Magpadayon sa Pagpasundayag sa Pagkamaayo
Magpadayon sa Pagpasundayag sa Pagkamaayo
“Ang mga bunga sa kahayag naglangkob sa tanang matang sa pagkamaayo ug pagkamatarong ug kamatuoran.”—EFESO 5:9.
1. Sa unsang paagi ang milyonmilyon karon nagpakita nga sila mouyon sa Salmo 31:19?
ANG labing dalayegong butang nga mahimo ni bisan kinsang tawo mao ang paghimaya kang Jehova. Karong adlawa, milyonmilyon nagahimo niini pinaagi sa pagdayeg sa Diyos tungod sa iyang pagkamaayo. Isip maunongong mga Saksi ni Jehova, kita bug-os kasingkasing nga mouyon sa salmista nga miawit: “Pagkadagaya sa imong pagkamaayo, nga imong gitipigan alang niadtong nangahadlok kanimo!”—Salmo 31:19.
2, 3. Unsay mahimong mahitabo kon ang atong buluhaton sa paghimog tinun-an dili suportadog maayong panggawi?
2 Ang masimbahong pagkahadlok kang Jehova motukmod kanato sa pagdayeg kaniya tungod sa iyang pagkamaayo. Kini motukmod usab kanato nga ‘dayegon si Jehova, dayegon siya, ug ipahibalo ang himaya sa iyang pagkahari.’ (Salmo 145:10-13) Kana ang hinungdang kita masibotong nagpakig-ambit sa buluhaton sa pagwali sa Gingharian ug paghimog tinun-an. (Mateo 24:14; 28:19, 20) Siyempre, ang atong buluhaton sa pagwali kinahanglang suportadog maayong panggawi. Kon dili, makapasipala kita sa balaang ngalan ni Jehova.
3 Daghang tawo nag-angkon nga nagsimba sila sa Diyos, apan ang ilang panggawi wala mahiuyon sa mga sukdanang gipahayag diha sa iyang inspiradong Pulong. Mahitungod sa pipilang wala magagawi segun sa ilang mga pangangkon nga nagbuhat silag maayo, si apostol Pablo misulat: “Ikaw , . . . nga nagatudlo sa uban, dili magtudlo sa imong kaugalingon? Ikaw nga nagawali nga ‘Ayaw pangawat,’ nagapangawat ka ba? Ikaw nga nagaingon ‘Ayaw panapaw,’ nagapanapaw ka ba? . . . ‘Ang ngalan sa Diyos gipasipalahan tungod kaninyo taliwala sa kanasoran’; ingon sa nahisulat.”—Roma 2:21, 22, 24.
4. Unsa ang epekto sa atong maayong panggawi?
4 Inay magpasipala sa ngalan ni Jehova, maningkamot kita sa paghimaya niini pinaagi sa atong maayong panggawi. Maayo kinig epekto nganha sa mga tawo sa gawas sa Kristohanong kongregasyon. Sa usa ka butang, makatabang kini kanato sa pagpahilom sa atong mga magsusupak. (1 Pedro 2:15) Mas hinungdanon, ang atong maayong panggawi makapadani sa mga tawo nganha sa organisasyon ni Jehova, nga mabuksan ang dalan aron sila maghimaya kaniya ug makabatog kinabuhing walay kataposan.—Buhat 13:48.
5. Unsang mga pangutana ang angay natong hisgotan karon?
5 Sanglit dili man kita hingpit, sa unsang paagi makalikay kita sa panggawi nga makadaot sa dungog ni Jehova ug makapandol sa mga nangita sa kamatuoran? Sa pagkamatuod, sa unsang paagi molampos kita sa pagpasundayag sa pagkamaayo?
Usa ka Bunga sa Kahayag
6. Unsa ang pipila sa “dili-mabungahong mga buhat nga iya sa kangitngit,” apan unsang mga bunga ang angayng madayag taliwala sa mga Kristohanon?
