Mabuntog Nimo ang Kamingaw

KINSAY makaingon nga wala pa makasinati sukad sa kasakit nga ipahinabo sa kamingaw? Daghang butang ang makapabati kanatog kamingaw. Apan, grabe ang gibating kamingaw sa mga babaye nga wala gayod maminyo o kadtong nabiyuda o gibulagan.

Pananglitan, usa ka batan-ong Kristohanong babaye nga ginganlag Frances nag-ingon: “Pag-edad nakog 23, morag nangaminyo na ang tanan nakong mga higala, ug ako na lang ang nahibilin.” a Ang pagbating nag-inusara mahimong mosamot samtang manglabay ang katuigan ug magkadiyutay ang posibleng maminyoan. “Wala gayod akoy plano nga magpabiling tagsaanon, ug gusto gihapon nakong magminyo kon motungha ang kahigayonan,” miangkon si Sandra, nga karon duolan na sa 50 anyos. Si Angela, nga mga 50 anyos na, miingon: “Wala ako maningkamot nga magpabiling tagsaanon, apan mao nay akong kahimtang. Diyutay ra kaayo ang mga ulitawo sa dapit nga giasaynan nako ingong espesyal payunir.”

Dalayegon nga daghang Kristohanong mga babaye ang mipili nga dili magminyo tungod kay maunongon nilang gipatalinghogan ang tambag ni Jehova nga magminyo “lamang diha sa Ginoo.” (1 Corinto 7:39) Ang uban nakapasibo sa pagkatagsaanon, apan nakaplagan sa uban nga ang tinguha nga magminyo ug manganak misamot sa pagpanglabay sa katuigan. “Ang emosyonal nga kahaw-ang, nga gipahinabo sa pagkawalay-kapikas, maoy kanunay nakong gibati,” misugid si Sandra.

Ang ubang mga hinungdan, sama sa pag-atiman sa tigulang nga mga ginikanan, makapasamot tingali sa pagbatig kamingaw. “Tungod kay dili ako minyo, ang pamilya nagdahom nga ako maoy mag-atiman sa among tigulang nga mga ginikanan,” miingon si Sandra. “Sulod sa 20 ka tuig akong giabaga ang dakong bahin niining maong responsibilidad, bisan pag may lima ako ka igsoon. Maarang-arang unta ang kahimtang kon dunay bana nga makatabang nako.”

Si Frances naghisgot sa laing bahin nga nakapasamot sa iyang kamingaw. Siya miasoy: “Usahay ang mga tawo direktang mangutana nako, ‘Nganong wala pa man ka magminyo?’ Tungod sa maong komento gibati nakong ang akong pagkatagsaanon daw sala nako. Diha sa halos tanang kasal nga akong tambongan, dunay mosukna sa dili nako gustong pangutana, ‘O, kanus-a man ka magminyo?’ Ug magsugod ko sa paghunahuna, ‘Kon ang mahunahunaon sa espirituwal nga mga brader dili interesado nako, tingali wala nako mabatoni ang kinahanglanong Kristohanong mga hiyas o tingali dili lang gyod ko makabibihag.’”

Sa unsang paagi mabuntog ang mga pagbating nag-inusara ug nagmamingawon? Unsay mahimo sa uban, kon duna man, aron makatabang?

 Salig Kang Jehova

Ang salmista miawit: “Itugyan ang imong palas-anon kang Jehova, ug siya magasapnay kanimo. Dili gayod niya itugot nga matarog ang matarong.” (Salmo 55:22) Ang pulong “palas-anon” sa Hebreohanong teksto sa literal nagpasabot ug “bahin,” ug nagtumong kini sa mga kabalaka ug kahingawa nga basin giantos nato tungod sa atong kahimtang sa kinabuhi. Si Jehova mas nahibalo niining maong mga palas-anon kay ni bisan kinsa ug makahatag kanatog kusog sa pagsagubang niini. Ang pagsalig kang Jehova nga Diyos maoy nakatabang kang Angela sa pagsagubang sa kamingaw. Naghisgot sa iyang bug-os-panahong ministeryo, siya nahinumdom: “Sa dihang nagsugod ko pagpayunir, ang akong paris ug ako nagpuyo nga layo sa kinadul-ang kongregasyon. Nakakat-on mi sa pagsalig kang Jehova sa bug-os, ug kining maong pagsalig nakatabang nako sa tibuok kong kinabuhi. Kon mosantop sa akong hunahuna ang negatibong mga butang, makigsulti ko kang Jehova ug siya nagtabang kanako. Ang Salmo 23 kanunayng nakatabang ug dako, ug subsob ko kining basahon.”

