Ang Usa ka Andam nga Espiritu Nagtukmod sa mga Tawo sa Pagtungha sa Gilead

ANG Watchtower Bible School of Gilead naglungtad aron mabansay ang dedikadong mga lalaki ug babaye alang sa langyawng misyonaryong pag-alagad. Kinsay mahimong motungha sa Gilead? Kadtong adunay andam nga espiritu. (Salmo 110:3) Dayag kaayo kana niadtong Septiyembre 8, 2001, sa dihang ang ika-111 nga klase migraduwar.

Ang ubang mga estudyante nianang klaseha kinabubut-on nang mibiya sa pamilya, mga higala, ug yutang natawhan sa pag-alagad diin dako ang panginahanglan. Sa pagbuhat niana, ilang gisulayan ang ilang kaugalingon kon makapasibo ba sila sa pagkinabuhi diha sa medyo lahi nga palibot. Pananglitan, si Richer ug Nathalie naghikay sa ilang mga kalihokan aron mobalhin sa Bolivia, si Todd ug Michelle ngadto sa Dominican Republic, ug si David ug Monique ngadto sa usa ka nasod sa Asia aron sa pagwali sa maayong balita sa Gingharian sa Diyos. Ang ubang mga estudyante nag-alagad na sa Nicaragua, Ecuador, ug Albania.

Si Christy nadasig sa pagtuon ug Kinatsila samtang hayskul pa, nga nakatabang sa pag-andam kaniya sa pag-estar ug duha ka tuig sa Ecuador una pa maminyo. Ang uban mianib sa mga kongregasyon nga langyaw ug pinulongan diha sa ilang kaugalingong mga nasod. Nag-atubang sa lahi nga hagit, si Saul ug Priscilla nagpasundayag ug andam nga espiritu pinaagi sa pagpaningkamot sa pagpaarang-arang sa ilang pagsultig Iningles una pa moadto sa tunghaan.

Ang 20 ka semana nga misyonaryong pagbansay dali rang milabay. Miabot na ang adlaw sa graduwasyon, ug ang mga estudyante kauban na sa mga higala ug pamilya, nga namati sa maalamong tambag ug makapadasig nga mga panamilit.

Ang tsirman sa programa mao si Theodore Jaracz, usa ka graduwado sa ikapitong klase sa Tunghaang Gilead, kinsa nag-alagad karon ingong membro sa Nagamandong Lawas sa mga Saksi ni Jehova. Ang iyang pangbukas nga mga komento nagpasiugda sa kamatuoran nga ingong usa ka organisasyon, wala gayod kita motipas gikan sa tumong sa pagbansay ug mga estudyante sa Gilead, nga mao ang pagwali sa maayong balita sa Gingharian sa tibuok gipuy-ang yuta. (Marcos 13:10) Ang Gilead nagsangkap sa kuwalipikadong mga estudyante sa pagpadayon niining kalihokang pagwali sa mas dakong sukod kay sa ilang gihimo sa nangagi ug diha sa mga dapit sa kalibotan diin ang nabansay nga mga misyonaryo ilabinang gikinahanglan. Si Brader Jaracz nag-awhag sa mga estudyante sa pagpahimulos sa ilang pagbansay sa Gilead samtang sila moduyog na sa mga misyonaryo nga nag-alagad sa pagkakaron sa 19 ka nasod diin gipadala ang mga graduwado.

Tukma-sa-Panahong Tambag Alang Niadtong Migraduwar

Misunod ang serye sa mga pakigpulong. Si William Van De Wall, usa ka membro sa Komite sa Sanga sa Tinipong Bansa, nagpakigpulong bahin sa ulohang “Misyonaryong Kasibot—Usa ka Timaan sa Matuod nga mga Kristohanon.” Gipunting niya ang pagtagad diha sa sugo nga “paghimog mga tinun-an,” nga nasulat sa Mateo 28:19, 20, ug gitambagan niya ang mga estudyante: “Sundoga si Jesus, kinsa nagtuman sa iyang misyonaryong asaynment uban ang kasibot ug kadasig.” Aron matabangan ang umaabot nga mga misyonaryo nga mahuptan kanunay ang ilang kasibot alang sa misyonaryong buluhaton, gidasig niya sila: “Sunda ang usa ka praktikal nga eskedyul; hupti ang maayong  mga batasan sa personal nga pagtuon, nga gamiton ang kinabag-ohang teokratikanhon nga mga termino; ug kanunayng isentro ang pagtagad sa mga katarongan kon nganong anaa kamo sa inyong asaynment.”

