Bug-os nga Masinangkapan Ingong mga Magtutudlo sa Pulong sa Diyos
Bug-os nga Masinangkapan Ingong mga Magtutudlo sa Pulong sa Diyos
‘Ang Diyos . . . sa pagkatinuod naghimo kanamong kuwalipikado nga mga ministro.’—2 CORINTO 3:5, 6.
1, 2. Unsang mga paningkamot sa pagsangyaw ang gihimo usahay, apan nganong kasagarang mapakyas kini?
UNSAY imong bation kon hatagan ka ug trabaho diin dili ka kuwalipikado nga mobuhat niana? Handurawa kini: Ang mga materyales nga imong gikinahanglan giladlad sa imong atubangan, ug dunay mga himan nga magamit. Apan wala ka mahibalo kon unsaon pagtuman ang maong tahas. Misamot pa ka komplikado ang situwasyon kay dinalian kining trabahoa. Ang mga tawo naglaom kanimo. Pagkamakapahigawad niana!
2 Ang maong problema dili gayod hinanduraw lamang. Tagda ang usa ka pananglitan. Usahay, ang usa sa mga iglesya sa Kakristiyanohan mosulay pag-organisar ug pagtuman sa balay-sa-balay nga ministeryo. Ang maong mga paningkamot kasagarang mapakyas, nga mahunong sulod sa mga semana o mga bulan. Ngano? Ang Kakristiyanohan wala magtabang sa iyang mga sumusunod nga mahimong kuwalipikado sa maong trabaho. Bisan ang mga klero dili kuwalipikado nga mosangyaw, kasagaran bisan pag naedukar sila diha sa sekular nga mga eskuylahan ug mga seminaryo sulod sa daghang tuig. Nganong makaingon man kita niana?
3. Sa 2 Corinto 3:5, 6, unsang ekspresyon ang gigamit ug tulo ka beses, ug unsay buot ipasabot niini?
3 Gipatin-aw sa Pulong sa Diyos kon unsay makapahimong kuwalipikado sa usa ka matuod nga magsasangyaw sa Kristohanong maayong balita. Si apostol Pablo gidasig sa pagsulat: ‘Dili nga kami sa among kaugalingon kuwalipikado nga mag-isip sa bisan unsa ingong nagagikan sa among kaugalingon, kondili ang among pagkahimong kuwalipikado nagagikan sa Diyos, kinsa sa pagkatinuod naghimo kanamong kuwalipikado nga mga ministro.’ (2 Corinto 3:5, 6) Matikdi ang ekspresyon nga gigamit ug tulo ka beses dinhi—“kuwalipikado.” Unsay buot ipasabot niini? Ang Vine’s Expository Dictionary of Biblical Words nag-ingon: “Kon mga butang ang hisgotan [ang orihinal nga Gregong pulong kuwalipikado] nagpasabot ug ‘igo’ . . . ; kon mga tawo ang hisgotan, kini nagpasabot ug ‘makasarang,’ ‘takos.’” Busa, ang usa ka tawong “kuwalipikado” makasarang ug takos nga mohimo sa gihatag nga tahas. Oo, ang matuod nga mga ministro sa maayong balita kuwalipikado nga mohimo niining buluhatona. Sila makasarang, angayan, o takos nga mosangyaw.
4. (a) Sa unsang paagi ang panig-ingnan ni Pablo nagpakita nga ang pagkahimong kuwalipikado alang sa Kristohanong ministeryo dili alang lamang sa pipila ka piniling mga tawo? (b) Unsa ang tulo ka paagi nga si Jehova naghimo kanatong kuwalipikado nga mga ministro?
4 Apan, asa gikan ang maong kuwalipikasyon? Tungod ba sa personal nga mga abilidad? Tungod ba sa superyor nga kinaadman? Tungod ba sa espesyal nga edukasyon diha sa iladong mga eskuylahan? Si apostol Pablo dayag nga nakabaton nianang tanan. (Buhat 22:3; Filipos 3:4, 5) Bisan pa niana, siya mapaubsanong miila nga ang iyang mga kuwalipikasyon ingong ministro naggikan, dili sa mga kolehiyo ug unibersidad, kondili gikan kang Jehova nga Diyos. Ang mao bang mga kuwalipikasyon alang lamang sa pipila ka piniling mga tawo? Si Pablo misulat ngadto sa kongregasyon sa Corinto bahin sa ‘among pagkahimong kuwalipikado.’ Kana tinong nagsugyot nga seguroon ni Jehova nga ang tanan niyang matinumanong mga alagad makasarang, makahimo sa trabaho nga gipabuhat niya kanila. Sa unsang paagi ang matuod nga mga Kristohanon karon gihimo ni Jehova nga kuwalipikado? Hisgotan nato ang tulo ka paagi nga iyang gigamit: (1) iyang Pulong, (2) iyang balaang espiritu, ug (3) iyang yutan-ong organisasyon.