6 Isip dedikadong mga Kristohanon, gipahimuslan nato ang butang nga makatabang kanato sa paglikay sa “dili-mabungahong mga buhat nga iya sa kangitngit.” Kini naglakip sa mga buhat nga makapasipala sa Diyos sama sa pagbakak, pagpangawat, mapasipalahong sinultihan, mangil-ad nga paghisgot bahin sa sekso, makauulaw nga panggawi, malaw-ay nga pagpanistis, ug paghuboghubog. (Efeso 4:25, 28, 31; 5:3, 4, 11, 12, 18) Inay malangkit sa maong mga buhat, kita “magpadayon sa paglakaw ingon nga mga anak sa kahayag.” Si apostol Pablo nag-ingon nga “ang mga bunga sa kahayag naglangkob sa tanang matang sa pagkamaayo ug pagkamatarong ug kamatuoran.” (Efeso 5:8, 9) Busa pinaagi sa paglakaw diha sa kahayag kita makapadayon sa pagpasundayag sa pagkamaayo. Apan unsang matanga kini sa kahayag?
7. Unsay kinahanglang atong himoon aron magpadayon sa pagpasundayag sa bunga sa pagkamaayo?
7 Bisan pa sa atong mga kadili-hingpit, kita makapasundayag sa pagkamaayo kon kita magalakaw diha sa espirituwal nga kahayag. “Ang imong pulong maoy lampara sa akong tiil, ug kahayag sa akong alagianan,” miawit ang salmista. (Salmo 119:105) Kon buot natong magpadayon sa pagpasundayag sa “mga bunga sa kahayag” pinaagi sa “tanang matang sa pagkamaayo,” kinahanglang atong pahimuslan kanunay ang espirituwal nga kahayag nga makaplagan diha sa Pulong sa Diyos, nga gituki pag-ayo diha sa Kristohanong mga publikasyon, ug gihisgotang regular panahon sa atong mga tigom alang sa pagsimba. (Lucas 12:42; Roma 15:4; Hebreohanon 10:24, 25) Kinahanglang atong hatagan usab ug linaing pagtagad ang panig-ingnan ug mga pagtulon-an ni Jesu-Kristo, “ang kahayag sa kalibotan” ug “ang aninag sa himaya [ni Jehova].”—Juan 8:12; Hebreohanon 1:1-3.
Usa ka Bunga sa Espiritu
8. Nganong makapasundayag man kita sa pagkamaayo?
8 Ang espirituwal nga kahayag sa walay duhaduha motabang kanato sa pagpasundayag sa pagkamaayo. Dugang pa, kita makapasundayag niining hiyasa tungod kay kita giagak sa balaang espiritu o aktibong puwersa sa Diyos. Ang pagkamaayo maoy bahin sa “bunga sa espiritu.” (Galacia 5:22, 23) Kon kita magpailalom sa paggiya sa balaang espiritu ni Jehova, ipatungha niini diha kanato ang kahibulongang bunga niini sa pagkamaayo.
9. Sa unsang paagi makalihok kita nga nahiuyon sa mga pulong ni Jesus nga nahitala sa Lucas 11:9-13?
9 Ang atong idlot nga tinguha nga pahimut-an si Jehova pinaagi sa pagpasundayag sa bunga sa espiritu sa pagkamaayo angayng magtukmod kanato nga molihok nga nahiuyon sa mga pulong ni Jesus: “Padayon sa pagpangayo, ug kini igahatag kaninyo; padayon sa pagpangita, ug kamo makakaplag; padayon sa pagpanuktok, ug kini pagabuksan kaninyo. Kay ang matag usa nga nagapangayo magadawat, ug ang matag usa nga nagapangita makakaplag, ug sa matag usa nga nagapanuktok kini pagabuksan. Sa pagkatinuod, kinsang amahana taliwala kaninyo nga, kon ang iyang anak mangayog isda, tingali maghatag kaniyag serpente inay isda? O kon siya usab mangayog itlog, hatagan siyag tanga? Busa, kon kamo, bisan tuod [dili hingpit ug busa sa relatibong paagi] daotan, mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan sa langit mohatag ug balaang espiritu niadtong nagapangayo kaniya!” (Lucas 11:9-13) Atong sundon ang tambag ni Jesus pinaagi sa pag-ampo alang sa espiritu ni Jehova aron kita makapadayon sa pagpasundayag sa bunga niining pagkamaayo.
