Nadawat ba Nimo “ang Espiritu sa Kamatuoran”?
Nadawat ba Nimo “ang Espiritu sa Kamatuoran”?
‘Ang Amahan mohatag kaninyo ug laing magtatabang nga magauban kaninyo hangtod sa kahangtoran, ang espiritu sa kamatuoran.’—JUAN 14:16, 17.
1. Unsang hinungdanong impormasyon ang gihatag ni Jesus sa iyang mga tinun-an panahon sa iyang kataposang mga oras uban kanila sa lawak sa itaas?
“GINOO, asa ka paingon?” Mao kanay usa sa mga pangutana nga gisukna sa mga apostoles ni Jesus kaniya panahon sa kataposang mga oras nga gigugol niya uban kanila sa lawak sa itaas didto sa Jerusalem. (Juan 13:36) Samtang nagpadayon ang tigom, giingnan sila ni Jesus nga siya gitakdang mobiya kanila aron mobalik sa iyang Amahan. (Juan 14:28; 16:28) Dili na nila siya makauban sa linawas sa pagtudlo kanila ug sa pagtubag sa ilang mga pangutana. Apan gipasaligan niya sila, nga nag-ingon: “Hangyoon ko ang Amahan ug hatagan kamo niya ug laing magtatabang [o, maghuhupay] nga magauban kaninyo hangtod sa kahangtoran.”—Juan 14:16, potnot sa Ingles.
2. Unsay gisaad ni Jesus nga iyang ipadala sa mga tinun-an human siya mobiya?
2 Gipaila ni Jesus ang maong magtatabang ug gipatin-aw niya kon sa unsang paagi kini moabag sa iyang mga tinun-an. Giingnan niya sila: “Kining mga butanga, hinunoa, wala ko isulti kaninyo sa sinugdan, tungod kay uban pa man ako kaninyo. Apan karon moadto na ako kaniya nga nagpadala kanako . . . Alang sa inyong kaayohan nga mobiya ako. Kay kon dili ako mobiya, ang magtatabang dili gayod moabot kaninyo; apan kon molakaw ako, ipadala ko siya kaninyo. . . . Sa dihang moabot siya, ang espiritu sa kamatuoran, siya magatultol kaninyo ngadto sa tibuok nga kamatuoran.”—Juan 16:4, 5, 7, 13.
3. (a) Kanus-a gipadala “ang espiritu sa kamatuoran” ngadto sa unang mga Kristohanon? (b) Unsa ang usa ka hinungdanong paagi nga niana ang espiritu maoy ilang “magtatabang”?
3 Kining saara natuman sa Pentekostes 33 K.P., sumala sa gipamatud-an ni apostol Pedro: “Kining maong Jesus gibanhaw sa Diyos, nga niining kamatuorana kaming tanan mga saksi. Busa tungod kay siya gibayaw man ngadto sa tuong kamot sa Diyos ug nakadawat sa gisaad nga balaang espiritu gikan sa Amahan, iyang gibubo kini nga inyong nakita ug nadungog.” (Buhat 2:32, 33) Sa makita nato sa ulahi, ang balaang espiritu nga gibubo sa Pentekostes nakahimo ug daghang butang alang sa unang mga Kristohanon. Apan si Jesus nagsaad nga “ang espiritu sa kamatuoran” ‘magpahinumdom kanila sa tanang butang nga iyang gisulti kanila.’ (Juan 14:26) Magpahinumdom kini kanila sa ministeryo ug mga pagtulon-an ni Jesus, bisan sa eksaktong mga pulong nga gisulti ni Jesus, ug isulat kini. Kini ilabinang nakatabang sa tigulang nga si apostol Juan sa kataposan sa unang siglo K.P. sa dihang gisugdan niya pagsulat ang iyang asoy sa Ebanghelyo. Ang maong asoy naglakip sa bililhong tambag nga gihatag ni Jesus sa dihang gisugdan niya ang Memoryal sa iyang kamatayon.—Juan, mga kapitulo 13-17.
