Pagsagubang sa “Tunok sa Unod”

“Ang akong dili-takos nga kalulot igo na alang kanimo.”—2 CORINTO 12:9.

1, 2. (a) Nganong dili kita angayng malibog bahin sa kamatuoran nga kita mag-atubang ug mga pagsulay ug mga problema? (b) Nganong makasalig man kita atubangan sa mga pagsulay?

 “ANG tanan nga nagtinguha sa pagkinabuhi uban ang diyosnong pagkamahinalaron kalangkit ni Kristo Jesus pagalutoson usab.” (2 Timoteo 3:12) Nganong lutoson man? Tungod kay si Satanas nangangkon nga ang tawo moalagad sa Diyos tungod lamang sa hinakog nga mga hinungdan, ug siya naningkamot pag-ayo sa pagpamatuod sa iyang pangangkon. Kas-a gipasidan-an ni Jesus ang iyang matinumanong mga apostoles: “Mapugsanong gipangayo ni Satanas nga maangkon kamo aron sa pag-ayag kaninyo ingon sa trigo.” (Lucas 22:31) Nahibalo gayod si Jesus nga gitugotan sa Diyos si Satanas sa pagsulay kanato pinaagi sa masakit nga mga problema. Siyempre, wala kana magpasabot nga ang tanang kalisdanan nga atong giatubang direktang naggikan kang Satanas o sa iyang mga demonyo. (Ecclesiastes 9:11) Apan naghinamhinam si Satanas nga gamiton ang bisan unsang paagi nga iyang magamit sa pagbungkag sa atong integridad.

² Giingnan kita sa Bibliya nga dili kita angayng malibog bahin sa mga pagsulay nga modangat kanato. Bisan unsay mahitabo kanato, kini dili katingad-an ni wala-damha. (1 Pedro 4:12) Gani, “ang samang mga butang maylabot sa mga pag-antos nagakahitabo diha sa tibuok kapunongan sa [atong] mga igsoon dinhi sa kalibotan.” (1 Pedro 5:9) Karong adlawa, si Satanas nagpadangat ug hilabihang kapit-os diha sa matag alagad sa Diyos. Ang Yawa malipayng magtan-aw kanato nga gisakit sa daghang samag-tunok nga mga problema kutob sa mahimo. Aron mapalampos kana, gigamit niya ang iyang sistema sa mga butang sa paagi nga lagmit kining makadugang o makapasamot sa bisan unsang ‘mga tunok sa atong unod.’ (2 Corinto 12:7) Bisan pa niana, ang mga pag-atake ni Satanas dili kinahanglang magbungkag sa atong integridad. Sama ra nga si Jehova “magtaganag kalingkawasan” aron kita makalahutay sa pagsulay, buhaton niya ang susama niana sa dihang mag-atubang kita ug mga suliran nga samag mga tunok sa atong unod.—1 Corinto 10:13.

Kon Unsaon Pagsagubang sa Tunok

3. Unsay tubag ni Jehova sa dihang mihangyo si Pablo kaniya nga kuhaon ang tunok sa iyang unod?

³ Si apostol Pablo mihangyo sa Diyos nga kuhaon ang tunok sa iyang unod. “Tungod niini sa tulo ka higayon ako nangaliyupo sa Ginoo nga unta kini mobiya kanako.” Unsay tubag ni Jehova sa kinasingkasing nga hangyo ni Pablo? “Ang akong dili-takos nga kalulot igo na alang kanimo;  kay ang akong gahom ginahingpit diha sa kaluyahon.” (2 Corinto 12:8, 9) Atong susihon kining maong tubag ug tan-awon kon sa unsang paagi kini makatabang kanato sa pagsagubang sa bisan unsang samag-tunok nga mga problema nga nagsakit kanato.