“Magpadayon sa Pagbuhat ug Maayo”
10. Unsang mga bahin sa pagkamaayo ni Jehova ang gihisgotan sa Exodo 34:6, 7?
10 Tungod sa espirituwal nga kahayag gikan sa Pulong sa Diyos ug sa tabang sa balaang espiritu sa Diyos, kita ‘makapadayon sa pagbuhat ug maayo.’ (Roma 13:3) Pinaagig regular nga pagtuon sa Bibliya, mas daghan ug mas daghan ang atong makat-onan bahin sa kon sa unsang paagi makasundog kita sa pagkamaayo ni Jehova. Ang nag-unang artikulo naghisgot sa mga bahin sa pagkamaayo sa Diyos nga nahisgotan diha sa pahayag ngadto kang Moises nga nahitala sa Exodo 34:6, 7, diin atong mabasa: “Si Jehova, si Jehova, usa ka Diyos nga maluluy-on ug mapuangoron, mahinay sa kasuko ug dagaya sa mahigugmaong-kalulot ug kamatuoran, nagatipig ug mahigugmaong-kalulot alang sa linibo, nagapasaylo ug kasaypanan ug kalapasan ug sala, apan dili gayod magpahigawas gikan sa silot.” Ang mas dakong pagtuki sa maong mga bahin sa pagkamaayo ni Jehova makatabang nato nga “magpadayon sa pagbuhat ug maayo.”
11. Sa unsang paagi angay kitang maapektahan sa kahibalo nga si Jehova maoy maluluy-on ug mapuangoron?
11 Kining pahayag sa Diyos mopaigmat kanato nga kinahanglang atong sundogon si Jehova pinaagi sa pagkahimong maluluy-on ug mapuangoron. “Malipayon ang maluluy-on,” matod ni Jesus, “sanglit sila pakitaan ug kaluoy.” (Mateo 5:7; Lucas 6:36) Kay nahibalo nga si Jehova maoy mapuangoron, matukmod kita nga mahimong mapuangoron ug maayohon diha sa atong mga pagtagad sa uban, lakip kadtong atong gisangyawan. Kini nahiuyon sa tambag ni Pablo: “Himoa ang inyong sinultihan nga kanunayng madanihon, tinimplahan ug asin, aron mahibaloan ninyo kon unsaon pagtubag sa matag usa.”—Colosas 4:6.
12. (a) Sanglit ang Diyos mahinay sa kasuko, unsaon nato pagtagad ang uban? (b) Ang mahigugmaong-kalulot ni Jehova motukmod kanato sa pagbuhat sa unsa?
12 Sanglit ang Diyos mahinay sa kasuko, ang atong tinguha nga “magpadayon sa pagbuhat ug maayo” motukmod kanato sa pag-antos sa ginagmayng mga kasaypanan sa mga isigkamagtutuo ug pagpunting sa hunahuna diha sa ilang maayong mga hiyas. (Mateo 7:5; Santiago 1:19) Ang mahigugmaong-kalulot ni Jehova motukmod kanato sa pagpasundayag ug maunongong gugma, bisan ilalom sa labing masulayong mga kahimtang. Kini maoy tilinguhaon gayod.—Proverbio 19:22.
13. Unsay angay natong buhaton sa pagpaaninag nga si Jehova maoy ‘dagaya sa kamatuoran’?
13 Sanglit ang atong langitnong Amahan ‘dagaya sa kamatuoran,’ kita matinguhaon nga ‘irekomendar ang atong kaugalingon ingong iyang mga ministro pinaagi sa matinud-anong sinultihan.’ (2 Corinto 6:3-7) Nahilakip sa pito ka butang nga dulumtanan kang Jehova mao ang “bakakon nga dila” ug “usa ka bakakong saksi nga nagasabwag ug kabakakan.” (Proverbio 6:16-19) Busa ang atong tinguha sa pagpahimuot sa Diyos nagtukmod kanato nga ‘isalikway ang kabakakan ug isulti ang tinuod.’ (Efeso 4:25) Hinaot dili gayod kita mapakyas sa pagpasundayag sa pagkamaayo niining hinungdanong paagi.
14. Nganong angayng kita magmapinasayloon?
14 Ang pahayag sa Diyos ngadto kang Moises angayng motukmod usab kanato nga magmapinasayloon, kay si Jehova andam magpasaylo. (Mateo 6:14, 15) Siyempre, si Jehova magpahamtang ug silot diha sa dili-mahinulsolong mga makasasala. Busa kinahanglang atong ituboy ang iyang mga sukdanan sa pagkamaayo kon bahin sa paghupot sa espirituwal nga kahinlo sa kongregasyon.—Levitico 5:1; 1 Corinto 5:11, 12; 1 Timoteo 5:22.
