“Sumala sa Sulti sa mga Tawo Kinsa ba Ako?”

PANAHON na usab sa Pasko. Ang mga tawo sa tibuok kalibotan mipili sa pagsaulog sa usa ka adlawng-natawhan. Kang kinsang adlawng-natawhan? Iyaha sa Anak sa Diyos o iyaha lang sa usa ka debotadong Hudiyo nga determinadong repormahon ang relihiyong naglungtad diha sa iyang lugar sa unang siglo? Kini ba maoy adlawng-natawhan sa usa ka tigpanalipod sa mga kabos, usa ka rebelde nga nakahulga ug dako sa Romanhong Imperyo mao nga siya gipatay o kaha usa ka manggialamon nga nagpasiugda ug kahibalo ug kaalam sa kaugalingon? Ikaw adunay katarongan sa paghunahuna, ‘Kinsa ba gayod si Jesu-Kristo?’

Si Jesus mismo interesado sa tubag sa mga tawo nianang pangutanaha. “Sumala sa sulti sa mga tawo kinsa ba ako?” maoy iyang gipangutana kas-a sa iyang mga tinun-an. (Marcos 8:27) Nganong nangutana man siya? Daghan ang wala na magsunod kaniya. Ang uban dayag nga nalibog ug nahigawad human nga iyang gisalikway ang ilang mga paningkamot nga himoon siyang hari. Dugang pa, sa dihang gihagit sa iyang mga kaaway, si Jesus wala maghatag ug timailhan gikan sa langit sa pagpamatuod kon kinsa siya. Busa sa pagtubag nianang pangutanaha, unsay giingon sa mga apostoles sa kon kinsa siya? Gisulti nila ang pipila sa komon nga mga panglantaw sa mga tawo: “Ang pipila nag-ingon nga si Juan  nga Bawtista, ang uban si Elias, ang uban pa si Jeremias o usa sa mga manalagna.” (Mateo 16:13, 14) Wala na nila isulti ang daghang matamayong mga titulo nga kaylap niadtong tungora sa Palestina bahin kang Jesus—tigpasipala, tigpakaaron-ingnon, mini nga manalagna, bisan buangon.

Ang Daghang Dagway ni Jesus

Kon isukna ni Jesus ang mao gihapong pangutana karon, basin pa ganig iyang usbon kini: “Sumala sa sulti sa mga eskolar kinsa ba ako?” Sa makausa pa, ang mga tubag malagmit mausa ra niining tubaga: Dunay daghang lainlaing mga opinyon. Sumala kang David Tracy sa University of Chicago, ang lainlaing mga tawo may daghang lainlaing mga opinyon ug interpretasyon bahin kang Jesus ug kon unsay iyang gisulti ug gihimo. Sa milabayng siglo, ang mga eskolar naggamit ug daghan kaayong komplikado nga mga metodo sa sosyolohiya, antropolohiya, ug literaryo tungod kay gisulayan nila sa pagmugnag mga tubag sa pangutana kon kinsa ba gayod si Jesus. Ingong resulta sa maong mga metodo, sa ilang hunahuna kinsa ba gayod si Jesus?

Ang pipila ka eskolar nagpadayon sa pag-ingon nga ang Jesus sa kasaysayan maoy usa ka Hudiyong manalagna nga nagsangyaw bahin sa kataposan sa kalibotan ug nag-awhag ug paghinulsol. Apan, naglikay sila sa pagtawag kaniya nga Anak sa Diyos, Mesiyas, ug Manunubos. Giduhaduhaan sa kadaghanan ang asoy sa Bibliya bahin sa iyang langitnong gigikanan ug sa iyang pagkabanhaw. Alang sa uban, si Jesus maoy usa lang ka tawo kinsa pinaagi sa iyang maayong sumbanan sa kinabuhi ug pagtulon-an nagdasig sa daghang relihiyon nga sa ngadtongadto maoy naglangkob sa Kristiyanidad. Ug sumala sa gihisgotan diha sa Theology Today, ang uban pa nag-isip kang Jesus ingong “usa ka tigkantalita, naglibodlibod nga manggialamon, o tinugahang magbabaol; usa nga tig-organisar sa komunidad, usa ka hippie nga magbabalak nga nagsaway sa katilingban, o usa ka maayong laking mangtutukbil nga prangkang nagpahayag sa iyang mga opinyon samtang nag-adto sa mga kabaryohan sa nahilit nga Palestina nga samok, kabos, ug may purohang mosilaob ngadto sa kapintasan.”

