Ugmara ang Imong Kasingkasing sa Pagkahadlok Kang Jehova

“Kon ugmaron lang unta nila ang ilang kasingkasing sa pagkahadlok kanako ug sa pagtuman kanunay sa tanan kong kasugoan.”—DEUTERONOMIO 5:29.

1. Sa unsang paagi makaseguro kita nga moabot ra ang adlaw nga ang mga tawo makatagamtam ug kagawasan gikan sa kahadlok?

 ANG katawhan kanunayng gitugaw sa kahadlok sulod sa daghang siglo. Ang kahadlok sa gutom, sakit, krimen, o gubat kanunayng nakapabalaka sa milyonmilyong tawo. Tungod niini ang pasiuna sa Tibuok-Kalibotang Deklarasyon sa Tawhanong mga Katungod nagpahayag sa tinguha sa pagpatungha ug usa ka kalibotan diin ang tanang tawo makatagamtam ug kagawasan gikan sa kahadlok. a Ikalipay, ang Diyos mismo nagpasalig kanato nga ang ingon niana nga kalibotan moabot—apan dili pinaagi sa tawhanong mga paningkamot. Pinaagi sa iyang manalagnang si Miqueas, si Jehova nagsaad kanato nga sa iyang bag-ong kalibotan sa pagkamatarong, ‘walay magpakurog sa iyang katawhan.’—Miqueas 4:4.

2. (a) Sa unsang paagi giawhag kita sa Kasulatan sa pagkahadlok sa Diyos? (b) Unsang mga pangutana ang mahimong motungha sa dihang palandongon nato ang atong obligasyon sa pagkahadlok sa Diyos?

² Sa laing bahin, ang kahadlok mahimo usab nga usa ka positibong puwersa. Sa Kasulatan, ang mga alagad sa Diyos sublisubling giawhag nga mahadlok kang Jehova. Giingnan ni Moises ang mga Israelinhon: “Kahadloki si Jehova nga imong Diyos, ug kaniya ka mag-alagad.” (Deuteronomio 6:13) Kasiglohan sa ulahi si Solomon misulat: “Kahadloki ang matuod nga Diyos ug tumana ang iyang mga sugo. Kay kini mao ang tibuok nga obligasyon sa tawo.” (Ecclesiastes 12:13) Pinaagi sa atong buluhatong pagsangyaw, nga gituman ilalom sa pagdumala sa mga manulonda, kita nag-awhag usab sa tanang tawo nga ‘kahadlokan ang Diyos ug ihatag kaniya ang himaya.’ (Pinadayag 14:6, 7) Dugang pa sa pagkahadlok kang Jehova, ang mga Kristohanon angay nga mahigugma kaniya uban sa tibuok nilang kasingkasing. (Mateo 22:37, 38) Sa unsang paagi kita mahigugma sa Diyos ug sa samang panahon mahadlok kaniya? Nganong kinahanglan mang mahadlok sa usa ka mahigugmaon nga Diyos? Unsang mga benepisyo ang atong makuha gikan sa pag-ugmad sa diyosnong kahadlok? Aron matubag kining mga pangutanaha, kinahanglang masabtan una nato kon unsay kahulogan sa pagkahadlok sa Diyos ug kon sa unsang paagi kining matanga sa kahadlok mahimong hinungdanong bahin sa atong relasyon kang Jehova.

Kahingangha, Kataha, ug Kahadlok

3. Unsay kahulogan sa pagkahadlok sa Diyos?

³ Ang pagkahadlok sa Diyos maoy usa ka pagbati nga angayng batonan sa mga Kristohanon alang sa ilang Magbubuhat. Ang usa ka kahubitan niining matanga sa kahadlok maoy “kahingangha ug dakong kataha alang sa Maglalalang ug maayong matang sa kahadlok nga dili makapahimuot kaniya.” Busa, ang pagkahadlok sa Diyos mag-impluwensiya sa duha ka hinungdanong mga bahin sa atong kinabuhi: atong tinamdan sa Diyos ug atong tinamdan sa panggawi nga iyang gidumtan. Dayag, ang duha ka bahin hinungdanon ug takos sa mainampingong pagpamalandong. Sumala sa gipunting sa Vine’s Expository Dictionary of New Testament Words, alang sa mga Kristohanon kining matahaong kahadlok maoy ‘nagkontrolar nga motibo sa kinabuhi, sa mga butang may kalabotan sa espirituwal ug moral.’

