Kat-oni ang Leksiyon Gikan Kang Nicodemo

“KON si bisan kinsa buot mosunod kanako, padumilia siya sa iyang kaugalingon ug ipapas-an ang iyang estaka sa pagsakit sa adlaw-adlaw ug magpadayon sa pagsunod kanako.” (Lucas 9:23) Ang ubos nga mga mangingisda ug usa ka tinamay nga maniningil ug buhis midawat dayon sa maong imbitasyon. Gibiyaan nila ang tanan aron mosunod kang Jesus.—Mateo 4:18-22; Lucas 5:27, 28.

Ang imbitasyon ni Jesus mabati gihapon karon, ug daghan ang misanong. Apan, ang uban nga nalipay sa pagtuon sa Bibliya uban sa mga Saksi ni Jehova nagpanuko sa ‘pagdumili sa ilang kaugalingon ug pagpas-an sa ilang estaka sa pagsakit.’ Sila nag-ukon-ukon sa pagdawat sa responsabilidad ug bililhong kahigayonan nga mahimong mga tinun-an ni Jesus.

Nganong naglangaylangay man ang uban sa pagdawat sa imbitasyon ni Jesus ug sa pagpahinungod sa ilang kaugalingon ngadto kang Jehova nga Diyos? Ibutang ta nga kadtong wala mamatuto sa Hudiyohanon-Kristohanong  panghunahuna sa pagkausay-Diyos magkinahanglan tingalig dakong panahon una pa masabtan sa bug-os nga naglungtad ang usa ka personal, labing gamhanan nga Maglalalang. Apan, bisan human sila makombinsir nga tinuod ang Diyos, ang uban mamalibad sa pagsunod sa mga tunob ni Jesus. Mahadlok tingali sila kon unsay hunahunaon sa ilang mga paryente ug mga higala bahin kanila kon sila mahimong mga Saksi ni Jehova. Ang uban, nga nalimot sa pagkadinalian sa panahon diin kita nagpuyo, miliso ngadto sa pagpangagpas sa kadungganan ug bahandi. (Mateo 24:36-42; 1 Timoteo 6:9, 10) Bisan unsa pa tingaliy hinungdan, alang niadtong nagapadayon sa pag-oktaba sa ilang desisyon nga mahimong mga sumusunod ni Jesus, adunay leksiyon nga makat-onan gikan sa asoy bahin kang Nicodemo, usa ka dato nga Hudiyohanong magmamando sa adlaw ni Jesus.

Gihatagan ug Talagsaong mga Kahigayonan

Mga unom ka bulan lamang human sugdi ni Jesus ang iyang yutan-ong ministeryo, naila ni Nicodemo si Jesus ‘ingong magtutudlo nga gikan sa Diyos.’ Kay nakadayeg sa mga milagro nga di pa dugayng gihimo ni Jesus didto sa Jerusalem sa Paskuwa sa 30 K.P., si Nicodemo miadto sa kagabhion aron sa pagpahayag sa iyang pagtuo kang Jesus ug sa pagkat-on ug dugang bahin niini nga magtutudlo. Niana, gitug-anan ni Jesus si Nicodemo sa usa ka lalom nga kamatuoran bahin sa panginahanglan nga “ipanganak pag-usab” aron makasulod sa Gingharian sa Diyos. Niining higayona, gisulti usab ni Jesus ang mga pulong: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.”—Juan 3:1-16.

Pagkakahibulongang palaaboton ang naghulat kang Nicodemo! Puwede siyang mahimong  suod nga kauban ni Jesus, nga unang makasaksi sa nagkalainlaing bahin sa kinabuhi ni Jesus dinhi sa yuta. Ingong usa ka magmamando sa mga Hudiyo ug magtutudlo sa Israel, si Nicodemo adunay igoigong kahibalo sa Pulong sa Diyos. Siya usab adunay hait nga panabot, ingon sa gipakita sa iyang pag-ila kang Jesus ingong magtutudlo nga gipadala sa Diyos. Si Nicodemo interesado sa espirituwal nga mga butang, ug siya mapainubsanon sa talagsaong paagi. Pagkalisod gayod alang sa usa ka membro sa kinatas-ang hukmanan sa mga Hudiyo nga ilhon ang usa ka ubos nga anak ug panday ingong usa ka tawo nga gipadala sa Diyos! Kanang tanang hiyas bililhon kaayo aron ang usa ka tawo mahimong tinun-an ni Jesus.