Ang Pulong ni Jehova Naghimo Kanatong Kuwalipikado
5, 6. Ang Balaang Kasulatan adunay unsang epekto nganha sa matuod nga mga Kristohanon?
5 Una, sa unsang paagi ang Pulong sa Diyos motabang sa paghimo kanatong kuwalipikado nga mga ministro? Si Pablo misulat: ‘Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong, aron ang tawo sa Diyos mahimong makasarang gayod, bug-os nga masinangkapan alang sa tanang maayong buhat.’ (2 Timoteo 3:16, 17) Busa ang Balaang Kasulatan motabang kanato nga mahimong ‘makasarang gayod, bug-os nga masinangkapan’ sa pagtuman sa “maayong buhat” sa pagtudlo sa mga tawo bahin sa Pulong sa Diyos. Apan, komosta kadtong tanang sumusunod sa mga iglesya sa Kakristiyanohan? Sila mahimong mogamit sa Bibliya. Ngano man nga kining basahona nakatabang sa pipila ka tawo nga mahimong makasarang nga mga ministro apan wala makatabang sa uban? Ang tubag makita diha sa atong tinamdan sa Bibliya.
6 Ikasubo, daghang tig-adto sa simbahan ang dili modawat sa mensahe sa Bibliya “ingon sa kon unsa kini sa pagkatinuod, ingong pulong sa Diyos.” (1 Tesalonica 2:13) Nagpatongpatong na ang makauulaw nga rekord sa Kakristiyanohan bahin niini. Human mogugol ug daghang tuig sa pagtuon diha sa teolohikal nga mga institusyon, ang mga klero ba nasangkapan ingong mga magtutudlo sa Pulong sa Diyos? Wala gayod. Aw, ang ubang mga estudyante nagsugod pagtuon diha sa seminaryo ingong mga magtutuo sa Bibliya apan migraduwar nga mga maduhaduhaon na hinuon niini! Human niana, inay isangyaw ang Pulong sa Diyos—nga wala na tuohi sa daghan kanila—ilang gitumong ang ilang ministeryo sa ubang natad, nga midapig sa politikanhong mga lantugi, nagpasiugda sa katilingbanong ebanghelyo, o nagpatigbabaw sa tawhanong mga pilosopiya diha sa ilang mga wali. (2 Timoteo 4:3) Sa kasukwahi, ang matuod nga mga Kristohanon nagsunod sa panig-ingnan ni Jesu-Kristo.
7, 8. Sa unsang paagi ang tinamdan ni Jesus bahin sa Pulong sa Diyos lahi nianang sa relihiyosong mga lider sa iyang adlaw?
7 Wala tugoti ni Jesus ang relihiyosong mga lider sa iyang adlaw nga mag-impluwensiya sa iyang panghunahuna. Nagatudlo man sa usa ka gamayng grupo, sama sa iyang mga apostoles, o sa dakong panon, si Jesus kanunayng migamit sa balaang mga sinulat. (Mateo 13:10-17; 15:1-11) Kining maong buhat nakapalahi kaniya sa relihiyosong mga lider sa maong panahon. Sila kusganong nagdili sa komon nga mga tawo sa pagsusi sa lalom nga mga butang sa Diyos. Gani, naandan na sa usa ka magtutudlo niadtong mga adlawa ang pagtuo nga ang ubang mga teksto sa Bibliya lisod kaayong sabton ug mahimo lamang kining hisgotan uban sa iyang kinasuorang estudyante—ug bisan nianang kahimtanga, kini himoon sa hinay lamang nga tingog ug magpandong. Ang pagkamatuotuohon sa maong relihiyosong mga lider maylabot sa paghisgot sa pipila ka bahin sa Bibliya halos sama ra sa ilang pagkamatuotuohon sa paglitok sa balaang ngalan!