4. Sa unsang mga paagi nakabenepisyo si Pablo sa dili-takos nga kalulot ni Jehova?

⁴ Matikdi nga gidasig sa Diyos si Pablo sa pagpabili sa dili-takos nga kalulot nga gihatag na kaniya pinaagi kang Kristo. Gani, gipanalanginan pag-ayo si Pablo sa daghang paagi. Si Jehova mahigugmaong naghatag kaniya sa pribilehiyo nga mahimong tinun-an ni Jesus, bisan tuod kanhi usa siya ka panatikong magsusupak sa mga sumusunod ni Jesus. (Buhat 7:58; 8:3; 9:1-4) Human niana malulotong gihatagan ni Jehova si Pablo ug daghang kulbahinam nga mga buluhaton ug mga pribilehiyo. Klaro ang leksiyon niini alang kanato. Bisan sa kinalisdang mga panahon, daghan gihapon kitag mga panalangin nga angayng pasalamatan. Dili gayod nato tugotan ang atong mga pagsulay nga makapakalimot kanato sa dagayang pagkamaayo ni Jehova.—Salmo 31:19.

5, 6. (a) Sa unsang paagi gitudloan ni Jehova si Pablo nga ang gahom sa Diyos “ginahingpit diha sa kaluyahon”? (b) Sa unsang paagi ang panig-ingnan ni Pablo nagpamatuod kang Satanas nga bakakon?

⁵ Ang dili-takos nga kalulot ni Jehova igo na sa laing paagi. Ang gahom sa Diyos maoy dakong tabang kanato nga makalahutay sa atong mga pagsulay. (Efeso 3:20) Gitudloan ni Jehova si Pablo nga ang gahom sa Diyos “ginahingpit diha sa kaluyahon.” Sa unsang paagi? Mahigugmaon niyang gihatagan si Pablo sa tanang kusog nga gikinahanglan niya aron makasagubang sa iyang pagsulay. Sa baylo, ang paglahutay ni Pablo ug ang iyang bug-os nga pagsalig kang Jehova nagpadayag sa tanan nga ang gahom sa Diyos nagmadaogon sa kaso niining huyang ug makasasalang tawo. Karon tagda ang epekto diha sa Yawa, kinsa nangangkon nga ang mga tawo moalagad lamang sa Diyos kon ang kinabuhi malinawon ug walay mga problema. Ang integridad ni Pablo nagsilbing tamparos nianang tigpasipala!

⁶ Ania si Pablo, kanhing kaalyado ni Satanas sa iyang pakigbugno batok sa Diyos, usa ka mayubitong maglulutos sa mga Kristohanon, usa ka masibotong Pariseo kinsa, sa walay duhaduha, kanhi nakatagamtam ug maluhong pagkinabuhi tungod kay siya natawo sa pamilya nga anaa sa taas nga hut-ong sa katilingban. Nag-alagad na niining tungora si Pablo kang Jehova ug Jesu-Kristo ingong “ang labing ubos sa mga apostoles.” (1 Corinto 15:9) Isip labing ubos, siya mapaubsanong nagpasakop sa awtoridad sa unang-siglong Kristohanon nga nagamandong lawas. Ug siya milahutay nga matinumanon bisan pa sa iyang tunok sa unod. Naulawan si Satanas tungod kay ang mga pagsulay sa kinabuhi wala makapabugnaw sa kasibot ni Pablo. Wala gayod makalimti ni Pablo ang paglaom nga iyang pakig-ambitan sa langitnong Gingharian ni Kristo. (2 Timoteo 2:12; 4:18) Walay tunok, bisag unsa ka sakit, ang makaiban sa iyang kasibot. Hinaot nga ang atong kasibot dili usab mobugnaw! Pinaagi sa pagpalig-on kanato latas sa atong mga pagsulay, gipasidunggan kita ni Jehova pinaagi sa pribilehiyo nga motabang sa pagpamatuod kang Satanas nga bakakon.—Proverbio 27:11.

Hinungdanon ang mga Tagana ni Jehova

7, 8. (a) Pinaagi sa unsa nga si Jehova nagpalig-on sa iyang mga alagad karon? (b) Nganong ang adlaw-adlaw nga pagbasa sa Bibliya ug pagtuon hinungdanon kaayo sa pagsagubang sa tunok sa atong unod?

⁷ Karong adlawa, gihatagan ni Jehova ug gahom ang matinumanong mga Kristohanon pinaagi sa iyang balaang espiritu, iyang Pulong, ug sa atong Kristohanong panag-igsoonay. Sama kang apostol Pablo, ikatugyan nato ang atong mga palas-anon kang Jehova pinaagi sa pag-ampo. (Salmo 55:22) Bisan tuod dili tingali kuhaon sa Diyos ang atong mga pagsulay, mahimo niyang ihatag kanato ang kaalam sa pagsagubang niana, bisan pag kanang maong mga pagsulay lisod kaayong antoson. Si Jehova makatagana usab kanato ug kusog—nga maghatag kanatog “gahom nga labaw sa kasarangan”—aron matabangan kita sa paglahutay.—2 Corinto 4:7.