Ang interes ni Nicodemo niining tawhana nga taga-Nasaret morag wala gayod molubad. Duha ka tuig ug tunga sa ulahi, panahon sa Pista sa mga Balongbalong, si Nicodemo mitambong sa usa ka tigom sa Sanhedrin. Niining higayona, si Nicodemo ‘usa gihapon kanila.’ Ang pangulong mga saserdote ug mga Pariseo nagpadalag mga polis aron dakpon si Jesus. Ang mga polis namalik ug mitaho: “Wala pa gayoy laing tawo nga nakasulti ug sama niini.” Ang mga Pariseo nagsugod sa pagtamay kanila: “Nahisalaag ba usab kamo? Aduna bay usa sa mga magmamando o sa mga Pariseo nga nagbutang ug pagtuo kaniya? Apan kining panon sa katawhan nga wala mahibalo sa Balaod maoy tinunglong katawhan.” Si Nicodemo wala na gayod makapugong. Siya misulti: “Ang atong balaod dili magahukom sa usa ka tawo gawas kon kini makapaminaw una gikan kaniya ug mahibaloan ang iyang gibuhat, dili ba?” Dayon siya maoy gipuntirya sa pagsaway gikan sa ubang mga Pariseo: “Gikan ka ba usab sa Galilea? Susiha ug makita mo nga walay manalagna nga pagabangonon gikan sa Galilea.”—Juan 7:1, 10, 32, 45-52.

Mga unom ka bulan sa ulahi, sa Adlaw sa Paskuwa sa 33 K.P., nakita ni Nicodemo ang lawas ni Jesus nga gikanaog sa estaka sa pagsakit. Miduyog siya kang Jose nga taga-Arimatea, laing membro sa Sanhedrin, sa pag-andam sa lawas ni Jesus aron ilubong. Alang sa maong katuyoan, si Nicodemo nagdala ug “usa ka rolyo nga mira ug mga aloe” nga motimbang ug mga 100 libras sa Romanhon, katumbas sa 72 libras sa Ingles. Dakong kantidad sa salapi ang naggasto niini. Nagkinahanglan usab siyag kaisog nga mailhang kauban ‘nianang impostor,’ ingon sa pagtawag sa iyang kaubang mga Pariseo kang Jesus. Kay naandam  gilayon ang lawas ni Jesus aron ilubong, gipahiluna nilang duha si Jesus diha sa usa ka bag-ong handomanang lubnganan sa duol. Apan, bisan niining higayona, si Nicodemo wala pa gihapon mailhi ingong usa ka tinun-an ni Jesus!—Juan 19:38-42; Mateo 27:63; Marcos 15:43.

Kon Nganong Siya Wala Molihok

Kon nganong mibalibad si Nicodemo sa ‘pagpas-an sa iyang estaka sa pagsakit’ ug sa pagsunod kang Jesus, si Juan wala magbutyag diha sa iyang asoy. Apan, naghatag siyag mga timailhan nga mahimong magpatin-aw kon nganong nagduhaduha kini nga Pariseo.

Una sa tanan, gipunting ni Juan nga ang Hudiyohanong magmamando “miadto [kang Jesus] sa kagabhion.” (Juan 3:2) Ang usa ka eskolar sa Bibliya naghatag niini nga katin-awan: “Si Nicodemo miadto sa kagabhion, dili kay nahadlok, kondili aron makalikay sa mga panon nga mahimong mobalda sa iyang pagsukitsukit kang Jesus.” Apan, si Juan nagtumong kang Nicodemo ingong “ang tawo nga miadto [kang Jesus] sa kagabhion sa unang higayon” diha sa samang konteksto nga iyang gitumong si Jose nga taga-Arimatea ingong “usa ka tinun-an ni Jesus apan sa tago tungod sa iyang kahadlok sa mga Hudiyo.” (Juan 19:38, 39) Busa, lagmit nga si Nicodemo miadto kang Jesus sa kagabhion tungod sa “kahadlok sa mga Hudiyo,” sama ra sa uban sa iyang adlaw nga nahadlok nga malambigit kang Jesus.—Juan 7:13.

