Makab-ot ba Gayod ang Katilingban nga Walay Kalainan sa Kahimtang sa Kinabuhi?

SI John Adams, nga nahimong ikaduhang presidente sa Tinipong Bansa, maoy usa sa mipirma sa makasaysayanhong Deklarasyon sa Independensiya, nga naglakip niining nabantog nga mga pulong: “Among gituohan nga dayag kining mga kamatuorana, nga ang tanang tawo gilalang nga managsama.” Bisan pa niana, si John Adams lagmit nagduhaduha kon ang mga tawo managsama ba gayod, kay siya misulat: “Ang pagkadili-managsama sa Hunahuna ug Lawas lig-on kaayong pagkaestablisar sa Diyos nga Labing Gamhanan sa iyang Paghulma sa Tawhanong Kinaiyahan nga wala gayoy batid nga laraw o polisa ang makahimo kanilang managsama.” Sa kasukwahi, ang Britanikong magsusulat sa kasaysayan nga si H. G. Wells naghanduraw ug usa ka katilingban diin ang tanang tawo managsama binase sa tulo ka butang: usa ka tibuok-kalibotang relihiyon nga giambitan sa tanan apan putli ug walay-lama, samang edukasyon alang sa tanan, ug walay armadong mga puwersa.

Hangtod karon, ang kasaysayan wala pa makapatunghag katilingban diin ang tanang tawo  managsama sumala sa gihanduraw ni Wells. Ang mga tawo dili gayod managsama, ug ang mga kalainan sa kahimtang sa kinabuhi naglabi gihapon diha sa katilingban. Ang mao bang mga kalainan sa kahimtang sa kinabuhi nakahatag ug bisan unsang kaayohan ngadto sa katilingban sa katibuk-an? Wala. Ang mga sistema sa mga hut-ong sa katilingban nagbahinbahin sa mga tawo, nga miresulta sa kasina, pagdumot, kasakit, ug daghang pag-ula ug dugo. Ang kanhing panghunahuna nga labaw ang mga puti diha sa Aprika, Australia, ug Amerika del Norte naghatag ug kagul-anan ngadto sa dili mga puti—lakip ang bug-os nga pagkapuo sa mga Aborigine sa Van Diemen’s Land (karon Tasmania). Sa Uropa, ang pagklasipikar sa mga Hudiyo ingong sakop sa ubos nga hut-ong sa katilingban maoy pasiuna sa Holocaust. Ang dakong katigayonan niadtong anaa sa piniling sakop sa katilingban ug ang kawalay-katagbawan taliwala sa ubos ug tungatunga nga mga hut-ong sa katilingban maoy mga hinungdan sa pagbuto sa Rebolusyong Pranses sa ika-18ng siglo ug sa Rebolusyong Bolshevik sa ika-20ng siglo nga Rusya.

Usa ka maalamong tawo sa karaang panahon misulat: “Ang tawo nagmando sa tawo alang sa iyang kadaotan.” (Ecclesiastes 8:9) Tinuod ang iyang gisulti, nagamando man ang mga indibiduwal o kaha ang mga hut-ong sa katilingban. Sa dihang ang usa ka grupo sa mga tawo magtuboy sa kaugalingon ibabaw sa uban, ang kagul-anan ug pag-antos seguradong moresulta.

Atubangan sa Diyos ang Tanang Tawo Managsama

Ang pipila ba ka grupo sa mga tawo kinaiyanhong labaw kay sa ubang mga grupo? Sa panan-aw sa Diyos, dili. Ang Bibliya nag-ingon: “Gihimo [sa Diyos] gikan sa usa ka tawo ang tanang nasod sa katawhan, aron magpuyo ibabaw sa tibuok nawong sa yuta.” (Buhat 17:26) Dugang pa, ang Maglalalang “wala magpihig sa mga prinsipe ug wala maghatag ug labawng pagtagad sa hamili kay sa timawa, kay silang tanan buhat man sa iyang mga kamot.” (Job 34:19) Ang tanang tawo pareho ug gigikanan, ug atubangan sa Diyos ang tanan natawo nga managsama.

