Mga Pangutana Gikan sa mga Magbabasa

Unsay kahulogan sa giingon diha sa Hebreohanon 12:4: “Kamo wala pa gayod makasukol hangtod sa dugo”?

Ang mga pulong “makasukol hangtod sa dugo” nagpasabot nga makaagwanta bisan hangtod sa kamatayon, nga sa literal nagkahulogag pagbubo sa dugo sa usa.

Si apostol Pablo nahibalo nga tungod sa ilang pagtuo, ang pipila ka Hebreohanong mga Kristohanon ‘nakalahutay na sa usa ka dakong sangka bisan pa sa mga pag-antos.’ (Hebreohanon 10:32, 33) Sa paghisgot niana, mopatim-aw nga si Pablo naggamit ug sambingay sa usa ka bugno diha sa Gregong bangga sa dula, nga mahimong naglakip sa lumba sa lakaw, bangga sa dumog, boksing, ug paglabay sa discus ug salapang. Busa, sa Hebreohanon 12:1, giawhag niya ang mga isigka-Kristohanon: “Tangtangon usab nato ang tanang kabug-at ug ang sala nga daling makasabod kanato, ug daganon nato nga malahutayon ang lumba nga gibutang sa atong atubangan.”

Tulo ka bersikulo sa ulahi, diha sa Hebreohanon 12:4, lagmit giusab ni Pablo ang ilustrasyon gikan sa lumba sa lakaw ngadto sa bangga sa boksing. (Ang duha ka magdudula gihisgotan diha sa 1 Corinto 9:26.) Ang mga boksingero kaniadto nagbugkos ug mga tinabas nga panit diha sa ilang mga kumo ug mga pulso. Ang mga tinabas mahimong gitaoran ug “gagmayng tingga, puthaw, o metal, nga nagpahinabog grabeng mga samad sa mga boksingero.” Ang maong linuog nga mga sangka nakapahinabog pagdugo, usahay kamatayon pa gani.

Bisan unsa pa man ang kahimtang, ang Hebreohanong mga Kristohanon adunay ubay-ubayng panig-ingnan sa matinumanong mga alagad sa Diyos nga nakaantos sa paglutos ug sa linuog nga pag-abuso, bisan hangtod sa kamatayon, “hangtod sa dugo.” Matikdi ang konteksto diin gihisgotan ni Pablo kon unsay naagoman sa mga matinumanon sa kakaraanan:

“Sila gibato, sila gisulayan, sila gipamutol pinaagig gabas, sila gipamatay pinaagi sa espada, sila naglakawlakaw nga nagsul-ob sa mga panit sa karnero, sa mga panit sa kanding, samtang sila nag-antos sa kawalad-on, sa kasakitan, gidaogdaog.” Human niana, gihatagan ni Pablo ug dakong pagtagad ang Maghihingpit sa atong pagtuo, si Jesus: “Siya nag-antos sa estaka sa pagsakit, nga wala igsapayan ang kaulaw, ug milingkod sa tuong kamot sa trono sa Diyos.”—Hebreohanon 11:37; 12:2.

Oo, daghan ang ‘nakasukol hangtod sa dugo,’ sa ato pa, hangtod sa kamatayon. Ang ilang pagsukol labaw pa kay sa pangsulod lamang nga pagpakigbisog batok sa sala sa kakulang sa pagtuo. Maunongon sila ilalom sa linuog nga panggawas nga pag-abuso, nga nagmatinumanon hangtod sa kamatayon.

Ang mga bag-ohan diha sa kongregasyon sa Jerusalem, tingali nahimong mga Kristohanon sa dihang nahunong na ang mapait nga paglutos sa miagi, wala pa gayod makaatubang nianang grabeng mga pagsulay. (Buhat 7:54-60; 12:1, 2; Hebreohanon 13:7) Bisan pa niana, bisan ang mga pagsulay nga dili kaayo grabe nakapaluya na sa pipila kanila sa pagpadayon diha sa lumba; sila ‘gikapoy ug nangaluya ang ilang mga kalag.’ (Hebreohanon 12:3) Kinahanglan silang mouswag ngadto sa pagkahamtong. Magpalig-on kana sa ilang katakos sa paglahutay bisag unsa pay modangat, bisan pag naglakip kanag pisikal nga pag-abuso hangtod sa kamatayon.—Hebreohanon 6:1; 12:7-11.

Daghang Kristohanon sa modernong panahon ang ‘nakasukol hangtod sa dugo,’ nga gipamatay tungod kay dili nila ikompromiso ang ilang pagka-Kristohanon. Imbes tugotan ang mga pulong ni Pablo diha sa Hebreohanon 12:4 nga mahimong hinungdan sa kahadlok, isipon nato kana ingong impormasyon nga nagpaila sa sukod nga determinado natong lahutayon sa pagpabiling maunongon ngadto sa Diyos. Sa ulahi sa mao ra gihapong sulat ngadto sa mga Hebreohanon, si Pablo misulat: “Magpadayon kita sa pagbaton sa dili-takos nga kalulot, nga pinaagi niini kita makahatag ug sagradong pag-alagad nga dalawaton sa Diyos uban ang diyosnong kahadlok ug kalisang.”—Hebreohanon 12:28.