8 Si Kristo dili ingon niana. Nagtuo siya nga dili pipila lamang ka piniling mga tawo kondili ang tanang tawo kinahanglang maghatag ug pagtagad sa “matag pulong nga magagula sa baba ni Jehova.” Dili gusto ni Jesus nga ihatag ang pribilehiyo sa pagpatin-aw sa Kasulatan ngadto lamang sa hamiling pundok sa mga eskolar. Giingnan niya ang iyang mga tinun-an: “Ang isulti ko kaninyo sa tago, isulti sa kahayag; ug ang madungog ninyo nga hinagawhaw, iwali gikan sa mga atop.” (Mateo 4:4; 10:27) Si Jesus nagtinguha gayod sa pagpaambit sa kahibalo sa Diyos ngadto sa daghang tawo kutob sa maarangan.
9. Sa unsang paagi ang matuod nga mga Kristohanon naggamit sa Bibliya?
9 Ang Pulong sa Diyos angayng mao ang hatagag dakong pagtagad diha sa atong pagpanudlo. Pananglitan, sa dihang kita mohatag ug pakigpulong diha sa Kingdom Hall sa mga Saksi ni Jehova kasagaran dili pa igo ang pagbasa ug pipila ka piniling mga bersikulo gikan sa Bibliya. Kinahanglan tingali natong ipatin-aw, iilustrar, ug ipadapat ang usa ka teksto sumala sa konteksto. Ang atong tumong mao ang pagkuha, ingnon ta, sa mensahe sa Bibliya gikan sa maong panid ug itisok kana sa kasingkasing sa atong mga mamiminaw. (Nehemias 8:8, 12) Ang Bibliya angay usab nga gamiton kon kinahanglang maghatag ug tambag o magpahamtang ug nagatul-id nga disiplina. Bisan tuod ang katawhan ni Jehova nagsulti ug lainlaing mga pinulongan ug lainlaig mga kagikan, silang tanan nagtahod sa Basahon sa mga basahon—ang Bibliya.
10. Unsay epekto sa dinasig nga mensahe sa Bibliya nganhi kanato?
10 Sa dihang gamiton uban ang maong pagtahod, ang mensahe sa Bibliya dunay gahom. (Hebreohanon 4:12) Magpalihok kini sa mga tawo sa paghimog mga kausaban sa ilang kinabuhi, sama sa pagtalikod sa dili-kasulatanhong mga panggawi nga pakighilawas, panapaw, idolatriya, paghuboghubog, ug pagpangawat. Nakatabang kini sa daghan kaayong tawo sa paghukas sa daang personalidad ug pagsul-ob sa bag-o. (Efeso 4:20-24) Oo, kon gitahod nato kini labi pa sa bisan unsang tawhanong hunahuna o tradisyon ug gamiton kini kanunay, ang Bibliya makatabang sa paghimo kanatong makasarang, bug-os nga masinangkapan ingong mga magtutudlo sa Pulong sa Diyos.
Ang Espiritu ni Jehova Naghimo Kanatong Kuwalipikado
11. Nganong ang balaang espiritu ni Jehova haom nga tawgon ingong “ang magtatabang”?
11 Ikaduha, hisgotan nato ang papel sa balaang espiritu, o aktibong gahom, ni Jehova sa paghimo kanatong bug-os nga masinangkapan. Dili gayod nato kalimtan nga ang espiritu ni Jehova mao ang labing puwersadong gahom sa tanan. Si Jehova nag-awtorisar sa iyang pinalanggang Anak sa paggamit nianang makalilisang nga gahom alang sa kaayohan sa tanang matuod nga mga Kristohanon. Sa kahaom, gitawag ni Jesus ang balaang espiritu ingong “ang magtatabang.” (Juan 16:7) Giawhag niya ang iyang mga sumusunod sa pagpangayo kang Jehova sa maong espiritu, nga nagpasalig kanila nga si Jehova madagayaong maghatag niana.—Lucas 11:10-13; Santiago 1:17.
12, 13. (a) Nganong hinungdanon nga kita mag-ampo alang sa balaang espiritu sa pagtabang kanato diha sa atong ministeryo? (b) Sa unsang paagi gipakita sa mga Pariseo nga ang balaang espiritu wala maglihok diha kanila?