Ang sunod diha sa programa mao si Guy Pierce, usa ka membro sa Nagamandong Lawas. Gitagik niya ang temang “Padayong Ugmara ang ‘Imong Gahom sa Pagpangatarongan.’” (Roma 12:1) Naghatag siya ug praktikal nga tambag ngadto sa migraduwar nga klase, nga nagdasig kanila sa paggamit sa ilang hinatag-sa-Diyos nga katakos sa paghunahuna ug pagpangatarongan. “Padayon sa pagpamalandong bahin sa gisulti ni Jehova kaninyo pinaagi sa iyang Pulong. Kini manalipod kaninyo,” siya miingon. (Proverbio 2:11) Giawhag usab ni Brader Pierce ang klase nga dili mahimong dogmatiko sa ilang mga panglantaw aron nga dili nila mapugngan ang ilang “gahom sa pagpangatarongan.” Tino nga kining tukma-sa-panahong mga pahinumdom makatabang samtang ang mga graduwado mag-alagad ingong mga misyonaryo.

Sunod gipailaila sa tsirman ang usa sa mga instruktor sa Gilead, si Lawrence Bowen, kinsa nagpakigpulong bahin sa temang “Pagdesisyon nga Dili Mahibalo sa Bisan Unsa.” Iyang gipunting nga maylabot sa iyang misyonaryong buluhaton sa Corinto, si apostol Pablo ‘mihukom nga dili mahibalo  sa bisan unsa . . . gawas kang Jesu-Kristo, ug kaniya nga gilansang.’ (1 Corinto 2:2) Si Pablo nahibalo nga ang kinadak-ang puwersa sa uniberso, ang balaang espiritu, nagpaluyo sa mensahe nga gibanaag sa tibuok Bibliya: ang pagbindikar sa pagkasoberano ni Jehova pinaagi sa gisaad nga Binhi. (Genesis 3:15) Ang 48 ka migraduwar nga mga estudyante gidasig nga mahisama kang Pablo ug Timoteo ug sa paglampos ingong mga misyonaryo, nga magpabilin diha sa “sumbanan sa makapahimsog nga mga pulong.”—2 Timoteo 1:13.

“Pabilhi ang Inyong Pribilehiyo, Usa ka Gasa Gikan sa Diyos” mao ang tema sa kataposang serye sa pangbukas nga mga pakigpulong. Si Wallace Liverance, ang tigrehistro sa Tunghaang Gilead, mitabang sa mga graduwado sa pagsabot nga ang mga pribilehiyo sa pag-alagad maoy mga pagpahayag sa dili-takos nga kalulot sa Diyos, dili usa ka butang nga katungod nilang madawat o gihagoan nila. Naggamit sa panig-ingnan ni apostol Pablo, si Brader Liverance miingon: “Wala pilia ni Jehova si Pablo nga mahimong iyang apostol ngadto sa kanasoran tungod sa mga buhat, nga mora bag gihagoan ni Pablo ang katungod nga maangkon ang maong asaynment o nga takos siya niini. Wala kini mag-agad sa gidugayon sa pag-alagad o sa kasinatian. Gikan sa panglantaw sa tawo, morag si Bernabe ang maayong pilion. Wala kini ipasukad sa personal nga katakos; si Apolos dayag nga mas larinong manulti kay kang Pablo. Kadto maoy pagpahayag sa Diyos sa iyang dili-takos nga kalulot.” (Efeso 3:7, 8) Gidasig ni Brader Liverance ang mga graduwado sa paggamit sa ilang gasa, o pribilehiyo sa pag-alagad, sa pagtabang sa uban nga mahimong mga higala sa Diyos ug makadawat sa “gasa nga ginahatag sa Diyos . . . , ang kinabuhing walay kataposan pinaagi ni Kristo Jesus nga atong Ginoo.”—Roma 6:23.

