Kahupayan Gikan sa Kahigwaos—Usa ka Mapuslanong Tambal

“Umari kanako, kamong tanang nabudlayan ug nabug-atan, ug ako magapalagsik kaninyo.”—MATEO 11:28.

1, 2. (a) Unsay anaa sa Bibliya nga motabang sa pagpamenos sa sobrang kahigwaos? (b) Unsa ka epektibo ang mga pagtulon-an ni Jesus?

 LAGMIT mouyon ka nga ang sobrang kahigwaos makadaot; mosangpot kini sa kasubo. Ang Bibliya nag-ingon nga ang tanang tawo nabug-atan pag-ayo nga daghan ang maikagong nagpaabot sa kagawasan gikan sa makapahigwaos nga kinabuhi karon. (Roma 8:20-22) Apan ang Kasulatan nagpakita usab kon sa unsang paagi mabatonan nato ang dakong kahupayan gikan sa kasubo bisan karon. Mabatonan ang maong kahupayan pinaagi sa pagsunod sa tambag ug panig-ingnan sa usa ka batan-ong lalaki nga nabuhi 20 ka siglo kanhi. Siya usa ka panday, apan mas gimahal niya ang mga tawo kay sa iyang trabaho. Iyang gitandog pag-ayo ang kasingkasing sa mga tawo pinaagi sa iyang gisulti, gitagad ang ilang mga panginahanglan, gitabangan ang maluya ug gihupay ang nagmagul-anon. Dugang pa, iyang gitabangan ang daghang tawo nga makab-ot ang ilang espirituwal nga katakos. Busa nakaplagan nila ang kahupayan gikan sa sobrang kahigwaos, nga makaplagan usab nimo.—Lucas 4:16-21; 19:47, 48; Juan 7:46.

² Kining tawhana, si Jesus sa Nasaret, wala giyahi sa kinaadman sa kalibotan nga gipangita sa pipila diha sa karaang Roma, Atenas, o Alejandria. Bisan pa niana, gibantog ang iyang mga pagtulon-an. Kini adunay tema: ang kagamhanan nga pinaagi niana ang Diyos malamposong magmando sa atong yuta. Gipatin-aw usab ni Jesus ang paninugdang mga prinsipyo alang sa pagkinabuhi—mga prinsipyo nga bililhon gayod karon. Kadtong nakakat-on ug nagpadapat sa gitudlo ni Jesus makatagamtam ug mga kaayohan karon, lakip na sa kahupayan gikan sa sobrang kahigwaos. Buot ba nimong matagamtam kana?

3. Unsang maanindot nga pagdapit ang gipaabot ni Jesus?

³ Tingali magduhaduha ka. ‘Ang usa ba ka tawo nga nabuhi dugay na kanhi adunay dakong impluwensiya sa akong kinabuhi karon?’ Aw, pamati sa makapadaning mga pulong ni Jesus: “Umari kanako, kamong tanang nabudlayan ug nabug-atan, ug ako magapalagsik kaninyo. Isangon diha kaninyo ang akong yugo ug magtuon gikan kanako, kay ako malumog-buot ug mapainubsanon sa kasingkasing, ug kamo makakaplag ug kahayahay alang sa inyong mga kalag. Kay ang akong yugo masayon ug ang akong luwan magaan.” (Mateo 11:28-30) Unsay buot niyang ipasabot? Susihon nato kining mga pulonga diha sa pipila ka detalye ug tan-awon nato kon sa unsang paagi makatabang kini kanimo sa pagkaplag ug kahupayan gikan sa grabeng kahigwaos.

4. Kang kinsa nakigsulti si Jesus, ug nganong malisdan tingali ang iyang mga mamiminaw sa pagbuhat kon unsay gikinahanglan kanila?

