“Gusto Akong Moalagad sa Diyos”
Mga Magmamantala sa Gingharian Nagtaho
“Gusto Akong Moalagad sa Diyos”
“GUMULA kamo kaniya, katawhan ko.” Mao kana ang gideklarar sa manulonda nga nadungog ni apostol Juan sa unang siglo K.P. Sa atong adlaw minilyon ka matinud-anong mga tawo ang misanong ug mikalagiw gikan sa “Dakong Babilonya,” ang tibuok-kalibotang imperyo sa bakak nga relihiyon. (Pinadayag 18:1-4) Usa kanila mao si Wilner nga taga-Haiti, kinsa nag-asoy sa iyang eksperyensiya.
“Natawo ako sa 1956 sa usa ka debotadong Katoliko nga pamilya diha sa gamayng lungsod sa St. Marc, Haiti. Handurawa ang kalipay sa akong pamilya sa dihang napili ako, apil sa lain pang duha gikan sa among lungsod, sa pagsulod sa seminaryo sa St. Michel de l’Atalaye, Haiti. Dayon, sa 1980, gipadala kami ngadto sa Stavelot, Belgium, alang sa dugang nga pagbansay. Didto mitungha usab kami sa usa ka Katolikong unibersidad.
“Sa sinugdanan madasigon ako nga mosulod sa pagkapari. Usa ka adlaw niana diha sa komedor, ang pari nga maoy nagdumala sa among grupo mihangyo kanako nga magpabilin sa pipila ka minutos tungod kay duna siyay gustong isulti kanako. Handurawa ang akong kakugang sa dihang giprangkahan ako niya nga naibog siya nako! Akong giayran ang iyang pagbirigbirig apan mibati gayod ako nga nalimbongan. Akong gisulatan ang akong pamilya bahin sa maong hitabo ug mihawa sa seminaryo pipila ka bulan sa ulahi, bisan pag nasuko sila. Nakakita ako ug puy-anan diha sa baryo ug mikuhag laing kurso.
“Sa dihang ako mibalik sa St. Marc, wala na koy pagsalig sa Iglesya Katolika. Bisan pa niana, gusto kong moalagad sa Diyos, apan wala ako mahibalo kon unsay buhaton. Miadto ako sa simbahan sa Sabadista, sa simbahan sa Ebenezer, ug sa simbahan sa Mormon. Ako walay espirituwal nga giya.
“Dayon akong nahinumdoman nga sa nagtungha pa sa seminaryo sa Belgium, tigbasa ako sa Crampon nga Bibliya. Dinhi nahibaloan nako nga ang Diyos dunay ngalan. Busa akong gilitok ang iyang ngalan nga kinasingkasing nga nag-ampo sa Diyos sa pagtabang nako nga makaplagan ang matuod nga relihiyon.
“Wala madugay human niana, may duha ka Saksi ni Jehova nga mibalhin sa among lugar. Sila maoy malinawon, matinahoron, ug maligdong. Nakadayeg ako sa ilang paagi sa pagkinabuhi. Usa ka adlaw niana, usa sa duha ka Saksi midapit kanako sa pagtambong sa tinuig nga Memoryal sa kamatayon ni Kristo. Naikag gayod ako sa maong tigom ug misugot nga regular nga magtuon sa Bibliya uban sa mga Saksi. Sulod sa mga unom ka bulan, ako nakombinsir nga akong nakaplagan ang hustong dalan sa pag-alagad sa Diyos. Akong gipahinungod ang akong kinabuhi kang Jehova ug nabawtismohan sa Nobyembre 20, 1988.”
Ngadtongadto, si Wilner misulod sa bug-os-panahong pag-alagad. Karon, siya nag-alagad ingong usa ka ansiyano sa kongregasyon. Siya ug ang iyang asawa, apil sa ilang duha ka anak, malipayong nag-alagad diha sa kongregasyon.
[Hulagway sa panid 9]
Pinaagi sa pagbasa sa Bibliya, nahibaloan ni Wilner nga ang ngalan sa Diyos maoy Jehova