“Ang Panalangin ni Jehova—Mao Kana ang Makapadato”

KITANG tanan buot nga mapanalanginan. Ang The American Heritage College Dictionary nag-ingon nga ang mga panalangin magpausbaw sa “kalipay, kaayohan, o kalamboan.” Sanglit si Jehova mao ang Maghahatag sa “matag maayong gasa ug matag hingpit nga regalo,” ang tanang dalisay, dumalayon nga panalangin naggikan sa atong mahigugmaong Maglalalang. (Santiago 1:17) Siya magbubo sa mga panalangin sa tanang katawhan, bisan niadtong wala makaila kaniya. Si Jesus nag-ingon bahin sa iyang Amahan: “Siya magapasubang sa iyang adlaw diha sa mga tawong daotan ug sa mga maayo ug magapaulan diha sa mga tawong matarong ug sa mga dili-matarong.” (Mateo 5:45) Bisan pa niana, si Jehova magpakita ug linaing kahangawa alang niadtong mahigugma kaniya.—Deuteronomio 28:1-14; Job 1:1; 42:12.

Ang salmista misulat: “Walay bisan unsang maayo nga ihikaw ni Jehova gikan niadtong nagalakaw nga dili salawayon.” (Salmo 84:11) Oo, kadtong moalagad kang Jehova dunay tugob, makahuloganong mga kinabuhi. Sila nahibalo nga “ang panalangin ni Jehova—mao kana ang makapadato, ug dili niya kana dugangan ug kasakit.” Ang Bibliya nag-ingon usab: “Sila nga ginapanalanginan [ni Jehova] magapanag-iya sa yuta.” (Proverbio 10:22; Salmo 37:22, 29) Pagkadakong panalangin niana!

Sa unsang paagi madawat nato ang panalangin ni Jehova? Ang usa ka paagi mao nga kinahanglang ugmaron nato ang mga hiyas nga makapahimuot kaniya. (Deuteronomio 30:16, 19, 20; Miqueas 6:8) Makita nato kini sa panig-ingnan sa tulo ka alagad ni Jehova sa karaang kapanahonan.

Si Jehova Nagapanalangin sa Iyang mga Alagad

Si Noe maoy talagsaong alagad sa Diyos. Sa Genesis 6:8, atong mabasa: “Si Noe nakakaplag ug pabor sa mga mata ni Jehova.” Ngano? Kay masinugtanon man si Noe. Ang asoy nag-ingon: “Si Noe naglakaw uban sa matuod nga Diyos.” Gituman ni Noe ang matarong nga mga prinsipyo ni Jehova ug gisunod ang iyang mga sugo. Sa panahon nga ang kalibotan naglunang sa kapintasan ug kahilayan, si Noe nadasig sa ‘pagbuhat sumala sa tanan nga gisugo sa Diyos kaniya. Gibuhat niya ang ingon gayod.’ (Genesis 6:9, 22) Ingong sangpotanan, si Jehova nagsugo kaniya sa pagtukod “ug arka aron sa pagluwas sa panimalay [ni Noe].” (Hebreohanon 11:7) Niining paagiha, si Noe ug ang iyang pamilya—ug pinaagi kanila ang tawhanong rasa—naluwas sa kalaglagan niadtong kaliwatana. Ug si Noe namatay uban ang paglaom nga mabanhaw nga may palaabotong walay-kataposang kinabuhi sa usa ka paraisong yuta. Pagkadagayang mga panalangin ang iyang nadawat!

Si Abraham may mga hiyas usab nga nakapahimuot kang Jehova. Panguna niini mao ang pagtuo. (Hebreohanon 11:8-10) Gibiyaan ni Abraham ang haruhayng kinabuhi sa Ur ug sa ulahi sa Haran kay siya may pagtuo sa saad ni Jehova nga ang iyang binhi modaghan ug mahimong panalangin sa tanang nasod. (Genesis 12:2, 3) Bisan pa sa daghang tuig sa pagsulay, ang iyang pagtuo gigantihan sa dihang natawo ang iyang anak nga lalaki nga si Isaac. Pinaagi kaniya, si Abraham nahimong katigulangan sa piniling nasod sa Diyos, ang Israel, ug ngadtongadto sa Mesiyas. (Roma 4:19-21) Dugang pa, siya ang “amahan sa tanan nga nagbatog pagtuo,” ug siya gitawag nga “higala ni Jehova.” (Roma 4:11; Santiago 2:23; Galacia 3:7, 29) Pagkatugob sa iyang pagkinabuhi, ug pagkadagaya niyang gipanalanginan!