⁴ Si Jesus nakigsulti sa daghan nga naningkamot pag-ayo sa pagbuhat kon unsay nahisubay sa balaod apan “nabug-atan” tungod kay ang Hudiyong mga lider naghimo sa relihiyon nga usa ka kabug-at. (Mateo 23:4) Ilang gihatagag dakong pagtagad ang daghan kaayong lagda alang sa halos tanang bahin sa kinabuhi. Dili ka ba mahigwaos kon sige nimong madungog ang “ayaw nig buhata” o “ayaw nag buhata”? Sa kasukwahi, ang pagdapit ni Jesus maoy pagtultol sa mga tawo ngadto sa kamatuoran, sa pagkamatarong, sa mas maayong kinabuhi pinaagi sa pagpamati kaniya. Oo, ang paagi nga mahibalo bahin sa matuod nga Diyos naglakip sa pagpatalinghog kang Jesu-Kristo, kay diha kaniya, ang mga tawo nakakita—ug makakita—kon  sama sa unsa si Jehova. Si Jesus miingon: “Siya nga nakakita kanako nakakita usab sa Amahan.”—Juan 14:9.

Makapahigwaos ba Kaayo ang Imong Kinabuhi?

5, 6. Unsay kalainan sa mga kahimtang sa trabaho ug mga suweldo sa adlaw ni Jesus ug sa atoa karon?

⁵ Mahimong interesado ka niining butanga tungod kay basig nabug-atan ka sa imong trabaho o situwasyon sa pamilya. O ang ubang mga responsibilidad daw bug-at ra tingali kaayo. Kon mao, nahisama ka sa sinserong mga tawo nga nahimamat ug gitabangan ni Jesus. Pananglitan, palandonga ang problema bahin sa pagpangitag pangabuhian. Daghan ang nakigbisog niana karon, ug mao man usab sa panahon ni Jesus.

⁶ Niadtong panahona, ang usa ka mamumuo maghago ug 12 ka oras kada adlaw, 6 ka adlaw kada semana, kasagaran sa usa lamang ka denario sa tibuok adlaw. (Mateo 20:2-10) Unsay kalainan niini sa imong suweldo o nianang sa imong mga higala? Malisod itandi ang mga suweldo sa karaang panahon nianang sa modernong kapanahonan. Ang usa ka paagi sa pagtandi niini mao ang pagkonsiderar sa mapalit sa salapi. Ang usa ka eskolar nag-ingon nga sa adlaw ni Jesus ang usa ka buok tinapay nga hinimo sa upat ka tasang harina nga gikan sa trigo mokantidad ug usa ka oras nga suweldo. Ang laing eskolar nag-ingon nga ang usa ka kopa sa maayong bino mokantidad ug mga duha ka oras nga suweldo. Makita nimo sa maong mga detalye nga ang mga tawo niadtong panahona naghago pag-ayo sa daghang oras kada adlaw aron mabuhi. Nagkinahanglan silag kahupayan ug kalagsik, sama kanato. Kon nagtrabaho ka, mapugos ka tingali sa paghimog labaw pa. Kasagaran wala na kitay panahon sa paghimog gitimbangtimbang-pag-ayo nga mga desisyon. Mouyon ka tingali nga nangandoy ka ug kahupayan.

7. Unsay reaksiyon ngadto sa mensahe ni Jesus?

⁷ Tin-aw, ang pagdapit ni Jesus sa tanan nga “nabudlayan ug nabug-atan” makapadani kaayo sa daghang mamiminaw niadtong panahona. (Mateo 4:25; Marcos 3:7, 8) Ug hinumdomi nga gidugang ni Jesus ang saad, “Ako magapalagsik kaninyo.” Ang mao gihapong saad nagakatuman karon. Ikapadapat kini kanato kon kita “nabudlayan ug nabug-atan.” Ug ikapadapat kini sa atong mga minahal, kansang situwasyon lagmit nga susama niana.

8. Sa unsang paagi ang pagmatuto ug anak ug ang pagkatigulang makadugang sa kahigwaos?

⁸ Adunay ubang mga butang nga nagpabug-at sa mga tawo. Ang pagmatuto ug mga anak maoy dakong suliran. Bisan ang pagkabata mahimong suliran usab. Nagkadaghang tawo sa tanang panuigon ang nag-atubang sa mga problema sa mental  ug pisikal nga kahimsog. Ug bisan tuod ang mga tawo mas taas tingali ug kinabuhi, ang mga tigulang dunay linaing mga problema nga atubangon, bisan pa sa mga kauswagan sa medisina.—Ecclesiastes 12:1.

