Aduna bay Paglaom sa Kaluwasan?

Ang ika-20ng siglo gitawag ug usa sa labing dugoong mga siglo nga naagian sukad sa tawo. Ang mga krimen, gubat, panagbangi sa minoriya, pag-abuso sa droga, pagkadili-matinud-anon, ug kapintasan ilabinang mikaylap sulod sa miaging pipila ka dekada. Gawas pa niana, ang mga tawo nakasinatig kasakit ug pag-antos nga maoy resulta sa sakit, pagkatigulang, ug kamatayon. Kinsay wala mangandoy nga makabatog kagawasan gikan sa dagkong mga problema nga naglungtad sa kalibotan karon? Samtang molantaw kita sa umaabot, aduna bay paglaom sa kaluwasan?

TAGDA ang panan-awon nga gipiyal kang apostol Juan mga 2,000 ka tuig kanhi. Siya misulat: “Tan-awa! Ang tolda sa Diyos anaa uban sa mga tawo, ug siya mopuyo uban kanila, ug sila mahimong iyang mga katawhan. Ug ang Diyos makig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” (Pinadayag 21:3, 4) Si manalagnang Isaias mitagna usab: “Iyang lamyon gayod ang kamatayon hangtod sa kahangtoran, ug ang Soberanong Ginoong Jehova tinong magpahid sa mga luha gikan sa tanang nawong. Ug ang kaulawan sa iyang katawhan iyang wagtangon gikan sa tibuok yuta, kay si Jehova maoy nagsulti niini.”—Isaias 25:8.

Handurawa lang kon unsa unyay kahulogan sa katumanan sa mga saad sa Diyos! Ang mga tawo luwason, o ipahigawas, gikan sa pagdaogdaog ug kapintasan, gikan sa mga hinungdan sa pag-antos ug kagul-anan. Aw, bisan ang sakit, pagkatigulang, ug kamatayon dili na maghasol pa kanato! Ang Pulong sa Diyos, ang Bibliya, nagsaad ug walay-kataposang kinabuhi ilalom sa hingpit nga mga kahimtang dinhi sa yuta. (Lucas 23:43; Juan 17:3) Ug mabatonan kini sa tanang nagtinguha niini. “Kabubut-on [sa Diyos] . . . nga ang tanang matang sa mga tawo mangaluwas unta ug makadangat sa tukmang kahibalo sa kamatuoran.”—1 Timoteo 2:3, 4.

Apan, aron makabenepisyo gikan sa mga saad sa Diyos kinahanglang masabtan nato ang papel ni Jesu-Kristo diha sa atong kaluwasan ug magpasundayag ug pagtuo kaniya. Si Jesus mismo miingon: “Gihigugma pag-ayo sa Diyos ang kalibotan nga gihatag niya  ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Nagpunting sa hinungdanong papel ni Jesu-Kristo niining butanga, si apostol Pedro miingon: “Walay kaluwasan diha kang bisan kinsa pang lain, kay walay laing ngalan ilalom sa langit nga gikahatag taliwala sa mga tawo nga pinaagi niini kita gayod maluwas.” (Buhat 4:12) Si apostol Pablo ug ang iyang kauban nga si Silas nag-awhag sa usa ka tawo nga sinserong nangutana: “Tumuo ka sa Ginoong Jesus ug ikaw maluwas, ikaw ug ang imong panimalay.”—Buhat 16:30, 31.

Oo, si Jesu-Kristo mao “ang Pangulong Ahente sa kinabuhi,” ug ang kaluwasan posible lamang pinaagi kaniya. (Buhat 3:15) Apan sa unsang paagi ang usa ka tawo nahimong usa ka hinungdanong persona sa pagluwas kanato? Ang pagkabaton ug tin-awng pagsabot sa iyang papel niining bahina angayng magpalig-on sa atong paglaom sa kaluwasan.

 [Picture Credit Lines sa panid 2]

Panid 3: Mga bombardero: USAF photo; gikuraw nga mga bata: UNITED NATIONS/J. FRAND; nasunog nga bapor de giyera: U.S. Navy photo