⁸ Sa unsang paagi madawat nato ang maong tabang? Kinahanglang makugihon kitang magtuon sa Pulong sa Diyos, kay diha niana makaplagan nato ang iyang seguradong mga paghupay. (Salmo 94:19) Diha sa Bibliya, mabasa nato ang makapatandog nga mga pulong sa mga alagad sa Diyos samtang nangayo sila sa Iyang tabang. Ang mga tubag ni Jehova, nga kasagarang naglakip sa paggamit ug makapahupayng mga pulong, maoy butang nga takos palandongon. Ang pagtuon sa Pulong sa Diyos magpalig-on kanato aron ang ‘gahom nga labaw sa kasarangan maiya sa Diyos ug dili gikan sa atong kaugalingon.’ Sama ra nga  kinahanglan natong mokaon ug pisikal nga pagkaon kada adlaw aron makakuhag sustansiya ug kusog, angay usab kitang mokaon nga regular sa mga pulong sa Diyos. Gibuhat ba nato kini? Kon mao, nan makita nato nga ang atong pagkadawat ug “gahom nga labaw sa kasarangan” motabang kanato sa paglahutay sa bisan unsang mahulagwayong mga tunok nga mahimong mag-apektar kanato karon.

9. Sa unsang paagi ang mga ansiyano nagpaluyo niadtong nagsagubang ug mga problema?

⁹ Ang mahinadlokon-sa-Diyos nga Kristohanong mga ansiyano maoy “sama sa usa ka tagoanang dapit gikan sa hangin” sa kalisdanan, “usa ka salipdanang dapit gikan sa bagyo” sa mga problema. Ang mga ansiyano, nga gustong mopahiuyon nianang inspiradong paghubit, mapaubsanon ug sinserong mohangyo kang Jehova nga hatagan sila sa “dila sa mga tinudloan” aron nga sila mahibalo kon unsaon pagtubag ang mga nanag-antos pinaagi sa haom nga mga pulong. Ang mga pulong sa mga ansiyano mahisama sa hinay nga ulan nga makapabugnaw ug makapahupay sa atong espiritu sulod sa malisod nga mga panahon sa kinabuhi. Pinaagi sa ‘paghupay sa magul-anong mga kalag,’ ang mga ansiyano tinuod nga nagpaluyo sa ilang espirituwal nga mga igsoong lalaki ug babaye nga gikapoy tingali o nawad-ag paglaom tungod sa usa ka tunok sa ilang unod.—Isaias 32:2; 50:4; 1 Tesalonica 5:14.

10, 11. Sa unsang paagi ang mga alagad sa Diyos makadasig sa uban nga nag-antos ug grabeng mga pagsulay?

¹⁰ Ang tanang alagad ni Jehova maoy bahin sa iyang nahiusang Kristohanong pamilya. Oo, kita maoy “mga sangkap nga sa tinagsa iya sa usag usa,” ug kita “nailalom sa obligasyon nga maghigugmaay sa usag usa.” (Roma 12:5; 1 Juan 4:11) Sa unsang paagi nato tumanon kining obligasyona? Sumala sa 1 Pedro 3:8, buhaton nato kana pinaagi sa ‘pagpakitag pagbati alang sa isigkaingon, nga magbaton ug inigsoong pagbati, ug magmabination uban ang kalumo’ niadtong tanan nga sama natog pagtuo. Mahitungod niadtong nagasagubang sa usa ka masakit kaayo nga tunok sa unod, sila man batan-on o tigulang, kitang tanan makahatag kanilag linaing pagtagad. Sa unsang paagi?

