Sila Nakasagubang sa mga Tunok sa Ilang Unod
Sila Nakasagubang sa mga Tunok sa Ilang Unod
“Gihatagan akog tunok sa unod, usa ka manulonda ni Satanas, sa pagsagpa kanako sa kanunay.”—2 CORINTO 12:7.
1. Unsa ang pipila ka problema nga giatubang sa mga tawo karon?
NAKIGBISOG ka ba sa usa ka nagapadayon nga pagsulay? Kon mao, wala ka mag-inusara. Niining “makuyaw nga mga panahong lisod sagubangon,” ang matinumanong mga Kristohanon nagasagubang sa grabeng pagsupak, mga problema sa pamilya, sakit, mga kabalaka labot sa panalapi, kagul-anan, pagkamatay sa mga minahal, ug uban pang mga suliran. (2 Timoteo 3:1-5) Sa pipila ka nasod, ang kinabuhi sa daghan ginapameligro sa mga kanihit sa pagkaon ug mga gubat.
2, 3. Unsang negatibong tinamdan ang mahimong moresulta tungod sa samag-tunok nga mga problema nga atong giatubang, ug sa unsang paagi mahimo kanang peligroso?
2 Tungod sa maong mga problema ang usa malumsan pag-ayo, ilabina kon daghang kalisdanan ang mahitabo sa samang higayon. Matikdi kon unsay giingon sa Proverbio 24:10: “Naluya ka ba sa adlaw sa kasakit? Ang imong kusog diyutay ra.” Oo, ang kahigawad tungod sa mga pagsulay nga atong maagoman makaiban sa gikinahanglan kaayo natong kusog ug makapaluya sa atong determinasyon nga molahutay hangtod sa kataposan. Sa unsang paagi?
3 Aw, tungod sa kahigawad mahimong mawad-an kita sa atong katakos sa paglantaw sa mga butang nga dili-mapihigon. Pananglitan, sayon ra alang kanato nga pasobrahan ang atong mga kalisdanan ug mosugod pagkaluoy sa atong kaugalingon. Ang uban motuaw pa gani ngadto sa Diyos, “Nganong gitugotan man nimo kining mahitabo kanako?” Kon ang ingon nianang negatibong tinamdan mogamot sa kasingkasing sa usa ka tawo, makaiban kini sa iyang kalipay ug pagsalig. Ang usa ka alagad sa Diyos mahimong mahigawad pag-ayo nga mohunong pa gani siya sa ‘pagpakigbugno sa maayong pakigbugno sa pagtuo.’—1 Timoteo 6:12.
4, 5. Sa pipila ka kahimtang, sa unsang paagi nalangkit si Satanas sa atong mga problema, apan sa unsa kita makasalig?
4 Si Jehova nga Diyos tinong dili gayod mao ang nagpahinabo sa atong mga pagsulay. (Santiago 1:13) Ang ubang mga pagsulay mahitabo kanato tungod lamang kay naningkamot kita sa pagkahimong matinumanon kaniya. Gani, ang tanan nga moalagad kang Jehova naghimo sa ilang kaugalingon nga mga target sa iyang pangunang kaaway, si Satanas nga Yawa. Sa mubong panahon nga nahibilin kaniya, kanang daotang “diyos niini nga sistema sa mga butang” naningkamot sa pagpahinabo ni bisan kinsa nga nahigugma kang Jehova nga molunga sa pagtuman sa Iyang kabubut-on. (2 Corinto 4:4) Si Satanas grabeng nagpaantos kutob sa iyang mahimo sa tibuok kapunongan sa atong mga igsoon sa tibuok kalibotan. (1 Pedro 5:9) Tinuod, si Satanas dili mao ang direktang nagpahinabo sa tanan natong mga problema, apan mahimong pahimuslan niya ang mga problema nga atong giatubang, nga nagtinguhang mosamot pa kita ka luya.