4. Sa unsang paagi “ang espiritu sa kamatuoran” mitabang sa unang dinihogang mga Kristohanon?
4 Gisaaran usab ni Jesus kadtong unang mga tinun-an nga ang espiritu ‘magatudlo kanila sa tanang butang’ ug ‘magatultol kanila ngadto sa tibuok kamatuoran.’ Ang espiritu motabang kanila sa pagsabot sa mas laglom nga mga butang sa Kasulatan ug pagtipig sa ilang panaghiusa sa hunahuna, pagsabot, ug katuyoan. (1 Corinto 2:10; Efeso 4:3) Busa ang balaang espiritu naghatag ug gahom niadtong unang mga Kristohanon sa paglihok ingong usa ka pundok sa “matinumanon ug maalamong ulipon” nga magtagana sa tagsatagsa ka dinihogang Kristohanon ug espirituwal nga “pagkaon sa hustong panahon.”—Mateo 24:45.
Ang Espiritu Nagpamatuod
5. (a) Unsang bag-ong paglaom ang gibutyag ni Jesus sa iyang mga tinun-an sa gabii sa Nisan 14, 33 K.P.? (b) Unsay papel sa balaang espiritu sa pagtuman sa saad ni Jesus?
5 Sa gabii sa Nisan 14, 33 K.P., gipasumbingay ni Jesus sa iyang mga tinun-an nga sa ulahi sila pagadawaton niya ug mopuyo uban kaniya ug sa iyang Amahan didto sa langit. Giingnan niya sila: “Sa balay sa akong Amahan adunay daghang puloy-anan. Kon dili pa, giingnan ko unta kamo, tungod kay ako moadto aron sa pag-andam ug dapit alang kaninyo. Ug usab, kon ako moadto ug mag-andam ug dapit alang kaninyo, ako moanhi pag-usab ug pagadawaton ko kamo nganhi kanako, aron nga kon asa ako kamo atua usab.” (Juan 13:36; 14:2, 3) Sila magahari uban kaniya sa iyang Gingharian. (Lucas 22:28-30) Aron mabatonan nila kining langitnong paglaom, sila kinahanglang ‘ipanganak gikan sa espiritu’ ingong espirituwal nga mga anak sa Diyos ug dihogan nga moalagad ingong mga hari ug mga saserdote uban kang Kristo sa langit.—Juan 3:5-8; 2 Corinto 1:21, 22; Tito 3:5-7; 1 Pedro 1:3, 4; Pinadayag 20:6.
6. (a) Kanus-a nagsugod ang langitnong pagtawag, ug pila ang nakadawat niini nga pagtawag? (b) Kadtong gitawag gibawtismohan ngadto sa unsa?
6 Kining “langitnong pagtawag” nagsugod sa Pentekostes 33 K.P. ug, sa pangunang bahin, mipatim-aw nga natapos kini sa tungatunga sa katuigan sa 1930. (Hebreohanon 3:1) Ang gidaghanon niadtong gitimbrehan sa balaang espiritu nga mahimong bahin sa espirituwal nga Israel maoy 144,000, nga “gipalit gikan sa katawhan.” (Pinadayag 7:4; 14:1-4) Sila gibawtismohan ngadto sa espirituwal nga lawas ni Kristo, ngadto sa iyang kongregasyon, ug ngadto sa iyang kamatayon. (Roma 6:3; 1 Corinto 12:12, 13, 27; Efeso 1:22, 23) Human sila mabawtismohi sa tubig ug madihogi sa balaang espiritu, sila misulod ngadto sa usa ka masakripisyohong dalan, nga nagpasabot ug pagkinabuhi nga maunongon hangtod sa ilang kamatayon.—Roma 6:4, 5.
