Nagasalig Ka ba sa Usa ka Matuod nga Diyos?

Usa ka ekspedisyon nga gisugo sa American Museum of Natural History ang nagpaingon sa Artiko aron sa pagtuon sa usa ka yuta didto nga gitaho sa manunuhid nga si Robert E. Peary nga nakita niya pito ka tuig nga sayosayo pa, sa 1906.

GIKAN sa Cape Colgate sa halayo kaayong amihanan-kasadpan nga bahin sa Amerika del Norte, may nakita si Peary nga morag puti nga mga taluktok sa usa ka halayo nga yuta. Ginganlan niya kinig Crocker Land nga gikuha niya sa ngalan sa usa sa mga tawo nga mitabang kaniya sa pinansiyal nga paagi. Pagkadako kaha sa kalipay sa mga membro nianang nagsunod nga ekspedisyon sa dihang nalantawan nila ang usa ka dapit nga may kabungtoran, kawalogan, ug naputos-sa-yelo nga mga taluktok! Apan sa wala madugay ilang naamgohan nga gimatamata lamang diay sila. Kining daw talan-awon sa usa ka yuta didto sa Artiko naglimbong kang Peary, ug sa naamgohan nila kini, nakagugol na silag panahon, kusog, ug kahinguhaan sa pagsuhid sa usa ka butang nga dili diay tinuod.

Karon, daghang tawo ang naghatag sa ilang debosyon ug panahon sa mga diyos nga gituohan nilang tinuod. Sa mga adlaw sa mga apostoles ni Jesus, ang mga diyos sama kang Hermes ug Zeus gisimba. (Buhat 14:11, 12) Niining panahona, ang mga diyos nga gisimba sa Shinto, Hindu, ug ubang mga relihiyon sa kalibotan mikabat ug milyonmilyon. Gani, sumala sa giingon sa Bibliya, “adunay daghang ‘diyos’ ug daghang ‘ginoo.’” (1 Corinto 8:5, 6) Kini bang tanan maoy matuod nga mga diyos?

Mga Diyos nga “Dili Makaluwas”

Tagda, pananglitan, ang paggamit ug mga larawan o mga simbolo sa pagsimba. Niadtong nagasalig niana o nagaampo pinaagi niana, ang mga idolo morag mga manluluwas nga nakabaton ug labaw-tawhanong mga gahom nga makahatag sa mga tawo ug ganti o makaluwas kanila gikan sa kapeligrohan. Apan makaluwas ba gayod kini? Mahitungod nianang mga butanga, ang salmista miawit: “Ang mga idolo sa kanasoran maoy plata ug bulawan, ang binuhat sa mga kamot sa yutan-ong tawo. Sila adunay baba, apan  dili sila makasulti; sila adunay mga mata, apan dili sila makakita; sila adunay mga igdulungog, apan dili sila makadungog. Walay espiritu usab sa ilang baba.” Sa pagkatinuod, sila maoy mga diyos nga “dili makaluwas.”—Salmo 135:15-17; Isaias 45:20.

Tinuod, kadtong naghimog mga idolo moingon tingali nga ang gama sa ilang mga kamot adunay kinabuhi ug gahom. Ug kadtong nagsimba sa mga idolo nagasalig niana. “Gipas-an nila [ang idolo] sa abaga,” miingon si manalagnang Isaias, “gidala nila kini ug gibutang kini sa iyang dapit aron pabarogon kini.” Siya midugang: “Gikan sa gibarogan niini kini dili molakaw. Ang usa motuaw gani niana, apan kini dili motubag; gikan sa kasakit sa usa kini dili moluwas kaniya.” (Isaias 46:7) Ang kamatuoran mao nga ang usa ka idolo magpabiling walay kinabuhi bisag unsa pa ka sinsero ang pagtuo niadtong nagasalig niana. Ang maong linilok nga mga larawan ug inumol nga mga estatwa maoy “walay-bili nga mga diyos.”—Habacuc 2:18.

Ang pag-idolo, pagtahod, o pagdayeg sa inilang mga maglilingaw, mga atleta, politikal nga mga sistema, ug pipila ka relihiyosong mga lider kasagaran usab karon. Dugang pa, ang kuwarta maoy diyos alang sa daghan. Sa matag kaso, kining maong mga idolo gipresentar nga nakabaton ug mga hiyas ug mga prinsipyo nga wala nila mabatoni. Kini dili makatagana sa tanan nga gilaoman niadtong nagtuo niana. Pananglitan, ang bahandi morag maoy tubag sa daghang problema, apan ang gahom sa bahandi malimbongon. (Marcos 4:19) Usa ka tigpanukiduki nangutana: “Ngano man nga ang usa ka butang nga gitinguha pag-ayo sa daghan kaayong tawo, ug gituohan nga usa ka matang sa sulbad sa tanang problema, sa dihang mabatonan na ang mga epekto niini makapahigawad ug makapaguol?” Oo, tungod sa pagpangagpas sa bahandi ang usa ka tawo magsakripisyo tingali sa kon unsay tinuod nga bililhon, sama sa maayong panglawas, makapatagbaw nga pamilyahanong kinabuhi, suod nga mga panaghigalaay, o bililhong relasyon uban sa Maglalalang. Ang iyang diyos usa ra diay ka “idolo sa kabakakan”!—Jonas 2:8.

“Walay Usang Mitubag”

Binuang nga tawgong tinuod ang usa nga dili tinuod. Ang mga magsisimba sa diyos nga si Baal sa adlaw ni manalagnang Elias nakakat-on niini pinaagi sa mapait nga kasinatian. Hugot silang nagtuo nga si Baal may gahom sa pagpakanaog ug kalayo gikan sa langit ug pagsunog sa gihalad nga mananap. Gani, “sila nagtawag sa ngalan ni Baal gikan sa buntag hangtod sa udto, nga nag-ingon: ‘Oh Baal, tubaga kami!’” May mga dalunggan ba si Baal nga makadungog ug baba nga makasulti? Ang asoy nagpadayon: “Walay tingog, ug walay usang mitubag.” Sa pagkatinuod, “walay nagtagad.” (1 Hari 18:26, 29) Si Baal dili tinuod, buhi, o aktibo.

Pagkahinungdanon nga atong ilhon ug simbahon ang usa ka matuod nga Diyos! Apan kinsa siya? Ug sa unsang paagi ang pagsalig kaniya makabenepisyo kanato?

[Mga hulagway sa panid 3]

Ang kauban ni Peary nga si Egingwah nagsuhid sa kapunawpunawan sa pagpangita ug yuta

Si Robert E. Peary

[Credit Lines]

Egingwah: From the book The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[Mga hulagway sa panid 4]

Daghan ang nalimbongan sa giidolo niining kalibotana