¹¹ Kinahanglang maningkamot kita nga magmasensitibo sa ilang pag-antos. Kon kita dili maluoy, dili mobati, o dili-magtagad, basin wala nato tuyoang gipasamot ang ilang pag-antos. Ang pagkahibalo nato sa ilang mga pagsulay angayng magtukmod kanato sa pagbantay sa kon unsay atong isulti, kon unsaon nato kana pagsulti, ug kon sa unsang paagi kita molihok. Ang atong pagkapositibo ug pagkamakapadasig makatabang sa paghupay ug diyutay sa kasakit sa bisan unsang tunok nga nag-apektar kanila. Busa mahimo kitang makapalig-ong tabang kanila.—Colosas 4:11.

Kon sa Unsang Paagi ang Pipila Nakasagubang nga Malamposon

12-14. (a) Unsay gihimo sa usa ka Kristohanon aron masagubang ang kanser? (b) Sa unsang paagi ang espirituwal nga mga igsoong lalaki ug babaye niining babayhana nagpaluyo ug nagdasig kaniya?

¹² Samtang nagkaduol kita sa kataposan niining mga adlaw, ang “mga kaul-ol sa kasakit” nagkagrabe kada adlaw. (Mateo 24:8) Busa, ang mga pagsulay  lagmit nga moapektar sa tanang tawo sa yuta, ilabina sa matinumanong mga alagad ni Jehova, nga naningkamot sa pagtuman sa iyang kabubut-on. Pananglitan, tagda ang usa ka Kristohanon nga nag-alagad diha sa bug-os-panahong ministeryo. Nadayagnos siya nga dunay kanser ug kinahanglang kuhaon pinaagig operasyon ang iyang salivary ug lymphatic nga mga glandula. Sa dihang siya ug ang iyang bana nahibalo nga naa siya niining sakita, dihadiha miduol sila kang Jehova pinaagi sa taas, mapangaliyupoon nga pag-ampo. Sa ulahi miingon siya nga ang dili-katuohang kalinaw midangat kanila. Bisan pa niana, giantos niya ang nagpulipuling maayo ug dili maayo nga mga panahon, ilabina sa dihang nagsagubang sa segundaryong mga epekto sa mga tambal.

¹³ Aron masagubang ang iyang kahimtang, kining igsoona naningkamot nga mahibalo ug daghan kutob sa iyang mahimo bahin sa kanser. Nangonsulta siya sa iyang mga doktor. Diha sa Ang Bantayanang Torre, Pagmata!, ug susamang Kristohanong mga publikasyon, nakita niya ang mga sugilanon sa kinabuhi nga nagpakita kon sa unsang paagi ang mga indibiduwal nakasagubang niini nga balatian sa emosyonal nga paagi. Gibasa usab niya ang may kalambigitan nga mga teksto sa Bibliya nga nagpakita sa katakos ni Jehova sa pagpaluyo sa iyang katawhan panahon sa mga kalisdanan, ug uban pang makatabang nga mga impormasyon.

¹⁴ Usa ka artikulo bahin sa pagsagubang sa kawalay-paglaom naghisgot niining maalamong mga pulong: “Ang nagalain sa iyang kaugalingon mangita sa iyang hakog nga tinguha.” (Proverbio 18:1) Busa ang artikulo naghatag niining tambaga: “Ayaw pagpalain.” a Ang sister miasoy: “Daghan ang nag-ingon nga sila nag-ampo alang kanako; ang uban mitelepono kanako. Duha ka ansiyano ang magtawganan aron sa pagsusi kon unsay akong gibati. Nakadawat ako ug mga bulak ug daghang kard. Ang uban nagluto gani ug mga pagkaon. Dugang pa, daghan ang miboluntaryo sa paghatod kanako kon ako magpatambal.”

15-17. (a) Sa unsang paagi ang usa ka Kristohanon nakasagubang sa mga kalisdanan nga misangpot tungod sa mga aksidente? (b) Unsang pagpaluyo ang gihatag niadtong anaa sa kongregasyon?