7. Nganong ang mga dinihogang Kristohanon lamang ang takos nga makig-ambit sa mga emblema sa Memoryal?
7 Ingong espirituwal nga mga Israelinhon, kining dinihogang mga Kristohanon nalakip sa bag-ong pakigsaad nga gihimo tali ni Jehova ug “sa Israel sa Diyos.” (Galacia 6:16; Jeremias 31:31-34) Ang bag-ong pakigsaad gipalig-on sa giulang dugo ni Kristo. Gihisgotan kini ni Jesus sa dihang gisugdan niya ang Memoryal sa iyang kamatayon. Si Lucas misulat: “Siya nagkuhag tinapay, nagpasalamat, nagpikaspikas niini, ug naghatag niini kanila, nga nag-ingon: ‘Kini nagkahulogan sa akong lawas nga igahatag alang kaninyo. Ipadayon ninyo ang pagbuhat niini sa paghandom kanako.’ Maingon man usab, ang kopa sa samang paagi human sila makapanihapon, siya nag-ingon: ‘Kini nga kopa nagkahulogan sa bag-ong pakigsaad tungod sa akong dugo, nga igabubo alang kaninyo.’” (Lucas 22:19, 20) Ang mga nanghibilin, o nahibiling mga membro sa 144,000 nga ania pa sa yuta, mao ang takos nga makig-ambit sa emblema nga tinapay ug bino panahon sa Memoryal sa kamatayon ni Kristo.
8. Unsaon pagkahibalo sa mga dinihogan nga sila nakadawat sa langitnong pagtawag?
8 Unsaon pagkahibalo sa mga dinihogan nga sila nakadawat sa langitnong pagtawag? Seguradong madawat nila ang pamatuod sa balaang espiritu. Si apostol Pablo misulat nianang mga tawhana: “Ang tanan nga gitultolan sa espiritu sa Diyos, kini sila mga anak sa Diyos. . . . Ang espiritu mismo nagpamatuod uban sa atong espiritu nga kita mga anak sa Diyos. Nan, kon kita mga anak, kita usab mga manununod: mga manununod gayod sa Diyos, apan kaubang mga manununod ni Kristo, basta duyog kita nga magaantos aron kita usab duyog nga pagahimayaon.” (Roma 8:14-17) Kining pagpamatuod sa espiritu gamhanan kaayo nga kadtong adunay gamay kaayong pagduhaduha bahin sa pagkadawat sa langitnong pagtawag makataronganong makahinapos nga wala sila makadawat niini, ug busa dili sila makig-ambit sa mga emblema sa Memoryal.
Ang Espiritu ug ang Ubang Karnero
9. Unsang duha ka lainlaing mga grupo ang gihisgotan sa mga Ebanghelyo ug sa basahon sa Pinadayag?
9 Kay anaa sa hunahuna ang limitadong gidaghanon sa mga Kristohanon nga gitawag aron molangkob sa espirituwal nga Israel, gihisgotan sila ni Jesus ingong “gamayng panon.” Sila gidawat ngadto sa ‘toril’ sa bag-ong pakigsaad, nga lahi sa dili-maihap nga “ubang mga karnero,” nga giingon ni Jesus nga pagatigomon usab niya. (Lucas 12:32; Juan 10:16) Kadtong sakop sa ubang mga karnero nga gitigom sa panahon sa kataposan maoy molangkob sa “dakong panon” nga giingon nga makalabang-buhi sa “dakong kasakitan,” uban ang paglaom nga mabuhing walay kataposan sa paraiso sa yuta. Makaiikag, ang panan-awon nga nadawat ni Juan sa kataposan sa unang siglo K.P. naghatag sa kalainan niining dakong panon ug sa 144,000 ka membro sa espirituwal nga Israel. (Pinadayag 7:4, 9, 14) Ang ubang mga karnero ba makadawat usab sa balaang espiritu, ug kon mao man, sa unsang paagi kini mag-apektar sa ilang kinabuhi?
10. Sa unsang paagi ang ubang mga karnero nabawtismohan “sa ngalan sa Amahan ug sa Anak ug sa balaang espiritu”?
10 Sa pagkatinuod ang balaang espiritu adunay hinungdanong bahin sa kinabuhi sa ubang mga karnero. Ilang gisimbolohan ang ilang pahinungod ngadto kang Jehova pinaagi sa pagpabawtismo “sa ngalan sa Amahan ug sa Anak ug sa balaang espiritu.” (Mateo 28:19) Ilang giila ang pagkasoberano ni Jehova, nagpasakop kang Kristo ingong ilang Hari ug Manunubos, ug nagpasignunot sa paglihok sa espiritu, o aktibong gahom, sa Diyos diha sa ilang kinabuhi. Sa matag adlaw, sila naningkamot sa pag-ugmad sa “bunga sa espiritu,” nga mao ang “gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon.”—Galacia 5:22, 23.
