Magpadayon sa Pag-alagad Kang Jehova Uban ang Malig-ong Kasingkasing
Magpadayon sa Pag-alagad Kang Jehova Uban ang Malig-ong Kasingkasing
“Malig-on ang akong kasingkasing, Oh Diyos, malig-on ang akong kasingkasing.”—SALMO 57:7.
1. Nganong mahuptan nato ang hugot nga pagtuo sama sa iya ni David?
SI Jehova makahimo kanato nga malig-on sa Kristohanong pagtuo, aron kita makahawid sa matuod nga Kristiyanidad ingon nga iyang napahinungod nga mga alagad. (Roma 14:4) Busa, mahimong mahuptan nato ang hugot nga pagtuo sama sa iya sa salmistang si David, kinsa nadasig sa pag-awit: “Oh Diyos, malig-on ang akong kasingkasing.” (Salmo 108:1) Kon malig-on ang atong kasingkasing, kita matukmod sa pagtuman sa atong pagpahinungod sa Diyos. Ug pinaagi sa pagsalig kaniya alang sa giya ug kusog, kita mapamatud-ang dili-matarog, malig-on sa determinasyon ug sa pagtuo ingong mga maghuhupot sa integridad, “nga kanunayng puliki diha sa buluhaton sa Ginoo.”—1 Corinto 15:58.
2, 3. Unsa ang kahulogan sa mga tambag ni Pablo nga natala sa 1 Corinto 16:13?
2 Sa mga tambag nga gipunting sa mga sumusunod ni Jesus sa karaang Corinto apan tinong mapadapat sa mga Kristohanon karong adlawa, si apostol Pablo miingon: “Magtukaw, barog nga malig-on sa pagtuo, magpakalalaki, magmakusganon.” (1 Corinto 16:13) Sa Grego, ang porma sa berbo sa matag usa niining mga sugoa nagpahayag sa espesipikong panahon, busa nag-awhag sa mapinadayonong aksiyon. Unsay kahulogan nianang tambaga?
3 Kita mahimong “magtukaw” sa espirituwal pinaagi sa pagsukol sa Yawa ug sa pagpabiling suod sa Diyos. (Santiago 4:7, 8) Ang pagsalig kang Jehova makapaarang nato sa pagpabiling nahiusa ug ‘makabarog nga malig-on diha sa Kristohanong pagtuo.’ Kita—lakip ang daghang babaye sa atong taliwala—“magpakalalaki” pinaagi sa pag-alagad sa Diyos nga maisogon ingong mga magmamantala sa Gingharian. (Salmo 68:11) Kita “magmakusganon” pinaagi sa pagpadayon sa pagsalig sa atong langitnong Amahan alang sa kusog sa pagbuhat sa iyang kabubut-on.—Filipos 4:13.
4. Unsay mitultol sa atong pagpabawtismo ingong mga Kristohanon?
4 Atong gipadayag nga atong gidawat ang kamatuoran sa dihang kita nagpahinungod nga way-pagpanuko kang Jehova ug nagpasimbolo niana pinaagi sa pagpabawtismo sa tubig. Apan unsay mitultol sa atong pagpabawtismo? Sa sinugdan nagkuha kitag tukmang kahibalo sa Pulong sa Diyos. (Juan 17:3) Tungod niini naugmad ang pagtuo ug gitukmod kita sa paghinulsol, pinaagi sa pagpadayag ug tinuod nga kasubo mahitungod sa buhat nga daotan kanhi. (Buhat 3:19; Hebreohanon 11:6) Misunod ang atong pagkakabig, kay gitalikdan nato ang daotang mga buhat aron magkinabuhing nahiuyon sa kabubut-on sa Diyos. (Roma 12:2; Efeso 4:23, 24) Gisundan kadto ug bug-os-kasingkasing nga pagpahinungod kang Jehova diha sa pag-ampo. (Mateo 16:24; 1 Pedro 2:21) Kita nangayo sa Diyos ug maayong tanlag ug nabawtismohan ingong simbolo sa atong pagpahinungod kaniya. (1 Pedro 3:21) Ang paghinumdom sa maong mga lakang motabang kanato sa pagtagad nga bug-os sa panginahanglan nga kanunayng paningkamotan ang pagtuman sa atong pagpahinungod ug padayong mag-alagad kang Jehova uban ang malig-ong kasingkasing.