Ilalom sa Yugo

9, 10. Sa karaang kapanahonan, simbolo sa unsa ang yugo, ug nganong gidapit ni Jesus ang mga tawo sa pagsangon sa iyang yugo diha kanila?

⁹ Namatikdan ba nimo nga sa mga pulong nga gikutlo gikan sa Mateo 11:28, 29, si Jesus miingon: “Isangon diha kaninyo ang akong yugo ug magtuon gikan kanako”? Niadtong panahona, ang usa ka ordinaryong tawo mibati tingali nga daw nagtrabaho siya ilalom sa usa ka yugo. Sukad sa karaang kapanahonan, ang yugo nahimong simbolo sa pagkaulipon o pagkasulogoon. (Genesis 27:40; Levitico 26:13; Deuteronomio 28:48) Daghan sa mga mamumuo nga inadlaw nga nahimamat ni Jesus nagtrabaho nga gisangonan ug tinuod nga yugo diha sa ilang mga abaga, nga nagpas-an ug bug-at nga mga palas-anon. Depende kon sa unsang paagi gidisenyo ang yugo, mahimong dili kaayo kini mobag-id sa liog ug abaga o mahimong mobag-id kini pag-ayo. Ingong panday, lagmit nakahimo si Jesus ug mga yugo, ug nahibalo gayod siya kon unsaon pagporma ang usa ka yugo nga “masayon.” Tingali gihapinan niya ug panit o panapton ang mga bahin nga modapat sa liog ug abaga aron ang yugo dili kaayo mobag-id kutob sa mahimo.

¹⁰ Sa dihang miingon si Jesus, “Isangon diha kaninyo ang akong yugo,” lagmit gitandi niya ang iyang kaugalingon sa usa ka tigtagana ug maayong-pagkahimo nga mga yugo nga “masayon” diha sa liog ug abaga sa trabahador. Busa, midugang si Jesus: “Ang akong luwan magaan.” Nagpasabot kini nga ang yugo komportableng gamiton, ug ang trabaho dili usab hilabihan ka bug-at. Tinuod nga pinaagi sa pagdapit sa iyang mga mamiminaw sa pagdawat sa iyang yugo, si Jesus wala magtanyag ug dihadihang kahupayan gikan sa tanang madaogdaogong mga kahimtang nga naglungtad niadtong panahona. Bisan pa niana, ang lahing panglantaw nga iyang gitanyag makahatag ug dakong kahayahay. Ang mga kausaban sa ilang estilo sa kinabuhi ug paagi sa pagbuhat sa mga butang makapahupay usab kanila. Labawng hinungdanon, ang tin-aw ug lig-on nga paglaom makatabang kanila nga dili kaayo mahigwaos sa ilang kinabuhi.

Makaplagan Nimo ang Kahayahay

11. Nganong si Jesus wala lamang magsugyot ug pag-ilis sa mga yugo?

¹¹ Palihog matikdi nga si Jesus wala mag-ingon nga ilisan sa mga tawo ang ilang yugo. Ang Roma mao gihapon ang magmando sa yuta, sa samang paagi nga ang mga kagamhanan karon maoy nagmando sa yuta diin nagpuyo ang mga Kristohanon. Ang unang-siglong buhis sa Roma anaa gihapon. Ang mga problema sa panglawas ug ekonomiya magpabilin. Ang pagkadili-hingpit ug sala padayong mag-apektar sa mga tawo. Bisan pa niana, mahuptan nila ang kahayahay pinaagi sa pagsagop sa pagtulon-an ni Jesus, sama ra nga mabatonan nato kini karon.

12, 13. Unsay gipasiugda ni Jesus nga makahatag ug kahayahay, ug unsay reaksiyon sa pipila?

