“Sa Kataposan Akong Nahibaloan Kon Unsay Akong Diperensiya!”

MAO kana ang gibati sa usa ka lalaki sa Tokyo sa dihang iyang nabasa ang sugilanon sa kinabuhi diha sa Disyembre 1, 2000, nga isyu sa Ang Bantayanang Torre. Ang artikulo nag-ulohang “Wala Kamo Mahibalo Kon Maunsa ang Inyong Kinabuhi Ugma,” ug giasoy niini ang eksperyensiya sa usa ka kanhing misyonaryo nga nag-antos gumikan sa balatian nga nailhan sa medisina ingong manic-depressive psychosis.

Ang lalaki nga taga-Tokyo miingon sa sulat nga giadres sa mga magpapatik niining magasina: “Ang gihubit nga mga simtoma haom gayod kanako. Busa miadto ako sa usa ka sikyatrik nga ospital ug nasayran nga ako adunay manic depression. Ang doktor nga naghiling kanako nahingangha. Siya miingon, ‘Ang mga tawong duna niining sakita talagsa rang maghunahuna nga sila may sakit.’ Natabangan ako nga madayagnos ang sakit una pa kini mograbe pag-ayo.”

Milyonmilyong tawo sa tibuok kalibotan nakabenepisyo sa lainlaing mga paagi gumikan sa pagbasa sa matag isyu sa Ang Bantayanang Torre ug sa kauban niini nga magasin, ang Pagmata! Ilang nakaplagan nga matulon-anon ug makapatagbaw ang mga artikulo. Ang magasing Bantayanang Torre gipatik na karon diha sa 141 ka pinulongan, ug ang Pagmata! gipatik diha sa 86 ka pinulongan. Ikaw usab malingaw sa pagbasa nga regular sa Ang Bantayanang Torre ug Pagmata!