Adunay Ilang Matang sa Kaalam

“ANG mga hamtong may kaalam, apan ang mga bata usab adunay ilang matang sa kaalam,” matod pa sa usa ka panultihon sa Nigeria. Nadiskobrehan ni Edwin, usa ka Kristohanong ansiyano sa Nigeria, nga tinuod kini.

Usa ka adlaw niana, nakakita si Edwin ug metal nga kahon sa ilalom sa iyang lamesa sa balay.

“Kang kinsa man ni?” gipangutana ni Edwin ang iyang tulo ka anak.

“Ako na,” mitubag ang otso-anyos nga si Emmanuel. Dayon midugang siya nga kining tayaon, 12 sentimetros nga puthawng kahon nga gitibhangan sa ibabaw maoy alang sa mga amot sa tibuok-kalibotang buluhaton sa mga Saksi ni Jehova. “Tungod kay dili man ko moadto sa Kingdom Hall kada adlaw,” matod niya, “nakahukom ko sa paghimog kahon aron nga bisan kanus-a nga dili nako magasto ang kuwarta nga akong pang-esnak, ako kanang ikahulog sa kahon.”

Ang amahan ni Emmanuel dunay kahon sa balay nga tigomanan ug kuwarta aron makatambong sa tinuig nga distritong kombensiyon. Apan tungod sa usa ka dinaliang panginahanglan sa pamilya, nagamit nila ang kuwarta nga gihulog niana. Aron maseguro nga ang iyang amot nga salapi dili gamiton sa laing katuyoan, nagdala si Emmanuel ug daan nga lata ngadto sa tigsolda aron makipot kini. Sa pagkahibalo sa tigsolda kon unsay gamit sa maong lata, gihimoan niyag kahon si Emmanuel ginamit ang iglalabay na nga metal. Si Michael, ang singko-anyos nga igsoon ni Emmanuel, nangayo usab ug kahon.

Kay natingala sa gibuhat sa mga bata, gipangutana sila ni Edwin kon nganong nagpahimo silag mga kahon. Mitubag si Michael: “Gusto nakong moamot!”

Luyo sa kasayoran sa ilang mga ginikanan, si Emmanuel, Michael, ug Uchei, ang ilang nuybe-anyos nga igsoong babaye, nagtigom sa bahin sa ilang kuwartang pang-esnak ug gihulog kana sa mga kahon. Diin man nila makuha kini nga ideya? Sa dihang ang mga bata makamao nang mokupot ug kuwarta, gitudloan sila sa ilang mga ginikanan sa paghulog ug kuwarta sa mga kahon sa amot diha sa Kingdom Hall. Dayag nga gipadapat gayod sa mga bata ang ilang nakat-onan.

Sa dihang napuno na ang mga kahon, kini gibuksan. Ang natigom miabot ug $3.13 (T.B.)—dakong kantidad diha sa usa ka nasod diin ang aberids nga tinuig nga kita mokabat lamang ug pipila ka gatos ka dolyar. Ang maong boluntaryong mga donasyon nagsuportar sa buluhatong pagwali sa mga Saksi ni Jehova nga ginahimo na karon sa 235 ka yuta sa tibuok kalibotan.