11, 12. (a) Sa unsang paagi ang mga dinihogan gibalaan sa linain kaayong paagi? (b) Sa unsang paagi ang ubang mga karnero gibalaan ug gihimong sagrado?
11 Kinahanglan usab nga tugotan sa ubang mga karnero ang Pulong sa Diyos ug ang iyang balaang espiritu nga magputli, o magbalaan, kanila. Ang dinihogan gibalaan na sa linain kaayong paagi, nga gipahayag nga matarong ug balaan ingong pangasaw-onon ni Kristo. (Juan 17:17; 1 Corinto 6:11; Efeso 5:23-27) Ang manalagnang si Daniel naghisgot kanila ingong “ang mga balaan sa Supremong Usa,” kinsa nakadawat sa Gingharian ilalom sa “anak sa tawo,” si Kristo Jesus. (Daniel 7:13, 14, 18, 27) Sayosayo pa, pinaagi kang Moises ug Aaron, si Jehova miingon ngadto sa nasod sa Israel: “Ako mao si Jehova nga inyong Diyos; ug balaanon ninyo ang inyong kaugalingon ug kamo magmabalaan, tungod kay ako balaan.”—Levitico 11:44.
12 Ang pulong “pagbalaan” sa paninugdan nagpasabot sa “buhat o proseso sa paghimong balaan, pagbulag, o paglain alang sa pag-alagad o paggamit ni Jehova nga Diyos; ang kahimtang sa pagkahimong sagrado, balaan, o putli.” Sukad pa sa 1938, Ang Bantayanang Torre nag-ingon nga ang mga Jonadab, o ubang mga karnero, “kinahanglang mahibalo nga ang pagkonsagrar [pagpahinungod] ug pagbalaan gikinahanglan sa matag usa nga mahimong bahin sa dakong pundok ug mabuhi dinhi sa yuta.” Sa panan-awon bahin sa dakong panon, nga gisulat diha sa basahon sa Pinadayag, sila gihisgotan nga ‘nakalaba sa ilang tag-as nga mga besti ug gipaputi kini sa dugo sa Kordero’ ug naghatag kang Jehova ug “sagradong pag-alagad adlaw ug gabii diha sa iyang templo.” (Pinadayag 7:9, 14, 15) Sa tabang sa balaang espiritu, ang ubang mga karnero naghimo sa ilang maarangan aron makab-ot ang mga kinahanglanon ni Jehova sa pagkabalaan.—2 Corinto 7:1.
Paghimog Maayo Ngadto sa mga Igsoon ni Kristo
13, 14. (a) Sumala sa sambingay ni Jesus bahin sa mga karnero ug mga kanding, sa unsa nagadepende ang kaluwasan sa mga karnero? (b) Niining panahon sa kataposan, sa unsang paagi ang ubang mga karnero nakahimog maayo ngadto sa mga igsoon ni Kristo?
13 Gipasiugda ni Jesus ang panagsuod sa ubang mga karnero ug sa gamayng panon diha sa iyang sambingay sa mga karnero ug mga kanding, nga nalakip diha sa iyang tagna bahin sa “kataposan sa sistema sa mga butang.” Nianang maong sambingay, tin-awng gipakita ni Kristo nga ang kaluwasan sa ubang mga karnero dakog kalabotan sa ilang pagtratar sa mga dinihogan, nga iyang gitawag ug “akong mga igsoon.” Siya miingon: “Ang hari magaingon niadtong anaa sa iyang tuo, ‘Umari, kamong gipanalanginan sa akong Amahan, panunda ninyo ang gingharian nga giandam alang kaninyo sukad pa sa pagkatukod sa kalibotan. . . . Sa pagkatinuod ako magaingon kaninyo, Sa sukod nga gibuhat ninyo kini sa usa sa labing ubos niining akong mga igsoon, gibuhat ninyo kini kanako.’”—Mateo 24:3; 25:31-34, 40.
