Mga Ansiyano—Bansaya ang Uban sa Pagpas-an sa Luwan

DIHA sa mga kongregasyon sa mga Saksi ni Jehova sa tibuok kalibotan, adunay dinaliang panginahanglan alang sa mga lalaki nga makaalagad sa mga katungdanan sa pagkamagtatan-aw. Adunay tulo ka dagkong katarongan alang niini nga kaugmaran.

Una, ginatuman ni Jehova ang iyang saad nga himoon ang ‘gamay nga usa ka gamhanang nasod.’ (Isaias 60:22) Pinaagi sa iyang dili-takos nga kalulot, duolag usa ka milyon ka bag-ong mga tinun-an ang nabawtismohan ingong mga Saksi ni Jehova sa miaging tulo ka tuig. Gikinahanglan ang responsableng mga lalaki aron tabangan kining bag-ong mga nabawtismohan nga mouswag ngadto sa Kristohanong pagkahamtong.—Hebreohanon 6:1.

Ikaduha, pipila sa nag-alagad ingong mga ansiyano sulod sa mga dekada napugos sa pagpakunhod sa ilang gipas-an nga buluhaton diha sa kongregasyon tungod sa katigulangon o mga suliran sa panglawas.

Ikatulo, ubay-ubay sa masibotong Kristohanong mga ansiyano nag-alagad na karon ingong mga membro sa mga Hospital Liaison Committee, Regional Building Committee, o Assembly Hall Committee. Diha sa pipila ka kaso kinahanglan nilang balansehon ang ilang nagkalainlaing mga kaakohan pinaagi sa paghiklin sa labing menos pipila sa ilang mga kaakohan diha sa ilang lokal nga kongregasyon.

Sa unsang paagi matagan-an kining dinaliang panginahanglan alang sa dugang kuwalipikadong mga lalaki? Ang pagbansay mao ang tubag sa panginahanglan. Ang Bibliya nagdasig sa Kristohanong mga magtatan-aw nga bansayon ang “matinumanong mga tawo, nga, sa baylo, makabaton ug igong katakos sa pagpanudlo sa uban.” (2 Timoteo 2:2) Sumala sa usa ka diksiyonaryo, ang berbo nga “pagbansay” nagkahulogan ug “pagtudlo aron mahimong angayan, kuwalipikado, o hanas.” Atong tagdon kon sa unsang paagi bansayon sa mga ansiyano ang ubang kuwalipikadong mga lalaki.

Sundoga ang Panig-ingnan ni Jehova

Walay duhaduha nga si Jesu-Kristo maoy ‘angayan, kuwalipikado, ug hanas’ gayod sa iyang buluhaton! Gibansay siya ni Jehova nga Diyos mismo. Unsang mga bahina ang nagpahimo niini nga programa sa pagbansay nga epektibo kaayo? Gihisgotan ni Jesus ang tulo, sumala sa natala diha sa Juan 5:20: “Ang Amahan [1] nagmahal sa Anak ug [2] nagpakita kaniya sa tanang butang nga iyang ginabuhat, ug siya magpakita kaniya ug [3] mga buhat nga labaw pa niini.” Ang pagsusi sa matag usa niining mga bahina maghatag ug pagsabot sa ulohan labot sa pagbansay.

Matikdi nga si Jesus miingon una: “Ang Amahan nagmahal sa Anak.” Sukad pa sa sinugdanan sa paglalang, ang usa ka mainiton nga bugkos ang naglungtad tali kang Jehova ug sa iyang Anak. Ang Proverbio 8:30 nagpatin-aw nianang relasyona: “Unya didto ako [Jesus] tupad kaniya [Jehova nga Diyos] ingon nga batid nga magbubuhat, ug ako iyang gikahinangpan pag-ayo sa matag adlaw, ako nagakalipay sa iyang atubangan sa tanang panahon.” Wala magduhaduha si Jesus nga si Jehova ‘nahinangop pag-ayo’ kaniya. Ug wala itago ni Jesus ang kalipay nga iyang gibati samtang nagbuhat tupad sa iyang Amahan. Pagkamaayo gayod kon ang mainiton, maayo nga relasyon maglungtad tali sa Kristohanong mga ansiyano ug niadtong ilang ginabansay!

Ang ikaduhang bahin nga gihisgotan ni Jesus mao nga ang Amahan “nagpakita kaniya sa tanang butang nga iyang ginabuhat.” Kining mga pulonga nagpalig-on sa gipahayag sa Proverbio 8:30, nga mao, si Jesus didto “tupad” kang Jehova sa dihang gilalang ang uniberso. (Genesis 1:26) Masundog sa mga ansiyano kanang maayo kaayong panig-ingnan pinaagi sa suod nga pagbuhat uban sa ministeryal nga mga alagad, nga magpakita kanila kon unsaon pagtuman ang ilang mga katungdanan uban ang igong katakos. Hinunoa, ang bag-ong natudlong ministeryal nga mga alagad dili lang mao  ang nanginahanglan ug mauswagong pagbansay. Komosta man kadtong matinumanong mga igsoong lalaki nga nangab-ot sa katungdanan sa pagkamagtatan-aw sulod na sa daghang tuig apan wala pa gihapon matudlo? (1 Timoteo 3:1) Angayng hatagan sa mga ansiyano ug espesipikong tambag ang maong mga lalaki aron ilang mahibaloan kon unsang mga bahina ang kinahanglan nilang pauswagon.

