Maayong Pagpangulo—Asa Nato Makaplagi Kini?

“ANG matag balay adunay nagtukod,” nag-ingon ang Bibliya, “apan siya nga nagtukod sa tanang butang mao ang Diyos.” (Hebreohanon 3:4; Pinadayag 4:11) Sanglit ang matuod nga Diyos, si Jehova, mao ang atong Maglalalang, siya “nahibalo pag-ayo sa atong pagkaumol.” (Salmo 103:14) Siya adunay bug-os nga kahibalo sa atong mga limitasyon ug mga panginahanglan. Ug tungod kay siya usa ka mahigugmaong Diyos, buot niyang itagana ang maong mga panginahanglan. (Salmo 145:16; 1 Juan 4:8) Ang atong panginahanglan sa maayong pagpangulo dili eksepsiyon.

Pinaagi sa manalagnang si Isaias, si Jehova nagpahayag: “Tan-awa! Ingong saksi ngadto sa nasodnong mga pundok akong gihatag siya, ingong pangulo ug komandante ngadto sa nasodnong mga pundok.” (Isaias 55:4) Ang solusyon sa krisis karon sa pagpangulo naglakip sa pag-ila sa maong Pangulo—nga gitudlo sa Labing Gamhanan mismo—ug pagdawat sa iyang pagpangulo. Nan, kinsa ang maong gitagnang Pangulo ug Komandante? Unsa ang iyang mga kredensiyal ingong pangulo? Asa niya kita tultolan? Unsay kinahanglang atong buhaton aron makapahimulos sa iyang pagpangulo?

Ang Sinaad nga Pangulo Miabot

Mga 2,500 ka tuig kanhi, ang manulondang si Gabriel mipakita sa manalagnang si Daniel ug giingnan siya: “Angay kang mahibalo ug magbaton  sa hait nga salabotan nga sukad sa paggula sa sugo sa pagpasig-uli ug sa pagtukod pag-usab sa Jerusalem hangtod sa Mesiyas nga Pangulo, adunay pito ka semana, ingon man kan-umag-duha ka semana. Siya mahibalik ug matukod gayod pag-usab, nga may plasa ug nagalibot nga trinseras, apan sa malisod nga mga panahon.”—Daniel 9:25.

Tin-aw, ang manulonda nagpahibalo kang Daniel bahin sa tinong panahon sa pag-abot sa Pangulo nga pinili ni Jehova. Ang “Mesiyas nga Pangulo” mopakita pagkatapos sa 69 ka semana, o 483 ka tuig, nga magsugod pag-ihap sa 455 W.K.P., sa dihang migula ang sugo sa pagtukod pag-usab sa Jerusalem. a (Nehemias 2:1-8) Unsay nahitabo pagkatapos sa maong yugto? Ang magsusulat sa Ebanghelyo nga si Lucas miasoy: “Sa ikanapulog-lima ka tuig sa paghari ni Tiberio Cesar, sa dihang si Poncio Pilato mao ang gobernador sa Judea, ug si Herodes mao ang magmamando sa distrito sa Galilea [29 K.P.], . . . ang pahayag sa Diyos miabot kang Juan nga anak nga lalaki ni Zacarias didto sa kamingawan. Busa siya miadto sa tibuok yuta nga naglibot sa Jordan, nga nagwali sa bawtismo nga simbolo sa paghinulsol alang sa kapasayloan sa mga sala.” Niadtong panahona, “ang mga tawo nagpaabot” sa Mesiyas nga Pangulo. (Lucas 3:1-3, 15) Bisan pag ang mga panon sa katawhan miduol kang Juan, dili siya ang gipaabot nga Pangulo.

Unya sa mga Oktubre sa 29 K.P., si Jesus nga Nasareno miduol kang Juan aron magpabawtismo. Ug si Juan nagpamatuod, nga nag-ingon: “Nakita ko ang espiritu nga mikunsad ingon sa salampati gikan sa langit, ug kini mipabilin diha kaniya. Bisan ako wala makaila kaniya, apan ang Usa mismo nga nagpadala kanako sa pagbawtismo sa tubig nag-ingon kanako, ‘Siya nga makit-an mo nga kaniya ang espiritu mokunsad ug magpabilin, kini siya mao ang magbawtismo sa balaang espiritu.’ Ug nakita ko kini, ug ako nagpamatuod nga kini siya mao ang Anak sa Diyos.” (Juan 1:32-34) Panahon sa iyang bawtismo, si Jesus nahimong ang dinihogang Pangulo—ang Mesiyas o Kristo.

Oo, ang sinaad nga “pangulo ug komandante ngadto sa nasodnong mga pundok” mao si Jesu-Kristo. Ug sa dihang susihon nato ang iyang mga hiyas ingong usa ka pangulo, masabtan dayon nato nga ang iyang pagpangulo molabaw kaayo sa modernong-adlaw nga mga kinahanglanon sa usa ka mithianong pangulo.