14 Ang ekspresyon nga “sa sukod nga gibuhat ninyo kini” nagtumong sa mga buhat sa mahigugmaong pagpaluyo nga gihatag ngadto sa inanak-sa-espiritu nga mga igsoon ni Kristo, nga gitratar sa kalibotan ni Satanas ingong mga langyaw, nga ang uban gani gibalhog ngadto sa bilanggoan. Sila nanginahanglan ug pagkaon, igong besti, ug pag-atiman sa panglawas. (Mateo 25:35, 36, potnot sa Ingles) Niining panahon sa kataposan, sukad sa 1914, daghan sa mga dinihogan ang nahimutang sa maong mga situwasyon. Ang modernong kasaysayan sa mga Saksi ni Jehova nagpamatuod nga sila gitabangan sa ilang maunongong mga kauban, ang ubang mga karnero, sanglit sila gipalihok sa espiritu.
15, 16. (a) Sa unsang kalihokan nga ang ubang mga karnero ilabinang mitabang sa dinihogang mga igsoon ni Kristo dinhi sa yuta? (b) Sa unsang paagi ang mga dinihogan nagpahayag sa ilang apresasyon sa ubang mga karnero?
15 Ang dinihogang mga igsoon ni Kristo dinhi sa yuta niining panahon sa kataposan ilabinang nakadawat sa aktibong pagpaluyo sa ubang mga karnero sa pagtuman sa hinatag-sa-Diyos nga buluhaton sa ‘pagwali niining maayong balita sa gingharian sa tibuok gipuy-ang yuta ingon nga pagpamatuod ngadto sa tanang kanasoran.’ (Mateo 24:14; Juan 14:12) Samtang ang gidaghanon sa mga dinihogan dinhi sa yuta nagaus-os latas sa katuigan, ang gidaghanon sa ubang mga karnero nagauswag nga naglakip sa literal nga milyonmilyon. Libolibo niini ang nag-alagad ingong bug-os-panahong mga ebanghelisador—mga payunir ug mga misyonaryo—nga nagpakaylap sa maayong balita sa Gingharian ngadto “sa kinalay-ang dapit sa yuta.” (Buhat 1:8) Ang uban nakig-ambit sa buluhatong pagsangyaw kutob sa ilang maarangan ug malipayong nagpaluyo niining hinungdanong buluhaton sa pinansiyal nga paagi.
16 Pagkamapasalamaton sa dinihogang mga igsoon ni Kristo niining maunongong pagpaluyo sa ilang kauban nga ubang mga karnero! Ang ilang gibati maayong pagkapahayag sa librong Worldwide Security Under the “Prince of Peace,” nga gitagana sa ulipon nga matang sa 1986. Kini nag-ingon: “Sukad sa Gubat sa Kalibotan II, ang katumanan sa tagna ni Jesus alang sa ‘kataposan sa sistema sa mga butang’ sa dakong bahin maoy tungod sa ginabuhat sa ‘dakong panon’ sa ‘ubang mga karnero.’ . . . Busa, daghang salamat sa internasyonal, daghag-pinulongan nga ‘dakong panon’ tungod sa kadako sa ilang nahimo sa pagtuman sa tagna [ni Jesus] sa Mateo 24:14!”
“Dili Mahingpit nga Bulag Kanato”
17. Sa unsang paagi ang mga matinumanon sa kakaraanan nga pagabanhawon dinhi sa yuta “dili mahingpit nga bulag” sa mga dinihogan?
17 Nagsulti isip usa sa mga dinihogan ug nagtumong sa matinumanong mga lalaki ug babaye nga nabuhi una pa kang Kristo, si apostol Pablo misulat: “Kini silang tanan, bisan tuod sila gipamatud-an pinaagi sa ilang pagtuo, wala makabaton sa katumanan sa saad, sanglit ang Diyos may gipanan-aw nga mas maayo alang kanato [ang mga dinihogan], aron nga sila dili mahingpit nga bulag kanato.” (Hebreohanon 11:35, 39, 40) Panahon sa Milenyo, si Kristo ug ang iyang 144,000 ka dinihogang mga igsoon sa langit molihok ingong mga hari ug mga saserdote ug magahatag sa mga benepisyo sa halad lukat ni Kristo dinhi sa yuta. Busa ang ubang mga karnero “mahingpit” sa lawas ug hunahuna.—Pinadayag 22:1, 2.
