Dili pa Kaayo Tigulang nga Mokat-on

I Kseniya natawo niadtong 1897. Aduna siyay 3 ka anak nga babaye, usa ka anak nga lalaki, 15 ka apo, ug 25 ka apo sa tuhod. Sa tibuok niyang kinabuhi gibuhat niya kon unsay gitudlo sa iyang mga ginikanan nga iyang buhaton. Bisan tuod nahiabot siya sa Moscow ingong kagiw gikan sa nagusbat-sa-gubat nga Republika sa Abkhaz, nga nahimutang tali sa Itom nga Dagat ug sa Caucasus, natagbaw na siya sa iyang kinabuhi, ilabina maylabot sa gitawag niyang napanunod niya nga pagtuo.

Sa 1993, ang anak nga babaye ni Kseniya nga si Meri nahimong usa sa mga Saksi ni Jehova. Gisugdan ni Meri ang pag-estorya kang Kseniya mahitungod kang Jehova nga Diyos ug sa Bibliya, apan dili siya gustong maminaw. Kanunayng sultian ni Kseniya ang iyang anak nga, “Tigulang na kaayo ko nga mokat-on pa ug bag-ong butang.”

Bisan pa niana, ang iyang anak nga si Meri; ang asawa sa iyang apo nga lalaki, si Londa; ug ang iyang mga apo sa tuhod nga si Nana ug Zaza, kinsa nahimong mga Saksi ni Jehova, nagpadayon sa pag-estorya kaniya bahin sa Bibliya. Usa niana ka gabii sa 1999, nagbasa silag usa ka teksto ngadto kang Kseniya nga nakapatandog sa iyang kasingkasing. Naundan kadto sa makapatandog nga mga pulong ni Jesus ngadto sa iyang matinumanong mga apostoles sa dihang gisugdan niya ang Panihapon sa Ginoo. (Lucas 22:19, 20) Sa edad nga 102, nakahukom si Kseniya nga mosugod pagtuon sa Bibliya niadtong gabhiona.

“Human magkinabuhi sulod sa 102 ka tuig,” matod ni Kseniya, “sa kataposan ako nang nasabtan ang kahulogan sa kinabuhi. Naamgohan ko karon nga walay laing molabaw pa kay sa pag-alagad sa atong kahibulongan, mahigugmaon nga Diyos, si Jehova. Abtik gihapon ko ug himsog pa ug lawas. Makabasa pa ko bisag walay antiyohos ug madasigong nakig-uban sa akong pamilya.”

Sa Nobyembre 5, 2000, nabawtismohan si Kseniya. Siya miingon: “Karon ihatag ko ang akong kinabuhi ngadto kang Jehova sa pag-alagad kaniya uban ang gugma. Magpahimutang akog mga magasin ug mga tract samtang maglingkod diha sa hunonganan sa bus duol sa akong balay. Kanunayng moduaw ang akong mga paryente, ug malipayon akong magpaambit kanila sa kamatuoran bahin kang Jehova.”

Si Kseniya nagapaabot sa adlaw sa dihang ‘ang iyang unod mabag-o labi pa kay sa pagkabatan-on, ug mahibalik siya sa mga adlaw sa kabaskog sa iyang pagkabatan-on.’ (Job 33:25) Kon ang usa ka sentenaryo wala mobating tigulang na kaayo nga mokat-on sa kahulogan sa kinabuhi gikan sa Bibliya, komosta ang bahin kanimo?