¹² Ang usa ka hinungdanong kapadapatan sa ilustrasyon ni Jesus sa yugo nadayag maylabot sa buluhaton nga paghimog tinun-an. Walay duhaduha nga ang pangunang kalihokan ni Jesus mao ang pagtudlo sa uban, nga ang gipasiugda mao ang Gingharian sa Diyos. (Mateo 4:23) Busa sa dihang miingon siya, “Isangon diha kaninyo ang akong yugo,” tinong maglakip kana sa pagsunod kaniya nianang mao gihapong kalihokana. Ang asoy sa Ebanghelyo nagpakita nga gipalihok ni Jesus ang sinserong mga tawo sa pagbag-o sa ilang trabaho, usa ka pangunang kabalaka sa kinabuhi sa daghan. Hinumdomi ang iyang pagtawag kang Pedro, Andres, Santiago, ug Juan: “Sunod kamo kanako, ug himoon ko kamong mga mangingisda ug mga tawo.” (Marcos 1:16-20) Gipasundayag niya sa maong mga mangingisda kon unsa ka makapatagbaw unya kon buhaton nila ang buluhaton nga iyang giuna diha sa iyang kinabuhi, nga nagbuhat niana ilalom sa iyang paggiya ug uban sa iyang tabang.

¹³ Ang uban sa iyang Hudiyong mga mamiminaw nakasabot sa punto ug nagpadapat niana. Handurawa ang talan-awon sa daplin sa dagat nga atong mabasa diha sa Lucas 5:1-11. Upat ka mangingisda ang nagbuntag pagpangisda apan walay nakuha. Sa kalit lang, napuno ang ilang pukot! Wala kini maatol lamang; kini misangpot tungod sa pagsalga ni Jesus. Samtang milantaw sila sa baybayon, nakita nila ang panon sa mga tawo nga interesado kaayo sa mga pagtulon-an ni Jesus. Nakatabang kana sa pagpatin-aw kon unsay giingon ni Jesus niadtong upat: ‘Sukad karon mangisda na kamo ug mga tawo nga buhi.’ Unsay ilang reaksiyon? “Gidala nilag balik ang mga sakayan sa mamala, ug gibiyaan ang tanan ug misunod kaniya.”

14. (a) Sa unsang paagi makaplagan nato ang kahayahay karon? (b) Unsang makapahayahay nga maayong balita ang gimantala ni Jesus?

 ¹⁴ Sa panguna, makasanong ka sa susamang paagi. Ang buluhaton nga pagpanudlo sa mga tawo sa kamatuoran sa Bibliya nagpadayon gihapon. Mga unom ka milyong Saksi ni Jehova sa tibuok kalibotan ang midawat sa pagdapit ni Jesus nga ‘isangon ang iyang yugo’ diha kanila; sila nahimong “mga mangingisda ug mga tawo.” (Mateo 4:19) Ang uban naghimo niana nga bug-os-panahon; ang uban naghimo kutob sa ilang maarangan nga dili bug-os-panahon. Ang tanan napalagsik niana, busa namenosan ang kahigwaos sa ilang kinabuhi. Naglakip kini sa pagbuhat sa ilang gikalipayan, pagpahibalo sa uban sa maayong balita—ang “maayong balita sa gingharian.” (Mateo 4:23) Makapalipay gayod nga maghisgot bahin sa maayong balita apan ilabina kini nga maayong balita. Ang Bibliya nasudlan sa paninugdang impormasyon nga atong gikinahanglan sa pagkombinsir sa daghan nga mamenosan nila ang kahigwaos sa ilang kinabuhi.—2 Timoteo 3:16, 17.

15. Sa unsang paagi makabenepisyo ka gikan sa mga pagtulon-an ni Jesus bahin sa kinabuhi?

¹⁵ Sa usa ka sukod, bisan ang mga tawo nga bag-o pang nagsugod sa pagkahibalo bahin sa Gingharian sa Diyos nakabenepisyo gikan sa mga pagtulon-an ni Jesus kon sa unsang paagi magkinabuhi. Daghan ang matinud-anong makaingon nga ang mga pagtulon-an ni Jesus nakapalagsik kanila ug nakatabang kanila sa pag-usab sa ilang kinabuhi. Mapamatud-an mo kana pinaagi sa pagsusi sa pipila ka prinsipyo sa pagkinabuhi nga gipahayag diha sa mga asoy sa kinabuhi ug ministeryo ni Jesus, ilabina sa mga Ebanghelyo nga gisulat ni Mateo, Marcos, ug Lucas.