Si apostol Pablo dunay dako usab nga palas-anon. Sa labing menos tulo ka higayon, siya ‘nangaliyupo sa Ginoo nga ang iyang tunok sa unod mobiya unta kaniya.’ Si Pablo wala tabangi sa milagrosong paagi, apan nadawat niya ang saad nga ang dili-takos nga kalulot sa Diyos magpalig-on kaniya. (2 Corinto 12:7-9) Nadiskobrehan usab ni Pablo ang sekreto sa pagkakontento. Siya misulat sa ulahi: “Sa tanang butang ug sa tanang kahimtang nakat-onan ko ang sekreto kon unsaon pagkabusog ug kon unsaon pagkagutom, kon unsaon sa pagkinabuhi sa kadagaya ug kon unsaon sa pag-antos sa kawalad-on. Sa tanang butang ako adunay kusog pinaagi kaniya nga naghatag ug gahom kanako.”—Filipos 4:12, 13.

Sa unsang paagi ang usa makabaton sa kusog sa Diyos sa dihang mobatig kahigawad o kamingaw? Si Pablo misulat: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filipos 4:6, 7) Gisunod ni Sandra kining maong tambag. Siya miingon: “Kay tagsaanon, daghan kog panahon nga mag-inusara. Naghatag kini kanakog daghang kahigayonan nga moampo kang Jehova. Mibati akong suod kaayo niya ug makasulti kaniya nga walay pagpanuko bahin sa akong mga problema ug mga kalipay.” Ug si Frances miingon: “Ang pagpakigbisog sa negatibong mga hunahuna nga ako-ako ra maoy kanunayng pakigbugno. Apan ang madayganong pagpahibalo kang Jehova sa akong gibati dako kaayog gikatabang. Kombinsido ko nga si Jehova interesado sa bisan unsa nga mahimong mag-apektar sa akong espirituwal ug emosyonal nga kaayohan.”—1 Timoteo 5:5.

“Magpadayon sa Pagpinas-anay sa mga Kabug-at sa Usag Usa”

Sulod sa Kristohanong panag-igsoonay, ang mga kabug-at dili kinahanglang pas-anon nga mag-inusara. “Magpadayon sa pagpinas-anay sa mga kabug-at sa usag usa, ug sa ingon magtuman sa balaod ni Kristo,” mitambag si apostol Pablo. (Galacia 6:2) Pinaagi sa atong pagpakig-uban sa mga isigka-Kristohanon, makadawat kitag “maayong pulong” sa pagdasig nga makapagaan sa kabug-at sa kamingaw.—Proverbio 12:25.

Tagda usab ang giingon sa Kasulatan bahin sa anak nga babaye ni Maghuhukom Jepte sa Israel. Una pa sa iyang kadaogan batok sa kaawayng mga puwersa sa Ammon, si Jepte nanaad nga ihatag kang Jehova ang unang mosugat niya sa iyang panimalay aron sa pagpahalipay kaniya. Ang iya diay kadtong anak nga babaye. (Maghuhukom 11:30, 31, 34-36) Bisan pag nagpasabot kana nga siya magpabiling tagsaanon ug palabyon ang iyang normal nga tinguha sa pagbaton ug pamilya, ang anak nga babaye ni Jepte kinabubut-ong mituman niining maong saad ug nag-alagad diha sa sangtuwaryo sa Shilo sa tibuok niyang kinabuhi. Wala ba panumbalinga ang iyang pagsakripisyo? Sa kasukwahi: “Sa matag tuig ang mga anak nga babaye sa Israel moadto sa pagpasidungog sa anak nga babaye ni Jepte nga Gileadnon, upat ka adlaw sa usa ka tuig.” (Maghuhukom 11:40) Oo, ang pagdayeg makadasig niadtong nakadawat niana. Busa, kanunay natong dayegon ang mga takos niana.