Ipadayon ang Inyong Pagtinguha sa Tukmang Kahibalo
5. Nganong angay kitang magpadayon sa pagkuhag kahibalo sa Kasulatan?
5 Aron makatuman sa atong pagpahinungod sa Diyos, angay kitang magpadayon sa pagkuhag makaugmad-sa-pagtuo nga kahibalo sa Kasulatan. Pagkamakalipay ang pagkaon sa espirituwal nga pagkaon sa una natong nasayran ang kamatuoran sa Diyos! (Mateo 24:45-47) Lamian ang maong “mga pagkaon”—ug kana nakapahimsog kanato sa espirituwal. Ang padayong pagkaon karon ug sustansiyadong espirituwal nga pagkaon gikinahanglan aron padayon natong mahuptan ang malig-ong kasingkasing ingon nga napahinungod nga mga alagad ni Jehova.
6. Sa unsang paagi natabangan ka tingali sa pag-ugmad sa kinasingkasing nga pagpabili sa kamatuoran sa Bibliya?
6 Gikinahanglan ang paningkamot aron makakuhag dugang kahibalo sa Kasulatan. Nahisama kini sa pagpangita sa gilubong nga bahandi—nga gikinahanglan ang paghago. Apan pagkamagantihon nga makaplagan “ang mismong kahibalo sa Diyos”! (Proverbio 2:1-6) Sa dihang ang usa ka magmamantala sa Gingharian unang nagtuon sa Bibliya uban kanimo, tingali iyang gigamit ang librong Kahibalo nga Motultol sa Kinabuhing Walay Kataposan. Ang dakong panahon mahimong gigahin sa paghisgot sa matag kapitulo, tingali dili lang usa ka sesyon. Nakabenepisyo ka sa dihang gibasa ug gihisgotan ang gisitar nga mga teksto. Kon lisod hisabtan ang usa ka punto, kadto gipatin-aw. Ang nagdumala sa imong pagtuon sa Bibliya nangandam pag-ayo, nag-ampo alang sa espiritu sa Diyos, ug mitabang kanimo sa pag-ugmad sa kinasingkasing nga pagpabili sa kamatuoran.
7. Unsay makahimo sa usa ka tawo nga takos sa pagtudlo sa kamatuoran sa Diyos ngadto sa uban?
7 Nahiangay ang maong pagpaningkamot, kay si Pablo misulat: “Si bisan kinsa nga natudloan nga binaba sa pulong makig-ambit sa tanang maayong butang uban sa naghatag sa maong binaba nga pagtulon-an.” (Galacia 6:6) Ang Gregong teksto nagpaila dinhi nga ang mga pagtulon-an sa Pulong sa Diyos gisilsil sa hunahuna ug kasingkasing sa usang “natudloan nga binaba.” Ang imong pagkanatudloan nianang paagiha makahimo kanimong takos nga magtutudlo sa uban. (Buhat 18:25) Aron mahimong matinumanon sa imong pagpahinungod, angay nimong mahuptan ang imong espirituwal nga kahimsog ug kalig-on pinaagi sa padayong pagtuon sa Pulong sa Diyos.—1 Timoteo 4:13; Tito 1:13; 2:2.
Hinumdomi ang Imong Paghinulsol ug Pagkakabig
8. Sa unsang paagi posible ang padayong paghupot sa diyosnong panggawi?
8 Nahinumdom ka ba sa kahupayan nga imong gibati sa dihang ikaw nakakat-on sa kamatuoran, naghinulsol, ug unya mibating gipasaylo sa Diyos binase sa pagtuo sa halad lukat ni Jesus? (Salmo 32:1-5; Roma 5:8; 1 Pedro 3:18) Seguradong dili na nimo gustong mobalik sa makasasalang pagkinabuhi. (2 Pedro 2:20-22) Lakip sa ubang mga butang, ang regular nga pag-ampo kang Jehova motabang kanimo sa padayong paghupot sa diyosnong panggawi, pagtuman sa imong pagpahinungod, ug pagpadayon sa pag-alagad nga matinumanon kang Jehova.—2 Pedro 3:11, 12.