Matikdi usab ang matinumanong tawo nga si Moises. Talagsaon sa iyang mga hiyas mao ang iyang pagpabili sa espirituwal nga mga butang.  Gisalikway ni Moises ang tanang katigayonan sa Ehipto ug “nagpabiling lig-on nga daw nakakita sa Usa nga dili-makita.” (Hebreohanon 11:27) Human sa 40 ka tuig sa Midian, mibalik siya sa Ehipto ingong usa ka tigulang ug maisogong mibarog atubangan sa kinakusgang gahom sa maong panahon, si Paraon, aron pangayoon ang kagawasan sa iyang mga igsoon. (Exodo 7:1-7) Nasaksihan niya ang napulo ka hampak, ang pagbahin sa Pulang Dagat, ug ang kalaglagan sa kasundalohan ni Paraon. Gigamit siya ni Jehova aron ihatag ang Balaod ngadto sa Israel ug aron pataliwad-an ang Iyang pakigsaad uban sa bag-ong nasod. Sulod sa 40 ka tuig, gipangunhan ni Moises ang nasod sa Israel didto sa kamingawan. Ang iyang kinabuhi may tinuod nga katuyoan, ug gipahimuslan niya sa kahibulongang paagi ang dagayang mga panalangin sa pag-alagad.

Presenteng-Adlaw nga mga Panalangin

Kining mga asoya nagpakita nga ang mga kinabuhi niadtong moalagad sa Diyos makahuloganon gayod. Sa dihang ugmaron sa katawhan ni Jehova ang maong mga hiyas sama sa pagkamasinugtanon, pagtuo, ug pagpabili sa espirituwal nga mga butang, sila tugob nga mapanalanginan.

Sa unsang paagi kita gipanalanginan? Buweno, samtang ang milyonmilyong tawo sulod sa Kakristiyanohan nagaantos sa espirituwal nga gutom, kita “mosanag tungod sa pagkamaayo ni Jehova.” (Jeremias 31:12) Pinaagi kang Jesu-Kristo ug sa “matinumanon ug maalamong ulipon,” si Jehova nagtaganag dagayang abiyo sa espirituwal nga pagkaon nga motabang nato sa pagpabilin diha  sa “dalan padulong sa kinabuhi.” (Mateo 7:13, 14; 24:45; Juan 17:3) Ang pagpakig-uban sa atong Kristohanong mga igsoon maoy laing dato nga panalangin. Sa mga tigom ug sa ubang mga okasyon, ang pagpakig-uban sa mga isigkamagsisimba nga nagpasundayag sa gugma ug masibotong naningkamot sa pagsul-ob sa “bag-ong pagkatawo” maoy tinubdan sa tumang kalipay. (Colosas 3:8-10; Salmo 133:1) Bisan pa niana, ang atong labing dakong panalangin mao ang hamiling kahigayonan sa pagbaton ug personal nga relasyon kang Jehova nga Diyos ug sa pagsunod sa mga tunob sa iyang Anak, si Kristo Jesus.—Roma 5:1, 8; Filipos 3:8.

Sa pagpalandong sa maong mga panalangin, kita makaamgo kon unsa gayod ka hamili ang atong pag-alagad sa Diyos. Basin atong mahinumdoman ang sambingay ni Jesus bahin sa nagapanawng magpapatigayon nga nangitag bililhong mga perlas. Si Jesus miingon bahin niining tawhana: “Sa pagkakaplag ug usa ka perlas nga bililhon kaayo, siya milakaw ug nagbaligya dayon sa tanang butang nga iyang nabatonan ug nagpalit niini.” (Mateo 13:46) Ingon gayod niana ang atong bation bahin sa atong relasyon sa Diyos, atong pribilehiyo sa pag-alagad kaniya, atong Kristohanong panagkauban, atong Kristohanong paglaom, ug sa tanang ubang mga panalangin maylabot sa atong pagtuo. Wala nay mas bililhon pa diha sa atong kinabuhi.