5 Apan, bisan unsa ka gamhanan si Satanas o ang iyang mga hinagiban, mapildi nato siya! Sa unsang paagi makatino kita niana? Tungod kay si Jehova nga Diyos makig-away alang kanato. Giseguro niya nga ang iyang mga alagad mahibalo sa mga taktika ni Satanas. (2 Corinto 2:11) Gani, ang Pulong sa Diyos nagtug-an kanato ug daghan bahin sa mga pagsulay nga nag-apektar sa matuod nga mga Kristohanon. Sa kahimtang ni apostol Pablo, ang Bibliya naggamit sa mga pulong nga “tunok sa unod.” Ngano man? Susihon nato kon sa unsang paagi gipatin-aw sa Pulong sa Diyos kanang maong mga pamulong. Dayon masabtan nato nga dili lang diay kita ang nagkinahanglan sa tabang ni Jehova aron modaog sa mga pagsulay.
Kon Nganong ang mga Pagsulay Samag mga Tunok
6. Unsay gipasabot ni Pablo sa “tunok sa unod,” ug malagmit unsa kadtong maong tunok?
6 Si Pablo, kay gisulayan pag-ayo, nadasig sa pagsulat: “Gihatagan akog tunok sa unod, usa ka manulonda ni Satanas, sa pagsagpa kanako sa kanunay, aron ako dili hilabihang mabayaw.” (2 Corinto 12:7) Unsa kining tunok sa unod ni Pablo? Aw, ang usa ka tunok nga nakadulot pag-ayo sa panit tinong masakit gayod. Busa ang sambingay nagsugyot ug usa ka butang nga nagpahinabog kasakit kang Pablo—pisikal man, emosyonal, o kanang duha. Basig nag-antos si Pablo sa usa ka balatian sa mata o sa laing pisikal nga kaluyahon. O ang tunok mahimong naglangkit niadtong mga tawo nga nagduhaduha sa mga kuwalipikasyon ni Pablo ingong apostol ug nagkuwestiyon sa bili sa iyang buluhatong pagsangyaw ug pagpanudlo. (2 Corinto 10:10-12; 11:5, 6, 13) Bisan unsa pa kadto, ang maong tunok nagpabilin, ug dili mahimong kuhaon.
7, 8. (a) Unsay gipaila sa ekspresyong ‘pagsagpa kanunay’? (b) Nganong hinungdanon nga atong sagubangon ang bisan unsang mga tunok nga nag-apektar kanato karon?
7 Matikdi nga ang tunok nagsigeg sagpa kang Pablo. Makaiikag, ang Gregong berbo nga gigamit ni Pablo dinhi gikuha sa pulong “mga kumo.” Kanang pulonga gigamit sa literal nga paagi diha sa Mateo 26:67 ug sa mahulagwayong paagi diha sa 1 Corinto 4:11. Nianang mga bersikuloha, naghatag kinig ideya sa pagkagidabodabohan ug suntok. Tungod sa naghingaping pagdumot ni Satanas kang Jehova ug sa Iyang mga alagad, makaseguro kita nga ang Yawa nahimuot nga ang usa ka tunok nagsigeg sagpa kang Pablo. Karon, si Satanas nahimuot usab sa dihang sa susama kita gihasol sa usa ka tunok sa unod.
8 Busa, sama kang Pablo, kinahanglang mahibaloan nato kon unsaon pagsagubang ang maong mga tunok. Ang atong kinabuhi nagdepende sa atong pagbuhat niana! Hinumdomi nga buot ni Jehova nga magkinabuhi kita sa walay kataposan diha sa iyang bag-ong kalibotan, diin ang samag-tunok nga mga problema dili na gayod mohasol pa kanato. Aron matabangan kita nga madaog kining kahibulongang ganti, ang Diyos naghatag kanato ug daghang panig-ingnan diha sa iyang balaang Pulong, ang Bibliya, nga nagpakita nga ang iyang matinumanong mga alagad malamposong nakasagubang sa mga tunok sa ilang unod. Sila maoy ordinaryo, dili-hingpit nga mga tawo, sama gayod kanato. Ang paghisgot sa pipila nga nalakip niining bagang “panganod sa mga saksi” makatabang kanato sa ‘pagdagan nga malahutayon sa lumba nga gibutang sa atong atubangan.’ (Hebreohanon 12:1) Ang pagpamalandong sa ilang giantos makapalig-on sa atong pagsalig nga kita makasagubang sa bisan unsang mga tunok nga mahimong gamiton ni Satanas batok kanato.