“Pagbantay Pag-ayo”
15, 16. Sa unsang paagi ang tambag ni Pablo nga nahitala sa Efeso 5:15-19 motabang kanato nga magpadayon sa pagbuhat ug maayo?
15 Aron makapadayon sa pagpasundayag sa pagkamaayo bisan pa sa kadaotan alirong kanato, kinahanglang mahupong kita sa espiritu sa Diyos ug magbantay sa atong paglakaw. Uyon niana, si Pablo miawhag sa mga Kristohanon sa Efeso: “Pagbantay pag-ayo nga ang inyong paglakaw dili ingon sa dili-maalamon kondili ingon sa maalamon nga mga tawo, nga magapalit sa nahiangay nga panahon alang sa inyong kaugalingon, tungod kay ang mga adlaw daotan. Tungod niini hunong na sa pagkahimong dili-makataronganon, hinunoa padayong sabta kon unsa ang kabubut-on ni Jehova. Dugang pa, ayaw kamo pagkahubog sa bino, nga niini adunay unodnong pagpatuyang, kondili magmapuno sa espiritu, nga magasulti taliwala ninyo sa mga salmo ug sa mga pagdayeg sa Diyos ug sa espirituwal nga mga awit, nga magaawit ug magaduyog sa inyong kaugalingon uban sa honi diha sa inyong mga kasingkasing ngadto kang Jehova.” (Efeso 5:15-19) Kining tambaga tinong nahiangay alang kanato niining makuyaw nga kataposang mga adlaw.—2 Timoteo 3:1.
16 Aron makapadayon kita sa pagbuhat ug maayo, kinahanglang magpadayon kita sa pagbantay pag-ayo nga kita magalakaw ingon sa mga nagpasundayag sa kaalam sa Diyos. (Santiago 3:17) Kinahanglang likayan nato ang dagkong mga sala ug mahupong sa balaang espiritu, nga magpagiya kita niana. (Galacia 5:19-25) Pinaagi sa pagpadapat sa espirituwal nga instruksiyon nga ginapahayag panahon sa Kristohanong mga tigom, mga asembliya, ug mga kombensiyon, kita makapadayon sa pagbuhat ug maayo. Ang mga pulong ni Pablo ngadto sa mga taga-Efeso makapahinumdom usab kanato nga panahon sa kadaghanan natong mga tigom sa pagsimba, makabaton kitag kaayohan gikan sa atong kinasingkasing nga pag-awit sa “espirituwal nga mga awit”—nga daghan niana naghisgot sa espirituwal nga mga hiyas, sama sa pagkamaayo.
17. Kon ang ilang mga kahimtang mopugong kanila sa regular nga pagtambong sa mga tigom, makapaneguro sa unsa ang mga Kristohanong may grabeng sakit?
17 Komosta ang atong mga isigkamagtutuo nga dili regular sa pagtambong sa Kristohanong mga tigom tungod sa grabeng sakit? Mahimong sila mobatig kaguol kay sila dili makasimba kanunay kang Jehova diha sa direktang pagpakig-uban sa ilang espirituwal nga mga igsoong lalaki ug babaye. Apan sila makapaneguro nga si Jehova nakasabot sa ilang mga kahimtang, nga sila huptan niya diha sa kamatuoran, hatagan sa iyang balaang espiritu, ug tabangan nga magpadayon sa pagbuhat ug maayo.—Isaias 57:15.
18. Unsay motabang kanato nga magpadayon sa pagpasundayag sa pagkamaayo?
18 Aron magpadayon sa pagpasundayag sa pagkamaayo kinahanglang atong bantayan ang atong mga pagpakig-uban ug palay-an kadtong “walay gugma sa pagkamaayo.” (2 Timoteo 3:2-5; 1 Corinto 15:33) Ang pagpadapat sa maong tambag motabang kanato sa paglikay sa ‘pagpaguol sa balaang espiritu sa Diyos’ pinaagi sa paggawi nga supak sa mga pagtultol niini. (Efeso 4:30) Dugang pa, kita matabangan sa pagbuhat ug maayo kon ugmaron nato ang suod nga pagpakig-uban sa mga tawo kansang kinabuhi naghatag ug ebidensiya nga sila maoy mga mahigugmaon sa pagkamaayo ug gitultolan sa balaang espiritu ni Jehova.—Amos 5:15; Roma 8:14; Galacia 5:18.