4. Sa unsang paagi maugmad nato ang kahingangha ug kataha alang sa atong Maglalalang?

⁴ Sa unsang paagi maugmad nato ang kahingangha ug kataha alang sa atong Maglalalang? Kita mobatig kahingangha sa dihang atong makita ang usa ka matahom nga talan-awon, usa ka dakong busay, o usa ka maanindot kaayong pagsalop sa adlaw. Kining pagbatia mosamot sa dihang makita nato, pinaagi sa mga mata sa pagtuo,  ang kamot sa Diyos luyo nianang mga buhat sa paglalang. Dugang pa, sama kang Haring David, atong maamgohan ang atong kaugalingong pagkawalay-bili kon itandi sa makapahinganghang linalang ni Jehova. “Sa dihang makakita ako sa imong mga langit, ang mga buhat sa imong mga tudlo, sa bulan ug sa mga bituon nga imong giandam, unsa ba ang may-kamatayong tawo nga ikaw nagahunahuna man kaniya?” (Salmo 8:3, 4) Kining dakong kahingangha motultol ngadto sa kataha, nga mopalihok kanato sa pagpasalamat ug pagdayeg kang Jehova tungod sa tanang gihimo niya alang kanato. Si David misulat usab: “Pagadayegon ko ikaw tungod kay sa makalilisang nga paagi ako katingalahan nga pagkabuhat. Ang imong mga buhat katingalahan, ingon sa nasayran pag-ayo sa akong kalag.”—Salmo 139:14.

5. Nganong angay kitang mahadlok kang Jehova, ug unsang maayong panig-ingnan ang nabatonan nato niining bahina?

⁵ Ang kahingangha ug kataha magpatungha ug maayong matang ug matinahorong kahadlok sa gahom sa Diyos ingong Maglalalang ug sa iyang awtoridad ingong angayan nga Magmamando sa uniberso. Sa usa ka panan-awon nga nakita ni apostol Juan, “kadtong nagmadaogon batok sa mapintas nga mananap ug sa iyang larawan”—ang dinihogang mga sumusunod ni Kristo diha sa ilang langitnong posisyon—nagmantala: “Dako ug katingalahan ang imong mga buhat, Jehova nga Diyos, ang Labing Gamhanan. Matarong ug matuod ang imong mga dalan, Hari nga walay kataposan. Kinsa bay dili mahadlok kanimo, Jehova, ug dili maghimaya sa imong ngalan.” (Pinadayag 15:2-4) Ang pagkahadlok sa Diyos, nga naggikan sa dakong kataha tungod sa iyang kahalangdon, motutol niining kaubang mga magmamando ni Kristo sa langitnong Gingharian sa pagpasidungog sa Diyos ingong supremong awtoridad. Sa dihang palandongon nato ang tanang napalampos ni Jehova ug ang matarong nga paagi nga siya nagmando sa uniberso, dili ba daghan kitag katarongan nga mahadlok kaniya?—Salmo 2:11; Jeremias 10:7.

