Unsaon Nimo Pag-atubang ang Pagkasalingkapaw?

DIHA sa tanaman sa Getsemane, giduol ni Judas Iskariote si Jesus ug “gihagkan siya nga mabination kaayo.” Kini maoy usa ka naandang pagpahayag sa mainitong pagbati. Apan ang gihimo ni Judas maoy pagpakaaron-ingnon lamang aron mailhan si Jesus niadtong mianha sa kagabhion sa pagdakop kaniya. (Mateo 26:48, 49) Si Judas maoy usa ka salingkapaw—usa ka tawo nga nagpakaaron-ingnon, usa ka tawo nga nagtago sa iyang daotang mga motibo luyo sa takoban sa pagkasinsero. Ang Gregong pulong nga gihubad ug “salingkapaw” nagkahulogang “usa nga motubag” ug nagpasabot usab ug usa ka artista sa entablado. Sa ulahi, ang pulong nagtumong kang bisan kinsa nga nagpakaaron-ingnon lang aron limbongan ang uban.

Unsay imong reaksiyon sa pagkasalingkapaw? Pananglitan, ikaw ba masuko sa dihang imong makita ang mga tiggamag sigarilyo nga nag-awhag sa pagpanigarilyo bisan pag dunay medikal nga pamatuod nga ang ilang produkto makadaot? Mapungot ka ba sa pagkasalingkapaw sa mga tig-atiman kinsa nagmaltratar niadtong gisalig kanila aron unta ilang atimanon? Nasakitan ka ba sa dihang ang imong gituohan nga usa ka tinuod nga higala napamatud-ang dili diay maunongon? Sa unsang paagi ang relihiyosong pagkasalingkapaw nag-apektar kanimo?

“Alaot Kamo . . . mga Salingkapaw!”

Tagda ang relihiyosong kahimtang nga naglungtad sa dihang si Jesus dinhi pa sa yuta. Ang mga eskriba ug mga Pariseo nagpakaaron-ingnon nga maunongong mga magtutudlo sa Balaod sa Diyos, apan ang tinuod ilang gipuno ang hunahuna sa mga tawo sa tawhanong mga pagtulon-an nga nagpahilayo sa ilang pagtagad sa Diyos. Ang mga eskriba ug mga Pariseo makutihong nag-insistir sa estriktong diwa sa balaod, apan ilang gibalewala ang paninugdang mga prinsipyo nga nagpabanaag sa gugma ug pagkamabination. Diha sa publiko sila nagpakaaron-ingnon nga debotado sa Diyos, apan diha sa pribado sila tugob sa pagkadaotan. Ang ilang mga buhat wala gayod mahiuyon sa ilang mga pulong. Ang ilang gibuhat gituyo “aron makita sa mga tawo.” Sila samag “pinaputi nga mga lubnganan, nga sa panggawas sa pagkatinuod matahom tan-awon apan sa sulod puno sa mga bukog sa patayng mga tawo ug sa tanang matang sa kahugawan.” Maisogong nagyagyag sa ilang pagkasalingkapaw, si Jesus sublisubli nga nagsulti kanila: “Alaot kamo, mga eskriba ug mga Pariseo, mga salingkapaw!”—Mateo 23:5, 13-31.

Kon ikaw nagkinabuhi niadtong mga panahona, sama sa bation sa ubang matinud-anog-kasingkasing nga mga tawo ikaw tingali mangil-aran gayod sa maong relihiyosong pagkasalingkapaw. (Roma 2:21-24; 2 Pedro 2:1-3) Apan tugotan kaha nimo ang pagkasalingkapaw sa mga eskriba ug mga Pariseo nga makapayugot kanimo sa punto nga imong isalikway ang tanang relihiyon, lakip nianang gitudlo ug gisubay ni Jesu-Kristo ug sa iyang mga tinun-an? Dili ba makadaot kana kanimo?

Tingali maglagot kita sa sinalingkapaw nga panggawi sa relihiyosong mga tawo maoy hinungdan nga talikdan nato ang relihiyon. Apan, kini nga sanong makapugong usab kanato nga makita ang pagkasinsero sa matuod nga mga magsisimba. Ang mismong mga babag nga atong gitukod agig panalipod batok sa pagkasalingkapaw, sa ingon, nakapahilayo kanato sa tinuod nga mga higala. Busa, ang atong sanong sa pagkasalingkapaw kinahanglang makataronganon ug timbang.