 Usa ka Paagi sa Pagkaplag ug Kahayahay

16, 17. (a) Asa nimo makaplagi ang pipila sa paninugdang mga pagtulon-an ni Jesus? (b) Unsay gikinahanglan aron makakaplag ug kahayahay pinaagi sa pagpadapat sa mga pagtulon-an ni Jesus?

¹⁶ Sa tingpamulak sa 31 K.P., si Jesus naghatag ug pakigpulong nga nabantog sa kalibotan hangtod karon. Kasagaran gitawag kini nga Wali sa Bukid. Nasulat kini diha sa Mateo mga kapitulo 5 hangtod sa 7 ug Lucas kapitulo 6, ug kini nagsumaryo sa daghan sa iyang mga pagtulon-an. Makita nimo ang ubang mga pagtulon-an ni Jesus sa ubang bahin sa mga Ebanghelyo. Kadaghanan sa iyang gisulti masabtan bisag dili ipatin-aw, apan ang pagpadapat niana malisod. Nganong dili nimo basahon pag-ayo ug palandongon kanang mga kapituloha? Tugoti ang gahom sa iyang mga ideya nga mag-impluwensiya sa imong hunahuna ug tinamdan.

¹⁷ Dayag nga ang mga pagtulon-an ni Jesus mahan-ay sa lainlaing mga paagi. Pundokon nato ang paninugdang mga pagtulon-an aron adunay usa sa matag adlaw sa bulan, nga ang tumong mao ang pagpadapat niini sa imong kinabuhi. Sa unsang paagi? Aw, palandonga pag-ayo ang mga punto. Hinumdomi ang datong magmamando nga nangutana kang Jesu-Kristo: ‘Unsay akong buhaton aron mapanunod nako ang kinabuhing walay kataposan?’ Sa dihang gisubli ni Jesus ang hinungdanong mga kinahanglanon sa Balaod sa Diyos, ang lalaki mitubag nga gituman na niya kini. Sa gihapon, naamgohan niya nga kinahanglang mobuhat pa siya ug dugang. Gihangyo siya ni Jesus nga maningkamot pa sa pagpadapat sa mga prinsipyo sa Diyos sa mapuslanong mga paagi, nga mahimong aktibong tinun-an. Dayag nga ang lalaki dili andam nga mohimo niana. (Lucas 18:18-23) Busa, ang usa nga gustong makakat-on bahin sa mga pagtulon-an ni Jesus karon kinahanglang mahinumdom nga adunay kalainan tali sa pag-uyon niana ug sa  aktuwal nga pagdawat niana, sa ingon mamenosan ang kahigwaos.

18. Iilustrar kon sa unsang paagi magamit nimo ang nag-ubang kahon sa mapuslanong paagi.

¹⁸ Sa pagsugod sa pagsusi ug pagpadapat sa mga pagtulon-an ni Jesus, tan-awa ang punto 1 diha sa nag-uban nga kahon. Nagtumong kini sa Mateo 5:3-9. Sa pagkatinuod, si bisan kinsa kanato makagugol ug dakong panahon sa pagpalandong bahin sa kahibulongang tambag nga gihatag nianang mga bersikuloha. Apan, sa pagtan-aw niana sa katibuk-an, unsay imong ikahinapos bahin sa tinamdan? Kon gusto gayod nimong mabuntog ang epekto sa sobrang kahigwaos diha sa imong kinabuhi, unsay makatabang? Sa unsang paagi mapauswag nimo ang imong situwasyon kon hatagan nimog mas dakong pagtagad ang espirituwal nga mga butang, nga tugotang kana maoy labaw nimong hunahunaon? Duna bay kalihokan sa imong kinabuhi nga kinahanglan nimong hatagag menos nga pagtagad, nga maghatag ug mas dakong pagtagad sa espirituwal nga mga isyu? Kon buhaton nimo kana, makadugang kana sa imong kalipay karon.

