Ang Diyos Nagdapit sa Tanang Kanasoran

SA IYANG unang biyahe ngadto sa Mali, si John natandog sa mainit nga pag-abiabi nga gipakita ni Mamadou ug sa iyang pamilya. Samtang si John nagyaka sa yuta ug bakikaw nga nagkaon diha sa platong gisalohan sa tanan, siya naghunahuna kon unsa ang labing maayong paagi nga ikapaambit niya ngadto sa nag-abiabi kaniya ang usa ka bililhon kaayong gasa—ang maayong balita sa Gingharian gikan sa Pulong sa Diyos, ang Bibliya. Bisan pag mahibalo siyang mosulti ug Pranses, nga mao ang pinulongang gisulti sa Mali, si John naghunahuna kon sa unsang paagi siya makakomunikar niining pamilyaha nga lahi kaayog relihiyon ug kaisipan.

Dili ikatingala, nakahunahuna si John mahitungod sa asoy sa Bibliya sa siyudad sa Babel. Didto gilahugay sa Diyos ang pinulongan sa rebelyosong mga tawo. (Genesis 11:1-9) Tungod niini, ang mga tawo nga lainlain ug pinulongan, relihiyon, ug kaisipan nanungha sa nagkadaiyang mga bahin sa yuta. Karon, tungod kay ordinaryo na lang ang pagbiyahe ug paglalin, daghan ang nakaatubang ug suliran sama nianang naatubang ni John, bisan diha mismo sa ilang kasilinganan: Sa unsang paagi ilang ikapaambit ang ilang pinasukad-sa-Bibliya nga paglaom uban sa mga tawong lahi ug kagikan?

Usa ka Karaang Pananglitan

Sama sa ubang mga manalagna sa Israel, si Jonas namulong ilabina ngadto sa mga Israelinhon. Siya nanagna sa panahon nga ang apostatang napulo-ka-tribong gingharian dayag nga nakigbahin sa mga buhat nga nagpasipala sa Diyos. (2 Hari 14:23-25) Handurawa ang reaksiyon ni Jonas sa dihang nakadawat siya ug linaing misyon sa pagbiya sa iyang yutang natawhan ug sa pag-adto sa Asirya aron sa pagsangyaw ngadto sa mga molupyo sa Nineve, mga tawo nga lahig relihiyon ug kultura. Malagmit pa nga si Jonas dili makamaong mosulti sa pinulongan sa mga taga-Nineve, o kaha siya dili larinong mosulti niini. Kon unsa man ugaling ang kahimtang, dayag nga gilisdan gayod si Jonas sa maong misyon, ug siya mikalagiw.—Jonas 1:1-3.

Tin-aw nga kinahanglang makakat-on si Jonas nga si Jehova nga Diyos dili motan-aw sa panggawas lang nga panagway kondili mosusi sa kasingkasing. (1 Samuel 16:7) Human sa pagluwas kang Jonas sa milagrosong paagi gikan sa pagkalumos, sa ikaduhang higayon gisugo siya ni Jehova sa pagsangyaw ngadto sa mga molupyo sa Nineve. Si Jonas mituman, ug tungod niini, ang mga taga-Nineve nag-ambahan sa paghinulsol. Ugaling, sayop gihapon ang panglantaw ni Jonas. Pinaagi sa usa ka praktikal nga epektibong leksiyon, gitudloan siya ni Jehova nga kinahanglang usbon niya ang iyang tinamdan. Gipangutana ni Jehova si Jonas: “Dili ba diay ako masubo alang sa Nineve nga dakong siyudad, diin adunay kapin sa usa ka gatos ug kawhaan ka libo ka tawo nga wala mahibalo sa kalainan tali sa ilang tuong kamot ug sa ilang wala?” (Jonas 4:5-11) Komosta man kita karong panahona? Sa unsang paagi kita makatabang sa mga tawo nga lahig kagikan?