¹⁵ Usa ka dugay nang alagad ni Jehova sa New Mexico, T.B.A., kaduha makaagom ug aksidente sa awto. Ang iyang liog ug mga abaga nasamdan, nga nakapasamot sa artraytis nga iyang gisagubang sa kapin sa 25 ka tuig. Siya miasoy: “Maglisod kaayo ko sa pagpugong sa akong ulo nga dili molubay ug pagbitbit sa bisan unsa nga nagtimbang ug kapin sa duha ka kilo. Apan ang kinasingkasing nga pag-ampo kang Jehova nakapalig-on gayod kanako. Mao man usab ang mga artikulo sa Ang Bantayanang Torre nga among gitun-an. Adunay usa ka magasin nga nagkomento bahin sa Miqueas 6:8, nga nag-ingon nga ang pagkamakasaranganon sa paglakaw uban sa Diyos nagkahulogan nga ang usa nahibalo sa iyang mga limitasyon. Nakatabang kini kanako sa pagsabot nga bisan pa sa akong kahimtang, dili ako angayng mahigawad, bisan pag ang panahon nga akong gigugol diha sa ministeryo menos ra kay sa gusto nako. Ang pag-alagad kaniya uban ang hinlong mga motibo maoy labing hinungdanon.”

¹⁶ Mitaho usab siya: “Ang mga ansiyano kanunayng modayeg kanako tungod sa akong mga paningkamot sa pagtambong sa mga tigom ug sa pagsangyaw sa kanataran. Ang mga batan-on motimbaya nako pinaagig halog. Ang payunir nga mga ministro mapailobon kaayo kanako ug kasagarang mag-usab sa ilang mga plano sa panahon nga magluya ako. Kon dili maayo ang panahon, maluloton silang magpakuyog nako sa mga balikduaw o dapiton ako sa pag-uban kanila diha sa ilang mga panagtuon sa Bibliya. Ug tungod kay dili man ako makadala ug bag, ang ubang mga magmamantala magbutang sa akong literatura diha sa ilang bag sa dihang makigbahin ako sa buluhatong pagsangyaw.”

¹⁷ Matikdi kon sa unsang paagi ang mga ansiyano sa kongregasyon ug ang mga isigkamagtutuo mitabang niining duha ka sister sa pagsagubang sa ilang samag-tunok nga mga kaluyahon. Sila nagtanyag ug praktikal, maluloton nga tabang nga ang tuyo mao ang pagtagbaw sa espesipikong espirituwal, pisikal, ug emosyonal nga mga panginahanglan. Wala ba kana magdasig kanimo sa paghatag ug tabang sa ubang mga igsoong lalaki ug babaye nga nakaeksperyensiyag mga problema? Kamong mga batan-on makatabang usab niadtong mga igsoon sa inyong kongregasyon nga nakigbisog sa mga tunok sa ilang unod.—Proverbio 20:29.

18. Unsang pagdasig ang makaplagan nato diha sa mga sugilanon sa kinabuhi nga gipatik sa mga magasing Bantayanang Torre ug Pagmata?

¹⁸ Ang mga magasing Bantayanang Torre ug Pagmata!  nagpatik ug daghang sugilanon sa kinabuhi ug mga eksperyensiya sa mga Saksi nga nakasagubang, ug nagasagubang pa, sa mga problema sa kinabuhi. Samtang regular nimong basahon ang mga artikulo nga sama niana, makita nimo nga daghan sa imong espirituwal nga mga igsoong lalaki ug babaye sa tibuok kalibotan ang nakalahutay sa mga kalisod sa ekonomiya, pagkamatay sa mga minahal tungod sa mga katalagman, ug peligrosong mga kahimtang panahon sa gubat. Ang uban nag-antos sa makapabaldadong mga sakit. Daghan ang dili makahimo sa yanong mga butang sa kinabuhi nga gibalewala lang sa daghang himsog nga mga tawo. Ang ilang mga balatian grabeng nagsulay kanila, ilabina sa dihang dili sila makapakig-ambit sa Kristohanong mga kalihokan kutob sa gusto nila. Giapresyar gayod nila ang tabang ug pagpaluyo nga gihatag kanila sa ilang mga igsoong lalaki ug babaye, batan-on ug tigulang!

