“Banyos-sa-Mata nga Ihidhid sa Imong mga Mata”

KANANG resetaha gihatag ni Jesu-Kristo ngadto sa unang-siglo nga Kristohanong kongregasyon sa Laodicea, Asia Minor.

Si Jesus miingon: ‘Palit . . . ug banyos-sa-mata nga ihidhid sa imong mga mata aron ikaw makakita.’ Dili literal nga sakit sa mata ang kinahanglang tambalan kondili espirituwal nga pagkabuta. Ang mga Kristohanon sa Laodicea naimpluwensiyahan sa espiritu sa mauswagon-sa-materyal nga siyudad diin sila nagpuyo ug wala nay pagtagad bahin sa ilang tinuod nga espirituwal nga mga panginahanglan.

Nagkomento bahin niini ingong hinungdan sa ilang nadaot nga panan-aw, si Jesus miingon: “Ikaw nagaingon: ‘Ako dato ug nakabatog mga bahandi ug wala na manginahanglan ug bisan unsa pa,’ apan wala ka mahibalo nga ikaw alaot ug makaluluoy ug kabos ug buta ug hubo.” Bisan pag wala makaalinggat niini, ang mga membro sa kongregasyon nagkinahanglag makaayong “banyos-sa-mata” nga mabatonan lamang pinaagi sa pagsunod sa pagtulon-an ug pagdisiplina ni Jesu-Kristo. ‘Palit gikan kanako,’ matod ni Jesus.—Pinadayag 3:17, 18.

Sama sa kahimtang niadtong mga taga-Laodicea, ang tinuod nga mga Kristohanon karon kinahanglang magbantay nga dili sobrang maimpluwensiyahan, tingali wala maamgohi, sa materyalistiko ug mahiligon-sa-kalingawan nga palibot diin sila nagpuyo. Ang reseta aron mahuptan ang himsog nga espirituwal nga panglantaw gipaila diha sa tambag: ‘Palit gikan kang Jesus . . . ug banyos-sa-mata nga ihidhid sa imong mga mata aron ikaw makakita.’

Takos tagdon ang kamatuoran nga kini nga “banyos-sa-mata” kinahanglang paliton. Dunay bili nga nalangkit. Kinahanglang gastohan ug panahon ang pagtuon ug pagpamalandong sa Pulong sa Diyos. Kining Pulonga, nagpasalig kanato ang salmista, “hinlo, nga nagapadan-ag sa [espirituwal nga] mga mata.”—Salmo 19:8.