Nahinumdom Ka Ba?

Gipabilhan mo ba ang pagbasa sa di pa dugayng mga gula sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

• Ang Pederal nga Konstitusyonal nga Korte sa Alemanya nakatampo sa unsang legal nga kadaogan nga naglangkit sa relihiyon?

Gibali sa korte ang negatibong desisyon sa laing korte maylabot sa mga Saksi ni Jehova ug sa pag-ila kanila ingong usa ka korporasyon nga giila sa gobyerno. Ang madaogong desisyon nag-ingon nga sulod sa utlanan sa relihiyosong kagawasan ang usa mahimong ‘motuman sa relihiyosong tinuohan’ inay sa gipangayo sa Estado.—8/15, panid 8.

• Unsa ka dugay ang pag-antos ni Job?

Ang basahon ni Job wala magpaila nga siya nag-antos sa daghang tuig. Ang pag-antos ni Job ug ang kasulbaran niana lagmit nahitabo sulod sa pipila ka bulan, tingali wala dangtig usa ka tuig.—8/15, panid 31.

• Nganong makatino kita nga ang Yawa dili lamang usa ka patuotuo?

Si Jesu-Kristo nahibalo nga ang Yawa tinuod. Si Jesus gitental sa usa ka tinuod nga persona, dili sa usa ka daotang kinaiya nga anaa sa sulod niya. (Mateo 4:1-11; Juan 8:44; 14:30)—9/1, mga panid 5-6.

• Ang Proverbio 10:15 nag-ingon: “Ang bililhon nga mga butang sa tawong dato mao ang iyang malig-on nga lungsod. Ang kalaglagan sa mga timawa mao ang ilang kakabos.” Sa unsang paagi kini tinuod?

Ang bahandi magsilbing panalipod batok sa pipila ka butang nga mohatag ug kawalay-kasegurohan sa kinabuhi, maingon nga ang usa ka kinutaang lungsod mohatag ug usa ka sukod sa kasegurohan niadtong nagpuyo diha niini. Sa laing bahin, ang kakabos makadaot sa dihang motungha ang wala-damhang mga panghitabo.—9/15, panid 24.

• Sa unsang diwa gisugdan ang “pagtawag sa ngalan ni Jehova” sa mga adlaw ni Enos? (Genesis 4:26)

Ang ngalan sa Diyos gigamit na sukad pa sa pagsugod sa kasaysayan sa tawo; busa, ang pagtawag sa ngalan ni Jehova nga gisugdan sa panahon ni Enos dili maoy pagtawag kang Jehova diha sa pagtuo. Tingali ang mga tawo mapasipalahong nagngalan sa ilang kaugalingon sa ngalan sa Diyos o kaha sa ubang mga tawo nga pinaagi kanila sila nagpakaaron-ingnong nagaduol sa Diyos diha sa pagsimba.—9/15, panid 29.

• Sumala sa pagkagamit diha sa Bibliya, unsay kahulogan sa pulong “disiplina”?

Ang maong pulong wala magpasabot sa bisan unsang matang sa pag-abuso o kapintasan. (Proverbio 4:13; 22:15) Ang Gregong pulong alang sa “disiplina” sa panguna nalangkit sa instruksiyon, edukasyon, pagtul-id ug, usahay, sa lig-on apan mahigugmaong pagsilot. Ang usa ka mahinungdanong paagi diin masundog sa mga ginikanan si Jehova mao ang pagpaningkamot nga mahuptan kanunay ang maayong komunikasyon uban sa ilang mga anak. (Hebreohanon 12:7-10)—10/1, mga panid 8, 10.

• Sa unsang paagi ang matuod nga mga Kristohanon karon makapakita nga sila dapig sa pagmando sa Diyos?

Sa pagpasiugda sa Gingharian sa Diyos, ang mga Saksi ni Jehova dili moapil sa politika o moaghat sa pagrebelde, bisan diha sa mga nasod diin gidili ang mga Saksi. (Tito 3:1) Sila naghimog mapuslanong kontribusyon sama sa paagi nga gihimo ni Jesus ug sa iyang unang mga tinun-an ug naningkamot sa pagtabang sa mga tawo sa pagsagop sa maayong mga sukdanan sa Bibliya, sama sa pagkamatinud-anon, moral nga kahinlo, ug maayong batasan sa pagtrabaho.—10/15, panid 6.

• Sa unsang paagi ang nagahatag-kinabuhi nga mga tubig nagaagos sa Andes?

Ang mga Saksi ni Jehova didto naningkamot sa pagdala sa mga kamatuoran sa Bibliya ngadto sa mga tawo, bisan diha sa duha ka lokal nga mga pinulongan, ang Quechua ug Aymara. Ang mga Saksi nagduaw sa mga tawo nga nagpuyo sa mga isla sa Lake Titicaca, lakip na sa “naglutaw” nga mga isla nga hinimo sa mga tangbo nga nanubo diha katubigan sa lanaw.—10/15, mga panid 8-10.

• Unsa ang gihatag sa Diyos alang sa paggiya kanato nga mahimong ipakasama sa sistema sa giya sa kompiyuter diha sa modernong mga ayroplanong depasahero?

Gisangkapan sa Diyos ang mga tawo ug kapasidad alang sa moral nga giya, usa ka pangsulod nga moral nga pagbati. Kini mao ang atong napanunod nga tanlag. (Roma 2:14, 15)—11/1, mga panid 3-4.

• Nganong dakog bili ang kamatayon ni Jesus?

Sa dihang nakasala ang hingpit nga tawong si Adan, iyang giwala ang tawhanong kinabuhi alang sa iyang kaugalingon ug sa iyang mga kaliwat. (Roma 5:12) Ingong usa ka hingpit nga tawo, gihalad ni Jesus ang iyang tawhanong kinabuhi, busa nagtaganag lukat nga nagpaposible nga ang matinumanong mga tawo makabaton ug kinabuhing walay kataposan.—11/15, mga panid 5-6.

• Kinsa ang mga Sityanhon nga gihisgotan sa Colosas 3:11?

Ang mga Sityanhon maoy usa ka tiglalin nga nasod sa kapatagan sa Eurasia, nga naghari sukad sa mga 700 ngadto sa 300 W.K.P. Sila maoy hanas nga mga mangangabayo ug manggugubat. Ang Colosas 3:11 mahimong nagpasabot, dili sa usa ka espesipikong nasod, kondili sa kinangil-aran sa dili-sibilisadong katawhan.—11/15, mga panid 24-5.

• Nganong atong ikaingon nga ang Bulawanong Lagda maoy usa ka pagtulon-an nga takos sa atong makanunayong pagtagad?

Kining pasukaranang prinsipyo bahin sa pamatasan gibatbat sa Judaismo, Budhismo, Gregong pilosopiya, ug sa Confucianismo. Apan, ang gitudlo ni Jesus diha sa Wali sa Bukid nagkinahanglag positibong mga lihok, ug kini nakaapektar sa kinabuhi sa mga tawo bisan diin ug sa bisan unsang yugto sa kasaysayan. (Mateo 7:12)—12/1, panid 3.