Diyos?
5 Sa samang paagi, sa dihang ang kamatuoran gikan sa Pulong sa Diyos gitanyag kanimo ug nagsugod ka sa pagpasundayag ug pagtuo, ang balaang espiritu ni Jehova misugod paglihok diha sa imong kasingkasing. Niining paagiha nagsugod ka sa pagkasabot ug pagpasalamat sa gidak-on sa nahimo ni Jehova sa pagpadala sa iyang pinalanggang Anak aron mamatay alang kanimo. Busa gitabangan ka ni Jehova nga makaamgo kon unsa ka dako ang iyang gugma alang sa katawhan. Sa dihang naamgohan nimo nga, bisan pag natawo ka nga makasasala nga nahimulag kaniya, giablihan ni Jehova ang dalan aron nga ang mga tawo ikapahayag nga matarong uban sa paglaom sa walay-kataposang kinabuhi, wala ba matandog ang imong kasingkasing? Wala ka ba mobati ug gugma alang kang Jehova?—Roma 5:10.
6. Nganong may mga panahon nga bation tingali nato nga medyo nahilayo kita kang Jehova?
6 Kay nadani sa gugma sa imong langitnong Amahan ug nakapasibo sa imong kinabuhi aron mahimong dalawaton niya, imong gipahinungod ang imong kinabuhi ngadto sa Diyos. Natagamtam nimo karon ang pakigdait uban sa Diyos. Apan, may mga panahon ba nga gibati nimong medyo nahilayo ka kang Jehova? Mahimong mahitabo kana kang bisan kinsa kanato. Apan hinumdomi kanunay nga ang Diyos dili mausab. Ang iyang gugma sama ka dili-mabalhinon ug ka makanunayon sa adlaw, nga dili gayod mohunong sa pagpadan-ag sa iyang mainit nga mga bidlisiw nganhi sa yuta. (Malaquias 3:6; Santiago 1:17) Sa laing bahin, kita mahimong mausab—bisan sa makadiyot. Samtang mobiyo ang yuta, katunga sa planeta ang maliminan sa kangitngit. Sa susama, kon talikdan nato ang Diyos, bisag sa gamay lang nga paagi, bation natong mobugnaw ang atong relasyon uban kaniya. Unsay atong mahimo aron matul-id ang maong situwasyon?
7. Sa unsang paagi ang pagsusi-sa-kaugalingon makatabang kanato sa pagpabilin diha sa gugma sa Diyos?
7 Kon mamatikdan nato nga medyo nahimulag na sa gugma sa Diyos, angay natong pangutan-on ang atong kaugalingon: ‘Gipakamenos ko ba ang gugma sa Diyos? Inanay ba akong mitalikod gikan sa buhi ug mahigugmaon nga Diyos, nga nagpakita sa lainlaing mga paagi ug pagkaluya sa pagtuo? Gisentro ba nako ang akong hunahuna sa “mga butang sa unod,” inay sa “mga butang sa espiritu”?’ (Roma 8:5-8; Hebreohanon 3:12) Kon nahilayo na kita kang Jehova, makahimo kitag mga lakang sa pagtul-id niining kahimtanga, sa pagbalik ngadto sa suod, mainit nga relasyon uban kaniya. Giawhag kita ni Santiago: “Duol sa Diyos, ug siya moduol kaninyo.” (Santiago 4:8) Patalinghogi ang mga pulong ni Judas: “Mga hinigugma, pinaagi sa pagpalig-on sa inyong kaugalingon diha sa inyong labing balaan nga pagtuo, ug sa pag-ampo uban sa balaang espiritu, magpabilin kamo diha sa gugma sa Diyos.”—Judas 20, 21.
