Mga Ginikanan—Tagbawa ang Panginahanglan sa Inyong mga Anak!

ANG mga anak nanginahanglag giya ug mahigugmaon nga disiplina, ilabina gikan sa ilang mga ginikanan. Maylabot niini, ang usa ka edukador nga taga-Brazil, si Tania Zagury, nag-ingon: “Ang kiling sa matag bata mao ang pagpangitag kalingawan. Kinahanglang dunay mga pagdili. Ang mga ginikanan maoy angayng mohimo niini. Kay kon dili, ang mga bata dili na mapugngan.”

Apan, diha sa daghang nasod ang impluwensiya sa usa ka matugotong katilingban nga nagbayaw sa personal nga kagawasan makapalisod sa pagsunod sa tambag sa ibabaw. Nan, asa makadangop ang mga ginikanan alang sa tabang? Giila sa mahinadlokon-sa-Diyos nga mga ginikanan nga ang ilang mga anak maoy “panulondon gikan ni Jehova.” (Salmo 127:3) Busa, sila mosalig sa Pulong sa Diyos, ang Bibliya, alang sa giya sa pagmatuto kanila. Pananglitan, ang Proverbio 13:24 nag-ingon: “Ang nagapugong sa iyang bunal nagadumot sa iyang anak, apan ang nahigugma kaniya nagapangita kaniya uban ang disiplina.”

Ang paggamit sa Bibliya sa pulong “bunal” dili angayng sabton nga nagkahulogan lamang ug pisikal nga pagsilot; kini naghawas sa paagi sa pagtul-id, bisan unsa mang matanga kana. Gani, kasagaran ang mga pulong mahimong mao ray gikinahanglan sa pagtul-id sa sukwahi nga dalan nga gisubay sa usa ka bata. Ang Proverbio 29:17 nag-ingon: “Kastigoha ang imong anak ug siya magahatag ug pahulay kanimo ug magahatag ug dakong kalipay sa imong kalag.”

Ang mga anak nagkinahanglag mahigugmaong disiplina aron mawagtang ang dili-maayong mga kinaiya. Ang maong lig-on ug maluloton nga pagtul-id nagpamatuod nga ang usa ka ginikanan may kahingawa sa bata. (Proverbio 22:6) Busa mga ginikanan, magmadasigon! Pinaagi sa pagsunod sa maayo, praktikal nga tambag sa Bibliya, inyong mapahimut-an si Jehova nga Diyos ug maangkon ang pagtahod sa inyong mga anak.