Mga Magmamantala sa Gingharian Nagtaho

Modernong-Adlaw nga mga Martir Naghatag ug Pamatuod sa Sweden

ANG Gregong pulong alang sa “saksi” maoy martyr, nga gikan niini gikuha ang pulong “martir,” nga nagkahulogang “usa nga naghatag ug pamatuod pinaagi sa iyang kamatayon.” Daghang unang-siglo nga mga Kristohanon naghatag ug pamatuod bahin kang Jehova pinaagi sa pagpakamatay alang sa ilang pagtuo.

Sa susama, sa ika-20ng siglo, libolibo ka Saksi ang nangamatay diha sa mga kamot sa mga tigpaluyo ni Hitler tungod sa ilang pagpabiling neyutral sa politikanhon ug nasyonalistiko nga mga isyu. Kining modernong-adlaw nga mga martir naghatag usab ug kusganong pamatuod. Mao kini ang nahitabo sa Sweden dili pa dugay.

May kalabotan sa ika-50ng anibersaryo sa pagkatapos sa Gubat sa Kalibotan II, ang gobyerno sa Sweden nagpasiugdag tibuok-nasod nga edukasyonal nga kampanya bahin sa Holocaust. Ang proyekto ginganlan ug Buhing Kasaysayan. Ang mga Saksi ni Jehova gidapit sa pag-apil ug pagpaambit sa ilang mga eksperyensiya.

Ang mga Saksi misanong pinaagi sa pagmugnag usa ka eksibisyon nga nag-ulohang Ang Nahikalimtang mga Biktima sa Holocaust. Gisugdan kini didto sa Assembly Hall sa mga Saksi ni Jehova sa Strängnäs. Ang mga Saksing nakalabang-buhi sa Holocaust presente sa pagpaambit sa ilang mga eksperyensiya uban sa kapin sa 8,400 ka bisita nga mianha sa unang adlaw! Pagkatapos sa 1999, ang eksibisyon napakita na sa kapin sa 100 ka museyo ug publikong mga librarya sa tibuok Sweden, ug mga 150,000 ka tawo ang nakakita niini. Ang mga bisita naglakip sa ubay-ubayng opisyales sa gobyerno, kinsa mihatag ug paborableng komento bahin sa ilang nakita.

Walay laing bugtong hitabo may kalabotan sa mga kalihokan sa mga Saksi ni Jehova sa Sweden ang may ingon niana ka makaylapong pagkobre sa publiko ug nakadawat ug ingon niana ka paborableng publisidad. Daghang bisita ang nangutana: “Nganong wala man ninyo kami sultihi kanhi bahin sa inyong mga eksperyensiya sa Holocaust?”

Human ipakita ang eksibisyon diha sa ilang dapit, usa ka kongregasyon mitaho ug 30-porsiyentong pag-uswag sa mga pagtuon sa Bibliya sa balay! Gidapit sa usa ka Saksi ang iyang kauban sa trabaho sa pagtan-aw sa eksibit. Ang maong kauban sa trabaho malipayong misugot ug gidala ang usa ka higala. Pagkahuman, ang higala miingon nga maglisod siya pagsabot kon sa unsang paagi nabatonan sa mga tawo ang maong lig-ong pagtuo nga palabihon pa nilang patyon kay sa mopirma ug dokumento sa pagsalikway sa ilang pagtuo. Misangpot kini sa dugang panaghisgot, ug nasugdan ang usa ka pagtuon sa Bibliya uban kaniya.

Sama sa ilang unang-siglong mga katugbang, kining ika-20ng siglo nga matinumanong mga martir maisogong naghatag ug pamatuod nga si Jehova mao ang bugtong matuod nga Diyos, kinsa takos sa atong dili-matarog nga pagtuo ug pagkamaunongon.—Pinadayag 4:11.

[Picture Credit Line sa panid 13]

Camp prisoner: Państwowe Muzeum Oświęcim-Brzezinka, courtesy of the USHMM Photo Archives