Mga Magmamantala sa Gingharian Nagtaho

“Sayop ang Imong Nadayal nga Numero”

SA Johannesburg, Habagatang Aprika, si Leslie ug Caroline nagturnoturno sa pagsangyaw pinaagi sa telepono ngadto sa mga tawo nga nagpuyo sa usa ka komunidad sa mga retirado nga guwardiyado kaayo ug ganghaan. Pipila lang ang naa sa balay ug diyutay ra ang interes nga gipakita nganha sa ilang Kristohanong mensahe, busa nadasig si Caroline sa dihang mitubag ang usa ka babaye.

“Si Gng. B—ba kini?” nangutana si Caroline.

“Dili,” miingon ang usa ka mahigalaong tingog, “Ako si Gng. G—. Sayop ang imong nadayal nga numero.”

Kay namatikdan ang kamainiton sa iyang tingog, si Caroline miingon: “Buweno, pasaysaya ko sa akong gustong isulti kang Gng. B—.” Dayon naghisgot siya bahin sa mga panalangin sa nagsingabot nga Gingharian sa Diyos. Human mahimo ang mga kahikayan sa paghatod sa brosyur nga Unsay Gikinahanglan sa Diyos Kanato?, si Gng. G—nangutana: “Lain pay ato, unsay inyong relihiyon?”

“Mga Saksi ni Jehova mi,” mitubag si Caroline.

“A, dili ko anang relihiyona! Dili ko gustong makigkita nimo.”

“Apan Gng. G—,” mihangyo si Caroline, “sa milabayng 20 minutos, akong gipaambit kanimo ang kinanindotan nga paglaom, nga nagpunting gikan sa Bibliya kon unsay buhaton sa Gingharian sa Diyos sa dili madugay alang sa katawhan. Nalipay kaayo ka sa pagkadungog niining mga butanga—nahinam pa gani—ug gustong mahibalo ug dugang pa. Unsa ba gayoy imong nahibaloan bahin sa mga Saksi ni Jehova? Kon masakit ka, moadto ka ba sa mekaniko? Nganong dili ko nimo tugotan sa pag-asoy kon unsay gituohan sa mga Saksi ni Jehova?”

Human sa makadiyot nga kahilom mitubag ang babaye: “Sa hunahuna ko husto ka. Mas maayong moanhi ka. Pero gusto kong masabtan nimo nga dili gayod nimo ako makombertir!”

“Gng. G—, dili gayod ako makakombertir nimo bisan pag gusto nako,” mitubag si Caroline. “Si Jehova lamang ang makahimo niana.”

Ang pagduaw aron sa paghatod ug brosyur milampos, ug si Gng. G— (Betty) miuyon nga duawon pag-usab. Pagbalik ni Caroline, miingon si Betty nga iyang gisuginlan ang mga babaye diha sa iyang talad-kan-anan nga siya nakighisgot uban sa mga Saksi ni Jehova. “Ngano god intawong gihimo mo man kana?” sila nangutana, nga ang aksiyon sa ilang mga kamot nagpakitang wala silay mahimo kon maoy iyang gusto. “Kanang mga tawhana dili gani motuo kang Jesus!”

Gipahinumdoman dayon ni Caroline si Betty sa usa ka pangunang punto gikan sa ilang miaging panaghisgot bahin sa Gingharian sa Diyos.

“Kinsa ganiy mahimong Hari?” misukna si Caroline.

“Aw, si Jesus,” mitubag si Betty.

“Siyempre,” miingon si Caroline. Dayon mipadayon siya pagsaysay nga ang mga Saksi ni Jehova nagtuo nga si Jesus maoy Anak sa Diyos, apan dili siya katupong sa Diyos ingong bahin sa usa ka Trinidad.—Marcos 13:32; Lucas 22:42; Juan 14:28.

Human sa pipila pa ka mga pagduaw, nadayag nga bisan tuod siya may positibo, malipayon nga espiritu, si Betty nag-antos sa dili-maayong panglawas. Gani, may kanser siya ug nahadlok nga mamatay. “Maayo untag nadungog na nako kining mga butanga katuigan kanhi ug naghupot ug pagtuo nga sama kaninyo,” siya misugid. Gihupay siya ni Caroline pinaagi sa pagpakita kaniya sa mga teksto nga naghubit sa kamatayon ingong hinanok nga pagkatulog nga gikan niana ang usa mahimong mobangon sa pagkabanhaw. (Juan 11:11, 25) Nadasig kaayo niini si Betty, kinsa nagpahimulos karon sa usa ka regular nga pagtuon sa Bibliya. Ang iyang nagkagrabeng sakit lamang ang nagpugong kaniya sa pagtambong sa mga tigom sa Kingdom Hall.

Miingon si Caroline: “Dayag nga ang mga manulonda nagtultol niining buluhatona. Ang numero sa telepono ni Betty ‘nasaypan pagdayal,’ ug tiaw mo kana, siya 89 anyos na!”—Pinadayag 14:6.