9. Kay gitalikdan na ang makasasalang mga buhat, unsang dalana ang angay natong subayon?
9 Tungod kay nakabig pinaagi sa pagtalikod sa makasasalang mga buhat, ipadayon ang pagpangayog tabang sa Diyos nga mapalig-on kanunay ang imong kasingkasing. Sa tinuoray, ikaw nagsubay sa sayop nga dalan apan mikonsultag kasaligang mapa ug misugod pagsubay sa hustong dalan. Ayaw na karon pagkahisalaag. Salig kanunay sa paggiya sa Diyos, ug mahimong determinado sa pagpabilin sa dalan paingon sa kinabuhi.—Isaias 30:20, 21; Mateo 7:13, 14.
Ayaw Gayod Hikalimti ang Imong Pagpahinungod ug Bawtismo
10. Unsang mga punto ang angay natong ibutang sa hunahuna mahitungod sa atong pagpahinungod sa Diyos?
10 Ibutang sa hunahuna nga ikaw nagpahinungod kang Jehova diha sa pag-ampo, nga naglantaw sa walay-kataposan nga matinumanong pag-alagad. (Judas 20, 21) Ang pagpahinungod nagpasabot sa paglain, o pagbulag, alang sa usa ka sagradong katuyoan. (Levitico 15:31; 22:2) Ang imong pagpahinungod maoy dili temporaryong kasabotan ni pagkamay-tulubagon ngadto sa mga tawo. Kini maoy permanenteng pagpahinungod ngadto sa Soberano sa Uniberso, ug aron makatuman niini gikinahanglan ang pagkamaunongon ngadto sa Diyos hangtod sa kamatayon. Oo, ‘kon kita mabuhi o kon kita mamatay, kita iya ni Jehova.’ (Roma 14:7, 8) Ang atong kalipay nag-agad sa atong pagpasakop sa iyang kabubut-on ug sa atong pagpadayon sa pag-alagad kaniya uban ang malig-ong kasingkasing.
11. Nganong angay nimong hinumdoman ang imong bawtismo ug ang kahulogan niini?
11 Hinumdomi kanunay ang imong bawtismo ingong simbolo sa imong bug-os-kasingkasing nga pagpahinungod sa Diyos. Kadto dili pinugos nga pagbawtismo, kay ikaw mismo ang mihimo sa desisyon. Determinado ka ba karon sa pagbuhat sa imong kabubut-on nga nahiuyon sa kabubut-on sa Diyos sa nahibilin nimong kinabuhi? Nangayo ka sa Diyos ug maayong tanlag ug nabawtismohan ingong simbolo sa imong pagpahinungod kaniya. Padayong hupti kanang maayong tanlag pinaagi sa pagtuman sa imong pagpahinungod, ug ang dagayang panalangin ni Jehova maanaa kanimo.—Proverbio 10:22.
Ang Imong Kabubut-on May Bahin nga Gidula
12, 13. Sa unsang paagi ang atong kaugalingong kabubut-on nalangkit sa pagpahinungod ug bawtismo?
12 Ang pagpahinungod ug bawtismo nakahatag gayod ug talagsaong mga kaayohan alang sa milyonmilyong tawo sa tibuok yuta. Sa dihang kita nagpasimbolo sa atong pagpahinungod sa Diyos pinaagi sa pagpabawtismo sa tubig, kita namatay maylabot sa atong kanhing paagi sa kinabuhi apan wala nato isalikway ang atong kaugalingong kabubut-on. Ingong mga magtutuo nga natudloan sa hustong paagi, aktuwal natong gigamit ang atong kaugalingong kabubut-on sa dihang kita nagpahinungod sa Diyos diha sa pag-ampo ug nabawtismohan. Tungod sa pagpahinungod sa atong kinabuhi ug pagpabawtismo, kinahanglang atong tinoon kon unsa ang kabubut-on sa Diyos ug unya tinuyong pilion ang pagbuhat niini. (Efeso 5:17) Sa ingon gisundog nato si Jesus, kinsa migamit sa iyang kaugalingong kabubut-on sa dihang siya naghiklin sa iyang mga hiramenta sa panday, nabawtismohan, ug bug-os nga nagdeboto sa iyang kaugalingon aron buhaton ang kabubut-on sa iyang langitnong Amahan.—Salmo 40:7, 8; Juan 6:38-40.