 Pagdapit sa mga Samarianhon ug mga Dili-Hudiyo

Sa unang siglo, gisugo ni Jesus ang iyang mga sumusunod sa paghimog mga tinun-an sa katawhan sa tanang kanasoran. (Mateo 28:19) Kini dili sayon alang kanila. Ang mga tinun-an ni Jesus maoy mga Hudiyo ug, sama kang Jonas, sila naanad sa pagpakig-estorya lamang sa mga tawo nga sama nilag kagikan ug kultura. Siyempre, naimpluwensiyahan usab sila sa kasagarang mga pagpihig nianang panahona. Apan, gigiyahan ni Jehova ang mga kahimtang mao nga anam-anam nga nasabtan sa iyang mga alagad ang iyang kabubut-on alang kanila.

Ang unang lakang mao ang pagbuntog sa pagpihig tali sa mga Hudiyo ug mga Samarianhon. Ang mga Hudiyo dili makiglabot sa mga Samarianhon. Apan, si Jesus makadaghan nga nag-andam sa dalan aron madawat sa mga Samarianhon ang maayong balita sa umaabot. Iyang gipasundayag nga siya dili-mapihigon pinaagi sa pagpakigsulti ngadto sa usa ka babayeng taga-Samaria. (Juan 4:7-26) Sa laing okasyon, pinaagi sa ilustrasyon bahin sa buotan nga Samarianhon, iyang gipakita ngadto sa usa ka relihiyosong Hudiyo nga ang dili-Hudiyong mga tawo mahibalo usab nga mopakitag gugma sa isigkatawo. (Lucas 10:25-37) Sa dihang miabot ang panahon nga ilakip na ni Jehova ang mga Samarianhon diha sa Kristohanong kongregasyon, si Felipe, Pedro, ug Juan—ang tanan Hudiyohanon ug kagikan—nagsangyaw ngadto sa mga molupyo sa Samaria. Ang ilang mensahe nakahatag ug dako kaayong kalipay sa maong siyudad.—Buhat 8:4-8, 14-17.

Kon nalisdan ang Hudiyong mga Kristohanon sa paghigugma sa mga Samarianhon, nga sa pagkatinuod maoy layong mga paryente sa mga Hudiyo, mas maglisod sila sa pagpakitag mabinationg gugma ngadto sa mga dili-Hudiyo, o mga Hentil, nga giyubit ug gidumtan sa mga Hudiyo. Apan, human sa kamatayon ni Jesus, ang ulang tali sa Hudiyohanong mga Kristohanon ug mga Hentil gikuha na. (Efeso 2:13, 14) Sa pagtabang kang Pedro nga madawat kining bag-ong kahikayan, gipakitaan siya ni Jehova ug usa ka panan-awon nga niana Iyang gisultihan siya sa ‘paghunong na sa pagtawag nga mahugaw sa mga butang nga gihinloan na sa Diyos.’ Dayon gitultolan siya sa espiritu ni Jehova ngadto sa usa ka Hentil nga ginganlag Cornelio. Sa dihang nasabtan ni Pedro ang panglantaw sa Diyos—nga dili niya angayng tawgong mahugaw ang maong Hentil tungod kay nahinloan na siya sa Diyos—siya miingon ilalom sa pagdasig: “Tinong naila ko nga ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” (Buhat 10:9-35) Pagkadako sa kahibulong ni Pedro sa dihang gipasundayag sa Diyos nga iyang gidawat si Cornelio ug ang iyang pamilya pinaagi sa pagbubo sa balaang espiritu diha kanila!

Pablo—Piniling Sudlanan Ngadto sa Tanang Kanasoran

Ang ministeryo ni Pablo maoy usa ka talagsaong panig-ingnan kon sa unsang paagi si Jehova anam-anam nga nag-andam sa iyang mga alagad sa paghigugma ug pagtabang sa tanang matang sa tawo. Sa pagkakombertir ni Pablo, si Jesus miingon nga si Pablo mag-alagad ingong pinili nga sudlanan aron magdala sa Iyang ngalan ngadto sa tanang kanasoran. (Buhat 9:15) Dayon si Pablo miadto sa Arabia, tingali aron mamalandong sa katuyoan sa Diyos sa paggamit kaniya sa pagsangyaw sa maayong balita ngadto sa tanang kanasoran.—Galacia 1:15-17.