12 Kinahanglang mag-ampo kita alang sa balaang espiritu sa adlaw-adlaw, ilabina sa pagtabang kanato diha sa atong ministeryo. Unsay epekto nianang aktibong gahom nganhi kanato? Kini mag-impluwensiya sa atong hunahuna ug kasingkasing, nga motabang kanato sa pag-usab, pagtubo sa espirituwal, ug paghukas sa daang pagkatawo ug pulihan kini ug bag-o. (Colosas 3:9, 10) Makatabang kini kanato sa pag-ugmad sa bililhon, sama sa iya ni Kristo nga mga hiyas. Daghan kanato ang makasag-ulo sa Galacia 5:22, 23. Nalista sa maong mga bersikulo ang mga bunga sa espiritu sa Diyos. Ang una mao ang gugma. Kanang hiyasa hinungdanon diha sa atong ministeryo. Ngano?
13 Ang gugma maoy puwersadong panukmod. Ang gugma alang kang Jehova ug sa isigkatawo magpalihok sa matuod nga mga Kristohanon sa pagpaambit sa maayong balita. (Marcos 12:28-31) Kon wala kanang gugmaha, kita dili gayod mahimong kuwalipikado nga mga magtutudlo sa Pulong sa Diyos. Matikdi ang kalainan tali kang Jesus ug sa mga Pariseo. Ang Mateo 9:36 nag-ingon bahin kang Jesus: “Sa pagkakita sa mga panon sa katawhan siya naluoy kanila, tungod kay sila pinanitan ug nagkatibuagsa sama sa mga karnero nga walay magbalantay.” Unsay hunahuna sa mga Pariseo sa komon nga mga tawo? Sila miingon: “Kining panon sa katawhan nga wala mahibalo sa Balaod maoy tinunglong katawhan.” (Juan 7:49) Ang maong mga Pariseo walay gugma alang sa mga tawo kondili daghan hinuon ug kayugot. Klaro nga ang espiritu ni Jehova wala maglihok diha kanila.
14. Sa unsang paagi ang panig-ingnan ni Jesus sa pagpakita ug gugma diha sa iyang ministeryo angayng magpalihok kanato?
14 Si Jesus naluoy sa mga tawo. Nasayod siya sa ilang kasakit. Nahibalo siya nga sila giabusohan, gipanitan, ug nagkatibuagsa sama sa mga karnero nga walay magbalantay. Nag-ingon ang Juan 2:25 nga si Jesus “nahibalo kon unsa ang anaa sa tawo.” Kay mao man ang Batid nga Magbubuhat ni Jehova panahon sa paglalang, si Jesus nakasabot pag-ayo sa tawhanong kinaiya. (Proverbio 8:30, 31) Ang maong pagsabot nagpalalom sa iyang gugma. Hinaot ang maong gugma kanunayng mahimong panukmod nga gahom luyo sa atong kalihokang pagsangyaw! Kon gibati nato nga mouswag pa kita niining bahina, mag-ampo kita alang sa balaang espiritu ni Jehova ug dayon molihok nga kaharmonya sa atong mga pag-ampo. Tubagon kita ni Jehova. Ipadala niya kining dili-mapugngang gahom sa pagtabang kanato nga mahimong mas mahisama kang Kristo, kinsa kuwalipikado kaayong mosangyaw sa maayong balita.
15. Sa unsang paagi ang mga pulong sa Isaias 61:1-3 mapadapat kang Jesus ug sa samang higayon nagyagyag sa mga eskriba ug mga Pariseo?
15 Diin gikan ang mga kuwalipikasyon ni Jesus? “Ang espiritu ni Jehova ania kanako,” siya miingon. (Lucas 4:17-21) Oo, si Jehova mismo ang nagtudlo kang Jesus pinaagi sa balaang espiritu. Wala na magkinahanglan si Jesus ug dugang pang mga pamatuod. Gitudlo ba sa balaang espiritu ang relihiyosong mga lider sa iyang adlaw? Wala. Ni sila gisangkapan sa pagtuman sa Isaias 61:1-3, nga gibasa ug kusog ni Jesus ug gipadapat sa iyang kaugalingon. Palihog basaha ang maong mga bersikulo, ug imong makita mismo nga ang maot nga mga eskriba ug mga Pariseo wala makakab-ot sa mga sukdanan. Wala silay maayong balita nga ipahayag sa mga kabos. Ug unsaon nila pagsangyaw ug kagawasan sa mga binihag ug pagpasig-uli sa panan-aw sa mga buta? Sa espirituwal nga diwa, sila mismo maoy mga buta ug naulipon sa hinimog-tawo nga mga tradisyon! Dili sama niadtong mga tawhana, kita ba kuwalipikado nga motudlo sa mga tawo?