13 Gituyo ni Jehova nga Diyos nga ang iyang Anak mahimong ‘hingpit pinaagi sa mga pag-antos.’ Busa gigamit gayod ni Jesus ang kaugalingong kabubut-on aron makaantos nga matinumanon sa maong mga alantoson. Sa maong tumong, siya mihimog “mga pangamuyo ug mga pangaliya usab . . . uban ang makusog nga mga pagtuaw ug mga luha, ug gidungog siya nga may pag-uyon tungod sa iyang diyosnong kahadlok.” (Hebreohanon 2:10, 18; 5:7, 8) Kon ipasundayag nato ang susamang masimbahong kataha sa Diyos, kita makapaneguro usab nga ‘pagadunggon nga may pag-uyon,’ ug kita makasalig nga himoon kitang malig-on ni Jehova ingon nga iyang napahinungod nga mga Saksi.—Isaias 43:10.
Ipadayon ang Paghupot sa Malig-ong Kasingkasing
14. Nganong angay natong basahon ang Bibliya kada adlaw?
14 Unsay motabang kanimo nga padayong mahuptan ang malig-ong kasingkasing ug sa ingon makatuman sa imong pagpahinungod sa Diyos? Uban sa katuyoan sa pagkuhag kanunay-nagauswag nga kahibalo sa Pulong sa Diyos, basaha ang Bibliya kada adlaw. Kini mao ang kanunayng giawhag sa “matinumanon ug maalamong ulipon” nga atong pagahimoon. Ang maong tambag gihatag tungod kay kinahanglang kita magpadayon sa paglakaw diha sa kamatuoran sa Diyos sa pagtuman sa atong pagpahinungod. Kon ang organisasyon ni Jehova tinuyong nagpasiugda ug bakak nga mga pagtulon-an, ang tambag sa pagbasa sa Bibliya dili gayod unta ihatag sa mga Saksi ni Jehova ug niadtong ilang gisangyawan.
15. (a) Unsay angayng tagdon sa paghimog mga desisyon? (b) Nganong ikaingon nga ang sekular nga trabaho maoy okupasyon nga may segundaryong bili sa Kristohanon?
15 Sa paghimog mga desisyon, hunahunaa kanunay ang mahimong epekto niana diha sa pagtuman sa imong pagpahinungod kang Jehova. Kini basin may kalabotan sa imong sekular nga trabaho. Gipaningkamotan mo ba nga makatabang kini kanimo sa pagpauswag sa matuod nga pagsimba? Bisag ang mga amo sagad nag-isip sa nagpahinungod nga mga Kristohanon ingong kasaligan ug hanas sa trabaho, sila nakamatikod usab nga ang mga Saksi ni Jehova dili sobra ka ambisyoso aron moasenso sa kalibotan ug dili makig-indig sa uban alang sa labing dakog-suweldo nga mga posisyon. Tinuod kini kay ang tumong sa mga Saksi dili man pagtigom ug bahandi, kabantog, maayong dungog, o gahom. Alang niadtong nagatuman sa ilang pagpahinungod sa Diyos, ang pagbuhat sa kabubut-on sa Diyos mao ang labing hinungdanon. Ang sekular nga trabaho nga makatagana kanila sa mga kinahanglanon sa kinabuhi maoy okupasyon nga may segundaryong bili. Sama ni apostol Pablo, ang panguna nilang okupasyon mao ang Kristohanong ministeryo. (Buhat 18:3, 4; 2 Tesalonica 3:7, 8; 1 Timoteo 5:8) Giuna ba nimo ang intereses sa Gingharian diha sa imong kinabuhi?—Mateo 6:25-33.
16. Unsay atong mahimo kon tungod sa sobrang kabalaka lisod ang pagtuman sa atong pagpahinungod sa Diyos?
16 Ang uban tingali nabug-atan pag-ayo sa nagkadaiyang mga kabalaka sa wala pa sila makakat-on sa kamatuoran. Apan ang ilang kasingkasing nahupong gayod sa kalipay, pagkamapasalamaton, ug gugma alang sa Diyos sa dihang ilang gidawat ang paglaom sa Gingharian! Ang pagpalandong sa mga kaayohan nga ilang natagamtam sukad niadto basin makatabang kanila sa pagtuman sa ilang pagpahinungod kang Jehova. Sa laing bahin, unsa na man kon ang sobrang kabalaka tungod sa mga suliran nga maoy kasagaran sa kinabuhi niining sistema karon daw nagtuok sa “pulong sa Diyos,” sama rang ang mga tunok makapugong sa mga binhi sa pagtubo ug pagbunga? (Lucas 8:7, 11, 14; Mateo 13:22; Marcos 4:18, 19) Kon makamatikod ka nga nagsugod kini sa pagkahitabo diha kanimo o sa imong pamilya, itugyan ang imong kabalaka kang Jehova ug pag-ampo nga siya motabang kanimo nga motubo sa gugma ug pagkamapasalamaton. Kon imong itugyan ang imong palas-anon kaniya, siya mopalig-on kanimo ug mohatag kanimog kusog sa pagpadayon sa pag-alagad kaniyang malipayon uban ang malig-ong kasingkasing.—Salmo 55:22; Filipos 4:6, 7; Pinadayag 2:4.
