Mga Pangutana Gikan sa mga Magbabasa

Husto ba ang pag-ingon nga ang kaluoy ni Jehova nagpagaan sa iyang hustisya?

Bisan tuod gigamit kining ekspresyona, labing maayo nga likayan kini tungod kay morag nagpasabot kini nga ang kaluoy ni Jehova mopagaan o mopugong sa iyang hustisya, nga morag ang iyang kaluoy mas labaw kay sa mas bug-at nga kalidad sa hustisya. Sayop kini.

Ang Hebreohanong pulong nga gihubad ug “hustisya” diha sa Bag-ong Kalibotang Hubad mahimong magkahulogan usab ug “paghukom.” Ang hustisya dakog kalabotan sa pagkamatarong. Apan, ang hustisya kasagarang may kalabotan sa balaod. Ang pagkamatarong kasagarang wala. Tinuod nga ang hustisya ni Jehova mahimong maglangkit sa pagpahamtang sa nahiangay nga silot, apan mahimong maglangkit usab kini sa paghatag ug kaluwasan alang niadtong takos niini. (Genesis 18:20-32; Isaias 56:1; Malaquias 4:2) Busa, ang hustisya ni Jehova dili angayng isipon nga bug-at o kinahanglang pagaanon.

Ang Hebreohanong pulong alang sa “kaluoy” mahimong magpasabot sa pagpakitag pagpugong sa pagpahamtang sa paghukom. Mahimong magpasabot usab kini sa aktuwal nga pagpahayag sa pagkamabination, nga maghatag ug kahupayan ngadto sa mga nabentahaan.—Deuteronomio 10:18; Lucas 10:29-37.

Si Jehova maoy Diyos sa hustisya ug kaluoy. (Exodo 34:6, 7; Deuteronomio 32:4; Salmo 145:9) Ang iyang hustisya ug ang iyang kaluoy parehong hingpit, ug kini magkaharmonya. (Salmo 116:5; Oseas 2:19) Kanang duha ka hiyas hingpit nga magkatimbang. Busa, kon moingon kita nga ang kaluoy ni Jehova nagpagaan sa iyang hustisya, kinahanglang moingon usab kita nga ang iyang hustisya nagpagaan sa iyang kaluoy.

Si Isaias nagtagna: “Si Jehova magpadayon sa pagpaabot nga pakitaan kamog pabor, ug busa siya motindog aron pakitaan kamog kaluoy. Kay si Jehova usa ka Diyos sa paghukom [“hustisya,” The New English Bible].” (Isaias 30:18) Gipakita dinhi ni Isaias nga ang hustisya ni Jehova maoy mopukaw sa mga buhat sa kaluoy imbes nga ang iyang kaluoy magpagaan o magpugong sa iyang hustisya. Si Jehova magpakitag kaluoy tungod kay siya matarong ug tungod usab kay siya mahigugmaon.

Tinuod nga ang magsusulat sa Bibliya nga si Santiago misulat: “Ang kaluoy magmadaogon batok sa paghukom.” (Santiago 2:13b) Apan, sa konteksto si Santiago naghisgot dili kang Jehova kondili sa mga Kristohanon nga nagpakitag kaluoy—pananglitan, ngadto sa mga sinakit ug kabos. (Santiago 1:27; 2:1-9) Sa dihang pagahukman ang maong mga maluluy-on, hinumdoman ni Jehova ang ilang panggawi ug maluluy-ong magapasaylo kanila pinasukad sa halad sa iyang Anak. Busa, ang ilang maluluy-ong panggawi nagmadaogon batok sa bisan unsang bug-at nga paghukom nga angay unta kanila.—Proverbio 14:21; Mateo 5:7; 6:12; 7:2.

Busa, sayop ang pag-ingon nga ang paghukom ni Jehova gipagaan sa iyang kaluoy sa diwa nga ang iyang hustisya kinahanglang pagaanon sa kaluoy. Hingpit ang pagkatimbang niining duha ka hiyas ni Jehova. Magkatimbang kini maingon nga katimbang usab kini sa ubang mga hiyas ni Jehova, sama sa gugma ug kaalam.