16. Unsang pagsalig ang mahimong bation sa katawhan ni Jehova karon kon bahin sa ilang mga kuwalipikasyon ingong mga ministro?
16 Tinuod, wala kita magtuon diha sa mga kolehiyo ug unibersidad sa Kakristiyanohan. Wala kita itudlo sa usa ka teolohikal nga seminaryo ingong mga magtutudlo. Nan, kulang ba kita sa mga kuwalipikasyon? Dili gayod! Ang pagkatudlo kanato ingong iyang mga Saksi naggikan kang Jehova. (Isaias 43:10-12) Kon kita mag-ampo alang sa iyang espiritu ug molihok nga kaharmonya sa atong pag-ampo, nabatonan nato ang kinatas-ang matang sa mga kuwalipikasyon. Siyempre, kita dili-hingpit ug dili bug-os nga makasundog sa panig-ingnan nga gihatag sa Dakong Magtutudlo, si Jesus. Bisan pa niana, dili ba kita mapasalamaton nga gigamit ni Jehova ang iyang espiritu sa paghimo kanatong kuwalipikado ug pagsangkap kanato ingong mga magtutudlo sa iyang Pulong?
Ang Organisasyon ni Jehova Naghimo Kanatong Kuwalipikado
17-19. Sa unsang paagi ang lima ka senemanang mga tigom nga gitagana sa organisasyon ni Jehova motabang kanato nga mahimong kuwalipikado nga mga ministro?
17 Karon hisgotan nato ang ikatulong paagi diin si Jehova nagsangkap kanato ingong mga magtutudlo sa iyang Pulong—ang iyang yutan-ong kongregasyon, o organisasyon, nga nagbansay kanato nga mahimong mga ministro. Sa unsang paagi? Hunahunaa lang ang programa sa instruksiyon nga atong ginatagamtam! Sa usa ka ordinaryong semana, motambong kita ug lima ka Kristohanong mga tigom. (Hebreohanon 10:24, 25) Magtigom kita sa gagmayng mga grupo diha sa Pagtuon sa Libro sa Kongregasyon aron mapahimuslan ang matukiong pagtuon sa Bibliya pinaagi sa usa ka teksbok nga mabatonan pinaagi sa organisasyon ni Jehova. Pinaagi sa pagpaminaw ug pagkomento, kita makakat-on ug magkadinasigay sa usag usa. Makadawat usab kita ug personal nga instruksiyon ug pagtagad gikan sa magtatan-aw sa pagtuon sa libro. Diha sa Miting Publiko ug Pagtuon sa Bantayanang Torre, makakuha kita ug dugang makapahimsog nga espirituwal nga pagkaon.
18 Ang atong Teokratikanhong Tunghaan sa Ministeryo gidisenyo sa paghatag kanatog instruksiyon kon unsaon pagpanudlo. Pinaagi sa pag-andam sa mga bahin sa mga estudyante, makakat-on kita kon unsaon paggamit ang Pulong sa Diyos sa pagtudlo sa nagkadaiyang mga ulohan. (1 Pedro 3:15) Natudlo ka na ba sukad nga mohatag ug bahin mahitungod sa usa ka ulohan nga morag pamilyar kanimo, unya imong nadiskobrehan nga nakakat-on ka ug bag-ong butang bahin niini? Usa kana ka komon nga kasinatian. Wala nay lain pang makapauswag sa atong kahibalo bahin sa usa ka ulohan kay sa pagtudlo niini ngadto sa uban. Bisan pag dili kita mismo ang gihatagan ug bahin, makakat-on gihapon kita sa pagkahimong mas maayong mga magtutudlo. Sa matag estudyante, atong makita ang maayong mga hiyas, ug makahunahuna kita kon unsaon pagsundog ang maong mga hiyas.
