Mga Pangutana Gikan sa mga Magbabasa

Gihimo ba ni Jehova ang iyang pakigsaad kang Abraham didto sa Ur o sa Haran?

Ang kinaunahang asoy sa pakigsaad ni Jehova kang Abraham makaplagan sa Genesis 12:1-3, nga nag-ingon: “Si Jehova miingon kang Abram: ‘Lakaw gikan sa imong yuta ug gikan sa imong mga paryente ug gikan sa balay sa imong amahan paingon sa yuta nga akong ipakita kanimo; ug maghimo ako ug usa ka dakong nasod gikan kanimo . . . Ug ang tanang banay sa yuta tinong magapanalangin sa ilang kaugalingon pinaagi kanimo.’” a Mahimong didto himoa ni Jehova kining pakigsaad kang Abraham samtang siya didto sa Ur ug nagkompirmar niana pag-usab sa dihang si Abraham didto sa Haran.

Sa unang siglo, gipunting ni Esteban ang sugo ni Jehova nga si Abraham kinahanglang mobalhin ngadto sa Canaan. Nagpakigpulong sa Sanhedrin, siya miingon: “Ang Diyos sa kahimayaan nagpakita sa atong katigulangang si Abraham sa didto pa siya sa Mesopotamia, sa wala pa siya magpuyo sa Haran, ug siya miingon kaniya, ‘Biya gikan sa imong yuta ug gikan sa imong mga paryente ug umadto sa yuta nga akong ipakita kanimo.’” (Buhat 7:2, 3) Sa sinugdan gikan sa Ur si Abraham, ug sumala sa gipakita ni Esteban, didto niya unang nadungog ang sugo nga moadto sa Canaan. (Genesis 15:7; Nehemias 9:7) Wala hisgoti ni Esteban ang pakigsaad sa Diyos kang Abraham, apan sa Genesis 12:1-3, kana nga pakigsaad gilangkit sa sugo nga moadto sa Canaan. Busa makataronganon ang pagtuo nga gihimo ni Jehova ang pakigsaad kang Abraham didto sa Ur.

Bisan pa niana, ang maampingong pagbasa sa asoy sa Genesis nagpakita nga gisulti pag-usab ni Jehova ang iyang pakigsaad kang Abraham didto sa Haran, sama nga iyang gisulti pag-usab ug gitin-aw ang ubang mga bahin niana sa daghang okasyon didto sa Canaan. (Genesis 15:5; 17:1-5; 18:18; 22:16-18) Sumala sa Genesis 11:31, 32, ang amahan ni Abraham, si Tera, mibiya sa Ur padulong sa Canaan, nga giubanan ni Abraham, Sara, ug Lot. Miabot sila sa Haran ug mipabilin didto hangtod sa kamatayon ni Tera. Taastaas nang panahon nga si Abraham didto sa Haran nga nakabaton na ug dakong bahandi. (Genesis 12:5) Ug sa usa ka panahon, si Nahor, nga igsoong lalaki ni Abraham, mibalhin usab didto.

Human marekord ang kamatayon ni Tera, ang Bibliya nagtaho sa mga pulong ni Jehova kang Abraham nga nagkanayon: “Niana si Abram milakaw ingon sa gisulti ni Jehova kaniya.” (Genesis 12:4) Busa, ang Genesis 11:31–12:4 nagpalig-on sa ideya nga si Jehova nagsulti sa mga pulong nga natala sa Genesis 12:1-3 human sa kamatayon ni Tera. Kon mao, si Abraham mibiya sa Haran ug mipaingon sa yuta nga gipakita ni Jehova isip pagsugot sa sugo nga mao pay iyang pagkadungog, maingon man ang usa ka sugo nga iyang nadungog katuigan nga sayosayo didto sa Ur.

Sumala sa Genesis 12:1, si Jehova nagsugo kang Abraham: “Lakaw gikan sa imong yuta ug gikan sa imong mga paryente ug gikan sa balay sa imong amahan.” Sa usa ka panahon ang “yuta” ni Abraham mao ang Ur, ug ang “balay” sa iyang amahan atua didto. Bisan pa niana, ang amahan ni Abraham nagbalhin sa iyang panimalay ngadto sa Haran, ug si Abraham nagtawag nianang dapita nga iyang yuta. Human sa daghang tuig sa Canaan, sa dihang gipadala niya ang iyang sinaligan ngadto sa ‘iyang yuta ug sa iyang mga paryente’ aron mangitag asawa alang kang Isaac, ang sinaligan miadto sa “siyudad ni Nahor” (sa Haran o kaha sa kasikbit nga lugar). (Genesis 24:4, 10) Didto ang sinaligan nakakaplag kang Rebeca taliwala sa mga paryente ni Abraham, ang dakong pamilya ni Nahor.—Genesis 22:20-24; 24:15, 24, 29; 27:42, 43.

Sa iyang pakigpulong sa Sanhedrin, si Esteban miingon bahin kang Abraham: “Human mamatay ang iyang amahan, gipalalin siya sa Diyos nganhi niining yutaa nga karon inyong ginapuy-an.” (Buhat 7:4) Nagpakita kini nga si Jehova nakigkomunikar kang Abraham didto sa Haran. Makataronganon ang pagtuo nga sa maong okasyon gisulti pag-usab ni Jehova ang iyang pakigsaad kang Abraham sumala sa gitaho sa Genesis 12:1-3, kay ang pakigsaad miepekto sa dihang si Abraham mibalhin ngadto sa Canaan. Sa ingon, ang pagsusi sa tanang kamatuoran motultol sa konklusyon nga gihimo gayod ni Jehova ang iyang pakigsaad kang Abraham didto sa Ur ug nagkompirmar niana pag-usab didto sa Haran.

[Footnote]