 Sa iyang unang misyonaryong panaw, si Pablo masibotong nagsangyaw ngadto sa mga dili-Hudiyo. (Buhat 13:46-48) Gipanalanginan ni Jehova ang kalihokan ni Pablo, ug pamatuod kadto nga ang apostol naglihok uyon sa kahikayan ni Jehova. Gipakita ni Pablo nga nasabtan gayod niya ang panglantaw ni Jehova sa dihang maisogon niyang gibadlong si Pedro, kinsa nagpasundayag ug pagkamapihigon pinaagi sa paglikay sa pagpakig-uban sa iyang dili-Hudiyong mga igsoon.—Galacia 2:11-14.

Ang dugang pamatuod nga gitultolan sa Diyos ang mga paningkamot ni Pablo makita diha sa iyang ikaduhang misyonaryong panaw sa dihang gipugngan sa balaang espiritu si Pablo sa pagsangyaw diha sa probinsiya sa Bitinia sa Roma. (Buhat 16:7) Dayag nga dili pa kadto ang hustong panahon. Apan sa ulahi, ang ubang mga taga-Bitinia nahimong mga Kristohanon. (1 Pedro 1:1) Diha sa usa ka panan-awon, ang usa ka tawong taga-Macedonia nangaliyupo kang Pablo, nga nag-ingon: “Dali ngari sa Macedonia ug tabangi kami.” Si Pablo nakahinapos nga kinahanglang usbon niya ang iyang ruta aron ikapahayag ang maayong balita nianang maong probinsiya sa Roma.—Buhat 16:9, 10.

Ang katakos ni Pablo sa pagpahiangay nasulayan pag-ayo sa dihang siya nagsangyaw ngadto sa mga taga-Atenas. Gidili sa Grego ug Romanhon nga balaod ang pagtudlo bahin sa laing mga diyos ug sa bag-ong relihiyosong mga kustombre. Ang gugma ni Pablo alang sa mga tawo nakapalihok kaniya sa pagtagad ug maayo sa ilang relihiyosong mga pagtulon-an. Sa Atenas iyang namatikdan ang usa ka halaran nga gisulatan “alang sa usa ka Diyos nga Wala Mailhi.” Gihisgotan niya kining maong impormasyon diha sa iyang buluhatong pagsangyaw. (Buhat 17:22, 23) Pagkamaayong paagi sa pagpahibalo sa iyang mensahe diha sa maluloton, matinahorong paagi!

Tinong nalipay gayod si Pablo sa dihang iyang gipamalandong ang mga resulta sa iyang buluhaton isip apostol ngadto sa tanang kanasoran! Nakatabang siya sa pagtukod ug mga kongregasyon nga gilangkoban sa ubay-ubayng Kristohanon nga dili-Hudiyohanon ug kagikan diha sa Corinto, Filipos, Tesalonica, ug sa mga lungsod sa Galacia. Iyang gitabangan ang mga lalaki ug babaye sa pagtuo, sama kang Damaris, Dionisio, Sergio Paulo, ug Tito. Pagkadakong pribilehiyo nga makita ang mga tawong wala kanhi mahibalo bahin kang Jehova ni sa Bibliya apan sa ulahi midawat sa kamatuoran sa Kristiyanidad! Mahitungod sa iyang  papel sa pagtabang sa mga dili-Hudiyo nga makakat-on sa kamatuoran, si Pablo miingon: “Niining paagiha, sa pagkatinuod, akong gihimong tumong nga dili ipahayag ang maayong balita sa dapit diin si Kristo napaila na, . . . apan, ingon sa nahisulat: ‘Sila nga wala pahibaloa bahin kaniya makakita, ug sila nga wala makadungog makasabot.’” (Roma 15:20, 21) Makapakigbahin ba kita sa pagpahayag sa maayong balita ngadto sa mga tawo nga dili sama natog kultura?