Pananglitan, ang usa tingali ka ministeryal nga alagad mahimong kasaligan, sayong moabot, ug matinud-anon sa pag-atiman sa iyang mga katungdanan. Siya usab tingali usa ka maayong magtutudlo. Sa daghang bahin mahimong maayo kaayo ang iyang ginabuhat diha sa kongregasyon. Apan, wala niya tingali maamgohi nga siya diay mapig-oton sa iyang pagpakiglabot sa iyang mga isigka-Kristohanon. Ang mga ansiyano angayng magpasundayag ug “kalumo nga iya sa kaalam.” (Santiago 3:13) Dili ba maluloton man nga ang ansiyano makig-estorya sa ministeryal nga alagad, nga tin-awng maghisgot sa problema, nga maghatag ug espesipikong mga pananglitan, ug maghimog praktikal nga mga sugyot alang sa pag-uswag? Kon ang ansiyano maampingong ‘magtimpla sa iyang tambag ug asin,’ ang iyang mga obserbasyon lagmit dawaton pag-ayo. (Colosas 4:6) Siyempre, ang ministeryal nga alagad makahimo sa buluhaton sa ansiyano nga labi pang makapalipay kon siya andam maminaw ug madinawaton sa bisan unsang tambag nga iyang madawat.—Salmo 141:5.

Sa pipila ka kongregasyon, ang mga ansiyano nagahatag ug praktikal, makanunayon nga pagbansay sa ministeryal nga mga alagad. Pananglitan, iuban nila ang kuwalipikadong ministeryal nga mga alagad sa dihang sila moduaw sa may sakit o sa tigulang nga igsoon. Niining paagiha ang ministeryal nga mga alagad makakuhag kasinatian diha sa buluhaton nga iya sa magbalantay. Aw, duna pay daghang mahimo ang ministeryal nga alagad aron palamboon ang kaugalingon niyang espirituwal nga pag-uswag.—Tan-awa ang kahon sa ubos nga nag-ulohang “Kon Unsay Mahimo sa Ministeryal nga mga Alagad.”

Ang ikatulong bahin nga naghimo sa pagbansay ni Jesus nga epektibo kaayo mao nga gibansay siya ni Jehova nga naghunahuna sa pag-uswag sa umaabot. Si Jesus miingon maylabot sa Amahan nga gipakita niya sa Anak ang “mga buhat nga labaw pa niini.” Ang kasinatian nga nabatonan ni Jesus sa dihang dinhi sa yuta nagpaarang kaniya sa pag-ugmad sa mga hiyas nga iyang gikinahanglan sa pagtuman sa umaabot nga mga asaynment. (Hebreohanon 4:15; 5:8, 9) Pananglitan, pagkabug-at nga asaynment ang pagadawaton unya ni Jesus—ang pagbanhaw ug paghukom sa bilyonbilyong tawo nga nangamatay karon!—Juan 5:21, 22.

Sa dihang magbansay sa ministeryal nga mga alagad, ang mga ansiyano karon angayng maghunahuna sa umaabot nga mga panginahanglan. Bisan tuod aduna tingaliy igong mga ansiyano ug ministeryal nga mga alagad nga moatiman sa mga panginahanglan sa pagkakaron, aduna ba kahay igong mga ansiyano ug ministeryal nga mga alagad kon matukod ang usa ka bag-ong kongregasyon? Kon matukod ang daghang kongregasyon? Sulod sa milabayng tulo ka tuig, may kapin sa 6,000 ka bag-ong mga kongregasyon sa tibuok kalibotan. Pagkadaghang ansiyano ug ministeryal nga mga alagad ang gikinahanglan aron atimanon kanang bag-ong mga kongregasyon!

Mga ansiyano, gisundog ba ninyo ang panig-ingnan ni Jehova pinaagi sa pag-ugmad ug mainitong  personal nga relasyon uban sa mga lalaki nga inyong ginabansay? Gipakita ba ninyo kanila kon unsaon sa pagtuman sa ilang buluhaton? Mahunahunaon ba kamo sa mga panginahanglan sa umaabot? Ang pagsundog sa panig-ingnan ni Jehova sa iyang pagbansay kang Jesus moresulta ug dagayang mga panalangin alang sa daghan.

Ayaw Pagpanuko sa Pagtugyan

Ang takos nga mga ansiyano nga naanad na sa pagdumalag daghang bug-at nga mga asaynment mahimong magpanuko sa pagtugyan sa awtoridad ngadto sa uban. Mahimo tingaling nasulayan na nila kini sa miagi apan walay maayong mga resulta. Busa sagopon tingali nila ang tinamdan nga ‘Kon buot nimong maayong pagkabuhat ang trabaho, ikaw na lay buhat niana.’ Apan kini nga tinamdan nahiuyon ba sa kabubut-on ni Jehova, sumala sa gisulti sa Kasulatan, nga ang dili-kaayo eksperyensiyadong mga lalaki bansayon nilang mas eksperyensiyado?—2 Timoteo 2:2.