19. Unsay imong mahimo aron makabaton ug dugang pagsabot?

¹⁹ Karon aduna ka pay mahimo. Nganong dili hisgotan kanang mga bersikuloha uban sa laing alagad sa Diyos, tingali sa imong kapikas sa kaminyoon, usa ka suod nga paryente, o usa ka higala? (Proverbio 18:24; 20:5) Hinumdomi nga ang datong magmamando nangutana sa laing tawo—kang Jesus—bahin nianang butanga. Ang tubag mas magpaposible unta nga maangkon niya ang kalipay ug dumalayon nga kinabuhi. Ang isigkamagsisimba kang kinsa makighisgot ka nianang mga bersikuloha dili sama kang Jesus; bisan pa niana, ang kabildohay bahin sa mga pagtulon-an ni Jesus makabenepisyo kaninyong duha. Sulayi dayon kana pagbuhat.

20, 21. Unsang programa ang mahimo nimong sundon sa pagtuon bahin sa mga pagtulon-an ni Jesus, ug sa unsang paagi matino nimo ang imong pag-uswag?

²⁰ Tan-awa pag-usab ang nag-uban nga kahon, “Mga Pagtulon-an nga Motabang Kanimo.” Kini nga mga pagtulon-an gipundok aron labing menos duna kay usa ka pagtulon-an nga konsiderahon kada adlaw. Mahimong basahon una nimo ang giingon ni Jesus diha sa mga bersikulong gisitar. Dayon hunahunaa ang iyang gisulti. Palandonga kon sa unsang paagi mapadapat nimo kini sa imong kinabuhi. Kon gibati nimo nga gipadapat na nimo kini, mamalandong aron masuta kon unsa pay imong mahimo sa pagkinabuhi sumala sa pagtulon-an sa Diyos. Sulayi sa pagpadapat ang maong pagtulon-an nianang adlawa. Kon maglisod ka pagsabot niana o pagsuta kon unsaon nimo pagpadapat kana, paggugol ug laing adlaw sa pagpalandong niana. Apan, hinumdomi nga dili kinahanglang mabatid ka niana una ka pa mopadayon sa sunod nga pagtulon-an. Pagkasunod adlaw, makakonsiderar ka na ug laing pagtulon-an. Sa kataposan sa semana, masubli nimo kon milampos ka ba sa pagpadapat ug upat o lima sa mga pagtulon-an ni Jesus. Sa ikaduhang semana dugangi kini, adlaw-adlaw. Kon makaplagan nimo nga nasipyat ka sa pagpadapat sa usa ka pagtulon-an, ayawg kahigawad. Ang matag Kristohanon makasinati niana. (2 Cronicas 6:36; Salmo 130:3; Ecclesiastes 7:20; Santiago 3:8) Ipadayon kana pagpadapat sa ikatulong semana ug sa ikaupat.

²¹ Human sa mga usa ka bulan, lagmit nakonsiderar na nimo ang tanang 31 ka puntos. Sa bisan unsang kahimtang, unsay imong bation ingong resulta? Dili ka ba mas malipayon, tingali mas relaks? Bisan pag diyutay lamang pag-uswag ang imong nahimo, lagmit mamenosan ang imong kahigwaos, o labing menos madumala nimo ang kahigwaos sa mas maayong paagi, ug duna kay paagi sa pagpadayon. Ayawg kalimot nga dunay daghang uban pang maayong mga puntos sa mga pagtulon-an ni Jesus nga wala sa listahan. Nganong dili nimo pangitaon ang pipila niini ug sulayan kana sa pagpadapat?—Filipos 3:16.