Dunay mas talagsaon usab nga mga panglantaw. Ang ideya bahin sa itomong Jesus madungog diha sa musikang rap, makita diha sa publikong mga arte, bisan sa sayaw. a Ang uban nangagpas nga si Jesus sa pagkatinuod maoy usa ka babaye. Sa ting-init sa 1993, ang mga bisita nga miduaw sa Tabo sa Orange County sa California nakakita ug estatwa ni “Christie,” usa ka naghubo, babayeng “Kristo” diha sa krus. Halos sa samang higayon sa New York, gidispley si “Christa”—usa ka babayeng “Jesus” nga gilansang sa krus. Kining duha ka estatwa nakapatunghag dakong kontrobersiya. Ug sa sayong bahin sa 1999, ang mga mamamalit nakakitag libro “bahin sa gugma sa Batang Jesus ug sa iyang iro, si Angel, sa usag usa.” Ang ilang relasyon gihubit ingong “makapatandog sa espirituwal ug nagpakita kon sa unsang paagi ang bata ug ang iro andam sa pagsakripisyo sa ilang mga kinabuhi alang sa usag usa.”

Hinungdanon ba Gayod nga Mahibalo Kon Kinsa si Jesus?

Nganong angay ka man nga maikag sa paghibalo kon kinsa si Jesus kaniadto ug karon? Ang usa ka katarongan mao nga, sa pagkutlo kang Napoleon, “si Jesu-Kristo nag-impluwensiya ug nagmando sa Iyang mga sakop bisag wala Siya diha.” Pinaagi sa iyang puwersadong mga pagtulon-an ug pinaagi sa iyang paagi sa pagkinabuhi, si Jesus kusganong nakaimpluwensiya sa kinabuhi sa bilyonbilyong tawo sa duolan sa duha ka libo ka tuig. Usa ka magsusulat tukma nga miingon: “Sa tanang mga sundalo nga nakamartsa sukad, ug sa tanang mga sundalo sa kadagatan nga natukod sukad, ug sa tanang mga parliamento nga gilingkoran sukad, sa tanang mga hari nga nagmando sukad, bisan pag tiponon wala makaimpluwensiya sa kinabuhi sa tawo niining yutaa sama ka dako sa iyang impluwensiya.”

Dugang pa, kinahanglang mahibalo ka kon kinsa si Jesus kaniadto ug karon tungod kay siya adunay direktang epekto unya sa imong umaabot. Ikaw dunay kahigayonan nga mahimong sakop sa natukod na nga langitnong gobyerno—ang Gingharian sa Diyos ubos ni Jesus. Ang atong gubot nga planeta ipasig-uli unya ngadto sa maanindot nga panagkadaiya sa kalalangan ug ekolohikal nga pagkatimbang ubos sa pagtultol ni Jesus. Ang tagna sa Bibliya nagpasalig kanato nga ang Gingharian ni Jesus magpakaon unya sa mga nalunosan, mag-atiman sa mga kabos, mag-ayo sa mga masakiton, ug magbanhaw sa mga patay.

Tino nga gusto nimong mahibalo kon unsang matanga sa persona ang mangulo sa maong gikinahanglan-pag-ayong gobyerno. Ang sunod nga artikulo motabang kanimo sa pagbaton ug pagsabot bahin sa tinuod nga Jesus.

[Footnote]