Pagkamaayo Mopatunghag Maayong mga Resulta
19-21. Iasoy ang mga kasinatian nga nagpakita sa epekto sa pagpasundayag sa pagkamaayo.
19 Ang paglakaw diha sa espirituwal nga kahayag, pagsunod sa pagtultol sa espiritu sa Diyos, ug pagbantay sa atong paglakaw motabang kanato sa paglikay sa daotan ug “magpadayon sa pagbuhat ug maayo.” Sa baylo, kini mahimong mopatunghag maayong mga resulta. Tagda ang kasinatian ni Zongezile, usa sa mga Saksi ni Jehova sa Habagatang Aprika. Sa iyang pagpadulong sa eskuylahan usa ka buntag, iyang gisusi ang kantidad sa diyutay niyang tinigom nga salapi sa bangko. Ang resibo gikan sa awtomatikong teller machine sayop nga nagpadayag ug sobrang R42,000 ($6,000, U.S.). Ang usa ka sekyu sa bangko ug uban pa miawhag nga iyang kobrahon ang salapi ug ideposito kini alang sa iyang kaugalingon sa laing bangko. Ang Saksing magtiayon nga kauban niya sa puy-anan mao lamang ang nagdayeg kaniya tungod sa dili pagkobra sa salapi.
20 Sa sunod adlaw nga tingtrabaho, gitaho ni Zongezile ang kasaypanan ngadto sa bangko. Nadiskobrehan nga ang iyang numero sa account sa bangko susama sa iya sa usa ka datong negosyante nga nasayop pagdeposito sa salapi sa sayop nga account. Kay natingalang wala gastoha ni Zongezile ang maong salapi, ang negosyante nangutana kaniya: “Unsa bay imong relihiyon?” Si Zongezile misaysay nga siya usa sa mga Saksi ni Jehova. Siya masibotong gidayeg sa mga opisyales sa bangko, kinsa miingon: “Maayo untag ang tanang tawo sama ka matinud-anon sa mga Saksi ni Jehova.” Sa pagkamatuod, ang mga buhat sa pagkamatinud-anon ug pagkamaayo makapahinabo nga ang uban makahimaya kang Jehova.—Hebreohanon 13:18.
21 Ang mga buhat sa pagkamaayo dili kinahanglang talagsaon aron kini adunay maayong epekto. Ingong ilustrasyon: Usa ka batan-ong Saksi nga nag-alagad ingong bug-os-panahong magwawali sa usa sa kapuloan sa Samoa kinahanglang moadto sa lokal nga ospital. Ang mga tawo naghulat aron makigkita sa doktor, ug ang Saksi nakamatikod nga ang usa ka tigulang nga babayeng tupad niya maoy masakiton kaayo. Iyang gihikay nga ang maong babaye maoy mokuha sa iyang turno aron siya matagad dayon. Sa usa ka higayon sa ulahi, nahibalag sa Saksi ang maong tigulang nga babaye sa tiyanggihan. Siya nakahinumdom kaniya ug sa iyang maayong buhat sa ospital. “Karon ako nahibalo na nga ang mga Saksi ni Jehova nahigugma gayod sa ilang silingan,” matod niya. Bisan pa nga kanhi siya dili matinagdanon sa mensahe sa Gingharian, ang pagkamaayong gipakita kaniya sa Saksi may maayong mga resulta. Iyang gidawat ang tanyag nga pagtuon sa Bibliya sa balay ug gisugdan ang pagkuhag kahibalo sa Pulong sa Diyos.
22. Unsa ang usa ka makahuloganon gayong paagi nga “magpadayon sa pagbuhat ug maayo”?
22 Lagmit kaayo, makaasoy kag mga kasinatian nga magpadayag sa pagkabililhon sa pagpasundayag sa pagkamaayo. Ang usa ka makahuloganon gayong paagi nga “magpadayon sa pagbuhat ug maayo” mao ang pagpakig-ambit nga regular sa pagmantala sa maayong balita sa Gingharian sa Diyos. (Mateo 24:14) Hinaot nga magpadayon kita sa masibotong pagpakig-ambit niining bililhong buluhaton, kay nahibalong kini usa ka paagi sa pagbuhat ug maayo, ilabina ngadto sa mosanong nga paborable. Labing hinungdanon, ang atong ministeryo ug ang maayong panggawi maghimaya kang Jehova, ang tuboran mismo sa pagkamaayo.—Mateo 19:16, 17.