Ang mga Tunok nga Nagsakit Kang Mepiboset
9, 10. (a) Sa unsang paagi nakaagom si Mepiboset ug usa ka tunok sa iyang unod? (b) Unsang kalulot ang gipakita ni Haring David kang Mepiboset, ug sa unsang paagi masundog nato si David?
9 Tagda si Mepiboset, ang anak nga lalaki sa higala ni David nga si Jonathan. Sa dihang si Mepiboset singko anyos pa, midangat ang balita nga ang iyang amahan, si Jonathan, ug ang iyang lolo, si Haring Saul, namatay. Ang iwa sa bata natarantar. “Gidala siya sa iyang iwa . . . , apan nahitabo nga sa dihang nagdagan siya sa kalisang aron sa pagkalagiw, siya [si Mepiboset] nahulog ug nabakol.” (2 Samuel 4:4) Kining maong pagkabakol lagmit gayod nga usa ka grabeng tunok nga kinahanglang antoson ni Mepiboset samtang siya nagdako.
10 Daghang tuig sa ulahi si Haring David, tungod sa iyang dakong gugma alang kang Jonathan, nagpakita ug mahigugmaong-kalulot kang Mepiboset. Gihatag ni David ang tanang kabtangan ni Saul ngadto kaniya ug gitudlo ang sulugoon ni Saul nga si Ziba ingong tig-atiman niining maong yuta. Giingnan usab ni David si Mepiboset: “Ikaw magakaon ug tinapay sa akong lamesa sa kanunay.” (2 Samuel 9:6-10) Sa walay duhaduha ang mahigugmaong-kalulot ni David nakapahupay kang Mepiboset ug nakatabang sa pagpamenos sa kasakit sa iyang pagkabakol. Pagkamaayong leksiyon alang kanato! Kita usab angayng magpakita ug kalulot ngadto niadtong nakigbisog sa usa ka tunok sa unod.
11. Unsay pangangkon ni Ziba bahin kang Mepiboset, apan giunsa nato pagkahibalo nga ang iyang pangangkon maoy bakak? (Tan-awa ang potnot.)
11 Sa ulahi, si Mepiboset kinahanglang makigbisog sa laing tunok sa iyang unod. Gibutangbutangan siya sa iyang alagad nga si Ziba sa atubangan ni Haring David, kinsa niadtong panahona mikalagiw gikan sa Jerusalem tungod sa pag-alsa ni Absalom nga anak ni David. Si Ziba miingon nga si Mepiboset sa pagkadili-maunongon nagpabilin sa Jerusalem sa paglaom nga makuha niya mismo ang pagkahari. a Si David mituo sa pagbutangbutang ni Ziba ug gihatag ang kabtangan ni Mepiboset ngadto sa maong bakakon!—2 Samuel 16:1-4.
12. Unsay reaksiyon ni Mepiboset sa iyang kahimtang, ug sa unsang paagi siya usa ka maayong panig-ingnan alang kanato?
12 Apan, sa dihang sa kataposan nagkita si Mepiboset ug si David, gisultian niya ang hari sa tinuod nga nahitabo. Nangandam na unta siya sa pag-uban kang David sa dihang gilingla siya ni Ziba ug miboluntaryo sa pag-adto puli kaniya. Gitul-id ba ni David kining maong sayop? Sa usa ka bahin. Gitunga niya ang kabtangan tali sa duha ka lalaki. Ania na usab ang laing posible nga mahimong tunok sa unod ni Mepiboset. Nahigawad ba siya pag-ayo? Mitutol ba siya sa desisyon ni David, nga nagreklamo nga dili kadto makiangayon? Wala, mapaubsanon siyang miuyon sa kagustohan sa hari. Gihatagan niyag dakong pagtagad ang positibong bahin, nga nagmaya nga ang angayang hari sa Israel nakapauli nga luwas. Si Mepiboset naghatag gayod ug maayo kaayong panig-ingnan pinaagi sa pag-antos sa pagkabakol, pagbutangbutang, ug kahigawad.—2 Samuel 19:24-30.
Nakasagubang si Nehemias sa mga Pagsulay nga Iyang Naagoman
13, 14. Unsang mga tunok ang kinahanglang antoson ni Nehemias sa dihang mibalik siya aron pagtukod pag-usab sa mga paril sa Jerusalem?