Ang Nausab nga mga Sirkumstansiya Dili Makaapektar sa Gugma sa Diyos
8. Unsang mga kausaban ang mahimong kalit nga mahitabo sa atong kinabuhi?
8 Ang atong kinabuhi niining sistemaha sa mga butang nailalom sa daghang kausaban. Namatikdan ni Haring Solomon nga “ang panahon ug ang wala damhang panghitabo modangat [kanatong] tanan.” (Ecclesiastes 9:11) Sa kalit lang, bug-os nga mausab ang atong kinabuhi. Niining adlawa kita maayog lawas, pagkasunod adlaw kita mahimong makaagom sa grabeng sakit. Niining adlawa ang atong sekular nga trabaho morag permanente, pagkasunod adlaw wala na kitay trabaho. Nga walay pasidaan, mahimong kalit nga mamatay ang usa ka minahal. Ang mga Kristohanon sa usa ka nasod taudtaod na tingaling nagtagamtam ug kalinaw, ug unya, sa kalit lang, mobuto ang mapintas nga paglutos. Tingali kita sayop nga giakusar, ug tungod niini, mag-antos kita sa inhustisya. Oo, ang kinabuhi dili permanente o dili gayod segurado.—Santiago 4:13-15.
9. Nganong maayong konsiderahon ang usa ka bahin sa Roma kapitulo 8?
9 Sa dihang mahitabo kanato ang makapasubo nga mga butang, mahimong mobati kitang gitalikdan, nga maghunahuna gani nga milubad na ang gugma sa Diyos alang kanato. Tungod kay kitang tanan mailalom man sa maong mga panghitabo, maayong konsiderahon nato pag-ayo ang makapahupay kaayong mga pulong ni apostol Pablo nga nasulat diha sa Roma kapitulo 8. Kanang mga pulonga gitumong ngadto sa dinihogan-sa-espiritu nga mga Kristohanon. Apan, sa prinsipyo mapadapat usab kini niadtong sakop sa ubang mga karnero, kinsa gipahayag nga matarong ingong mga higala sa Diyos, sama kang Abraham sa wala pa ang Kristohanong kapanahonan.—Roma 4:20-22; Santiago 2:21-23.
10, 11. (a) Unsay mga sumbong usahay sa mga kaaway batok sa katawhan sa Diyos? (b) Nganong ang maong mga akusasyon dili gayod hinungdanon alang sa mga Kristohanon?
10 Basaha ang Roma 8:31-34. Si Pablo nangutana: “Kon ang Diyos dapig kanato, kinsa ang batok kanato?” Tinuod, si Satanas ug ang iyang daotang kalibotan maoy batok kanato. Ang mga kaaway tingali sayop nga mag-akusar kanato, bisan diha sa mga korte sa nasod. Ang pipila ka Kristohanong mga ginikanan giakusar nga nagdumot sa ilang mga anak tungod kay wala motugot nga sila makadawat ug medikal nga mga pagtambal nga lapas sa balaod sa Diyos o wala sila paapila sa paganong mga selebrasyon. (Buhat 15:28, 29; 2 Corinto 6:14-16) Ang ubang matinumanong mga Kristohanon sayop nga gisumbong nga mialsa sa gobyerno tungod kay sila dili mopatay sa ilang isigkatawo diha sa gubat o dili mag-apil-apil sa politika. (Juan 17:16) Ang ubang mga magsusupak nagpakaylap ug mapasipad-ong mga bakak diha sa palaumagian sa balita, nga sayop ganing nag-akusar sa mga Saksi ni Jehova ingong peligrosong kulto.
11 Apan ayawg kalimot nga sa panahon sa mga apostoles, gikaingon: “Mahitungod niining sektaha nahibaloan namo nga kini ginasupak bisan diin.” (Buhat 28:22) Hinungdanon ba gayod ang bakak nga mga akusasyon? Ang Diyos maoy magpahayag sa matuod nga mga Kristohanon nga matarong, pinasukad sa ilang pagtuo sa halad ni Kristo. Nganong mohunong man si Jehova sa paghigugma sa iyang mga magsisimba human niya ikahatag kanila ang labing bililhong gasa nga iyang mahatag—ang iyang pinalanggang Anak? (1 Juan 4:10) Karon nga si Kristo gibangon na gikan sa mga patay ug gipahimutang diha sa tuong kamot sa Diyos, siya aktibong nagdepensa sa mga Kristohanon. Kinsay makataronganong makapanghimakak sa depensa ni Kristo alang sa iyang mga sumusunod o kinsay malamposong makahagit sa maayong hukom nga gipakanaog sa Diyos alang sa iyang mga matinumanon? Wala gayod!—Isaias 50:8, 9; Hebreohanon 4:15, 16.
