“Milalom ang Among Gugma”

SA Biyernes, Marso 31, 2000, ang Mount Usu sa Hokkaido, Japan, mibuto human sa 23 ka tuig nga kini dili aktibo. Libolibo ka molupyo ang napugos sa pagkalagiw gikan sa peligrosong sona. Daghan ang nawad-an sa ilang mga balay ug mga trabaho, apan maayo na lang walay usa kanila nga namatay. Apil sa mga tawong kinahanglang mokalagiw mao ang 46 ka Saksi ni Jehova, apan wala sila pasagdi.

Sa adlaw mismo sa pagbuto, sa tabang sa usa ka nagapanawng Kristohanong ministro nga nag-alagad nianang dapita, dihay gihimong kahikayan alang sa mga kalihokan sa paghatag ug hinabang. Wala madugay, nangabot ang mga suplay sa hinabang gikan sa silingang mga kongregasyon. Ubos sa pagdumala sa sangang buhatan sa Japan, nakaporma dayon ug komite sa hinabang, ug daghang donasyon alang sa hinabang nga salapi ang nangabot gikan sa mga Saksi ni Jehova sa tibuok Japan. Aron masuportahan ang espirituwal nga mga kalihokan, ang bug-os-panahong mga ministro sa mga Saksi ni Jehova gipadala ngadto sa kongregasyon nga labing apektado, ug balikbalik nga giduaw sa magtatan-aw sa sirkito ang maong dapit sa paghatag ug emosyonal ug espirituwal nga pagpaluyo.

Ang mga Saksi sa apektadong dapit nagpadayon sa paghimo sa ilang Kristohanong mga tigom nianang malisod nga panahon pinaagi sa paggamit ug pribadong mga puy-anan diha sa mas luwas nga dapit. Sa dihang wala na isugo ang pagbakwet gikan sa dapit nga nahimutangan sa Kingdom Hall, namalik ang mga igsoon ug ilang nakaplagan ang tinukod nga nagtakilid, naliki, ug nadaot. Dili halayo gikan sa Kingdom Hall, ang bag-ong naporma nga baba sa bolkan nagbuga pa gihapon ug baga nga aso. Ang mga Saksi naghunahuna, ‘Maalamon kaha nga padayon gihapong himoon ang mga tigom dinhing dapita? Puwede pa kahang ayohon ang Kingdom Hall?

Nakadesisyon nga magtukod ug bag-ong Kingdom Hall diha sa mas luwas nga dapit sa duol. Ang Regional Building Committee naghatag ug gikinahanglang tabang. Ang salapi nga gidonar sa mga Saksi sa tibuok nasod gigamit alang niining maong konstruksiyon. Nakapalit dayon ug lote, ug tungod sa tabang sa ginatos ka boluntaryo, usa ka bag-ong Kingdom Hall ang natukod sa mubong yugto sa panahon. Sa Dominggo, Hulyo 23, 2000, ang unang tigom nga gihimo niining bag-ong natukod nga Kingdom Hall gitambongan ug 75 ka tawo. Daghang nanambong ang mihilak sa kalipay. Sa dihang gipahinungod ang Kingdom Hall sa Oktubre niana gihapong tuiga, ang usa sa mga ansiyano sa lokal nga kongregasyon natukmod sa pag-ingon: “Ang pagbuto sa bolkan nakapahinabo ug mga kalisdanan ug pag-antos. Apan tungod niining maong konstruksiyon ang among kahadlok nahimong kalipay. Milalom ang among gugma kang Jehova ug sa among minahal nga Kristohanong mga igsoon!”

[Picture Credit Line sa panid 19]

Eruption of Mount Usu: AP Photo/Koji Sasahara