“Bukha Kanunay ang Inyong mga Mata”

Una, kinahanglang makakat-on kita sa pag-ila sa mga salingkapaw. Dili gayod kini sayon. Nakat-onan kini sa usa ka pamilya apan nagpahinabo kinig dakong kapildihan kanila. Ang inahan na-coma. Sa pagpasakag sumbong tungod sa sayop nga paagi sa pagtambal batok sa ospital diin kini  nahitabo, ang pamilya nagsuhol ug abogado nga usa usab ka magwawali diha sa lokal nga simbahan. Bisan pag mibayad ang ospital ug $3.4 milyones agig danyos, ang trahedya sa pamilya misamot. Ang inahan namatay nga kabos kaayo, ug walay kuwartang ikabayad aron ikapalubong kaniya. Ngano? Tungod kay gibulsa sa abogado ang dakong bahin sa kuwarta. Mahitungod niining maong abogado, ang usa ka mantalaan bahin sa balaod nag-ingon: “Kon siya nagsangyaw sa matang sa paggawi nga iyang gibuhat . . . , ang iyang mensahe mao kini: manglimbong kita.” Sa unsang paagi mapanalipdan nato ang atong kaugalingon batok sa ingon nianang mga tawhana?

“Bukha kanunay ang inyong mga mata,” mao kana ang tambag nga gihatag ni Jesus sa mga tawo sa iyang adlaw nga nag-atubang ug relihiyosong pagkasalingkapaw. (Mateo 16:6; Lucas 12:1) Oo, kinahanglang magbantay kita. Ang mga tawo magpahayag tingali sa labing hamili nga mga tuyo ug magpakitag pagkasinsero, apan kinahanglang magmabinantayon kita sa makataronganong paagi ug dili basta na lamang modawat dihadiha kang bisan kinsa. Dili ba maampingon natong susihon ang atong mga papel de bangko kon atong mahibal-an nga dunay naapod-apod nga mini nga mga kuwarta?

Ang mga salingkapaw mitungha bisan diha sa sulod sa matuod nga Kristohanong kongregasyon. Ang tinun-an nga si Judas nagpasidaan bahin kanila, nga nag-ingon: “Kini mao ang mga bato nga natago ilalom sa tubig diha sa inyong mga kombira sa gugma samtang sila nangombira uban kaninyo, mga magbalantay nga nagpakaon sa ilang kaugalingon nga walay kokahadlok; mga panganod nga walay-tubig nga gipadpad sa hangin; mga kahoy sa hinapos nga tinghunlak, apan walay bunga.”—Judas 12.

Ang ‘pagbuka kanunay sa atong mga mata’ nagkahulogan sa paglikay nga malimbongan sa usa ka tawo nga nagpakaaron-ingnon nga mahigugmaon apan sa pagkatinuod makikaugalingon ug nagpasiugdag mga opinyon nga dili pinasukad sa Pulong sa Diyos. Samag hait nga bato nga nahimutang sa mabaw nga bahin sa malinaw nga katubigan, kanang tawhana makapahinabog espirituwal nga pagkalunod sa dili-mabinantayon. (1 Timoteo 1:19) Ang salingkapaw tingali morag daghan ug ikahatag nga espirituwal nga pangpalagsik apan mapamatud-an nga usa diay ka “panganod nga walay-tubig”—walay ikahatag nga ulan. Sama sa kahoy nga walay bunga, ang maglilimbong dili mamungag tinuod nga Kristohanong bunga. (Mateo 7:15-20; Galacia 5:19-21) Oo, kinahanglan kitang magmaalisto batok sa maong mga manglilimbong. Apan, himoon nato kana nga dili magmaduhaduhaon sa mga motibo sa matag tawo.