Pagtabang sa Tanang mga Katawhan sa Yuta

Si Solomon nag-ampo ngadto kang Jehova bahin sa mga dili-Israelinhon nga nangadto sa templo sa Jerusalem aron sa pagsimba. Siya nangaliya: “Mamati ka unta gikan sa mga langit, ang imong pihong dapit nga puloy-anan, ug ikaw magabuhat sumala sa tanan nga alang niana nagasangpit ang usa ka langyaw kanimo; aron ang tanang mga katawhan sa yuta mahibalo sa imong ngalan.” (1 Hari 8:41-43) Mao usab kini ang pagbati sa libolibong magmamantala sa Gingharian diha sa daghang nasod karon. Makahimamat sila ug mga tawong sama sa mga taga-Nineve kinsa ‘wala mahibalo sa kalainan tali sa ilang tuong kamot ug sa ilang wala’ kon mahitungod sa espirituwal nga mga butang. Ug ang mga magmamantala sa Gingharian maikag nga makapakigbahin sa katumanan sa mga tagna maylabot sa pagtigom sa matuod nga mga magsisimba gikan sa daghang lainlain nga mga nasod.—Isaias 2:2, 3; Miqueas 4:1-3.

Maingon nga gidawat sa mga tawo gikan sa Kakristiyanohan ang mensahe sa paglaom sa Bibliya, sa ingon gidawat usab kini sa mga tawo gikan sa ubang relihiyosong mga kagikan. Unsay epekto niini kanimo mismo? Susiha ang imong kaugalingon sa matinud-anong paagi. Kon imong gibati nga ang pagkamapihigon lalom nga nakagamot diha kanimo, wad-a kini pinaagi sa pag-ugmad sa hiyas sa gugma. a Ayawg isalikway ang mga tawo nga malipay ang Diyos sa pagdawat.—Juan 3:16.

Panukiduki sa dili ka pa makig-estorya sa mga tawong lahi ug kagikan. Sinatia ang ilang mga tinuohan, ang ilang mga kabalaka, ug ang ilang kaisipan; dayon pangitag punto nga kamo magkasinabot. Pakitaig pagkamaayo ug pagkamabination ang uban. Ayaw pakiglantugi, hinunoa magmapailin-ilinon ug makapadasig. (Lucas 9:52-56) Sa pagbuhat niini, imong mapahimut-an si Jehova, “kansang kabubut-on mao nga ang tanang matang sa mga tawo mangaluwas unta ug makadangat sa tukmang kahibalo sa kamatuoran.”—1 Timoteo 2:4.

Pagkamalipayon nato nga diha sa atong mga kongregasyon dunay mga tawong gikan sa lainlaing mga kagikan! (Isaias 56:6, 7) Pagkamakapadasig nga madungog karon dili lang ang mga ngalan sama sa Mary, John, Stephen, ug Tom kondili ubang mga ngalan usab sama sa Mamadou, Jegan, Reza, ug Chan! Sa pagkamatuod, ‘nabuksan kanato ang usa ka dakong pultahan nga nagatultol ngadto sa kalihokan.’ (1 Corinto 16:9) Hinaot atong pahimuslan ang mga kahigayonan nga anaa sa atong atubangan sa pagpaabot sa pagdapit nga ginatanyag sa dili-mapihigong Diyos, si Jehova, ngadto sa mga tawo sa tanang kanasoran!

[Footnote]

[Mga hulagway sa panid 23]

Gipaambit ni Pablo ang maayong balita ngadto sa mga tawo bisan diin pinaagi sa pagkamapailin-ilinon

. . . sa Atenas

. . . sa Filipos

. . . samtang nagapanaw