Unsang Sakripisyo ang Gikinahanglan Aron Mahuptan ang Hinlong Tanlag?

“ANG Gobyerno Gimandoan sa Pagdawat sa R$20,000.” Kining talagsaong ulohan migula di pa dugay sa mantalaan sa Brazil nga Correio do Povo. Ang mantalaan nag-asoy sa estorya ni Luiz Alvo de Araújo, usa ka lokal nga kartero, kinsa nagbaligyag usa ka parselang yuta ngadto sa gobyerno sa estado. Human mapirmahi ang papeles nga magpamatuod nga ang iyang propiedad mapanag-iya na sa gobyerno sa estado, natingala si Luis sa pagkadiskobre nga sobrag R$20,000 (duolag $8,000, T.B.) ang gibayad kaniya!

Ang pag-uli sa sobrang kantidad nga gibayad lisod buhaton. Human sa daghang di-malamposong mga pagduaw ngadto sa mga departamento sa gobyerno, gisugyotan si Luis nga magkuhag abogado ug husayon ang problema didto sa korte. “Tataw nga dunay nasayop, ug tungod sa kalangan gumikan sa kuti nga pamaagi, wa nay nasayod kon unsaon paghusay ang kahimtang,” matod sa huwes nga nagmando sa gobyerno sa pagdawat sa salapi ug pagbayad sa legal nga mga galastohan. “Karon lang ko nakakitag kaso nga ingon niini.”

Si Luis, kinsa usa sa mga Saksi ni Jehova, miingon: “Ang akong nabansay-sa-Bibliya nga tanlag dili motugot nga tipigan ko ang dili gayod akoa. Kinahanglang iuli ko ang salapi.”

Daghan ang nag-isip sa maong tinamdan ingong talagsaon kaayo o dili gayod masabtan. Apan ang Pulong sa Diyos nagpakita nga ang matuod nga mga Kristohanon naghatag ug dakong bili sa paghupot ug hinlong tanlag diha sa ilang mga pakiglabot sa sekular nga mga awtoridad. (Roma 13:5) Ang mga Saksi ni Jehova determinadong maghupot ug ‘maminatud-ong tanlag ug magmaminatud-on sa tanang butang.’—Hebreohanon 13:18.