Ihatag Pagbalik Kang Jehova

Kay atong giila si Jehova ingong Maghahatag sa tanang maayong gasa, ang atong mga kasingkasing mapalihok sa pagpahayag sa pagpasalamat sa mga panalangin nga atong madawat. Unsaon man nato pagbuhat niana? Usa ka paagi mao ang pagtabang sa uban nga makatagamtam niining samang mga panalangin. (Mateo 28:19) Diha sa kapin sa 230 ka nasod, ang mga Saksi ni Jehova puliki sa pagduaw sa ilang mga silingan sa pagbuhat  niana. Sa pagbuhat nila sa ingon, gigugol nila ang ilang limitadong personal nga mga kahinguhaan—panahon, kusog, ug materyal nga mga kabtangan—aron matabangan ang uban nga “makadangat sa tukmang kahibalo sa kamatuoran.”—1 Timoteo 2:4.

Matikdi ang mga payunir nga nagpuyo sa Glendale, California, T.B.A. Matag Sabado sa buntag, mobiyahe silag halos 100 kilometros nga idabuwelta aron moduaw sa usa ka pederal nga bilanggoan. Bisan tuod mogugol lamang silag pipila ka oras sa matag duaw uban sa mga binilanggo, sila wala mawad-ig kadasig. Usa kanila miingon: “Magantihon kaayo ang pag-alagad niining talagsaong teritoryo. Kami nagabuhat niana uban ang tumang kalipay. Daghan ang among nakitang mga interesado nga di na namo maatiman. Sa pagkakaron, kami nagdumalag pagtuon sa lima ka tawo, ug lain pang upat ang mihangyo nga magtuon sa Bibliya.”

Ang masibotong Kristohanong mga ministro malipay sa pagtanyag sa ilang serbisyo nga walay bayad aron himoon kining nagaluwas-kinabuhing buluhaton. Ilang gisumbalik-silaw ang tinamdan ni Jesus, nga miingon: “Nadawat ninyo nga walay bayad, ihatag nga walay bayad.” (Mateo 10:8) Milyonmilyon sa tibuok kalibotan ang nakigbahin sa samang di-mahakogong pag-alagad, ug ingong resulta, panonpanon sa mga matinud-anong mga tawo ang misanong ug nahimong mga tinun-an. Sa miaging lima ka tuig lamang, duolan sa 1.7 ka milyon ang nagpahinungod sa ilang kinabuhi ngadto kang Jehova. Ang pag-atiman sa mga panginahanglan niining nagpadayong pag-uswag nagkinahanglan sa pagpatik ug mga Bibliya ug gipasukad-sa-Bibliyang mga publikasyon ug sa pagtukod ug bag-ong mga Kingdom Hall ug ubang mga tigomanan. Asa man gikan ang salapi nga gamiton sa maong mga panginahanglan? Bug-os nga naggikan sa kinabubut-ong mga donasyon.

Tungod sa mga kalisod sa panginabuhi sa pipila ka bahin sa kalibotan, daghan ang nakigbisog sa pagtagana sa pangunang mga kinahanglanon sa kinabuhi alang sa ilang mga pamilya. Sumala sa magasing New Scientist, usa ka bilyon ka tawo ang mogasto sa labing menos 70 porsiyento sa ilang kinitaan sa pamilya diha sa pagkaon. Daghan sa atong Kristohanong mga igsoong lalaki ug babaye ang anaa sa maong kahimtang. Kon walay tabang gikan sa mga isigkamagtutuo, dili gayod sila makabatog mga butang sama sa Kristohanong mga publikasyon o angay nga mga Kingdom Hall.