Nahigawad si apostol Pablo dihang usa sa iyang mga kauban sa panaw, si Juan Marcos, mibiya sa iyang asaynment didto sa Pamfilia ug mipauli. (Buhat 15:38, 39) Hinunoa, wala tugoti ni Pablo ang maong kapakyasan nga magpaluya kaniya sa pagbansay sa uban. Mipili siyag laing batan-ong igsoon, si Timoteo, ug nagbansay kaniya diha sa misyonaryong buluhaton. a (Buhat 16:1-3) Didto sa Berea nahibalag sa mga misyonaryo ang grabeng pagsupak nga dili na praktikal alang kang Pablo nga magpabilin didto. Busa gibiyaan niya ang bag-ong kongregasyon nga giatiman ni Silas, usa ka hamtong nga edarang igsoon, ug ni Timoteo. (Buhat 17:13-15) Walay duhaduha nga daghag nakat-onan si Timoteo gikan kang Silas. Sa ulahi, dihang andam na si Timoteo sa pagdawat ug dugang responsabilidad, gipadala siya ni Pablo sa Tesalonica aron dasigon ang kongregasyon didto.—1 Tesalonica 3:1-3.

Ang relasyon tali ni Pablo ug Timoteo dili kay walay pagpakabana o walay kadasig. Adunay mainitong bugkos tali kanila. Sa dihang nagsulat ngadto sa kongregasyon sa Corinto, si Pablo nagtumong kang Timoteo, kinsa giplanohan niyang ipadala didto, ingong iyang “hinigugma ug matinumanong anak diha sa Ginoo.” Siya midugang: “Ibutang [ni Timoteo] sa inyong hunahuna ang akong mga pamaagi labot kang Kristo Jesus.” (1 Corinto 4:17) Misanong si Timoteo sa pagbansay nga iyang nadawat gikan kang Pablo, nga nahimong kuwalipikado sa pagtuman sa iyang mga asaynment. Daghang batan-ong mga igsoong lalaki ang nahimong takos nga ministeryal nga alagad, ansiyano, o bisan nagapanawng magtatan-aw tungod kay nakabenepisyo siya gikan sa pagbansay nga iyang nadawat gikan sa mahunahunaong mga ansiyano nga nagpakitag tiunayng interes kaniya, sama sa gipakita ni Pablo ngadto kang Timoteo.

Mga Ansiyano, Bansaya ang Uban!

Sa walay duhaduha, ang tagna sa Isaias 60:22 nagakatuman karon. Si Jehova nagahimo sa ‘gamay nga usa ka gamhanang nasod.’ Aron magpabiling ‘gamhanan’ ang maong nasod, kinahanglan organisado kaayo kini. Mga ansiyano, nganong dili konsiderahon ang mga paagi aron ang dugang pagbansay ikahatag ngadto sa dedikadong mga lalaki nga kuwalipikadong modawat niana? Paneguroa nga ang matag ministeryal nga alagad nahibalo pag-ayo sa bisan unsang kausaban nga angay niyang himoon aron mouswag. Ug kamong mga bawtismadong mga lalaki, pahimusli ang bisan unsang personal nga atensiyon nga inyong madawat. Pahimusli ang mga kahigayonan sa pagpauswag sa inyong katakos, kahibalo, ug kasinatian. Si Jehova tinong magapanalangin sa maong kahikayan sa mahigugmaong tabang.—Isaias 61:5.

[Footnote]

[Kahon sa panid 30]

Kon Unsay Mahimo sa Ministeryal nga mga Alagad

Samtang ang mga ansiyano angayng motagana sa pagbansay alang sa ministeryal nga mga alagad, dunay daghang mahimo ang ministeryal nga mga alagad sa pagpauswag sa kaugalingon nilang espirituwal nga paglambo.

—Ang ministeryal nga mga alagad kinahanglang kugihan ug kasaligan sa pag-atiman sa ilang mga asaynment. Angay usab nilang ugmaron ang maayong batasan sa pagtuon. Sa igoigong sukod, ang pag-uswag nag-agad sa pagtuon ug pagpadapat sa mga butang nakat-onan.

—Sa dihang ang usa ka ministeryal nga alagad mangandam sa paghatag ug pakigpulong diha sa usa ka Kristohanong tigom, siya dili angayng magpanuko sa pagpangutana sa takos nga ansiyano alang sa mga sugyot kon unsaon pagpresentar sa materyal.

—Ang ministeryal nga alagad mahimo usab nga mangutana sa usa ka ansiyano nga matikdan siya kon giunsa niya paghatag ang pakigpulong pinasukad sa Bibliya ug maghatag ug tambag alang sa pagpauswag.

Ang ministeryal nga mga alagad angayng mangita, modawat, ug mopadapat sa tambag gikan sa mga ansiyano. Nianang paagiha, ang ilang pag-uswag “madayag sa tanan nga mga tawo.”—1 Timoteo 4:15.