22. Unsay mahimong moresulta sa pagsunod sa mga pagtulon-an ni Jesus, apan unsang dugang bahin ang angay natong tun-an?

 ²² Masabtan nimo nga ang yugo ni Jesus, bisan pag dili kay walay-kabug-at, tinuod nga masayon. Ang luwan sa iyang mga pagtulon-an ug pagkatinun-an maoy gaan. Human sa 60 ka tuig nga personal nga eksperyensiya, si apostol Juan, ang minahal nga higala ni Jesus, miuyon: “Kini ang kahulogan sa paghigugma sa Diyos, nga atong bantayan ang iyang mga sugo; ug bisan pa ang iyang mga sugo dili mabug-at.” (1 Juan 5:3) Mabatonan nimo ang susamang pagsalig. Kon mas taas ang panahon nga gigugol nimo sa pagpadapat sa mga pagtulon-an ni Jesus, mas makaplagan nimo nga ang makapahigwaos kaayo sa kinabuhi sa daghang tawo karon dili diay sama ka makapasubo alang kanimo. Masabtan nimo nga nakaplagan nimo ang dakong kahupayan. (Salmo 34:8) Apan, aduna pay laing bahin sa masayon nga yugo ni Jesus nga angay nimong konsiderahon. Gihisgotan usab ni Jesus nga siya “malumog-buot ug mapainubsanon sa kasingkasing.” Sa unsang paagi mohaom kini sa atong pagtuon ug pagsundog kang Jesus? Sa sunod nga artikulo, konsiderahon nato kini.—Mateo 11:29.

Unsay Imong Tubag?

• Nganong modangop kita kang Jesus sa dihang mangita kitag kahupayan sa sobrang kahigwaos?

• Simbolo sa unsa ang yugo, ug ngano?

• Nganong gidapit ni Jesus ang mga tawo sa pagsangon sa iyang yugo?

• Sa unsang paagi mabatonan nimo ang espirituwal nga kalagsik?

[Mga Pangutana sa Pagtuon]

[Blurb sa panid 14]

Ang tinuig nga teksto sa mga Saksi ni Jehova sa 2002 mao ang: “Umari kanako, . . . ug ako magapalagsik kaninyo.”—Mateo 11:28.

[Kahon/Hulagway sa panid 12, 13]

Mga Pagtulon-an nga Motabang Kanimo

Unsang maayong mga butang ang imong makita diha sa Mateo mga kapitulo 5 hangtod sa 7? Kining mga kapituloha nasudlan sa mga pagtulon-an nga gipahayag sa Dakong Magtutudlo, si Jesus, didto sa usa ka bukid sa Galilea. Palihog basaha ang mga bersikulo nga gisitar sa ubos, ginamit ang imong kopya sa Bibliya, ug pangutan-a ang imong kaugalingon sa nalangkit nga mga pangutana.

1. 5:3-9 Unsay gitug-an niini kanako bahin sa akong katibuk-ang tinamdan? Sa unsang paagi ako maningkamot aron mabatonan ang mas dakong kalipay? Sa unsang paagi ako makahatag ug mas dakong pagtagad sa akong espirituwal nga mga panginahanglan?

2. 5:25, 26 Unsay mas maayo kay sa pagsundog sa makiawayong espiritu nga nabatonan sa daghan?—Lucas 12:58, 59.

3. 5:27-30 Unsay gipasiugda sa mga pulong ni Jesus bahin sa paghanduraw maylabot sa sekso? Sa unsang paagi ang akong paglikay niana makadugang sa akong kalipay ug kalinaw sa hunahuna?

4. 5:38-42 Nganong angay akong maningkamot nga likayan ang importansiya nga gihatag sa modernong katilingban diha sa pagkaagresibo kaayo?

5. 5:43-48 Sa unsang paagi ako makabenepisyo gikan sa pagkahimong mas sinati sa mga kauban nga ako tingaling giisip nga mga kaaway? Unsay lagmit nga mahimo niini sa pagpamenos o pagwagtang sa tensiyon?

6. 6:14, 15 Kon usahay ako mokiling sa pagkahimong di-mapinasayloon, ang kasina o kayugot ba mao ang pangunang hinungdan? Sa unsang paagi mabag-o ko kana?

7. 6:16-18 Mokiling ba ako sa pagkahimong mas mabalak-on sa panggawas nga panagway kay sa unsa ako sa sulod? Sa unsa ako angayng mas magbantay?

8. 6:19-32 Unsa kahay epekto kon mahimo akong sobra ka mabalak-on sa kuwarta ug mga kabtangan? Ang paghunahuna bahin sa unsa ang motabang kanako sa pagkahimong timbang niining bahina?