6. Nganong angay kitang makabaton ug maayong matang sa kahadlok nga dili-makapahimuot kang Jehova?

⁶ Apan, dugang pa sa kahingangha ug kataha, ang pagkahadlok sa Diyos kinahanglang maglakip sa maayong matang sa kahadlok nga dili-makapahimuot kaniya o mahimong masinupakon kaniya. Ngano? Tungod kay bisan pag si Jehova “mahinay sa kasuko ug dagaya sa mahigugmaong-kalulot,” angay natong hinumdoman nga siya “dili gayod magpahigawas gikan sa silot.” (Exodo 34:6, 7) Bisan tuod mahigugmaon ug maluluy-on, si Jehova dili  mokonsentir sa pagkadili-matarong ug tinuyong pagbuhat ug daotan. (Salmo 5:4, 5; Habacuc 1:13) Kadtong tinuyo ug dili-mahinulsolon nga nagabuhat kon unsay daotan sa mga mata ni Jehova ug nagsupak kaniya dili mahigawas sa silot. Sumala sa giingon ni apostol Pablo, “makahahadlok nga mahulog ngadto sa mga kamot sa buhing Diyos.” Ang pagbaton ug maayong matang sa kahadlok nga mahulog sa maong situwasyon mao gayoy proteksiyon alang kanato.—Hebreohanon 10:31.

‘Kaniya Mohawid Kamo’

7. Unsay atong mga katarongan sa pagsalig sa nagaluwas nga gahom ni Jehova?

⁷ Ang matahaong pagkahadlok sa Diyos ug ang dulot nga pagkaamgo sa iyang makalilisang nga gahom maoy mga sukaranan sa pagsalig ug kompiyansa kang Jehova. Sama ra nga ang usa ka gamayng bata mobating gipanalipdan sa dihang anaa sa duol ang iyang amahan, kita usab mobating luwas ug masaligon ilalom sa nagagiyang kamot ni Jehova. Matikdi kon unsay reaksiyon sa mga Israelinhon human sila pagulaa ni Jehova sa Ehipto: “Nakita usab sa Israel ang dakong kamot nga gipalihok ni Jehova batok sa mga Ehiptohanon; ug ang katawhan nangahadlok kang Jehova ug nagbutang ug pagtuo kang Jehova.” (Exodo 14:31) Ang kasinatian ni Eliseo nagpamatuod usab sa kamatuoran nga “ang manulonda ni Jehova nagkampo libot niadtong nangahadlok kaniya, ug siya nagluwas kanila.” (Salmo 34:7; 2 Hari 6:15-17) Ang modernong adlaw nga kasaysayan sa katawhan ni Jehova ug lagmit ang atong kaugalingong personal nga kasinatian magpamatuod nga ang Diyos nagpasundayag gayod sa iyang gahom alang sa kaayohan niadtong nag-alagad kaniya. (2 Cronicas 16:9) Busa masabtan nato nga “sa pagkahadlok kang Jehova adunay lig-on nga pagsalig.”—Proverbio 14:26.

8. (a) Nganong ang pagkahadlok sa Diyos motukmod kanato sa paglakaw diha sa iyang mga dalan? (b) Ipatin-aw kon sa unsang paagi kita angayng ‘mohawid’ kang Jehova.

⁸ Ang maayong matang sa pagkahadlok sa Diyos dili lamang magpatunghag pagsalig ug kompiyansa kaniya kondili magpalihok usab kanato sa paglakaw diha sa iyang mga dalan. Sa dihang giinagurahan ni Solomon ang templo, siya miampo kang Jehova: ‘Hinaot nga ang Israel mahadlok kanimo pinaagi sa paglakaw diha sa imong mga dalan sa tanang adlaw nga sila buhi ibabaw sa nawong sa yuta nga imong gihatag sa among mga katigulangan.’ (2 Cronicas 6:31) Sayosayo pa, giawhag ni Moises ang mga Israelinhon: ‘Magalakaw kamo sunod kang Jehova nga inyong Diyos, ug kaniya mangahadlok kamo, ug tumana ninyo ang iyang kasugoan, ug pamati kamo sa iyang tingog, ug kaniya magaalagad kamo, ug kaniya mohawid kamo.’ (Deuteronomio 13:4) Sumala sa tin-awng gipakita niining mga bersikuloha, ang tinguha nga molakaw diha sa mga dalan ni Jehova ug ‘mohawid’ kaniya naggikan sa pagsalig ug kompiyansa sa Diyos. Oo, ang diyosnong kahadlok motultol kanato sa pagsugot kang Jehova, pag-alagad kaniya, ug paghawid kaniya, sama ra nga ang usa ka gamayng bata literal tingali nga mohawid sa iyang amahan kang kinsa siya adunay bug-os nga pagsalig ug kompiyansa.—Salmo 63:8; Isaias 41:13.