13 Hunahunaa ang mahulagwayong mga tunok nga giantos ni Nehemias sa dihang mibalik siya sa walay-paril nga siyudad sa Jerusalem sa ika-limang siglo W.K.P. Iyang nakita nga ang siyudad literal nga walay-depensa, ug ang napasig-uling mga Hudiyo didto wala maorganisar, nahigawad, ug mahugaw sa mga mata ni Jehova. Bisan pag giawtorisahan siya ni Haring Artajerjes sa pagtukod pag-usab sa mga paril sa Jerusalem, sa wala madugay nahibaloan ni Nehemias nga ang iyang misyon giayran sa mga gobernador sa sikbit nga mga nasod. “Daw daotan kini kaayo alang kanila nga ang usa ka tawo miabot aron mangitag kaayohan sa mga anak sa Israel.”—Nehemias 2:10.
14 Gihimo niadtong langyawng mga magsusupak ang tanan nilang maarangan sa pagpahunong sa buluhaton ni Nehemias. Ang ilang mga panghulga, pagpamakak, pagbutangbutang, pagpanghadlok—lakip sa paggamit ug mga espiya nga gipadala sa pagpaluya kaniya—lagmit gayong nahisama sa wala pa maibot nga mga tunok sa iyang unod. Nagpadala ba siya sa mga malipatlipatong kaugdahan niadtong mga kaaway? Wala! Iyang gibutang ang iyang bug-os nga pagsalig sa Diyos, nga wala maluya. Busa, sa dihang ang mga paril sa Jerusalem sa kataposan natukod pag-usab, kini naghatag ug dumalayong pamatuod sa mahigugmaong pagpaluyo ni Jehova kang Nehemias.—Nehemias 4:1-12; 6:1-19.
15. Unsang mga problema taliwala sa mga Hudiyo ang nakapahasol pag-ayo kang Nehemias?
15 Ingong gobernador, kinahanglan usab nga makigbisog si Nehemias sa daghang problema taliwala sa katawhan sa Diyos. Kining maong mga kalisdanan nahisamag mga tunok nga naghasol pag-ayo kaniya tungod kay kini nag-apektar sa relasyon sa mga tawo uban kang Jehova. Ang mga bahandianon tigpatantog dagko, ug ang ilang kabos nga mga igsoon, aron makabayad sa mga utang maingon man sa buhis nga gipahamtang sa Persia, napugos sa pagpaembargo sa ilang yuta ug nagpaulipon pa gani sa ilang mga anak. (Nehemias 5:1-10) Daghang Hudiyo ang wala magsunod sa Igpapahulay ug wala mosuportar sa mga Levihanon ug sa templo. Dugang pa, ang uban nangaminyo ug “Asdodnon, Ammonhanon ug Moabihanon nga mga asawa.” Nasakitan gayod niini si Nehemias! Apan walay usa niini nga mga tunok ang nakapahunong kaniya. Sa makadaghan giatubang niya ang situwasyon ingong masibotong tigbayaw sa matarong nga mga balaod sa Diyos. Sama kang Nehemias, hinaot nga dili nato tugotan ang dili-matinumanong panggawi sa uban nga makapatalikod kanato gikan sa maunongong pag-alagad kang Jehova.—Nehemias 13:10-13, 23-27.
Daghang Ubang mga Matinumanon Nakasagubang
16-18. Sa unsang paagi ang panagbangi sa pamilya naghasol kang Isaac ug Rebeca, Ana, David, ug Oseas?
16 Ang Bibliya naundan sa daghang uban pang mga panig-ingnan sa mga tawo nga nakasagubang sa makapaguol nga mga situwasyon nga samag mga tunok. Ang usa ka kasagarang tuboran sa maong mga tunok mao ang mga problema sa pamilya. Ang duha ka asawa ni Esau “maoy tinubdan sa kapaitan sa espiritu ni Isaac ug ni Rebeca,” ang mga ginikanan ni Esau. Miingon pa gani si Rebeca nga gikasilagan niya ang iyang kinabuhi tungod niadtong maong mga asawa. (Genesis 26:34, 35; 27:46) Hunahunaa usab si Ana ug kon sa unsang paagi ang iyang karibal nga si Penina, ang laing asawa sa iyang bana, ‘nagbiaybiay kaniya’ tungod kay si Ana apuli. Tingali subsob nga giantos ni Ana kining maong pagbugalbugal diha sa ilang balay. Gibiaybiay usab siya ni Penina atubangan sa mga tawo—sa walay duhaduha atubangan sa mga paryente ug mga higala—samtang ang pamilya mitambong sa pista sa Shilo. Sama ra kinig giduot pag-ayo ang tunok sa unod ni Ana.—1 Samuel 1:4-7.