Siyempre, wala kana magpasabot nga kining mga tawhana kontento na nga abagahon sa uban ang ilang luwan. Apan nagkinahanglan silag tabang. Si Moises, sa dihang nagdasig sa mga Israelinhon sa paghatag ug materyal nga mga amot ingong paagi sa pagpasalamat kang Jehova tungod sa ilang mga panalangin, miingon: “Ang gasa sa kamot sa matag usa kinahanglang sumala sa panalangin ni Jehova nga imong Diyos nga iyang gihatag kanimo.” (Deuteronomio 16:17) Busa, sa dihang nakita ni Jesus ang usa ka babayeng balo nga nag-amot ug “duha ka gagmayng sensilyo nga kubos kaayog bili” diha sa templo, iyang gidayeg siya atubangan sa iyang mga tinun-an. Gihimo niya ang iyang maarangan. (Lucas 21:2, 3) Sa samang paagi, ang mga Kristohanon diha sa mas kabos nga mga kahimtang mobuhat gayod sa ilang maarangan. Ug kon may kakulangan, kini ikatagana pinaagig mga amot gikan sa mga isigka-Kristohanon nga medyo haruhay sa materyal.—2 Corinto 8:13-15.

Kon kita mohatag ug balik sa Diyos sa maong mga paagi, hinungdanon nga kita adunay hustong motibo. (2 Corinto 8:12) Matod ni Pablo: “Ipabuhat sa matag usa ang sumala sa iyang gihukom diha sa iyang kasingkasing, dili nga kontragusto o pinugos, kay gihigugma sa Diyos ang malipayong maghahatag.” (2 Corinto 9:7) Pinaagi sa kinasingkasing nga paghatag, kita makapaluyo sa teokratikanhong pag-uswag nga nagakahitabo karon ug makapausbaw sa atong kalipay.—Buhat 20:35.

Ang pagpakigbahin sa buluhatong pagsangyaw ug paghatag ug kinabubut-ong mga amot maoy duha ka paagi nga kita makahatag ug balik kang Jehova tungod sa mga panalangin nga iyang gihatag kanato. Ug pagkamakapadasig ang pagkahibalo nga si Jehova gustong mohatag sa iyang panalangin ngadto sa daghan pang uban nga sinserong mga tawo, nga sa pagkakaron tingali wala makaila kaniya! (2 Pedro 3:9) Busa, mopadayon kita paggamit sa atong mga kahinguhaan diha sa pag-alagad sa Diyos aron makaplagan ang matinud-anong mga tawo ug makatabang nila sa pag-ugmad sa mga hiyas sama sa pagkamasinugtanon, pagtuo, ug pagkamapasalamaton. Nianang paagiha, makabaton kitag kalipay nga makatabang kanila nga ‘makatilaw ug makakita nga si Jehova maayo.’—Salmo 34:8.

[Kahon sa panid 28, 29]

Mga Paagi sa Paghatag nga Gipili sa Uban

MGA AMOT ALANG SA TIBUOK-KALIBOTANG BULUHATON

Daghan ang maggahin, o magbadyet, ug salapi nga ilang ihulog diha sa mga kahon sa kontribusyon nga gimarkahan ug “Contributions for the Society’s Worldwide Work—Matthew 24:14.”

Matag bulan ipadala sa mga kongregasyon kining salapia ngadto sa tibuok-kalibotang hedkuwarter sa mga Saksi ni Jehova sa Brooklyn, New York, o sa lokal nga sangang buhatan. Ang kinabubut-on nga mga donasyong salapi mahimong ipadala usab nga direkta ngadto sa Treasurer’s Office, Watch Tower Bible and Tract Society of the Philippines, P.O. Box 2044, 1060 Manila, o sa sangang buhatan nga nag-alagad sa inyong nasod. Ang alahas o ubang mahalong mga butang mahimong idonar usab. Ang mubong sulat nga nagpahayag nga kana maoy direkta nga gasa angayng ilakip sa maong mga amot.

KONDISYONAL-DONASYON NGA KAHIKAYAN

Ang salapi mahimong idonar sa linaing kahikayan diin, engkaso ang nagdonar dunay personal nga panginahanglan, ang donasyon mahimong ibalik kaniya. Alang sa dugang impormasyon, palihog kontaka ang Treasurer’s Office sa adres nga gitala sa itaas.