Ang Pagkamalahutayon Magdalag Kalipay

19. Nganong nakaarang si Pablo sa pagmaya bisan pa sa iyang samag-tunok nga mga pagsulay ug mga kaluyahon?

¹⁹ Si Pablo nagmaya sa pagkakita kon sa unsang paagi ang Diyos nagpalig-on kaniya. Siya miingon: “Sa tumang kalipay ako manghambog hinuon bahin sa akong mga kaluyahon, aron ang gahom ni Kristo mahimong samag tolda nga magpabilin ibabaw kanako. Busa ako nagakalipay sa kaluyahon, sa mga pag-insulto, sa mga higayon sa panginahanglan, sa mga paglutos ug sa mga kalisdanan, alang kang Kristo. Kay sa dihang ako maluya, ako gamhanan hinuon.” (2 Corinto 12:9, 10) Tungod sa iyang personal nga mga eksperyensiya, si Pablo masaligong makaingon: “Dili nga ako nagasulti labot sa akong kawalad-on, kay akong nakat-onan, bisan unsa man ang akong kahimtang, nga magmakontento. Ako makamao gayong magkinabuhi sa kawalad-on, ako makamao gayong magkinabuhi sa kadagaya. Sa tanang butang ug sa tanang kahimtang nakat-onan ko ang sekreto kon unsaon pagkabusog ug kon unsaon pagkagutom, kon unsaon sa pagkinabuhi sa kadagaya ug kon unsaon sa pag-antos sa kawalad-on. Sa tanang butang ako adunay kusog pinaagi kaniya nga naghatag ug gahom kanako.”—Filipos 4:11-13.

20, 21. (a) Nganong makakaplag kitag kalipay sa pagpamalandong sa “mga butang nga dili-makita”? (b) Unsa ang pipila ka “mga butang nga dili-makita” nga gilaoman nimong makita sa yutan-ong Paraiso?

²⁰ Busa, pinaagi sa pag-antos sa bisan unsang mahulagwayong tunok sa atong unod, makakaplag kita ug dakong kalipay sa pagpakita sa tanan nga ang gahom ni Jehova ginahingpit diha sa atong kaluyahon. Si Pablo misulat: “Wala kami moangka . . . Ang among pagkatawo sa sulod ginabag-o sa adlaw-adlaw. Kay bisan tuod ang kasakitan makadiyot lamang ug magaan, kini nagapatungha alang kanamo ug usa ka himaya nga labaw pa gayod ang gibug-aton ug walay kataposan; samtang kami nagapunting sa among mga mata . . . sa mga butang nga dili-makita. Kay ang mga butang . . . nga dili-makita walay kataposan.”—2 Corinto 4:16-18.

²¹ Kadaghanan sa katawhan ni Jehova karon naglaom nga mabuhi sa iyang yutan-ong Paraiso ug makatagamtam sa mga panalangin nga iyang gisaad. Ang maong mga panalangin mahimong isipon nga “dili-makita” nato karon. Apan, ang panahon tulin nga nagsingabot sa dihang makita nato ang maong mga panalangin sa atong kaugalingong mga mata, oo, ug makatagamtam niini sa walay kataposan. Ang usa nianang maong panalangin mao ang kahupayan nga dili na gayod mag-antos pa sa samag-tunok nga problema! Ang Anak sa Diyos ‘magbungkag sa mga buhat sa Yawa’ ug ‘magwagtang sa usa nga may gahom sa pagpahinabog kamatayon.’—1 Juan 3:8; Hebreohanon 2:14.

22. Unsang pagsalig ug determinasyon ang angay natong mahuptan?

²² Busa, bisan unsang tunok sa atong unod nga nagsakit kanato karon, magpadayon kita sa pagsagubang niana. Sama kang Pablo, mabatonan nato ang kusog sa pagbuhat niana sa tabang ni Jehova, kinsa dagayang nagahatag kanatog gahom. Sa dihang magpuyo na kita sa yutan-ong Paraiso, kita magdayeg kang Jehova nga atong Diyos sa adlaw-adlaw tungod sa iyang kahibulongang mga buhat alang kanato.—Salmo 103:2.

[Footnote]

Unsaon Nimo Pagtubag?

• Ngano ug sa unsang paagi ang Yawa naningkamot sa pagbungkag sa integridad sa matuod nga mga Kristohanon?

• Sa unsang paagi ang gahom ni Jehova “ginahingpit diha sa kaluyahon”?

• Sa unsang paagi ang mga ansiyano ug ang uban makadasig niadtong gisakit sa mga problema?

[Mga Pangutana sa Pagtuon]

[Hulagway sa panid 18]

Sa tulo ka higayon si Pablo nag-ampo nga kuhaon unta sa Diyos ang tunok sa iyang unod