Hinumdomi usab nga sa dihang ang usa ka tawo mamatay, ang tanang pangangkon nga siya labaw kay sa uban mahanaw. Ang karaang mga Ehiptohanon wala magtuo niana. Sa dihang mamatay ang usa ka Paraon, magbutang silag mahalong mga butang sa iyang lubnganan aron mapahimuslan niya kini samtang padayon niyang okupahon ang hataas niyang posisyon sa laing kalibotan. Napahimuslan ba niya kini? Wala. Kadaghanan sa maong bahandi kawaton lang, ug daghang butang nga wala makawat makita karon diha sa mga museyo.

Tungod kay patay na siya, dili gayod mapuslan sa Paraon kadtong mahalong mga butang. Inigkamatay, walay taas ug walay ubos nga mga hut-ong sa katilingban, walay adunahan ug walay kabos. Ang Bibliya nag-ingon: “Ang mga maalamon mamatay, ang hungog ug ang walay kabuot mahanaw sa tingob. Ang yutan-ong tawo, bisan pag madungganon, dili makapadayon; siya sama gayod sa mga mananap nga nangamatay.” (Salmo 49:10, 12) Kita mga hari man o mga ulipon, kining inspiradong mga pulong mapadapat kanatong tanan: “Bahin sa mga patay, sila walay nahibaloan nga bisan unsa, ni sila aduna pay suhol . . . Walay buluhaton ni lalang ni kahibalo ni kaalam sa Sheol, ang dapit diin ikaw moadto.”—Ecclesiastes 9:5, 10.

Kitang tanan natawo nga managsama sa mga mata sa Diyos, ug kitang tanan parehong mangamatay. Nan, pagkawalay-pulos nga ituboy ang usa ka grupo sa mga tawo ibabaw sa uban sulod sa atong mubo nga kinabuhi!

Usa ka Katilingban nga Walay Kalainan sa Kahimtang sa Kinabuhi—Makab-ot ba Kini?

Apan, aduna bay bisan unsang paglaom nga sa umaabot may usa ka katilingban taliwala sa mga buhi diin ang kalainan sa kahimtang sa kinabuhi dili na hinungdanon? Oo, aduna. Duolag 2,000 ka tuig kanhi sa dinhi pa si Jesus sa yuta, ang pundasyon gipahiluna na alang sa maong katilingban. Gitugyan ni Jesus ang iyang kinabuhi ingong halad lukat alang sa tanang matinuohong katawhan aron “ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.”—Juan 3:16.

Aron ipakita nga walay usa sa iyang mga sumusunod ang angayng magtuboy sa ilang kaugalingon ibabaw sa mga isigkamagtutuo, si Jesus miingon: “Kamo, ayaw kamo pagpatawag nga Rabbi, kay usa ra ang inyong magtutudlo, samtang kamong tanan mga igsoon. Dugang pa, ayaw ninyo tawgang amahan si bisan kinsa dinhi sa yuta, kay usa ra ang  inyong Amahan, ang langitnong Usa. Ayaw kamo pagpatawag nga ‘mga pangulo,’ kay usa ra ang inyong Pangulo, si Kristo. Apan ang labing dako taliwala kaninyo kinahanglang mahimong inyong alagad. Si bisan kinsa nga magabayaw sa iyang kaugalingon igapaubos.” (Mateo 23:8-12) Sa mga mata sa Diyos, ang tanang matuod nga mga tinun-an ni Jesus managsama diha sa pagtuo.