PAGPLANO ALANG SA BUHAT SA KALUOY

Dugang pa sa direkta nga mga gasang salapi ug kondisyonal nga mga donasyong salapi, adunay ubang mga paagi sa paghatag aron makabenepisyo ang buluhaton sa Gingharian sa tibuok kalibotan. Kini nag-apil sa:

Insyurans: Ang Watch Tower Society mahimong himoon nga benepisyaryo sa usa ka polisa sa life insurance o sa pagretiro/pensiyon nga programa.

Mga Kuwenta sa Bangko: Ang mga kuwenta sa bangko, mga sertipiko sa deposito, o indibiduwal nga mga kuwenta sa pagretiro mahimong ibutang nga in trust for o himoong payable on death to sa Watch Tower Society, nga nahiuyon sa mga kinahanglanon sa lokal nga bangko.

Stocks and Bonds: Ang mga stock o aksiyones ug mga bond ikadonar ngadto sa Watch Tower Society ingong direkta nga gasa.

Balay ug Yuta: Ang ikabaligya nga balay ug yuta mahimong idonar ngadto sa Watch Tower Society pinaagi kaha sa deretsong paghatag isip gasa o pagreserba sa balay o yuta samtang buhi pa ang nagdonar, kinsa mahimong magpadayon sa pagpuyo diha niana panahon sa iyang pagkinabuhi. Kontaka ang sangang buhatan sa inyong nasod sa dili pa buhatag papeles ang bisan unsang balay o yuta.

Wills and Trusts: Ang propiedad o salapi mahimong ikabilin ngadto sa Watch Tower Society pinaagi sa usa ka legal nga pagkabuhat nga testamento, o ang Watch Tower Society mahimong nganlan nga benepisyaryo sa usa ka trust agreement. Ang trust nga mapanunod sa usa ka relihiyosong organisasyon mahimong adunay pipila ka bentaha sa buluhisan.

Ingon sa gipasabot sa terminong “pagplano alang sa buhat sa kaluoy,” kining mga matanga sa donasyon kasagarang manginahanglan ug pagplano sa bahin sa nagdonar. Aron maabagan ang mga indibiduwal nga nagtinguhang makabenepisyo sa tibuok-kalibotang buluhaton sa mga Saksi ni Jehova pinaagi sa pipila ka matang sa pagplano alang sa buhat sa kaluoy, giandam ang Iningles ug Kinatsila nga brosyur nga nag-ulohang Charitable Planning to Benefit Kingdom Service Worldwide. Gisulat ang brosyur ingong tubag sa daghang pangutana bahin sa mga gasa, wills, ug trusts. Naundan usab kini ug dugang mapuslanong impormasyon sa pagplano bahin sa balay ug yuta, sa pinansiyal, ug sa buhis. Ug gidisenyo kini sa pagtabang sa mga indibiduwal sa Tinipong Bansa nga nagplano sa paghimog sa espesyal nga gasa karon o magpabilin ug panulondon inigkamatay aron makapilig labing mapuslanon ug episyenteng paagi sumala sa ilang personal ug pamilyahanong mga kahimtang. Kining brosyur mahimong mabatonan pinaagi sa paghangyo ug kopya nga direkta gikan sa Sangang Buhatan sa mga Saksi ni Jehova.

Human mabasa ang brosyur ug makonsulta ang Sangang Buhatan sa mga Saksi ni Jehova, daghan ang nakaabag sa mga Saksi ni Jehova ug sa samang higayon, nakapadako sa mga benepisyo sa buhis sa pagbuhat sa ingon. Ang Sangang Buhatan sa mga Saksi ni Jehova angay nga pahibaloon ug makadawat ug kopya sa bisan unsang dokumento maylabot sa bisan hain niining mga kahikayana. Kon ikaw interesado sa bisan hain niining mga kahikayan sa pagplano alang sa buhat sa kaluoy, ikaw angayng mokontak sa Sangang Buhatan sa mga Saksi ni Jehova, pinaagi kaha sa sulat o sa telepono, diha sa adres nga gilista sa ubos o sa opisina sa mga Saksi ni Jehova nga nag-alagad sa inyong nasod.

SANGANG BUHATAN SA MGA SAKSI NI JEHOVA

Watch Tower

186 Roosevelt Avenue,

San Francisco del Monte

1105 Quezon City

Telepono: 411-6090