Magpadayon sa ‘Pagbuhat ug Maayo’
23. Nganong ang Kristohanong ministeryo maoy maayong buluhaton?
23 Ang atong ministeryo sa walay duhaduha maoy maayong buluhaton. Kini mahimong moresulta sa kaluwasan alang kanato ug alang niadtong mamati sa mensahe sa Bibliya ug sa ingon makasubay sa dalan nga mosangpot sa kinabuhing walay kataposan. (Mateo 7:13, 14; 1 Timoteo 4:16) Nan, kon giatubang nato ang mga desisyon, ang tinguha sa pagbuhat ug maayo lagmit makapahinabo nga mangutana kita sa atong kaugalingon: ‘Sa unsang paagi kining desisyona moapektar sa akong buluhaton sa pagsangyaw sa Gingharian? Mapuslanon ba gayod ang dalan nga akong gipalandong? Motabang ba kini kanako sa pagtabang sa uban nga modawat sa “walay-kataposang maayong balita” ug modangat sa suod nga relasyon kang Jehova nga Diyos?’ (Pinadayag 14:6) Ang dakong kalipay mosangpot gikan sa usa ka desisyong mopausbaw sa intereses sa Gingharian.—Mateo 6:33; Buhat 20:35.
24, 25. Unsa ang pipila ka paagi sa pagbuhat ug maayo diha sa kongregasyon, ug makapaneguro kita sa unsa kon kita magpadayon sa pagpasundayag sa pagkamaayo?
24 Dili gayod nato pakamenoson ang mapuslanong mga epekto sa pagkamaayo. Makapadayon kita sa pagpasundayag niining hiyasa pinaagi sa pagpaluyo sa Kristohanong kongregasyon ug pagbuhat sa atong maarangan sa pag-atiman sa intereses ug kaayohan niini. Tinong magbuhat kitag maayo sa dihang kita regular nga motambong ug makig-ambit sa Kristohanong mga tigom. Ang atong presensiya mismo makadasig sa mga isigkamagsisimba, ug ang atong naandam-pag-ayong mga komento makapalig-on kanila sa espirituwal nga paagi. Kita magbuhat usab ug maayo sa dihang atong gamiton ang atong katigayonan sa pagmentinar sa Kingdom Hall ug sa dihang motabang kita sa pag-atiman niana. (2 Hari 22:3-7; 2 Corinto 9:6, 7) Sa pagkamatuod, “samtang kita may kahigayonan alang niini, buhaton nato ang maayo ngadto sa tanan, apan ilabina kanila nga atong kabanay sa pagtuo.”—Galacia 6:10.
25 Dili nato mapanan-aw ang matag kahimtang nga nagkinahanglan sa pagpasundayag sa pagkamaayo. Nan, sa pag-atubang natog bag-ong mga hagit, tinguhaon nato ang kalamdagan gikan sa Kasulatan, mag-ampo kita alang sa balaang espiritu ni Jehova, ug himoon ang atong labing maarangan sa pagtuman sa iyang maayo ug hingpit nga kabubut-on. (Roma 2:9, 10; 12:2) Makasalig kita nga kita dagayang panalanginan ni Jehova samtang kita magpadayon sa pagpasundayag sa pagkamaayo.
Unsaon Nimo Pagtubag?
• Sa unsang paagi makahimo kita sa labing dalayegong butang?
• Nganong ang pagkamaayo gitawag nga usa ka ‘bunga sa kahayag’?
• Nganong ang pagkamaayo gitawag nga usa ka ‘bunga sa espiritu’?
• Unsa ang epekto sa atong maayong panggawi?
[Mga Pangutana sa Pagtuon]
[Hulagway sa panid 17]
Ang Pulong sa Diyos ug ang iyang balaang espiritu motabang kanato sa pagpasundayag sa pagkamaayo
[Mga hulagway sa panid 18]
Ang pagpasundayag sa pagkamaayo mopatunghag maayong mga resulta