Gilantaw ba sa unang mga Kristohanon ang ilang kaugalingon nga managsama? Maoy kanay panglantaw niadtong nakasabot sa pagtulon-an ni Jesus. Gilantaw nila ang usag usa nga managsama diha sa pagtuo ug gipakita kana pinaagi sa pagtawag sa usag usa nga “igsoon.” (Filemon 1, 7, 20) Walay usa ang gidasig sa paglantaw sa iyang kaugalingon nga mas maayo kay sa uban. Pananglitan, tagda ang mapainubsanong paagi sa paghubit ni Pedro sa iyang kaugalingon diha sa iyang ikaduhang sulat: “Si Simon Pedro, usa ka ulipon ug apostol ni Jesu-Kristo, alang kanila nga nakabaton ug pagtuo, nga gihuptan ingong pribilehiyo nga sama sa amoa.” (2 Pedro 1:1) Si Pedro gitudloan mismo ni Jesus, ug ingong usa ka apostol, nahuptan niya ang usa ka hinungdanong posisyon sa kaakohan. Bisan pa niana, giisip niya ang iyang kaugalingon nga usa ka ulipon ug nakaamgo nga ang ubang mga Kristohanon naghupot ug samang pribilehiyo diha sa pagtuo nga iyang nabatonan.

Ang uban hayan moingon nga ang prinsipyo sa pagkamanagsama maoy sukwahi sa kamatuoran nga sa wala pa ang Kristohanong kapanahonan gihimo sa Diyos ang Israel nga iyang linaing nasod. (Exodo 19:5, 6) Sila moingon tingali nga kini maoy usa ka pananglitan sa pagkalabaw sa usa ka rasa, apan dili kana ingon niana. Tinuod nga ang mga Israelinhon, ingong mga kaliwat ni Abraham, nakatagamtam ug linaing relasyon uban sa Diyos ug gigamit sila ingong kanal-galamiton sa mga pinadayag gikan sa Diyos. (Roma 3:1, 2) Apan ang katuyoan niadto dili ang pagtuboy kanila ibabaw sa uban. Hinunoa, kadto maoy aron “ang tanang nasod mapanalanginan.”—Genesis 22:18; Galacia 3:8.

Sa kataposan ang kadaghanan sa mga Israelinhon wala mosundog sa pagtuo sa ilang katigulangan nga si Abraham. Wala sila magmatinumanon ug gisalikway nila si Jesus ingong ang Mesiyas. Tungod niana, gisalikway sila sa Diyos. (Mateo 21:43) Apan, ang mga maaghop taliwala sa katawhan wala mapakyas sa pagdawat sa gisaad nga mga panalangin. Sa Pentekostes 33 K.P., ang Kristohanong kongregasyon natukod. Kini nga organisasyon sa mga Kristohanon nga gidihogan sa balaang espiritu gitawag nga “Israel sa Diyos,” ug napamatud-ang mao ang kanal-galamiton nga pinaagi niini moabot ang maong mga panalangin.—Galacia 6:16.

Ang pipila ka membro sa maong kongregasyon kinahanglang edukahon maylabot sa pagkamanagsama. Pananglitan, ang tinun-an nga si Santiago nagtambag niadtong kinsa naghatag sa adunahang mga Kristohanon ug labawng pasidungog kay sa mga kabos. (Santiago 2:1-4) Sayop kadto. Gipakita ni apostol Pablo nga ang Hentil nga mga Kristohanon dili gayod ubos sa Hudiyong mga Kristohanon, ug ang babayeng mga Kristohanon dili gayod ubos sa mga lalaki. Siya misulat: “Sa pagkatinuod, kamong tanan mga anak sa Diyos pinaagi sa inyong pagtuo kang Kristo Jesus. Kay kamong tanan nga nabawtismohan ngadto kang Kristo nagsul-ob na kang Kristo. Walay Hudiyo ni Grego, walay ulipon ni tawong gawasnon, walay lalaki ni babaye; kay kamong tanan usa ka persona nga nahiusa kang Kristo Jesus.”—Galacia 3:26-28.