Ang Paghigugma sa Diyos Maoy Pagkahadlok Kaniya

9. Unsay kalambigitan sa paghigugma sa Diyos ug pagkahadlok sa Diyos?

⁹ Gikan sa panglantaw sa Kasulatan, ang pagkahadlok sa Diyos sa bisan unsang paagi dili magpugong sa paghigugma kaniya. Sa kasukwahi, ang mga Israelinhon gisugo sa ‘pagkahadlok kang Jehova . . . paglakaw diha sa tanan niyang mga dalan ug paghigugma kaniya.’ (Deuteronomio 10:12) Busa, ang pagkahadlok sa Diyos ug paghigugma sa Diyos nalambigit pag-ayo. Ang pagkahadlok sa Diyos mopalihok kanato sa paglakaw diha sa iyang mga dalan, ug kini sa baylo naghatag ug pamatuod sa atong gugma alang kaniya. (1 Juan 5:3) Makataronganon kini tungod kay kon mahigugma kita sa usa ka tawo, angayng mahadlok gayod kita nga masakitan siya. Ang mga Israelinhon nakapasakit kang Jehova pinaagi sa ilang rebelyosong dalan diha sa kamingawan. Tino nga dili nato gustong mobuhat ug bisan unsa nga makapaguol sa atong langitnong Amahan. (Salmo 78:40, 41) Sa laing bahin, tungod kay “si Jehova nagakalipay niadtong nahadlok kaniya,” ang atong pagsugot ug pagkamatinumanon makapalipay sa iyang kasingkasing. (Salmo 147:11; Proverbio 27:11) Ang paghigugma sa Diyos mopalihok kanato sa pagpahimuot kaniya, ug ang pagkahadlok sa Diyos mopugong kanato sa pagpasakit kaniya. Kini maoy magkatimbang, dili magkasukwahi, nga mga hiyas.

10. Sa unsang paagi gipakita ni Jesus nga nahimuot siya sa pagkahadlok kang Jehova?

¹⁰ Ang dalan sa kinabuhi ni Jesu-Kristo tin-awng nag-ilustrar kon sa unsang paagi kita mahigugma ug mahadlok sa Diyos sa samang panahon. Bahin kang Jesus ang manalagnang si Isaias misulat: “Ang espiritu ni Jehova mopahiluna kaniya, ang espiritu sa kaalam ug sa pagsabot, ang espiritu sa tambag  ug sa pagkagamhanan, ang espiritu sa kahibalo ug sa pagkahadlok kang Jehova; ug siya magkalipay diha sa pagkahadlok kang Jehova.” (Isaias 11:2, 3) Sumala niining tagnaa, ang espiritu sa Diyos nagpalihok kang Jesus sa pagkahadlok sa iyang langitnong Amahan. Dugang pa, atong namatikdan nga kining maong kahadlok, inay kay mapig-oton, maoy tuboran sa katagbawan. Si Jesus nakakaplag ug kahimuot sa pagtuman sa kabubut-on sa Diyos ug sa pagpahimuot sa kaniya, bisan sa kinalisdang mga sirkumstansiya. Sa dihang nag-atubang sa nagsingabot nga kamatayon diha sa sakitanang estaka, giingnan niya si Jehova: “Dili sumala sa akong pagbuot, kondili sumala sa imong pagbuot.” (Mateo 26:39) Tungod niining diyosnong kahadlok, si Jehova namati nga may pag-uyon sa mga pangamuyo sa iyang Anak, nagpalig-on kaniya, ug nagluwas kaniya gikan sa kamatayon.—Hebreohanon 5:7.

Pagkat-on sa Pagkahadlok Kang Jehova

11, 12. (a) Nganong angay natong makat-onan ang pagkahadlok sa Diyos? (b) Sa unsang paagi gitudloan kita ni Jesus sa pagkahadlok kang Jehova?