12, 13. (a) Unsang mga kahimtang o mga sirkumstansiya ang dili makapahimulag kanato gikan sa gugma sa Diyos? (b) Unsay tumong sa Yawa sa pagpahinabog kalisdanan kanato? (c) Nganong ang mga Kristohanon mogula nga bug-os nga magmadaogon?
12 Basaha ang Roma 8:35-37. Gawas pa kanato, duna bay si bisan kinsa o bisan unsa nga makabulag kanato gikan sa gugma ni Jehova ug sa iyang Anak, si Kristo Jesus? Mahimong gamiton ni Satanas ang iyang yutan-ong mga ahente aron samokon pag-ayo ang mga Kristohanon. Sulod sa miaging siglo, daghan sa atong mga igsoong lalaki ug babaye ang mapintas nga gilutos diha sa daghang nasod. Sa pipila ka dapit karon, ang atong mga igsoon adlaw-adlawng nag-atubang ug kalisod sa panalapi. Ang uban nakasinati sa kahapdos sa kagutom o kakulang sa besti. Unsay tumong sa Yawa sa pagpahinabo niining malisod nga mga kahimtang? Labing menos, usa sa iyang tumong mao nga mawala ang kadasig alang sa matuod nga pagsimba kang Jehova. Buot ni Satanas nga patuohon kita nga nabugnaw na ang gugma sa Diyos. Apan, mao ba kana ang kahimtang?
13 Sama kang Pablo, kinsa mikutlo sa Salmo 44:22, natun-an nato ang sinulat nga Pulong sa Diyos. Nasabtan nato nga tungod sa ngalan sa Diyos nga kining mga butanga nagakahitabo kanato, nga iyang “mga karnero.” Ang pagbalaan sa ngalan sa Diyos ug pagbindikar sa iyang unibersohanong pagkasoberano maoy nalangkit. Tungod nianang dagkong mga isyu nga gitugotan sa Diyos ang mga pagsulay, dili tungod kay wala na siya mahigugma kanato. Bisan unsa pa tingali ang kalisdanan, kita gipasaligan nga ang gugma sa Diyos alang sa iyang katawhan, lakip sa matag usa kanato, wala mausab. Ang bisan unsa nga daw kapildihan nga ato tingaling naagoman mahimong usa diay ka kadaogan kon atong huptan ang atong integridad. Kita gipalig-on ug gihupay sa pasalig sa dili-mabungkag nga gugma sa Diyos.
14. Nganong kombinsido si Pablo sa gugma sa Diyos bisan pa sa mga kalisdanan nga maagoman tingali sa mga Kristohanon?
14 Basaha ang Roma 8:38, 39. Unsay nakapakombinsir kang Pablo nga walay makabulag sa mga Kristohanon gikan sa gugma sa Diyos? Sa walay duhaduha ang personal nga mga kasinatian ni Pablo samtang diha sa ministeryo nagpalig-on sa iyang kombiksiyon nga ang mga kalisdanan dili makaapektar sa gugma sa Diyos alang kanato. (2 Corinto 11:23-27; Filipos 4:13) Dugang pa, nahibalo si Pablo sa walay-kataposang katuyoan ug sa mga pakiglabot ni Jehova sa Iyang katawhan sa nangagi. Ang kamatayon ba mismo makabuntog sa gugma sa Diyos alang niadtong maunongong nag-alagad kaniya? Dili gayod! Ang maong mga matinumanon nga mangamatay padayong mabuhi diha sa hingpit nga panumdoman sa Diyos, ug banhawon niya sila sa takdang panahon.—Lucas 20:37, 38; 1 Corinto 15:22-26.
15, 16. Iasoy ang pipila ka butang nga dili gayod makapahunong sa Diyos sa paghigugma sa iyang matinumanong mga alagad.