Human niini, si Mark Noumair, laing instruktor sa Gilead, nagdumala ug buhing panaghisgot uban sa pipila ka estudyante bahin sa temang “Ang Pagpangandam Motultol sa Maayong mga Resulta.” (Proverbio 21:5) Ang mga eksperyensiya nag-ilustrar nga sa dihang ang usa ka ministro mangandam pag-ayo alang sa ministeryo, ilabina sa pag-andam sa iyang kasingkasing, mabatonan niya ang tiunayng interes nganha sa mga tawo. Dili gayod siya maglisod kon unsay isulti. Hinunoa, siya mosulti ug mobuhat sa mga butang sa pagtabang kanila sa espirituwal. “Mao kini ang yawi sa pagkahimong malamposong misyonaryo,” matod pa ni Brader Noumair, nga naggamit sa iyang kaugalingong eksperyensiya ingong misyonaryo sa Aprika.

Misyonaryong Pag-alagad—Usa ka Makapatagbawng Karera

Giinterbiyo ni Ralph Walls ug Charles Woody ang pipila ka eksperyensiyadong mga misyonaryo, nga didto usab sa Patterson Educational Center alang sa linaing pagbansay. Ang mga interbiyo nagpasiugda nga ang gugma sa mga tawo mao ang maghatag ug kalipay diha sa misyonaryong pag-alagad. Makapadasig sa mga estudyante ug sa ilang mga pamilya ug mga higala nga nanambong ang pagpaminaw niining eksperyensiyadong mga misyonaryo samtang gisaysay nila mismo kon nganong ang misyonaryong pag-alagad usa ka makapatagbawng karera.

Si John E. Barr, nga nag-alagad sa Nagamandong Lawas, naghatag sa pangunang pakigpulong nianang adlawa, nga nag-ulohang “Awiti si Jehova ug Usa ka Bag-ong Awit.” (Isaias 42:10) Miingon si Brader Barr nga ang ekspresyong “usa ka bag-ong awit” siyam ka beses nga makita diha sa Bibliya. Nangutana siya, “Bahin sa unsa ba kining bag-ong awit?” Dayon siya mitubag: “Ang konteksto nagpadayag nga ang usa ka bag-ong awit giawit tungod sa bag-ong mga kaugmaran diha sa pagpatuman sa pagkasoberano ni Jehova.” Giawhag niya ang mga estudyante sa pagpadayon sa pagtampo sa ilang mga tingog sa pag-awit ug mga pagdayeg sa madaogong Gingharian sa Diyos diha sa mga kamot sa Mesiyanikong Hari, si Kristo Jesus. Matod ni Brader Barr ang pagbansay nga ilang nadawat sa Gilead nakatabang kanila sa pagsabot nga mas lalom pa kay sukad masukad sa lainlaing mga bahin niining “bag-ong awit.” “Ang tunghaan nagpasiugda sa panginahanglan nga kamo ‘moawit’ ug mga pagdayeg kang Jehova duyog sa inyong mga igsoong lalaki ug babaye bisan asa kamo moadto; kanunayng ugmara ang panaghiusa sa uban diha sa inyong mga asaynment.”

Human mahatagi ang mga estudyante sa ilang mga diploma, usa ka tigpamaba sa klase ang mibasa sa sulat sa sinserong pagpasalamat sa pagbansay nga ilang nadawat sa Gilead.

Mapauswag pa ba nimo ang imong pag-alagad sa Diyos ug mahimo kana nga mas mabungahon? Kon mao, pagkugi sama niining migraduwar nga mga estudyante. Mao kiniy nakatabang nga sila mikuwalipikar alang sa misyonaryong natad. Dakong kangaya ang makaplagan sa dihang ang usa malipayong nagtanyag sa kaugalingon nga kinabubut-on diha sa pag-alagad sa Diyos.—Isaias 6:8.

[Kahon sa panid 25]

MGA ESTADISTIKA SA KLASE

Gidaghanon sa mga nasod nga gihawasan: 10

Gidaghanon sa gipadad-an nga mga nasod: 19

Gidaghanon sa mga estudyante: 48

Aberids nga edad: 33.2

Aberids nga mga tuig diha sa kamatuoran: 16.8

Aberids nga tuig diha sa bug-os-panahong ministeryo: 12.6

[Hulagway sa panid 26]

Ika-111 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.