Usa ka Katawhan Karon nga Walay Kalainan sa Kahimtang sa Kinabuhi

Ang mga Saksi ni Jehova karon naningkamot sa pagkinabuhi uyon sa mga prinsipyo sa Kasulatan. Sila nahibalo nga ang mga hut-ong sa katilingban walay linaing kahulogan sa mga mata sa Diyos. Busa, sila walay klero/layko nga dibisyon, ug sila wala  mabahinbahin sumala sa kolor sa panit o bahandi. Bisag ang pipila kanila bahandianon tingali, sila wala maghatag ug dakong pagtagad sa “mapagawalong pagpasundayag sa mga kahinguhaan sa kinabuhi sa usa,” kay sila nahibalo nga ang maong mga butang lumalabay lamang. (1 Juan 2:15-17) Hinunoa, ang tanan nahiusa pinaagi sa ilang pagsimba sa Unibersohanong Soberano, si Jehova nga Diyos.

Ang matag usa kanila nagadawat sa kaakohan nga makigbahin sa buluhatong pagsangyaw sa maayong balita sa Gingharian ngadto sa iyang isigkatawo. Sama kang Jesus, gipasidunggan nila ang mga dinaogdaog ug sinalikway pinaagi sa pagduaw kanila diha sa ilang mga pinuy-anan, nga nagtanyag nga tudloan sila sa Pulong sa Diyos. Kadtong ubos ug kahimtang sa kinabuhi nakigtambayayong niadtong kinsa giisip tingali sa pipila nga anaa sa hataas nga hut-ong sa katilingban. Ang espirituwal nga mga hiyas maoy mahinungdanon, dili ang hut-ong sa katilingban. Sama sa unang siglo, ang tanan managsoon diha sa pagtuo.

Dunay Kadaiyahan Diha sa Pagkamanagsama

Dayag nga ang pagkamanagsama wala magkahulogan nga pareho sila sa tanang butang. Anaay mga lalaki ug babaye, tigulang ug bata, niining Kristohanong organisasyon nga naglakip sa mga tawo gikan sa nagkadaiya kaayong rasa, pinulongan, nasod, ug kahimtang sa ekonomiya. Ingong mga indibiduwal, sila lainlaig mental ug pisikal nga mga katakos. Apan ang maong mga kalainan wala maghimo sa pipila nga labaw o sa uban nga ubos. Hinuon, ang maong kalainan miresulta sa usa ka makapahimuot nga kadaiyahan. Ang maong mga Kristohanon nakaamgo nga ang bisan unsang mga abilidad nga ilang nabatonan maoy mga gasa gikan sa Diyos ug dili basehanan nga sila mobating labaw.

Ang pagkabahinbahin tungod sa kahimtang sa kinabuhi maoy resulta sa pagpaningkamot sa tawo nga mandoan ang kaugalingon inay sundon ang giya sa Diyos. Sa dili madugay, ang Gingharian sa Diyos mopuli sa adlaw-adlawng pagmando dinhi sa yuta, ug ang resulta mao ang kataposan sa hinimo-sa-tawo nga mga kalainan sa kahimtang sa kinabuhi, lakip sa ubang mga butang nga maoy nakaingon sa pag-antos sulod sa dugayng panahon. Unya, sa tinuod nga diwa, ‘ang maaghop makapanag-iya sa yuta.’ (Salmo 37:11) Ang tanang katarongan sa pagpanghambog mahitungod sa giisip sa usa nga pagkalabaw mahanaw na. Ang mga hut-ong sa katilingban dili na gayod tugotan sa pagbahinbahin sa tibuok-kalibotang panag-igsoonay sa tawo.

[Blurb sa panid 5]

Ang Maglalalang “wala maghatag ug labawng pagtagad sa hamili kay sa timawa, kay silang tanan buhat man sa iyang mga kamot.”—Job 34:19.

[Hulagway sa panid 6]

Ang mga Saksi ni Jehova nagpakitag pagtahod sa ilang mga silingan

[Mga hulagway sa panid 7]

Ang espirituwal nga mga hiyas mao ang mahinungdanon taliwala sa matuod nga mga Kristohanon