Imo bang gioktaba ang desisyon nga mahimong usa sa mga tinun-an ni Jesus tungod sa mahimong isulti sa imong mga paryente, higala, o mga kauban? “Ang pagpangurog tungod sa mga tawo nagadala ug usa ka lit-ag,” matod sa usa ka proverbio. Sa unsang paagi mabuntog nimo ang maong kahadlok? Ang proverbio nagpadayon: “Apan siya nga nagasalig kang Jehova pagapanalipdan.” (Proverbio 29:25) Aron maugmad ang maong pagsalig kang Jehova, kinahanglan nimong sination mismo nga ang Diyos mopalig-on kanimo kon ikaw anaa sa kalisdanan. Pag-ampo kang Jehova, ug hangyoa siya nga hatagan kag kaisog sa paghimo bisan sa gagmayng mga desisyon maylabot sa imong pagsimba. Sa ngadtongadto, ang imong pagtuo ug pagsalig kang Jehova motubo hangtod sa punto nga makahimo ka nag dagkong mga desisyon nga uyon sa kabubut-on sa Diyos.

Ang posisyon ug kabantog ni Nicodemo ingong membro sa nagamandong hut-ong sa katilingban mahimong nagpugong usab kaniya sa paghimog hinungdanong lakang sa pagdumili sa iyang kaugalingon. Niadtong panahona, lagmit nga siya naglisod gayod pagbiya sa iyang posisyon ingong membro sa Sanhedrin. Nagpanuko ka ba sa paghimog lakang aron mahimong sumusunod ni Kristo tungod kay mahimong mawala kanimo ang kabantog diha sa katilingban o mahimong isakripisyo ang pipila ka kalaoman nga mouswag? Walay usa niining mga butanga ang ikatandi sa dungog nga makaalagad sa Labing Hataas sa uniberso, kinsa andam nga motuman sa imong mga hangyo nga uyon sa iyang kabubut-on.—Salmo 10:17; 83:18; 145:18.

Ang laing posibleng rason sa pag-unyaunya ni Nicodemo mahimong nalangkit sa iyang bahandi. Ingong usa ka Pariseo, siya tingali naimpluwensiyahan sa uban, “kinsa mga mahigugmaon ug salapi.” (Lucas 16:14) Ang kamatuoran nga nakaarang siya pagpalit ug mahalon nga rolyo sa mira ug mga aloe nagpamatuod nga siya bahandianon. Ang uban karon padayong nag-angan-angan sa desisyon sa pag-abaga sa responsabilidad sa usa ka Kristohanon tungod kay sila mabalak-on bahin sa ilang materyal nga mga kabtangan. Apan, gitambagan ni Jesus ang iyang mga sumusunod: “Hunong na sa pagkabalaka bahin sa inyong mga kalag kon unsay inyong kan-on o kon unsay inyong imnon, o bahin sa inyong mga lawas kon unsay inyong isul-ob. . . . Kay ang inyong langitnong Amahan nahibalo nga gikinahanglan ninyo kining tanang butanga. Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo.”—Mateo 6:25-33.

Siya Nawad-ag Dakong Kahigayonan

Makaiikag, ang asoy bahin kang Nicodemo, nga makita lamang diha sa Ebanghelyo ni Juan, wala magtug-an kon nahimo ba gayod siyang sumusunod ni Jesus o wala. Matod sa usa ka tradisyon, si Nicodemo mibarog dapig kang Jesus, nabawtismohan, nahimong tumong sa paglutos sa mga Hudiyo, gitangtang sa iyang posisyon, ug sa kataposan gihinginlan gikan sa Jerusalem. Bisag unsa  pay kahimtang, usa ka butang ang tino: Siya nawad-ag dakong kahigayonan tungod sa pag-unyaunya samtang dinhi pa si Jesus sa yuta.

Kon misugod pa dayon si Nicodemo sa pagsunod kang Jesus sa una gayong higayon nga iyang nahimamat ang Ginoo, nahimo unta siyang suod nga tinun-an ni Jesus. Tungod kay si Nicodemo mapainubsanon, adunay kahibalo, pagsabot, ug pag-ila sa espirituwal nga mga panginahanglan, nahimo unta siyang usa ka talagsaong tinun-an. Oo, nadunggan unta niya ang makapahinganghang mga pakigpulong sa Dakong Magtutudlo, nakakat-on ug mahinungdanong mga leksiyon gikan sa mga ilustrasyon ni Jesus, nakasaksi sa katingalahang mga milagro nga gihimo ni Jesus, ug napalig-on sa panamilit nga tambag ni Jesus ngadto sa iyang mga apostoles. Apan iyang nasayloan kanang tanan.