17. Sa unsang paagi posible ang pag-antos sa grabeng mga pagsulay?
17 Magpadayon sa pag-ampo nga regular kang Jehova nga Diyos, sama nga ikaw miampo sa dihang ikaw nagpahinungod kaniya. (Salmo 65:2) Sa dihang tentalon sa pagbuhat ug daotan o moatubang ug grabeng pagsulay, pangayoa ang paggiya sa Diyos ug ang iyang tabang sa pagsunod niana. Ibutang sa hunahuna nga gikinahanglan ang pagtuo, kay ang tinun-ang si Santiago misulat: “Kon aduna man kaninyoy nakulangan ug kaalam [sa pag-antos sa pagsulay], magpadayon siya sa pagpangayo sa Diyos, kay siya nagahatag nga madagayaon ngadto sa tanan ug dili mamuyboy; ug kini igahatag kaniya. Apan magpadayon siya sa pagpangayo diha sa pagtuo, nga dili gayod magduhaduha, kay siya nga nagduhaduha maoy sama sa balod sa dagat nga ginakusokuso ug ginapadpad sa hangin. Sa pagkatinuod, dili angay nga maghunahuna kanang tawhana nga siya adunay madawat gikan kang Jehova; siya usa ka tawong maduhaduhaon, mabalhinon sa tanan niyang mga dalan.” (Santiago 1:5-8) Kon ang usa ka pagsulay daw mabug-at kaayo, makatino kita niini: “Walay tentasyon nga midangat kaninyo gawas nianang sagad sa mga tawo. Apan ang Diyos kasaligan, ug dili niya itugot nga tentalon kamo nga labaw sa inyong maantos, apan uban sa tentasyon siya usab magtaganag kalingkawasan aron kamo makahimo sa pag-antos niini.”—1 Corinto 10:13.
18. Unsay atong mahimo kon ang usa ka bug-at nga tinagong sala nagapahuyang sa atong determinasyon sa pagtuman sa atong pagpahinungod kang Jehova?
18 Unsa man kon ang usa ka bug-at nga tinagong sala nagatugaw sa imong tanlag ug nagapahuyang sa imong determinasyon sa pagtuman sa imong pagpahinungod sa Diyos? Kon ikaw mahinulsolon, mahimo kang maglipay sa kahibalo nga si Jehova ‘dili magtamay sa usa ka kasingkasing nga gun-ob ug dugmok.’ (Salmo 51:17) Tinguhaa ang tabang sa mahigugmaon nga Kristohanong mga ansiyano, kay nahibalo nga sila—sa pagsundog kang Jehova—dili makamenos sa imong tinguha nga matagamtam ang napasig-uli nga maayong relasyon uban sa imong langitnong Amahan. (Salmo 103:10-14; Santiago 5:13-15) Unya tungod sa nabag-ong espirituwal nga kusog ug malig-ong kasingkasing, makaarang ka sa paghimog tul-id nga mga alagian alang sa imong mga tiil ug maposible ang pagtuman sa imong pagpahinungod sa Diyos.—Hebreohanon 12:12, 13.
Magpadayon sa Pag-alagad Uban ang Malig-ong Kasingkasing
19, 20. Nganong hinungdanong kita magpadayon sa pagtuman sa atong pagpahinungod?
19 Niining lisod nga panahon, kinahanglang manlimbasog kita sa pagtuman sa atong pagpahinungod ug magpadayon sa pag-alagad sa Diyos uban ang malig-ong kasingkasing. Si Jesus miingon: “Siya nga nakalahutay hangtod sa kataposan mao ang maluwas.” (Mateo 24:13) Sanglit kita nagkinabuhi sa “kataposang mga adlaw,” ang kataposan mahimong moabot sa bisan unsang panahon. (2 Timoteo 3:1) Dugang pa, walay usa kanato ang makapaneguro nga buhi pa kita ugma. (Santiago 4:13, 14) Busa hinungdanong kita magpadayon sa pagtuman sa atong pagpahinungod karong adlawa!
