Mga Pangutana Gikan sa mga Magbabasa

Giunsa pagpasa sa halas sa tanaman sa Eden ngadto kang Eva ang ideya nga supakon ang balaod sa Diyos mahitungod sa kahoy sa kahibalo sa maayo ug sa daotan?

Ang Genesis 3:1 nag-ingon: “Karon ang halas mao ang labing mabinantayon sa tanang ihalas nga mananap sa kapatagan nga gibuhat ni Jehova nga Diyos. Busa kini miingon sa babaye: ‘Tinuod ba nga miingon ang Diyos nga dili gayod kamo makakaon gikan sa tanang kahoy sa tanaman?’” Dihay nagkadaiyang mga sugyot kon giunsa kaha pagkomunikar sa halas kang Eva. Ang usa ka ideya mao nga ang halas nakigkomunikar pinaagi sa lihok sa lawas o mga pagkompas. Pananglitan, ang Ingles nga klerigo nga si Joseph Benson mikomento: “Mopatim-aw nga lagmit kadto maoy pinaagig usa ka matang sa senyas. Sa pagkatinuod, ang pipila nagtuo nga ang katakos sa paghunahuna ug pagsulti maoy nailhang mga kinaiyahan sa mga halas kaniadto, . . . apan labot niini walay pamatuod.”

Apan, kon lihok sa lawas lang ang gamiton, sa unsang paagi ikakomunikar sa halas ngadto kang Eva ang ideya nga pinaagig pagkaon sa gidiling bunga siya mahimong sama sa Diyos, nga makahukom kon unsay maayo ug kon unsay daotan? Gawas pa, si Eva nakigkabildohay, nga nagtubag sa pangutana nga gipatungha sa halas. (Genesis 3:2-5) Ang opinyon nga ang halas nakigkomunikar pinaagig senyas o lihok sa lawas magpasabot nga si Eva mitubag pinaagig pagkompas, samtang ang Bibliya nag-ingon nga siya misulti.

Nga nagtumong niini nga hitabo, si apostol Pablo nagpasidaan sa mga isigka-Kristohanon: “Ako nahadlok nga sa unsa mang paagi, ingon nga ang halas nagdaldal kang Eva pinaagi sa lipatlipat niini, basin ug ang inyong kaisipan pagapahisalaagon.” Ang kapeligrohan nga gihisgotan ni Pablo naggikan sa “mini nga mga apostoles, malimbongong mga mamumuhat.” Ang hulga nga gipahinabo sa maong “maayong-laki nga mga apostoles” dili kay lihok ra sa lawas ug mga pagkompas. Lakip niini ang ilang sinultihan—ilang malipatlipatong mga pulong nga gisulti aron mahisalaag ang uban.—2 Corinto 11:3-5, 13.

Bisan pag ang katakos sa pagsulti maoy gigamit sa paglimbong kang Eva didto sa tanaman sa Eden, dili ikaingon nga ang literal nga halas dunay mga kuwerdas bokales. Kini wala gayod magkinahanglan niini. Sa dihang nakigsulti ang manulonda sa Diyos kang Balaam pinaagi sa usa ka asna, ang hayop wala magkinahanglan ug usa ka komplikadong voice box sama nianang sa usa ka tawo. (Numeros 22:26-31) Dayag nga sa dihang kining ‘amang nga mananap nga luwanan namulong sa tingog sa usa ka tawo,’ ang nagpaluyong gahom maoy gikan sa espiritung dominyo.—2 Pedro 2:16.

Ang espiritung linalang nga nagpaluyo sa halas nga nakig-estorya kang Eva giila sa Bibliya ingong “ang orihinal nga halas, ang usa nga gitawag Yawa ug Satanas.” (Pinadayag 12:9) Ang mga pulong nga nadungog ug gitubag ni Eva maoy pinaagi sa pag-aghat ni Satanas, kinsa “kanunayng naghimo sa iyang kaugalingon nga usa ka manulonda sa kahayag.”—2 Corinto 11:14.

[Hulagway sa panid 27]

“Kamo mahisama sa Diyos, nga mahibalo sa maayo ug sa daotan”