¹¹ Dili sama sa kinaiyanhong kahingangha nga atong bation sa dihang mag-atubang sa gahom ug kaanindot sa kinaiyahan, ang pagkahadlok sa Diyos dili awtomatikong bation nato. Mao nga ang mas Dakong David, si Jesu-Kristo, matagnaong nagdapit kanato: “Umari kamo, mga anak, pamati kanako; ang pagkahadlok kang Jehova maoy itudlo ko kaninyo.” (Salmo 34:11) Sa unsang paagi makat-onan nato kang Jesus ang pagkahadlok kang Jehova?

¹² Gitudloan kita ni Jesus sa pagkahadlok kang Jehova pinaagi sa pagtabang kanato nga makasabot sa kahibulongang personalidad sa atong langitnong Amahan. (Juan 1:18) Ang kaugalingong panig-ingnan ni Jesus nagpadayag kon sa unsang paagi ang Diyos naghunahuna ug kon sa unsang paagi siya nakiglabot sa uban, kay si Jesus hingpit nga nagsumbalik-silaw sa personalidad sa iyang Amahan. (Juan 14:9, 10) Dugang pa, pinaagi sa halad ni Jesus, makaduol kita kang Jehova sa dihang kita mag-ampo alang sa kapasayloan sa atong mga sala. Kining talagsaong pagpahayag sa kaluoy sa Diyos maoy puwersadong panukmod nga mahadlok kaniya. Ang salmista misulat: “Ang matuod nga pagpasaylo anaa kanimo, aron nga ikaw kahadlokan.”—Salmo 130:4.

13. Unsang mga lakang nga gilatid diha sa basahon sa Proverbio ang motabang kanato nga mahadlok kang Jehova?

¹³ Ang basahon sa Proverbio naglatid ug sunodsunod nga mga lakang nga makapaarang kanato sa pag-ugmad ug diyosnong kahadlok. “Anak ko, kon dawaton mo ang akong mga pulong ug tipigan mo ang akong mga sugo diha kanimo, aron sa paghatag ug pagtagad sa kaalam pinaagi sa imong igdulungog, aron ikiling mo ang imong kasingkasing sa katakos sa pag-ila; dugang pa, kon ikaw magasangpit sa pagsabot ug ikaw magapatugbaw sa imong tingog alang sa katakos sa pag-ila, . . . nan imong masabtan ang pagkahadlok kang Jehova, ug imong makaplagan ang mismong kahibalo sa Diyos.” (Proverbio 2:1-5) Busa, aron mobatig pagkahadlok sa Diyos kinahanglan kitang magtuon sa iyang Pulong, kinasingkasing nga maningkamot sa pagsabot sa gitudlo niini, ug dayon mamati pag-ayo sa tambag niini.

14. Sa unsang paagi masunod nato ang tambag nga gihatag ngadto sa mga hari sa Israel?

¹⁴ Ang matag hari sa karaang Israel gisugo nga maghimog kopya sa Balaod ug ‘basahon kana sa tanang adlaw sa iyang kinabuhi, aron siya makakat-on sa pagkahadlok kang Jehova nga iyang Diyos aron sa pagtuman sa tanang pulong sa balaod.’ (Deuteronomio 17:18, 19) Ang pagbasa ug pagtuon sa Bibliya hinungdanon usab kanato kon gusto natong makat-onan ang pagkahadlok kang Jehova. Samtang ipadapat nato ang mga prinsipyo sa Bibliya diha sa atong kinabuhi, kita inanay nga makabaton  ug diyosnong kaalam ug kahibalo. Atong “masabtan ang pagkahadlok kang Jehova” tungod kay makita nato ang maayong mga resulta nga ipatungha niini diha sa atong kinabuhi, ug atong gipabilhan ang atong relasyon uban sa Diyos. Dugang pa, pinaagi sa pagtigom nga regular uban sa atong mga isigkamagtutuo, ang mga bata ug tigulang makapamati sa ginatudlo sa Diyos, makakat-on sa pagkahadlok sa Diyos, ug makalakaw diha sa iyang mga dalan.—Deuteronomio 31:12.