18. (a) Ang mga kamatuoran sa Bibliya motabang sa ubang mga karnero sa pagsabot sa unsa? (b) Sa unsang paglaom nga ang ubang mga karnero nagapaabot “sa pagpadayag sa mga anak sa Diyos”?
18 Tungod niining tanan angayng matisok sa hunahuna sa ubang mga karnero kon nganong ang Kristohanon Gregong Kasulatan naghatag ug dakong pagtagad kang Kristo ug sa iyang dinihogan nga mga igsoon ug sa ilang hinungdanong bahin diha sa katumanan sa mga katuyoan ni Jehova. Busa giisip sa ubang mga karnero nga usa ka talagsaong kahigayonan nga magpaluyo sa tanang paagi nga posible sa dinihogang ulipon nga matang samtang nagapaabot “sa pagpadayag sa mga anak sa Diyos” sa Armagedon ug panahon sa Milenyo. Sila makapaabot nga ‘mapagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.’—Roma 8:19-21.
Nahiusa sa Espiritu Panahon sa Memoryal
19. Unsay nahimo sa “espiritu sa kamatuoran” alang sa mga dinihogan ug sa ilang mga kauban, ug sa unsang paagi sila ilabinang mahiusa sa gabii sa Marso 28?
19 Sa iyang paniklop nga pag-ampo sa gabii sa Nisan 14, 33 K.P., si Jesus miingon: “Naghangyo ako . . . aron nga silang tanan mahimong usa, ingon nga ikaw, Amahan, nahiusa kanako ug ako nahiusa kanimo, nga sila usab mahiusa unta kanato, aron nga ang kalibotan motuo nga ikaw nagpadala kanako.” (Juan 17:20, 21) Tungod sa gugma, gipadala sa Diyos ang iyang Anak aron sa pagbuhis sa iyang kinabuhi alang sa kaluwasan sa mga dinihogan ug sa kalibotan sa masinugtanong katawhan. (1 Juan 2:2) “Ang espiritu sa kamatuoran” naghiusa sa mga igsoon ni Kristo ug sa ilang mga kauban. Sa gabii sa Marso 28, human sa pagsalop sa adlaw, kanang duha ka matang magtigom aron sa paghandom sa kamatayon ni Kristo ug sa paghinumdom sa tanan nga nahimo ni Jehova alang kanila pinaagi sa halad sa iyang pinalanggang Anak, si Kristo Jesus. Hinaot ang ilang pagtambong nianang hinungdanong okasyon magpalig-on sa ilang panaghiusa ug magbag-o sa ilang determinasyon sa pagpadayon sa pagtuman sa kabubut-on sa Diyos, sa ingon naghatag ug pamatuod nga sila nalipay nga nahilakip niadtong gihigugma ni Jehova.
Agig Pagsubli
• Kanus-a gipadala “ang espiritu sa kamatuoran” ngadto sa unang mga Kristohanon, ug sa unsang paagi kini napamatud-an nga usa ka “magtatabang”?
• Unsaon pagkahibalo sa mga dinihogan nga ilang nadawat ang langitnong pagtawag?
• Sa unsang mga paagi nga ang espiritu sa Diyos nagalihok diha sa ubang mga karnero?
• Sa unsang paagi ang ubang mga karnero nagbuhat ug maayo ngadto sa mga igsoon ni Kristo, ug nganong sila “dili mahingpit nga bulag” sa mga dinihogan?
[Mga Pangutana sa Pagtuon]
[Hulagway sa panid 21]
“Ang espiritu sa kamatuoran” gibubo diha sa mga tinun-an sa Pentekostes 33 K.P.
[Mga hulagway sa panid 23]
Ang ubang mga karnero nagbuhat ug maayo sa mga igsoon ni Kristo pinaagi sa pagpaluyo kanila sa pagtuman sa sugo sa Diyos nga magwali