17 Palandonga kon unsay giantos ni David tungod sa binuang nga pangabubho sa iyang ugangang lalaki nga si Haring Saul. Aron maluwas ang iyang kinabuhi, si David napugos sa pagpuyo diha sa mga langob sa kamingawan sa En-gedi, diin kinahanglan siyang mokatkat sa titip kaayo ug peligroso nga batoong mga agianan. Ang inhustisya lagmit makapungot kaayo, tungod kay wala siya makasala batok kang Saul. Bisan pa niana, sulod sa daghang tuig si David kinahanglang magsigeg kalagiw—kining tanan tungod sa pangabubho ni Saul.—1 Samuel 24:14, 15; Proverbio 27:4.
18 Handurawa ang panagbangi sa pamilya nga naghasol kang manalagnang Oseas. Ang iyang asawa nahimong mananapaw. Ang pagkaimoral sa iyang asawa lagmit gayong nahisama sa mga tunok nga midulot sa iyang kasingkasing. Ug lagmit gayod nga nadugangan ang iyang giantos nga tumang kasakit sa dihang nanganak ang iyang asawa ug duha ka anak sa gawas tungod sa iyang pagpakighilawas!—Oseas 1:2-9.
19. Unsang paglutos ang naagoman ni manalagnang Micaias?
19 Ang laing tunok sa unod mao ang paglutos. Tagda ang kasinatian ni Micaias nga manalagna. Ang pagkakita nga ang daotang Haring Ahab gilibotan sa bakak nga mga manalagna ug nga si Ahab mituo sa ilang dayag kaayong kabakakan lagmit gayong nagsakit sa matarong nga kalag ni Micaias. Unya, sa dihang giingnan ni Micaias si Ahab nga kadtong tanang manalagna nagsulti pinaagi sa “usa ka malimbongong espiritu,” unsay gihimo sa lider niadtong mga bakakon? Aw, iyang ‘gitamparos si Micaias’! Mas grabe pa ang reaksiyon ni Ahab sa pasidaan ni Jehova nga ang kampanya sa pagbawi sa Ramot-gilead mapakyas gayod. Nagsugo si Ahab nga si Micaias ibalhog sa bilanggoan ug kunhoran ang iyang rasyon. (1 Hari 22:6, 9, 15-17, 23-28) Hinumdomi usab, si Jeremias ug ang pagtratar kaniya sa iyang mga maglulutos nga nagtinguha sa pagpatay kaniya.—Jeremias 20:1-9.
20. Unsang mga tunok ang kinahanglang antoson ni Noemi, ug sa unsang paagi siya gigantihan?
20 Ang pagkamatay sa mga minahal maoy lain pang makapasubong situwasyon nga mahisamag tunok sa unod. Kinahanglang antoson ni Noemi ang masakit nga pagkamatay sa iyang bana ug sa iyang duha ka anak nga lalaki. Nga gibati gihapon ang maong makapahugno nga mga hitabo, mibalik siya sa Betlehem. Giingnan niya ang iyang mga higala nga dili na siya tawgong Noemi, kondili Mara, usa ka ngalan nga nagbanaag sa kapait sa iyang mga naagoman. Apan, sa kataposan gigantihan ni Jehova ang iyang pag-antos pinaagi sa pagkabaton niyag apo nga lalaki nga nahimong sumpay sa kaliwat nga mitultol ngadto sa Mesiyas.—Ruth 1:3-5, 19-21; 4:13-17; Mateo 1:1, 5.
21, 22. Sa unsang paagi si Job gihasol sa makapaguol kaayong mga hitabo, ug unsay iyang reaksiyon?