Malipayon ang Tanan nga Nahadlok Kang Jehova

15. Sa unsang mga paagi nga ang pagkahadlok sa Diyos nalangkit sa atong pagsimba kaniya?

¹⁵ Sa nahisgotan na, masabtan nato nga ang pagkahadlok sa Diyos maoy maayong matang sa tinamdan nga angayng ugmaron natong tanan, tungod kay kini maoy usa ka hinungdanong bahin sa atong pagsimba kang Jehova. Tultolan kita niini sa pagsalig kaniya sa bug-os, sa paglakaw diha sa iyang mga dalan, ug sa paghawid kaniya. Sama sa kahimtang ni Jesu-Kristo, ang pagkahadlok sa Diyos magtukmod usab kanato sa pagtuman sa atong pahinungod karon ug hangtod sa kahangtoran.

16. Nganong gidasig kita ni Jehova nga mahadlok kaniya?

¹⁶ Ang pagkahadlok sa Diyos dili gayod daotan o hilabihan ka mapig-oton. “Malipayon ang matag usa nga nahadlok kang Jehova, nga nagalakaw sa iyang mga dalan,” gipasaligan kita sa Bibliya. (Salmo 128:1) Gidasig kita ni Jehova nga mahadlok kaniya tungod kay nahibalo siya nga kining hiyasa manalipod kanato. Mamatikdan nato ang iyang mahigugmaong kabalaka diha sa iyang gisulti kang Moises: “Kon ugmaron lang unta nila [ang mga Israelinhon] ang ilang kasingkasing sa pagkahadlok kanako ug sa pagtuman kanunay sa tanan kong kasugoan, aron maayo ang ilang dangatan ug sa ilang mga anak hangtod sa panahong walay tino!”—Deuteronomio 5:29.

17. (a) Unsang mga benepisyo ang atong makuha gikan sa pagkahadlok sa Diyos? (b) Unsang mga bahin sa diyosnong kahadlok ang konsiderahon sa mosunod nga artikulo?

¹⁷ Sa susama, kon ugmaron nato ang atong kasingkasing sa pagkahadlok sa Diyos, maayo ang atong dangatan. Sa unsang mga paagi? Una sa tanan, ang maong tinamdan makapahimuot sa Diyos ug makapasuod kanato ngadto kaniya. Si David nahibalo gikan sa personal nga kasinatian nga “pagatumanon niya ang tinguha niadtong nahadlok kaniya, ug ang ilang pagtuaw alang sa tabang iyang pagadunggon, ug siya magaluwas kanila.” (Salmo 145:19) Ikaduha, ang diyosnong kahadlok makabenepisyo kanato tungod kay mag-impluwensiya kini sa atong tinamdan sa kon unsay daotan. (Proverbio 3:7) Susihon sa mosunod nga artikulo kon sa unsang paagi kining maong kahadlok manalipod kanato batok sa espirituwal nga kapeligrohan, ug repasohon niini ang pipila ka Kasulatanhong mga panig-ingnan sa mga tawo nga nahadlok sa Diyos ug mitalikod sa buhat nga daotan.

[Footnote]

Matubag ba Nimo ang Mosunod?

• Unsay kahulogan sa pagkahadlok sa Diyos, ug sa unsang paagi kini mag-impluwensiya kanato?

• Unsay kalambigitan sa pagkahadlok sa Diyos ug paglakaw uban sa Diyos?

• Sa unsang paagi ang panig-ingnan ni Jesus nagpakita nga ang pagkahadlok sa Diyos nalangkit sa paghigugma sa Diyos?

• Sa unsang mga paagi maugmad nato ang atong kasingkasing sa pagkahadlok kang Jehova?

[Mga Pangutana sa Pagtuon]

[Hulagway sa panid 17]

Ang mga hari sa Israel gisugo sa paghimog personal nga kopya sa Balaod ug basahon kana adlaw-adlaw

[Hulagway sa panid 18]

Ang pagkahadlok kang Jehova motultol kanato sa pagsalig kaniya sama sa pagsalig sa usa ka anak sa iyang amahan

[Picture Credit Line sa panid 15]

Stars: Photo by Malin, © IAC/RGO 1991