Ang Mesiyas—Usa ka Mithianong Pangulo

Ang usa ka maayong pangulo mohatag ug tin-awng pagtultol ug motabang sa mga tawong gisalig kaniya sa pagbaton ug personal nga kalig-on ug mga katakos aron sila malamposong makasulbad sa mga suliran. ‘Kini usa ka kinahanglanon alang sa malamposong pangulo sa ika-21ng siglo,’ matod sa librong 21st Century Leadership: Dialogues With 100 Top Leaders. Si Jesus nag-andam nga epektibo kaayo sa iyang mga tigpatalinghog aron madumala ang adlaw-adlawng mga kahimtang! Hunahunaa lang ang iyang labing bantogang diskurso—ang Wali sa Bukid. Pagkadaghan sa praktikal nga tambag nga anaa sa mga pulong nga nahitala sa Mateo mga kapitulo 5 hangtod 7.

Pananglitan, palandonga ang tambag ni Jesus bahin sa paghusay sa personal nga mga kabingkilan. Matod niya: “Nan, kon ikaw nagadala sa imong gasa ngadto sa halaran ug didto mahinumdom ka nga ang imong igsoon may butang nga batok kanimo, biyai ang imong gasa didto atubangan sa halaran, ug lakaw; pakigdait una sa imong igsoon, ug unya, sa makabalik ka na, ihalad ang imong gasa.” (Mateo 5:23, 24) Hatagan ug unang pagtagad ang paghimo sa unang tikang sa pagpakigdait sa uban—bisan labaw pa kay sa pagtuman sa relihiyosong katungdanan, sama sa pagtanyag ug mga gasa ibabaw sa halaran sa templo sa Jerusalem sumala sa gisugo sa Moisesnong Balaod. Kon kana dili himoon, ang mga buhat sa pagsimba dili dawaton sa Diyos. Ang tambag ni Jesus maoy praktikal karon ingon man sa mga siglo kanhi.

Gitabangan usab ni Jesus ang iyang mga tigpatalinghog sa paglikay sa lit-ag sa imoralidad. Siya mitambag kanila: “Nadungog ninyo nga kini giingon, ‘Dili ka manapaw.’ Apan ako magaingon kaninyo nga ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.” (Mateo 5:27, 28) Pagkahaom nga pasidaan! Nganong sugdan man nato ang proseso sa pagpanapaw pinaagi sa paghunahuna bahin niana? Gikan sa  kasingkasing ang pakighilawas ug pagpanapaw mogawas, matod ni Jesus. (Mateo 15:18, 19) Maalamon nga atong bantayan ang atong kasingkasing.—Proverbio 4:23.

Ang Wali sa Bukid may ekselenteng tambag usab bahin sa paghigugma sa mga kaaway sa usa ka tawo, sa pagpasundayag sa pagkamahinatagon, sa pagbaton ug hustong panglantaw bahin sa materyal ug espirituwal nga mga butang, ug ang susama. (Mateo 5:43-47; 6:1-4, 19-21, 24-34) Si Jesus nagpakita gani sa iyang mamiminaw kon unsaon pagtinguha sa tabang sa Diyos pinaagi sa pagtudlo kanila kon unsaon pag-ampo. (Mateo 6:9-13) Ang Mesiyas nga Pangulo nagpalig-on ug nag-andam sa iyang mga sumusunod sa pagdumala sa mga suliran nga kasagarang masinati sa katawhan.

Unom ka beses diha sa Wali sa Bukid, si Jesus nagsugod sa iyang mga pahayag pinaagi sa mga pulong “nadungog ninyo nga kini giingon” o “nadungog usab ninyo nga giingon kini,” apan unya siya nagpahayag ug laing ideya, nga nag-ingon “bisan pa niana, ako magaingon kaninyo.” (Mateo 5:21, 22, 27, 28, 31-34, 38, 39, 43, 44) Kana nagpaila nga ang iyang mga tigpatalinghog naanad sa paglihok sa usa ka tinong paagi, sumala sa binabang mga tradisyon sa mga Pariseo. Apan si Jesus sa maong higayon nagpakita kanilag laing paagi—usa ka paagi nga nagsumbalik-silaw sa matuod nga diwa sa Moisesnong Balaod. Sa ingon si Jesus nagpailag usa ka kausaban, ug iya kanang gihimo sa paaging sayon nga madawat sa iyang mga sumusunod. Oo, si Jesus nagtukmod sa mga tawo sa paghimog talagsaong mga kausaban diha sa ilang mga kinabuhi, sa espirituwal ug moral nga paagi. Kini usa ka ilhanan sa usa ka matuod nga pangulo.