 Maayo usab nga tagdon nato ang panig-ingnan ni Jesus. Bisan pag dili kostumbre sa mga Hudiyong lalaki nga makigsulti sa mga babaye, si Jesus migugol ug panahon uban kang Maria ug Marta. Lagmit, sila maoy mga biyuda o kaha mga dalaga. Buot ni Jesus nga silang duha makatagamtam sa espirituwal nga mga benepisyo sa iyang pakighigala. (Lucas 10:38-42) Masundog nato ang panig-ingnan ni Jesus pinaagi sa pagpaapil sa atong dalagang mga igsoon sa espirituwal diha sa mga salosalo ug pinaagi sa paghimog mga kahikayan sa pagpakig-ambit sa buluhatong pagsangyaw uban kanila. (Roma 12:13) Giapresyar ba nila ang maong pagtagad? Usa ka sister miingon: “Nahibalo ko nga ang mga igsoon nagmahal ug nagpabili kanako, apan ako mapasalamaton sa dihang magpakita sila ug personal nga kaikag kanako.”

“Tungod kay wala man kamiy pamilya,” matod ni Sandra, “mas dako kamig panginahanglan nga mahalon, nga mobating bahin sa pamilya sa espirituwal nga mga igsoong lalaki ug babaye.” Dayag nga si Jehova may pagtagad kanila, ug kita nakigkooperar kaniya sa dihang gipabati nato silang gikinahanglan ug gimahal. (1 Pedro 5:6, 7) Ang maong kabalaka mamatikdan gayod, kay “siya nga nagapakitag kaluoy sa timawa nagapahulam kang Jehova, ug Siya [Jehova nga Diyos] magabayad kaniya sa iyang gibuhat.”—Proverbio 19:17.

“Ang Matag Usa Magpas-an sa Iyang Kaugalingong Luwan”

Bisan tuod makatabang ang uban, ug ang ilang pagpaluyo makapadasig pag-ayo, “ang matag usa magpas-an sa iyang kaugalingong luwan.” (Galacia 6:5) Sa pagpas-an sa luwan sa kamingaw, hinunoa, kinahanglang magbantay kita sa pipila ka kapeligrohan. Pananglitan, mahimong dag-on kita sa kamingaw kon dili na kita makig-estorya. Sa laing bahin, mabuntog nato ang kamingaw pinaagi sa gugma. (1 Corinto 13:7, 8) Ang paghatag ug pagpaambit mao ang kinamaayohang paagi sa pagkaplag ug kalipay—bisan unsa pay atong mga kahimtang. (Buhat 20:35) “Wala kaayo akoy panahon sa paghunahuna bahin sa kamingaw,” matod pa sa usa ka kugihang payunir nga sister. “Sa dihang mobati akong mapuslanon ug puliki, dili ako mobatig kamingaw.”

Kinahanglang mag-amping usab kita nga ang kamingaw dili magpugos kanato sa pagsulod sa dili maalamong romantikong relasyon. Pananglitan, dakong kasubo ang mosangpot kon atong tugotan ang tinguha nga magminyo nga mopugong kanato sa pagkakita sa daghang problema nga motungha gumikan sa pagpakigminyo sa usa nga dili-magtutuo ug ilabina sa Kasulatanhong tambag sa paglikay sa maong yugo! (2 Corinto 6:14) Ang usa ka diborsiyadang Kristohanong babaye miingon: “Dunay usa ka butang nga mas grabe pa sa pagkatagsaanon. Mao kanang pagpakigminyo sa sayop nga tawo.”

Ang usa ka problema nga dili masulbad kinahanglan tingaling antoson, labing menos sa pagkakaron. Uban sa tabang sa Diyos, ang kamingaw maantos. Samtang magpadayon kita sa pag-alagad kang Jehova, hinaot magmasaligon kita nga sa umaabot ang tanan natong mga panginahanglan pagatagbawon sa kinamaayohang paagi nga posible.—Salmo 145:16.

[Footnote]

[Mga hulagway sa panid 28]

Ang kamingaw mabuntog pinaagi sa paghatag ug pagpaambit