Mga Pangutana Gikan sa mga Magbabasa

Ang sugo ba sa Diyos nga natala sa Jeremias 7:16 nagpasabot nga ang mga Kristohanon dili moampo bahin sa usa kinsa napalagpot gikan sa Kristohanong kongregasyon tungod kay siya dili-mahinulsolong makasasala?

Human mapakanaog ang iyang paghukom batok sa dili-matinumanong Juda, si Jehova miingon kang Jeremias: “Kon bahin kanimo, ayaw pag-ampo alang niini nga katawhan, ni magpatugbaw alang kanila ug usa ka mapangaliyupoong pagtuaw o usa ka pag-ampo ni mangamuyo kanako, kay ako dili mamati kanimo.”—Jeremias 7:16.

Nganong gidid-an man ni Jehova si Jeremias sa pag-ampo alang sa mga Israelinhon? Tin-aw, kadto maoy tungod sa ilang tinuyo nga paglapas sa iyang Balaod. Sa dayag ug makauulaw nga paagi, sila ‘nangawat, nagbuno ug nanapaw ug nanumpa nga binakak ug naghimog gipaaso nga halad kang Baal ug nagsunod sa ubang mga diyos.’ Busa, giingnan ni Jehova ang walay-pagtuong mga Hudiyo: “Papahawaon ko kamo gikan sa akong atubangan, ingon sa akong pagpapahawa sa tanan ninyong mga igsoon, ang tibuok nga kaliwat sa Epraim.” Tinong dili haom nga si Jeremias, o si bisan kinsa, moampo kang Jehova nga balihon ang Iyang paghukom.—Jeremias 7:9, 15.

Uyon niini, si apostol Juan misulat mahitungod sa angay nga pag-ampo ngadto sa Diyos. Una, gipasaligan niya ang mga Kristohanon: “Bisan unsay atong pangayoon sumala sa iyang kabubut-on, siya magpatalinghog kanato.” (1 Juan 5:14) Dayon, mahitungod sa pag-ampo alang sa kaayohan sa uban, si Juan mipadayon: “Kon adunay makakita sa iyang igsoon nga nakasala sa sala nga dili makamatay, siya mangamuyo, ug siya maghatag ug kinabuhi kaniya, oo, alang kanilang wala makasala sa paagi nga makamatay. Adunay sala nga makamatay. Labot nianang salaa nga ako wala magsulti kaniya nga mangamuyo.” (1 Juan 5:16) Si Jesus usab naghisgot ug sala nga ‘dili mapasaylo,’ nga mao, ang sala batok sa balaang espiritu.—Mateo 12:31, 32.

Nagpasabot ba kini nga ang tanang napalagpot  gikan sa Kristohanong kongregasyon tungod kay nakasala nga dili mahinulsolon nakahimog mga sala nga “makamatay” ug busa dili angayng moampo bahin kanila? Dili kanunayng ingon niini ang kahimtang tungod kay sa pipila ka hitabo ang maong mga kalapasan dili mga sala nga makamatay. Gani, lisod mahibaloan kon kana makamatay ba. Ang usa ka kasagarang pananglitan mao si Haring Manases sa Juda. Nagpatindog siyag mga halaran alang sa bakak nga mga diyos, naghalad sa iyang kaugalingong mga anak nga lalaki, nagbuhat sa espiritismo, ug nagbutang ug linilok nga mga larawan sa templo ni Jehova. Gani, ang Bibliya nag-ingon nga si Manases ug ang katawhan nagbuhat “kon unsay daotan nga labaw pa kay sa kanasoran nga gilaglag ni Jehova gikan sa atubangan sa mga anak sa Israel.” Tungod niining tanan, gisilotan ni Jehova si Manases pinaagi sa pagpadala kaniya ngadto sa Babilonya ingong binihag nga tinalikalaan.—2 Hari 21:1-9; 2 Cronicas 33:1-11.

Ang mga sala ba ni Manases, bisag grabe kaayo, mao ang matang nga makamatay? Dayag nga dili, tungod kay ang asoy nagpadayon sa pag-ingon bahin kaniya: “Sa diha gayod nga kini nagpahinabog kasakit kaniya, iyang gilukmay ang nawong ni Jehova nga iyang Diyos ug nagpadayon pagpaubos pag-ayo sa iyang kaugalingon tungod sa Diyos sa iyang mga katigulangan. Ug siya nagpadayon pag-ampo Kaniya, mao nga Siya mitugot nga pangaliyupoan niya ug Iyang gidungog ang iyang hangyo alang sa pabor ug gipasig-uli siya sa Jerusalem sa iyang pagkahari; ug naila ni Manases nga si Jehova mao ang matuod nga Diyos.”—2 Cronicas 33:12, 13.

Busa, dili kita magdalidali paghinapos nga ang usa ka tawo sad-an sa sala nga makamatay tungod lamang kay siya napalagpot gikan sa kongregasyon. Nagkinahanglan tingalig panahon aron mabutyag ang tinuod nga kahimtang sa kasingkasing sa maong indibiduwal. Gani, kasagarang giingon nga usa sa mga katuyoan sa pagpalagpot mao ang pagpaamgo sa nakasala sa iyang sayop ug gilaoman nga siya maghinulsol ug magbag-o.

Sanglit ang nakasala wala na sa kongregasyon, ang bisan unsang pagbag-o sa kasingkasing ug tinamdan unang mamatikdan niadtong suod kaniya, sama sa usa ka kapikas sa kaminyoon o sa mga membro sa pamilya. Kadtong nakamatikod sa maong mga kausaban mohinapos tingali nga ang nakasala wala makahimog sala nga makamatay. Mahimong matukmod sila sa pag-ampo nga makakuha siyag kusog gikan sa inspiradong Pulong sa Diyos ug nga molihok si Jehova alang sa nakasala uyon sa Iyang kabubut-on.—Salmo 44:21; Ecclesiastes 12:14.

Bisan tuod ang pipila mahimong anaa sa kahimtang nga makakita ug igong pamatuod aron makatuo nga ang nakasala naghinulsol na, tingali dili kini makita sa kongregasyon sa katibuk-an. Sila maglibog, matugaw, o mapandol pa gani kon makabati sila nga dunay nag-ampo sa publiko bahin sa usa nga nakasala. Tungod niini, kadtong matukmod sa pag-ampo bahin sa nakasala angayng mohimo niini sa pribado lamang, nga magtugyan sa bisan unsang dugang kalamboan diha sa mga kamot sa takos nga mga ansiyano sa kongregasyon.

[Hulagway sa panid 31]

Gipasaylo ang grabeng mga sala ni Manases sa dihang nagpaubos siya sa atubangan ni Jehova

[Picture Credit Line sa panid 30]

Reproduced from Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s