21 Hunahunaa kon unsa ka kurat si Job sa dihang nabalitaan niya ang kalit ug mapintas nga kamatayon sa iyang napulo ka pinalanggang mga anak, maingon man ang pagkahanaw sa tanan niyang kahayopan ug sa iyang mga sulugoon. Sa kalit lang, ang tibuok niyang kalibotan daw nahugno! Unya, sa wala pa gani maulii si Job gikan niining makapaguol nga mga hitabo, gihampak siya ni Satanas ug usa ka sakit. Lagmit gayong naghunahuna si Job nga mamatay siya niining grabeng sakit. Dili na maantos ang iyang kasakit nga gibati niyang ang kamatayon makahupay kaniya.—Job 1:13-20; 2:7, 8.
22 Nga morag dili pa igo kining tanan, ang iyang asawa, tungod sa iyang kasubo ug tumang kasakit, miadto kaniya ug mipatugbaw: “Tungloha ang Diyos ug magpakamatay!” Pagkasakit niining tunoka diha sa iyang nagngutngot nga unod! Sunod, ang tulo ka higala ni Job, imbes hupayon siya, nag-atake kaniya pinaagig malimbongong pangatarongan, nga nag-akusar nga siya nakahimog tinagong mga sala ug naghunahuna nga mao kiniy hinungdan sa iyang kaalaotan. Ang ilang sayop nga mga argumento, ingnon ta, nagduot pa sa mga tunok sa iyang unod. Hinumdomi usab nga si Job wala mahibalo kon nganong nahitabo kining mangilngig nga mga butang kaniya; ni nahibalo siya nga dili diay siya patyon. Bisan pa, “niining tanan si Job wala makasala ni magpasangil ug bisan unsang butang nga dili angay batok sa Diyos.” (Job 1:22; 2:9, 10; 3:3; 14:13; 30:17) Bisan tuod gihasol sa daghang tunok sa usa ka higayon, wala gayod siya molunga diha sa iyang dalan sa integridad. Pagkamakapadasig!
23. Nganong ang matinumanong mga tawo nga atong gihisgotan nakaarang sa pag-antos sa lainlaing mga tunok sa unod?
23 Tinong duna pay daghang panig-ingnan nga sama sa nahisgotan na. Ang Bibliya naundan ug daghan pa. Kining tanang matinumanong mga alagad kinahanglang makigbisog sa ilang kaugalingong mahulagwayong mga tunok. Ug pagkadaghan sa mga problema nga ilang giatubang! Bisan pa, magkapareho sila sa usa ka butang. Walay usa kanila ang milunga sa pag-alagad kang Jehova. Bisan pa sa tanan nilang makapaguol nga mga pagsulay, ilang gibuntog si Satanas pinaagi sa kusog nga gihatag ni Jehova kanila. Sa unsang paagi? Ang sunod nga artikulo magtubag niining pangutanaha ug magpakita kanato kon sa unsang paagi kita usab makasagubang sa bisan unsang butang nga samag tunok sa atong unod.
[Footnote]
a Ang usa ka ambisyosong laraw nga sama niana dili gayod kinaiyanhon sa panggawi sa usa ka mapabilhon, mapaubsanong tawo sama kang Mepiboset. Sa walay duhaduha nahibalo siya pag-ayo sa pagkamatinumanon sa iyang amahan, si Jonathan. Bisan tuod ug anak nga lalaki ni Haring Saul, si Jonathan mapaubsanong miila kang David ingong pinili ni Jehova nga maghari ibabaw sa Israel. (1 Samuel 20:12-17) Ingon nga mahinadlokon-sa-Diyos nga ginikanan ni Mepiboset ug usa ka maunongong higala ni David, dili gayod tudloan ni Jonathan ang iyang bata pang anak sa pagtinguha sa harianong gahom.
Unsaon Nimo Pagtubag?
• Nganong ang mga problema nga atong giatubang ikatandi sa mga tunok sa unod?
• Unsa ang pipila sa mga tunok nga kinahanglang antoson ni Mepiboset ug Nehemias?
• Sa Kasulatanhong mga panig-ingnan sa mga lalaki ug babaye nga miantos sa lainlaing mga tunok sa unod, unsa ang ilabinang nakapatandog kanimo, ug ngano?
[Mga Pangutana sa Pagtuon]
[Mga hulagway sa panid 15]
Kinahanglang sagubangon ni Mepiboset ang pagkabakol, pagbutangbutang, ug kahigawad
[Hulagway sa panid 16]
Milahutay si Nehemias bisan pa sa pagsupak