Mga Pangutana Gikan sa mga Magbabasa

Sa unsang gilapdon nga ang mga restriksiyon sa kaminyoon tali sa mga paryente nga gilatid diha sa Moisesnong Balaod mapadapat ngadto sa mga Kristohanon karon?

Ang Balaod nga gihatag ni Jehova ngadto sa nasod sa Israel dili detalyado maylabot sa mga seremonyas ug mga pamaagi sa kasal. Hinunoa, kini naghatag ug mga pagdili batok sa pipila ka relasyon sa kaminyoon. Pananglitan, sa Levitico 18:6-20, atong makita ang usa ka talaan sa gidiling mga relasyon nga naglangkit sa usa ka ‘suod nga paryente sa unod.’ Kanang tekstoha naghatag ug ubay-ubayng detalye nga naglatid kon unsang mga paryenteha ang dili angayng mohimog seksuwal nga relasyon sa usag usa. Siyempre, ang mga Kristohanon wala mailalom sa Moisesnong Balaod o magapos sa gibaod niini. (Efeso 2:15; Colosas 2:14) Bisan pa niana, wala kini magkahulogan nga mahimo lang ibalewala sa mga Kristohanon kining butanga sa dihang mopili ug minyoan. Adunay daghang katarongan kon nganong ingon niini ang kahimtang.

Una, dunay sekular nga mga balaod nga nagkontrolar sa kaminyoon tali sa suod nga mga paryente, ug ang mga Kristohanon sa panguna obligadong motuman sa mga balaod sa nasod nga ilang gipuy-an. (Mateo 22:21; Roma 13:1) Siyempre, ang maong mga balaod dili managsama sa lainlaing mga dapit. Ang kadaghanang modernong mga balaod niining matanga pangunang gibase sa kaliwat. Usa ka iladong kamatuoran nga ang kaminyoon tali sa suod nga mga paryente mas dakog kalagmitan nga magladlad sa ilang anak sa henetikanhong mga depekto ug mga sakit. Tungod niini ug tungod sa ilang ‘pagpasakop sa labaw nga mga awtoridad,’ ang mga Kristohanon nga mosulod sa kaminyoon motuman sa lokal nga mga balaod sa kaminyoon.

Dayon anaa ang kahimtang kon unsay dalawaton ug kon unsay dili-dalawaton diha sa komunidad nga gipuy-an sa usa ka tawo. Kasagaran ang matag kultura dunay mga lagda ug mga kostumbre nga nagdili sa kaminyoon tali sa mga tawo nga suod nga kadugo, nga sagad naglantaw sa maong panagtipon ingong pag-unay ug busa gidili. Bisan pag ang espesipikong mga relasyon nga gidili nagkadaiya tingali kaayo diha sa nagkalainlaing mga kultura, “kasagaran, kon mas suod ang pagkaparyente sa duha ka tawo, mas puwersado ug mas higpit nga ipatuman ang pagdili o pagpugong sa seksuwal nga relasyon tali kanila,” nag-ingon ang The Encyclopædia Britannica. Busa, bisag walay pag-unay nga nalangkit, ang mga Kristohanon dili buot molihok nga bug-os nga magsalikway sa naestablisar na nga mga kostumbre o sa makataronganong pagkasensitibo sa komunidad, aron dili mapasipalahan ang Kristohanong kongregasyon o ang ngalan sa Diyos.—2 Corinto 6:3.

Ang atong hinatag-sa-Diyos nga tanlag dili angayng ibalewala. Ang tanang tawo gipakatawo nga makaila sa husto ug sayop, sa maayo ug daotan. (Roma 2:15) Ang ilang tanlag magsulti kanila kon unsay kinaiyanhon ug angay ug kon unsay dili-kinaiyanhon ug law-ay, gawas kon kini natuis o nahabol na gumikan sa mahilayong mga panggawi. Gihisgotan ni Jehova kining kamatuorana sa dihang gihatag niya sa mga Israelinhon ang iyang balaod batok sa kaminyoon tali sa suod nga mga paryente. Atong mabasa: “Ang binuhatan sa yuta sa Ehipto, diin kamo nagpuyo, dili kamo magbuhat; ug ang binuhatan sa yuta sa Canaan, nga akong pagadad-an kaninyo, dili kamo magbuhat; ug dili kamo magsubay sa ilang mga lagda.” (Levitico 18:3) Giampingan sa mga Kristohanon ang ilang gibase-sa-Bibliya nga tanlag ug dili motugot nga kini madaot pinaagi sa tinuis nga pag-ila sa husto ug sayop sa mga nasod.—Efeso 4:17-19.

Nan, unsay atong ikahinapos? Bisan tuod ang mga Kristohanon wala mailalom sa Moisesnong Balaod, ang ilang tanlag tin-awng nagsulti kanila nga ang kaminyoon tali sa suod nga mga paryente—sama sa amahan ug anak, inahan ug anak, managsoon—gidili gayod diha sa Kristohanong komunidad. a Samtang nagakalayo ang pagkapartidos, giila sa mga Kristohanon nga dunay mga balaod ug mga lagda nga dalawaton sa katilingban ug sa kultura. Kini angayng konsiderahon pag-ayo aron kita makatuman sa Kasulatanhong pahimangno: “Himoa nga dungganon ang kaminyoon taliwala sa tanan.”—Hebreohanon 13:4.

[Footnote]