Ang usa ka teksbok bahin sa pagdumala mipunting kon unsa ka lisod ang pagpahinabo sa maong kausaban. Kini nag-ingon: “Ang tigpahinabo sa kausaban [pangulo] nagkinahanglan sa pagkasensitibo sa usa ka social worker, pagkamailahon sa usa ka sikologo, agwanta sa usa ka maglulumba sa marathon, lanat sa usa ka irong magbubugno, pagkaindependente sa usa ka ermitanyo, ug pagkamapailobon sa usa ka santos. Ug bisan pa nianang tanang hiyas, dili ikagarantiya ang kalamposan.”

“Ang mga pangulo kinahanglang magagawi sumala sa gusto nilang igawi sa ilang mga sumusunod,” nag-ingon ang usa ka artikulong nag-ulohang “Pagpangulo: Hinungdanon ba ang mga Kinaiya?” Sa pagkamatuod, ang usa ka maayong pangulo magabuhat kon unsay iyang ginawali. Matuod gayod kana kang Jesu-Kristo! Oo, siya nagtudlo sa iyang mga kauban nga mahimong mapainubsanon, apan naghatag usab siyag praktikal nga panig-ingnan kanila pinaagi sa paghugas sa ilang mga tiil. (Juan 13:5-15) Wala lang siya magsugo sa iyang mga tinun-an aron pagwali sa maayong balita sa Gingharian sa Diyos, kondili siya nagkugi pag-ayo sa maong buluhaton. (Mateo 4:18-25; Lucas 8:1-3; 9:1-6; 10:1-24; Juan 10:40-42) Ug mahitungod sa pagsanong ngadto sa pagpangulo, si Jesus mihatag ug panig-ingnan. “Ang Anak dili makahimo ug usa ka butang sa iyang kaugalingong pagbuot,” siya miingon bahin sa iyang kaugalingon, “apan kon unsa lamang ang iyang nakita nga ginabuhat sa Amahan.”—Juan 5:19.

Ang nahaunang paghisgot bahin sa gisulti ug gibuhat ni Jesus tin-awng nagpakita nga siya mao ang mithianong Pangulo. Sa pagkamatuod, siya labaw pa kay sa tanang tawhanong mga sukdanan sa maayong pagpangulo. Hingpit si Jesus. Kay nakadawat ug imortalidad human sa iyang pagkamatay ug pagkabanhaw, siya buhi sa walay kataposan. (1 Pedro 3:18; Pinadayag 1:13-18) Kinsang tawhanong pangulo ang may samang mga katakos?

Unsay Angay Natong Buhaton?

Ingong ang nagamandong Hari sa Gingharian sa Diyos, ang “Mesiyas nga Pangulo” mopaulan ug mga panalangin sa masinundanong mga tawo. Bahin niini ang Kasulatan nagsaad: “Ang yuta mapuno sa kahibalo kang Jehova ingon sa katubigan nga nagtabon sa dagat mismo.” (Isaias 11:9) “Ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.” (Salmo 37:11) “Sila manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila.” (Miqueas 4:4) “Ang Diyos makig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”—Pinadayag 21:3, 4.

 Ang kalibotan karon nakasinati sa krisis sa pagpangulo. Hinuon, si Jesu-Kristo nagatultol sa mga maaghop padulong sa malinawong bag-ong kalibotan, diin ang masinundanong mga tawo mahiusa sa pagsimba kang Jehova nga Diyos ug mouswag padulong sa kahingpitan. Pagkabililhon nga kita mogahin ug panahon aron mabatonan ang kahibalo bahin sa matuod nga Diyos ug sa iyang tinudlong Pangulo ug molihok nga nahiuyon sa maong kahibalo!—Juan 17:3.

Usa sa labing maayong mga pagdayeg nga ikahatag nato sa usa ka tawo mao ang pagsundog kaniya. Nan dili ba angay natong paningkamotan ang pagsundog sa labing talagsaong Pangulo sa kasaysayan sa tawo—si Jesu-Kristo? Sa unsang paagi makahimo kita niana? Unsa unya ang epekto sa pagdawat sa iyang pagpangulo diha sa atong mga kinabuhi? Kining mga pangutanaha ug uban pa pagahisgotan sa mosunod nga duha ka artikulo.

[Footnote]

[Hulagway sa panid 4]

Gitagna ni Daniel ang pag-abot sa Pangulo nga pinili sa Diyos

[Mga hulagway sa panid 7]

Ang mga pagtulon-an ni Jesus nag-andam sa mga tawo sa pagdumala sa mga suliran sa kinabuhi

[Hulagway sa panid 7]

Tultolan ni Jesus ang masinundanong mga tawo padulong sa malinawong bag-ong kalibotan