9. 7:1-5 Unsay akong bation kon kauban nako ang mga tawo nga mahukmanon ug hinawayon, nga kanunayng mangitag sayop? Nganong hinungdanon nga likayan nakong mahisama niana?

10. 7:7-11 Kon dalayegon ang pagkamalahutayon sa dihang mohangyo ako sa Diyos, komosta sa ubang bahin sa kinabuhi?—Lucas 11:5-13.

11. 7:12 Bisag nahibalo ako sa Bulawanong Lagda, unsa ka subsob nga gipadapat nako kining tambaga sa akong pagtratar sa uban?

12. 7:24-27 Tungod kay ako ang responsable sa pagtultol sa akong kinabuhi, sa unsang paagi ako mas maandam alang sa daghan kaayong kalisdanan ug mga problema? Nganong angay nakong hunahunaon kini karon?—Lucas 6:46-49.

Dugang mga pagtulon-an nga akong makonsiderar:

13. 8:2, 3 Sa unsang paagi nako ikabanaag ang pagkamabination alang sa mga alaot, sama sa kanunayng gibuhat ni Jesus?

14. 9:9-38 Unsay bahin sa pagpakitag kaluoy diha sa akong kinabuhi, ug sa unsang paagi ikapakita ko pa kini?

15. 12:19 Kay nakakat-on gikan sa tagna bahin kang Jesus, naningkamot ba ako sa paglikay sa makiawayong mga argumento?

16. 12:20, 21 Unsang kaayohan ang akong mahimo sa dili pagdaogdaog sa uban pinaagi sa akong mga pulong o kaha sa akong mga lihok?

17. 12:34-37 Unsay kanunay nakong ginahisgotan? Ako nahibalo nga kon pug-on nako ang usa ka kahel, mogula ang duga sa kahel, busa nganong hatagan man nakog pagtagad kon unsay anaa sa sulod nako, kon unsay anaa sa akong kasingkasing?—Marcos 7:20-23.

18. 15:4-6 Gikan sa mga komento ni Jesus, unsay akong nasabtan bahin sa mahigugmaong pag-atiman sa mga tigulang?

19. 19:13-15 Unsay angay nakong gahinag panahon sa pagbuhat?

20. 20:25-28 Nganong dili-mapuslanon ang paghupot ug awtoridad alang sa kaugalingong kaayohan? Sa unsang paagi masundog nako si Jesus niining bahina?

Dugang mga hunahuna nga gisulat ni Marcos:

21. 4:24, 25 Unsay importansiya sa paagi nga gitratar nako ang uban?

22. 9:50 Kon maayo ang akong gisulti ug gibuhat, unsang maayong mga resulta ang lagmit nga modangat?

Sa kataposan, ang pipila ka pagtulon-an nga gisulat ni Lucas:

23. 8:11, 14 Kon tugotan nako ang kabalaka, bahandi, ug kalingawan nga maoy mohari sa akong kinabuhi, unsay mahimong moresulta?

24. 9:1-6 Bisan tuod si Jesus may gahom sa pag-ayo sa masakiton, unsay iyang giuna?

25. 9:52-56 Dali ra ba akong masilo? Gilikayan ko ba ang espiritu sa pagpanimalos?

26. 9:62 Sa unsang paagi angay nakong lantawon ang akong responsibilidad sa pagsulti bahin sa Gingharian sa Diyos?

27. 10:29-37 Sa unsang paagi akong mapamatud-an nga ako usa ka silingan, dili usa ka estranyo?

28. 11:33-36 Unsang mga kausaban ang himoon tingali nako aron ang akong kinabuhi mas moyano?

29. 12:15 Unsay kalambigitan sa kinabuhi ug mga kabtangan?

30. 14:28-30 Kon mogahin akog panahon sa pagtimbangtimbang pag-ayo sa mga desisyon, unsa tingaliy likayan nako, ug uban sa unsang mga benepisyo?

31. 16:10-12 Unsang mga benepisyo ang mahimong makuha nako gikan sa usa ka kinabuhi nga naghupot sa integridad?

[Mga hulagway sa panid 10]

Ang nagaluwas-ug-kinabuhi nga buluhaton ilalom sa yugo ni Jesus makapalagsik