20 Gipasiugda kini ni apostol Pedro diha sa iyang ikaduhang sulat. Iyang gipakita nga maingon nga ang mga dili-diyosnon nalaglag sa Lunop, ang simbolikong yuta, o daotang tawhanong katilingban, malaglag panahon sa “adlaw ni Jehova.” Busa si Pedro mipatugbaw: “Unsang matanga nga mga tawo kamo unya diha sa balaang mga buhat sa diyosnong pagkamahinalaron”! Iyang giawhag usab sila: “Mga hinigugma, kay nasayod na kamong daan niini, pagbantay kamo nga dili madaldal [sa bakak nga mga magtutudlo ug mga tawong dili-diyosnon] ug mangahulog gikan sa inyong kaugalingong kalig-on.” (2 Pedro 3:5-17) Pagkamakapasubo kon ang usa ka bawtismadong tawo mapahisalaag ug modangat sa kataposan sa iyang kinabuhi ingong usa nga napakyas sa pagpadayon paghupot ug malig-ong kasingkasing!
21, 22. Sa unsang paagi ang mga pulong sa Salmo 57:7 natuman sa kahimtang ni David ug sa matuod nga mga Kristohanon?
21 Ang imong determinasyon sa pagtuman sa imong pagpahinungod sa Diyos basin mapalig-on kon ibutang mo sa hunahuna ang malipayong adlaw sa imong pagbawtismo ug mangayo sa tabang sa Diyos aron ang imong mga pulong ug mga buhat makalipay sa iyang kasingkasing. (Proverbio 27:11) Dili gayod pakyason ni Jehova ang iyang katawhan, ug angay gayod nga kita magmatinumanon kaniya. (Salmo 94:14) Siya nagpakitag kaluoy ug simpatiya sa diha nga gipakyas ang mga plano sa mga kaaway ug giluwas si David. Tungod kay mapasalamaton niadto, gipahayag ni David ang kalig-on, pagkadili-matarog, sa iyang gugma alang sa iyang Tigluwas. Uban ang dulot nga pagbati, siya miawit: “Malig-on ang akong kasingkasing, Oh Diyos, malig-on ang akong kasingkasing. Magaawit ako ug magaawit ug mga pagdayeg.”—Salmo 57:7.
22 Sama kang David, ang matuod nga mga Kristohanon dili matarog sa ilang pagkamahinalaron ngadto sa Diyos. Uban ang malig-ong kasingkasing, ilang gihatag ang pasidungog sa ilang pagkaluwas ug pagpabiling buhi ngadto kang Jehova, nga maoy malipayon nilang awitan sa mga pagdayeg. Kon ang imong kasingkasing malig-on, kini mosalig sa Diyos, ug sa iyang tabang ikaw makatuman sa imong pagpahinungod. Oo, ikaw mahisama sa “matarong” nga mahitungod kaniya ang salmista miawit: “Siya dili mahadlok bisan sa daotang balita. Ang iyang kasingkasing malig-on, nga masaligon kang Jehova.” (Salmo 112:6, 7) Uban sa pagtuo sa Diyos ug bug-os nga pagsalig kaniya, ikaw makatuman sa imong pagpahinungod ug makapadayon sa pag-alagad kang Jehova uban ang malig-ong kasingkasing.
Nahinumdom Ka Ba?
• Nganong angay kitang magpadayon sa pagkuhag tukmang kahibalo sa Bibliya?
• Nganong angay natong ibutang sa hunahuna ang atong paghinulsol ug pagkakabig?
• Sa unsang paagi makabaton kitag kaayohan gikan sa paghinumdom sa atong pagpahinungod ug bawtismo?
• Unsay motabang kanato sa pagpadayon pag-alagad kang Jehova uban ang malig-ong kasingkasing?
[Mga Pangutana sa Pagtuon]
[Mga hulagway sa panid 18]
Nagapadayon ka ba sa paghupot sa imong espirituwal nga kahimsog pinaagi sa pagbasa sa Pulong sa Diyos adlaw-adlaw?
[Hulagway sa panid 18]
Ang paghimo sa Kristohanong ministeryo nga atong pangunang buluhaton motabang kanato sa pagpadayon pag-alagad kang Jehova uban ang malig-ong kasingkasing