Sa Unsang Paagi Makalabang-Buhi Ka sa Kataposan Niining Kalibotana?

ANG Bibliya naghubit sa kataposan niining presenteng sistema sa mga butang ingong “usa ka adlaw sa mabangis nga kasuko, usa ka adlaw sa kasakitan ug kagul-anan, usa ka adlaw sa bagyo ug sa kagun-oban, usa ka adlaw sa kangitngit ug kangiob, usa ka adlaw sa panganod ug sa mabagang kangiob.” (Sofonias 1:15) Segurado nga dili kini mao ang matang sa adlaw nga normal nimong paaboton! Apan, gitambagan ni apostol Pedro ang iyang mga isigka-Kristohanon nga ‘magpaabot ug magbutang kanunay sa hunahuna sa presensiya sa adlaw ni Jehova, nga pinaagi niini ang mga langit nga nagadilaab mangaugdaw ug ang mga elemento tungod sa hilabihang kainit mangatunaw! Apan adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini magpuyo ang pagkamatarong.’—2 Pedro 3:12, 13.

Si Pedro wala maghisgot dinhi sa kalaglagan sa literal nga mga langit ug yuta. Sa konteksto, ang “mga langit” ug “yuta” nga gitumong ni Pedro naghulagway sa presenteng dunot nga tawhanong mga gobyerno ug sa dili-diyosnong tawhanong katilingban. “Ang adlaw ni Jehova” dili molaglag sa yuta mismo kondili ‘molaglag sa mga makasasala sa yuta.’ (Isaias 13:9) Alang niadtong “nagapanghupaw ug nagaagulo tungod sa tanang dulumtanang mga butang” nga ginahimo sa daotang tawhanong katilingban karon, ang adlaw ni Jehova mahimo gayod nga usa ka adlaw sa kaluwasan.—Ezequiel 9:4.

Nan, sa unsang paagi ang usa maluwas sa “dako ug makalilisang nga adlaw ni Jehova”? “Ang pulong ni Jehova” nga gibutyag ngadto sa usa sa iyang mga manalagna nagtubag nianang pangutanaha: “Mahitabo gayod nga ang matag usa nga magatawag sa ngalan ni Jehova maluwas.” (Joel 1:1; 2:31, 32) Ang mga Saksi ni Jehova malipay nga motabang kanimo nga masabtan kon unsay kahulogan sa pagtawag sa ngalan ni Jehova.