“Hunong na sa Pagpanghukom”

Pagkasayon alang sa dili-hingpit nga mga tawo sa pagpunting sa mga kasaypanan sa ubang mga tawo samtang nagbalewala sa ilang kaugalingong mga sayop! Apan, kini nga kiling maghimo kanato nga daling madutlan sa pagkasalingkapaw. “Salingkapaw!” matod pa ni Jesus. “Kuhaa una ang salagunting gikan sa imong kaugalingong mata, ug unya makakita ka nga tin-aw kon unsaon sa pagkuha sa uhot gikan sa mata sa imong igsoon.” Mapuslanon kon atong sundon ang iyang tambag: “Hunong na sa pagpanghukom aron dili kamo pagahukman; kay sa hukom nga inyong ginahukom, kamo pagahukman . . . Nan, nganong tan-awon nimo ang uhot nga anaa sa mata sa imong igsoon, apan wala magtagad sa salagunting nga anaa sa imong kaugalingong mata?”—Mateo 7:1-5.

Kon ang uban dunay himoon usahay nga morag sinalingkapaw, kinahanglang mag-amping kita nga dili nato sila isipon dayon ingong mga salingkapaw. Pananglitan, si apostol Pedro “nagpalayo ug naglain sa iyang kaugalingon” gikan sa kaubang mga magtutuo nga Hentil sa Antioquia aron pahimut-an ang mga bisita nga may Hudiyohanong  mga kagikan nga gikan sa Jerusalem. Si Bernabe ‘nadala usab uban ni Pedro ug sa uban sa ilang pagpakaaron-ingnon.’ Gibuhat kini ni Pedro bisan pa sa kamatuoran nga nakapribilehiyo siya sa pagbukas sa dalan aron ang mga Hentil dawaton diha sa Kristohanong kongregasyon. (Galacia 2:11-14; Buhat 10:24-28, 34, 35) Apan kining wala tuyoang sala sa bahin ni Bernabe ug Pedro tino nga wala magbutang kanila sa samang kategoriya sa mga eskriba ug mga Pariseo o kang Judas Iskariote.

“Himoa nga Walay Pagkasalingkapaw ang Inyong Gugma”

“Sa dihang ikaw maghimog maayo sa ubang tawo,” mitambag si Jesus, “ayaw pagsuhol ug tigtrompeta nga mag-una kanimo—sama niadtong mga artista sa drama diha sa mga sinagoga ug kadalanan nga nanegurong dayegon sila sa mga tawo.” (Mateo 6:2, Phillips) “Himoa nga walay pagkasalingkapaw ang inyong gugma,” misulat si apostol Pablo. (Roma 12:9) Iyang gidasig ang batan-ong si Timoteo sa pagbaton ug “gugma gikan sa hinlong kasingkasing . . . ug gikan sa pagtuo nga walay pagkasalingkapaw.” (1 Timoteo 1:5) Kon ang atong gugma ug pagtuo tinuod—wala mamansahi sa kahakog ug pagpanglimbong—ang uban mosalig kanato. Kita mahimong tinubdan sa tinuod nga kusog ug kadasig niadtong anaa sa atong palibot. (Filipos 2:4; 1 Juan 3:17, 18; 4:20, 21) Ug labaw sa tanan, maangkon nato ang pag-uyon ni Jehova.

Ang pagkasalingkapaw, sa laing bahin, mapamatud-an sa ngadtongadto nga makapatay niadtong nagabuhat niini. Sa kataposan, ang pagkasalingkapaw mayagyag gayod. “Walay bisan unsa nga tinabonan nga dili mabuksan,” nag-ingon si Jesu-Kristo, “ug tinago nga dili mahibaloan.” (Mateo 10:26; Lucas 12:2) Ang maalamon nga si Haring Solomon nagpahayag: “Pagadad-on sa matuod nga Diyos ang tanang matang sa buhat ngadto sa paghukom maylabot sa tagsatagsa ka tinagong butang, maayo man kini o daotan.”—Ecclesiastes 12:14.

Sa kasamtangan, ngano mang tugotan nato ang pagkasalingkapaw sa uban nga mag-apektar kanato sa punto nga mahikawan kita sa tinuod nga gugma sa matuod nga mga higala? Mahimo kitang magmabinantayon nga dili mahimong sobra ka maduhaduhaon. Ug siyempre, maningkamot kita nga mahuptan ang atong gugma ug pagtuo nga walay lama sa pagkasalingkapaw.—Santiago 3:17; 1 Pedro 1:22.

[Mga hulagway sa panid 22, 23]

Tugotan kaha nimo ang pagkasalingkapaw sa mga eskriba ug mga Pariseo nga makapahilayo kanimo kang Jesu-Kristo ug sa iyang mga tinun-an?