15 Bisan unsang kaalaotan nga ipahinabo tingali kanato sa kinabuhi karon—usa ba ka makapabaldado nga aksidente, makamatayng sakit, o pagkahugno sa ekonomiya—walay makawagtang sa gugma sa Diyos alang sa iyang katawhan. Ang gamhanang mga manulonda, sama sa dili-masinugtanong manulonda nga nahimong Satanas, dili makapahunong kang Jehova sa paghigugma sa iyang debotadong mga alagad. (Job 2:3) Ang mga gobyerno tingali magdili, magbilanggo, ug magdagmal sa mga alagad sa Diyos ug magtawag tingali kanila nga “persona non grata” o mga tawong wala kahimut-i. (1 Corinto 4:13) Ang maong dili-makataronganong pagdumot nga gipakita sa mga nasod mahimong magpit-os sa mga tawo sa pagpakigbatok kanato, apan dili kini makaimpluwensiya sa Soberano sa uniberso nga talikdan kita.
16 Ingong mga Kristohanon, dili kita angayng mahadlok nga ang bisan unsa sa gitawag ni Pablo ug “mga butang nga ania karon”—ang mga hitabo, mga kahimtang, ug mga situwasyon niining presenteng sistema sa mga butang—ni ang “mga butang nga moabot” makabungkag sa relasyon sa Diyos sa iyang katawhan. Bisan tuod ang yutan-on ug ang daotang espiritung mga gahom makiggubat kanato, ang maunongong gugma sa Diyos magpalig-on kanato. Walay “gihabogon ni giladmon” ang makababag sa gugma sa Diyos, sumala sa gipasiugda ni Pablo. Oo, walay bisan unsa nga makapaluya tingali sa atong buot, ni bisan unsa nga mokiling sa pagpasundayag ug labawng impluwensiya kanato, ang makabulag kanato gikan sa gugma sa Diyos; ni ang bisan unsang laing linalang makaungkag sa relasyon sa Maglalalang uban sa iyang matinumanong mga alagad. Ang gugma sa Diyos dili gayod mapakyas; kini dumalayon.—1 Corinto 13:8.
Pabilhi ang Mahigugmaong-Kalulot sa Diyos sa Walay Kataposan
17. (a) Nganong ang pagkabaton sa gugma sa Diyos “mas maayo pa kay sa kinabuhi”? (b) Sa unsang paagi ikapasundayag nato nga atong gipabilhan ang mahigugmaong-kalulot sa Diyos?
17 Unsa ka hinungdanon ang gugma sa Diyos kanimo? Mibati ka ba sama kang David, kinsa misulat: “Tungod kay ang imong mahigugmaong-kalulot mas maayo pa kay sa kinabuhi, ang akong mga ngabil magadayeg kanimo. Busa dayegon ko ikaw sa tibuok kong kinabuhi; sa imong ngalan bayawon ko ang akong mga kamot”? (Salmo 63:3, 4) Sa pagkatinuod, aduna bay bisan unsa nga ikatanyag sa kinabuhi niining kalibotana nga mas maayo pa kay sa pagtagamtam sa gugma ug maunongon nga pakighigala sa Diyos? Pananglitan, ang pagpangagpas ba sa usa ka dakog-kita nga sekular nga karera mas maayo pa kay sa pagkabaton sa kalinaw sa hunahuna ug kalipay nga moresulta gumikan sa suod nga relasyon uban sa Diyos? (Lucas 12:15) Ang ubang mga Kristohanon nag-atubang sa kapilian nga isalikway si Jehova o atubangon ang kamatayon. Nahitabo kana sa daghang Saksi ni Jehova sa mga kampo konsentrasyon sa Nazi panahon sa Gubat sa Kalibotan II. Gawas lamang sa pipila, ang atong Kristohanong mga igsoon mipili nga magpabilin diha sa gugma sa Diyos, nga andam moatubang sa kamatayon kon gikinahanglan. Kadtong maunongong magpabilin diha sa iyang gugma makasalig nga makadawat gikan sa Diyos ug walay-kataposang kaugmaon, usa ka butang nga dili ikahatag sa kalibotan kanato. (Marcos 8:34-36) Apan labaw pa ang nalangkit kay sa walay-kataposang kinabuhi.
