Ang Maayong mga Buhat Nagahimaya sa Diyos

PINAAGI sa ilang maayong panggawi ug sulondang mga buhat, ang matuod nga mga Kristohanon naghatag ug himaya sa Diyos. (1 Pedro 2:12) Makita kini sa nahitabo sa Italya sa dili pa dugayng katuigan.

Sa Septiyembre 1997, usa ka kusog kaayong linog ang mitay-og sa lainlaing mga rehiyon sa Marche ug Umbria, nga nakaguba ug halos 90,000 ka balay. Ang mga grupo sa mga Saksi ni Jehova dihadihang mitabang sa ilang mga isigkamagtutuo ug sa uban. Dihay gisuplay nga mga treyler, katulganan, kosinilya, generitor, ug uban pang gikinahanglang mga butang. Kining maong mga paningkamot sa paghatag ug hinabang namatikdan.

Ang mantalaang Il Centro mitaho: “Ang unang miabot nga nagdalag mga suplay sa hinabang diha sa naapektohang mga dapit mao ang mga Saksi ni Jehova sa Roseto [sa probinsiya sa Teramo] . . . Gawas nga magtigom matag karon ug unya aron mag-ampo, kadtong mga matinumanon kang Jehova nagalihok sa praktikal nga paagi, nga nagtabang niadtong nag-antos, nga wala manumbaling kon unsay relihiyon sa ilang gitabangan.”

Ang mayor sa Nocera Umbra, usa sa mga lungsod nga naapektohan pag-ayo, misulat ngadto sa mga Saksi: “Personal ug kinasingkasing ako nga nagapasalamat kaninyo tungod sa inyong gitanyag nga tabang sa molupyo sa Nocera. Nakaseguro ako nga akong napahayag ang pagbati sa tanang lungsoranon niini.” Dugang pa, gigantihan sa Ministry of Interior ang Congregazione Cristiana dei Testimoni di Geova (Kristohanong Kongregasyon sa mga Saksi ni Jehova) ug usa ka sertipiko sa pasidungog ug usa ka medalya “sa pagpamatuod sa buluhatong nahimo ug kakugi nga gipakita diha sa mga kalihokan maylabot sa emerhensiya nga mitungha sa mga rehiyon sa Umbria ug Marche.”

Sa Oktubre 2000, mihapak ang usa ka malaglagong baha sa rehiyon sa Piedmont sa amihanang Italya. Sa makausa pa, milihok dayon ang mga Saksi sa paghatag ug hinabang. Kining maayong mga buhat namatikdan usab. Gigantihan sila sa Rehiyon sa Piedmont ug usa ka plake alang sa ilang “bililhong buluhaton sa pagboluntaryo aron tabangan ang mga molupyo sa Piedmont nga naapektohan sa baha.”

Gisultihan ni Jesu-Kristo ang iyang mga tinun-an: “Palamdaga ang inyong kahayag atubangan sa mga tawo, aron ilang makita ang inyong maayong mga buhat ug maghimaya sa inyong Amahan nga anaa sa mga langit.” (Mateo 5:16) Ang mga Saksi ni Jehova malipayon nga nagahimaya sa Diyos, dili sa ilang kaugalingon, pinaagi sa paghimo sa “maayong mga buhat” nga makatabang sa ilang mga isigkatawo sa espirituwal ug sa ubang mga paagi.