Mga Tigpuril sa mga Kahoy

A KAPANAHONAN sa Bibliya, ang mga kahoy giisip ingong bililhong mga manggad. Pananglitan, sa dihang gipalit ni Abraham ang lubnganan sa iyang gimahal nga asawa, si Sara, ang mga kahoy gilista diha sa kontrata sa pagbalhin sa propiedad.—Genesis 23:15-18.

Sama usab karon, gipabilhan ug maayo ang mga kahoy, ug gihatagag dakong internasyonal nga pagtagad ang pagtipig sa kalasangan. Ang librong State of the World 1998 nag-ingon: “Bisan tuod daghang tawo diha sa kasarangag-klima nga mga nasod mabalak-on sa tropikal nga kalasangan, mahimong wala lamang sila makaamgo nga ang kasarangag-klima nga kalasangan sa ilang mga nasod mismo mao ang nabahinbahin ug nadaot pag-ayo sa tanang matang sa lasang.” Unsay naghulga sa kahimsog sa kalasangan nianang kasarangag-klima nga mga nasod sa Uropa ug Amerika del Norte? Daghang tawo mopasangil sa pagpuril sa kalasangan, apan dunay laing mga hinungdan nga malipotong nagdaot sa mga kahoy, diin giusa-usa niini pagpuril ang mga kahoy, pagaingnon pa. Unsa kini? Ang polusyon sa hangin ug ang ulan nga may asido. Kini nga mga tighugaw inanayng nagpahuyang sa mga kahoy, nga naghimo niini nga daling mataptan sa mga dangan ug sakit.

Sulod sa mga dekada, ang mga tawong batid sa kalikopan ug ubang may-kahangawang mga molupyo nagpasidaan sa panginahanglan sa pagpanalipod sa ekosistema sa yuta. Sa katuigan sa 1980, human matun-i sa mga siyentipiko sa Alemanya ang mga epekto sa polusyon sa hangin ug ulan nga may asido diha sa kalikopan, sila nanghinapos: ‘Kon walay himoon, sa mga tuig 2000, ang mga tawo makadayeg na lamang sa kalasangan diha sa karaang mga hulagway ug sa mga salida sa sine.’ Ikalipay, ang gahom sa yuta sa pagpasig-uli lig-on kaayo nga hangtod karon ang kalasangan nakabarog sa daghang gitagna nga mga kadaot.

Hinuon, maylabot sa layog-abot nga kaayohan, ang Diyos lamang gayod ang makatipig ug maayo sa atong ekosistema. “Siya nagabisibis sa kabukiran gikan sa iyang mga lawak sa itaas” ug “nagapatubo sa lunhawng balili alang sa mga mananap, ug sa mga tanom alang sa tawo.” Ug siya nagsaad sa “paglaglag sa mga nagalaglag sa yuta.” (Salmo 104:13, 14; Pinadayag 11:18) Kahibulongan gayod unya sa dihang ang mga molupyo sa yuta makatagamtam sa usa ka walay polusyon nga kalibotan hangtod sa kahangtoran!—Salmo 37:9-11.