Dako kaayo ang nawala kang Nicodemo tungod sa iyang pagkamaduhaduhaon. Lakip niana mao ang mainitong imbitasyon ni Jesus: “Umari kanako, kamong tanang nabudlayan ug nabug-atan, ug ako magapalagsik kaninyo. Isangon diha kaninyo ang akong yugo ug magtuon gikan kanako, kay ako malumog-buot ug mapainubsanon sa kasingkasing, ug kamo makakaplag ug kahayahay alang sa inyong mga kalag. Kay ang akong yugo masayon ug ang akong luwan magaan.” (Mateo 11:28-30) Nawala kang Nicodemo ang kahigayonan nga masinati ang maong kahayahay sa literal nga paagi gikan kang Jesus mismo!

Komosta ang Bahin Kanimo?

Sukad sa 1914, si Jesu-Kristo presente na sa langit ingong Hari sa langitnong Gingharian sa Diyos. Nagtagna kon unsay mahitabo panahon sa iyang presensiya, lakip sa ubang mga butang, siya miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo 24:14) Sa dili pa moabot ang kataposan, ang maong tibuok-kalibotang buluhaton sa pagwali kinahanglang taposon una. Si Jesu-Kristo mahimuot nga dunay dili-hingpit nga mga tawo nga makigbahin. Ikaw usab mahimong makigbahin niining buluhatona.

Giila ni Nicodemo nga si Jesus gikan sa Diyos. (Juan 3:2) Gumikan sa pagtuon sa Bibliya, mao usab tingali kanay imong konklusyon. Nakahimo ka na tingalig mga kausaban sa imong paagi sa pagkinabuhi aron makapahiuyon sa mga sukdanan sa Bibliya. Tingali tigtambongan ka na sa mga tigom sa mga Saksi ni Jehova aron makakuhag dugang kahibalo sa Bibliya. Dalayegon ka tungod sa maong mga paningkamot. Apan, si Nicodemo kinahanglang mohimog labaw pa kay sa pagkasabot lang nga si Jesus gipadala sa Diyos. Kinahanglan niyang ‘dumilian ang iyang kaugalingon ug pas-anon ang iyang estaka sa pagsakit sa adlaw-adlaw ug magpadayon sa pagsunod kang Jesus.’—Lucas 9:23.

Sunda ang gisulti kanato ni apostol Pablo. Siya misulat: “Ingon nga nagabuhat duyog kaniya, kami nangaliyupo usab kaninyo nga dili dawaton ang dili-takos nga kalulot sa Diyos ug sipyaton ang katuyoan niini. Kay siya nag-ingon: ‘Sa usa ka panahong dalawaton ikaw akong gidungog, ug sa usa ka adlaw sa kaluwasan ikaw akong gitabangan.’ Tan-awa! Karon mao na ang panahon nga ilabinang dalawaton. Tan-awa! Karon mao na ang adlaw sa kaluwasan.”—2 Corinto 6:1, 2.

Karon mao na ang panahon sa pag-ugmad sa pagtuo nga mopalihok kanimo. Aron mapalampos kana, palandonga ang mga butang nga imong natun-an sa Bibliya. Pag-ampo kang Jehova, ug hangyoa siya nga tabangan ka sa pagpasundayag sa maong pagtuo. Samtang imong masinati ang iyang tabang, ang imong pagkamapasalamaton ug gugma kaniya mopalihok kanimo nga ‘dumilian ang imong kaugalingon ug pas-anon ang imong estaka sa pagsakit sa adlaw-adlaw ug magpadayon sa pagsunod kang Jesus.’ Molihok ka na ba karon?

[Hulagway sa panid 9]

Sa sinugdan, si Nicodemo maisogong mibarog dapig kang Jesus

[Hulagway sa panid 9]

Bisan pa sa pagsupak, mitabang si Nicodemo sa pag-andam sa lawas ni Jesus aron ilubong

[Hulagway sa panid 10]

Ang personal nga pagtuon ug pag-ampo makapalig-on kanimo sa paglihok

[Hulagway sa panid 10]

Dawaton mo ba ang pribilehiyo nga mag-alagad ilalom sa pagpangulo ni Jesu-Kristo?