19 Ang Tigom sa Pag-alagad usab gidisenyo sa pagsangkap kanato ingong mga magtutudlo sa Pulong sa Diyos. Kada semana, mapahimuslan nato ang madasigong mga pakigpulong, mga panaghisgot, ug mga demonstrasyon nga gidisenyo alang sa atong ministeryo. Unsang presentasyon ang atong gamiton? Sa unsang paagi masagubang nato ang linaing mga pagsupak diha sa atong publikong ministeryo? Unsang mga paagi sa pagsangyaw ang bukas kanato nga kinahanglan tingali natong sulayan pa? Unsay motabang kanato sa pagkahimong mas epektibong mga magtutudlo sa dihang maghimo kitag mga balikduaw ug magdumalag mga pagtuon sa Bibliya? (1 Corinto 9:19-22) Ang maong mga pangutana gitubag ug gihisgotan nga detalyado diha sa Tigom sa Pag-alagad. Daghang bahin sa tigom ang gipasukad sa mga artikulo sa Atong Ministeryo sa Gingharian, laing galamiton nga gitagana aron masangkapan kita sa atong hinungdanong buluhaton.
20. Sa unsang paagi kita bug-os nga makabenepisyo gikan sa mga tigom ug mga asembliya?
20 Pinaagi sa pagpangandam ug pagtambong sa atong mga tigom ug dayon pagpadapat kon unsay atong nakat-onan diha sa atong buluhaton ingong mga magtutudlo, makadawat kita ug bug-os nga pagbansay. Apan duna pay dugang pagbansay. Aduna usab kitay mas dagkong mga tigom—mga asembliya ug mga kombensiyon—nga gidisenyo sa pagsangkap kanato ingong mga magtutudlo sa Pulong sa Diyos. Ug naghinamhinam gayod kitang mamati pag-ayo ug ipadapat ang maong tambag!—Lucas 8:18.
21. Unsang ebidensiya ang nagpakita nga ang atong pagbansay epektibo, ug kinsa ang takos pasidunggan?
21 Epektibo ba ang pagbansay nga gitagana ni Jehova? Susihon nato ang mga ebidensiya. Kada tuig, gatosan ka libong tawo ang natabangan sa pagkat-on sa sukaranang mga doktrina sa Bibliya ug sa pagkinabuhi nga kaharmonya sa gikinahanglan sa Diyos kanila. Ang atong gidaghanon nag-uswag, apan walay usa kanato ang personal nga makaangkon sa kadungganan niana. Kinahanglang lantawon nato ang mga butang sa realistikanhong mga paagi, sama sa gibuhat ni Jesus. Siya miingon: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.” Sama sa mga apostoles kaniadto, kadaghanan kanato maoy mga tawong dili edukado ug ordinaryo. (Juan 6:44; Buhat 4:13) Ang atong kalamposan nagdepende kang Jehova, kinsa nagakabig sa matinud-anog-kasingkasing nga mga tawo ngadto sa kamatuoran. Maayo kanang pagkasulti ni Pablo: “Ako ang nagtanom, si Apolos ang nagbisibis, apan ang Diyos ang nagpadayon sa pagpatubo niini.”—1 Corinto 3:6.
22. Nganong dili kita angayng mahigawad pag-ayo maylabot sa bug-os nga pagpakig-ambit sa Kristohanong ministeryo?
22 Oo, si Jehova nga Diyos aktibong nakigbahin sa atong buluhaton ingong mga magtutudlo sa iyang Pulong. Tingali dili kita kanunayng mobati nga kuwalipikado nga mga magtutudlo. Apan hinumdomi, si Jehova mao ang nagakabig sa mga tawo ngadto kaniya ug sa iyang Anak. Si Jehova ang naghimo kanatong kuwalipikado nga motabang sa mga bag-ohan pinaagi sa iyang Pulong, iyang balaang espiritu, ug sa iyang yutan-ong organisasyon. Mosanong kita sa pagbansay ni Jehova pinaagi sa pagpadapat sa maayong mga butang nga ginatagana niya karon aron mahimo kitang bug-os nga masinangkapan ingong mga magtutudlo sa Pulong sa Diyos!
Unsaon Nimo Pagtubag?
• Sa unsang paagi ang Bibliya nagsangkap kanato alang sa buluhatong pagsangyaw?
• Unsang papel ang gidula sa balaang espiritu sa paghimo kanatong kuwalipikado nga mga ministro?
• Sa unsang mga paagi ang yutan-ong organisasyon ni Jehova nakatabang kanimo nga mahimong kuwalipikado ingong magsasangyaw sa maayong balita?
• Nganong makasalig man kita sa dihang makigbahin sa ministeryo?
[Mga Pangutana sa Pagtuon]
[Hulagway sa panid 25]
Ingong magtutudlo sa Pulong sa Diyos, si Jesus nagpasundayag ug gugma alang sa mga tawo