18. Nganong tilinguhaon kaayo ang walay-kataposang kinabuhi?
18 Bisag dili posible nga mabuhi sa walay kataposan nga wala si Jehova, sulayi paghanduraw kon sama sa unsa ang taas kaayo nga kinabuhi nga wala ang atong Maglalalang. Kini haw-ang, walay tinuod nga katuyoan. Gihatagan ni Jehova ang iyang katawhan ug makapatagbawng buluhaton nga himoon niining kataposang mga adlaw. Busa makasalig kita nga sa dihang si Jehova, ang Dakong Tigtuman sa Katuyoan, maghatag ug walay-kataposang kinabuhi, kini matugob sa makaiikag, bililhon nga mga butang nga atong tun-an ug buhaton. (Ecclesiastes 3:11) Bisag unsa pa ka daghana ang atong makat-onan sa umaabot nga mga milenyo, dili gayod nato bug-os nga matugkad ‘ang kalawom sa bahandi ug kaalam ug kahibalo sa Diyos.’—Roma 11:33.
Ang Amahan Nagmahal Kanimo
19. Unsang panamilit nga pasalig ang gihatag ni Jesu-Kristo sa iyang mga tinun-an?
19 Sa Nisan 14, 33 K.P., sa iyang kataposang gabii uban sa iyang 11 ka matinumanong mga apostoles, gisulti ni Jesus ang daghang butang aron sa pagpalig-on kanila sa kon unsay mahitabo sa umaabot. Silang tanan miunong kang Jesus latas sa iyang mga pagsulay, ug gibati nila mismo nga siya nahigugma kanila. (Lucas 22:28, 30; Juan 1:16; 13:1) Dayon gipasaligan sila ni Jesus: “Ang Amahan nagmahal kaninyo.” (Juan 16:27) Pagkadakong tabang sa maong mga pulong alang sa mga tinun-an sa pagkaamgo sa malumong mga pagbati nga nabatonan sa ilang langitnong Amahan alang kanila!
20. Unsay determinado nimong buhaton, ug sa unsa ikaw makasalig?
20 Daghang buhi karon ang nag-alagad kang Jehova nga matinumanon sulod sa daghang dekada. Sa walay duhaduha, sa dili pa matapos kining daotang sistema sa mga butang, makaatubang pa kita ug daghang pagsulay. Ayaw gayod tugoti ang maong mga pagsulay o kalisdanan nga makapaduhaduha kanimo sa maunongong gugma sa Diyos alang kanimo. Lisod maghinobra pagpasiugda niining kamatuorana: Si Jehova nagmahal kanimo. (Santiago 5:11) Hinaot ang matag usa kanato magpadayon sa paghimo sa atong bahin, nga maunongong magbantay sa mga sugo sa Diyos. (Juan 15:8-10) Hinaot gamiton nato ang tanang kahigayonan sa pagdayeg sa iyang ngalan. Kinahanglang palig-onon nato ang atong determinasyon sa pagpadayon sa pagduol kang Jehova diha sa pag-ampo ug pagtuon sa iyang Pulong. Bisan unsa may ipahinabo sa ugma-damlag, kon ginahimo nato ang atong maarangan sa pagpahimuot kang Jehova, kita magpabiling malinawon, masaligon kaayo sa iyang dili-mapakyas nga gugma.—2 Pedro 3:14.
Unsaon Nimo Pagtubag?
• Aron magpabilin kitang timbang sa espirituwal ug emosyonal, kang kinsang gugma ang ilabinang gikinahanglan nato?
• Unsang mga butanga ang dili gayod makapahunong kang Jehova sa paghigugma sa iyang mga alagad?
• Nganong ang pagsinati sa gugma ni Jehova “mas maayo pa kay sa kinabuhi”?
[Mga Pangutana sa Pagtuon]
[Mga hulagway sa panid 13]
Kon mobati kita nga nahimulag gikan sa gugma sa Diyos, makapaningkamot kita sa pagtul-id sa mga butang
[Hulagway sa panid 15]
Nasabtan ni Pablo kon nganong gilutos siya