Duha Ka Pastor nga Nagpabili sa mga Sinulat ni Russell

NIADTONG 1891, si Charles Taze Russell, kinsa mihimog talagsaong buluhaton taliwala sa matuod nga Kristohanong mga magsisimba ni Jehova, miduaw sa Uropa sa unang higayon. Sumala sa pipila ka taho, sa dihang mihunong sa Pinerolo, Italya, nahimamat ni Russell si Propesor Daniele Rivoire, kanhing pastor sa usa ka relihiyosong pundok nga gitawag ug mga Waldense. a Bisan tuod nakig-uban gihapon si Rivoire sa mga Waldense human siya mibiya sa ministeryo, siya naghupot ug bukas nga panghunahuna ug nagbasag ubay-ubayng mga publikasyon nga gisulat ni C. T. Russell.

Sa 1903, gihubad ni Rivoire ang libro ni Russell nga The Divine Plan of the Ages ngadto sa Italyano ug nagpatik niini sa kaugalingon niyang gasto. Kini maoy sa wala pa mapatik ang opisyal nga Italyanong edisyon. Diha sa pasiuna sa libro, si Rivoire misulat: “Among gitugyan kining unang Italyanong edisyon ilalom sa proteksiyon sa Ginoo. Panalanginan unta niya kini aron nga, bisan pa sa mga kasaypanan niini, makaamot kini sa kahimayaan sa iyang labing balaan nga ngalan ug magdasig sa iyang mga anak nga Italyano ug pinulongan nga labi pang magmaunongon. Hinaot ang mga kasingkasing sa tanan kinsa, pinaagi sa pagbasa niining libroha, magpabili sa kalalom sa mga bahandi, kaalam, ug kahibalo sa plano ug gugma sa Diyos, magmapasalamaton sa Diyos mismo, kansang pag-uyon nagpaposible sa pagpatik niining basahona.”

Gisugdan usab ni Rivoire ang paghubad sa Zion’s Watchtower and Herald of Christ’s Presence sa Italyano. Kining magasina, ang unang edisyon sa Ang Bantayanang Torre, migula matag tulo ka bulan sa 1903. Bisan tuod si Propesor Rivoire wala gayod mahimong Estudyante sa Bibliya, ingon sa pagtawag kaniadto sa mga Saksi ni Jehova, nagpakita siya ug dakong interes sa pagpakaylap sa mensahe sa Bibliya sumala sa gipatin-aw diha sa mga publikasyon sa mga Estudyante sa Bibliya.

“Morag Nangatagak ang mga Himbis Gikan sa Akong mga Mata”

Ang laing pastor sa mga Waldense nga nagpabili pag-ayo sa mga publikasyon ni Russell mao si Giuseppe Banchetti. Ang amahan ni Giuseppe, nga nakabig gikan sa Katolisismo, nag-edukar kaniya sa pagtulon-an sa mga Waldense. Sa 1894, si Giuseppe nahimong pastor ug nag-alagad sa nagkalainlaing mga komunidad sa mga Waldense sa Apulia ug Abruzzi ug sa mga isla sa Elba ug Sicily.

Ang awtorisadong Italyano nga edisyon sa Divine Plan of the Ages ni Russell gipatik niadtong 1905. Si Banchetti misulat ug usa ka madasigong komento bahin sa libro. Migula kini diha sa Protestanteng mantalaan nga La Rivista Cristiana. “Alang kanamo,” misulat si Banchetti, ang libro ni Russell “mao ang labing linamdagan ug seguradong giya nga makaplagan ni bisan kinsang Kristohanon sa paghimog mapuslanon ug magantihon nga pagtuon sa Balaang Kasulatan . . . Sa dihang nabasa ko kini, morag nangatagak  ang mga himbis gikan sa akong mga mata, nga naghimo sa dalan paingon sa Diyos nga mas tul-id ug mas sayon. Bisan ang kadaghanan sa daw mga panagsumpaki nahanaw na. Ang mga doktrina nga lisod sabton kaniadto nahimong yano ug bug-os nga dalawaton. Ang mga butang nga dili masabtan kaniadto nahimong tin-aw. Ang hamiling plano alang sa kaluwasan sa kalibotan pinaagi kang Kristo nahimong tin-aw gayod kaayo alang kanako nga ako naaghat sa pagpatugbaw sama sa giingon sa Apostol: Oh pagkalawom sa bahandi ug sa kaalam ug sa kahibalo sa Diyos!”—Roma 11:33.

Sumala sa naobserbahan ni Remigio Cuminetti niadtong 1925, si Banchetti nagpakita ug “dakong pag-uyon” sa buluhaton sa mga Estudyante sa Bibliya ug “kombinsido gayod” sa mga doktrina nga ilang gipatin-aw. Sa kaugalingon niyang paagi, buot usab ni Banchetti nga mahibaloan ang maong mga doktrina.

Dayag kini sa mga sinulat ni Banchetti nga, sama sa mga Saksi ni Jehova, siya nagtuo nga adunay yutan-ong pagkabanhaw, sumala sa gitudlo sa Kasulatan. Miuyon usab siya sa mga Estudyante sa Bibliya sa dihang iyang gipatin-aw nga ang tuig diin namatay si Jesus gitino ug gibutyag sa Diyos diha sa tagna ni Daniel sa 70 ka semana. (Daniel 9:24-27) Dili lang usa ka higayon, ug dayag nga nagsupak sa mga pagtulon-an sa iyang iglesya, siya nagtuo nga ang Paghandom sa kamatayon ni Jesu-Kristo angayng saulogon kas-a lamang sa usa ka tuig, “sa eksaktong adlaw diin natunong ang kasumaran.” (Lucas 22:19, 20) Gisalikway niya ang teoriya sa ebolusyon ni Darwin, ug gipanghimatud-an niya nga ang matuod nga mga Kristohanon dili angayng moapil sa sekular nga gubat.—Isaias 2:4.

Usa niana ka higayon, si Banchetti nakighisgot bahin sa mga sinulat ni Russell uban kang J. Campbell Wall. Ingong tubag sa mga pagsaway ni Wall, si Banchetti miingon: “Nakaseguro ako nga kon imong basahon ang unom ka tomo ni Russell, makasinati ka ug dulot kaayo nga kalipay, ug kinasingkasing ko nimong pasalamatan. Wala ako magpasundayag ug doktrina sa mapagawalong paagi; apan gibasa ko kadtong mga libroha onse ka tuig na kanhi, ug nagpasalamat ako sa Diyos kada adlaw tungod sa pagbutang sa akong atubangan sa maong kahayag ug sa maong paghupay pinaagi sa usa ka basahon nga bug-os ug lig-ong gipasukad sa Balaang Kasulatan.”

“Mamati, Mamati, Mamati”

Makaiikag nga kining duha ka pastor sa mga Waldense—si Daniele Rivoire ug si Giuseppe Banchetti—nagpahayag ug apresasyon sa paagi sa pagpatin-aw ni Russell sa Bibliya. Si Banchetti misulat: “Ako makaingon nga kitang mga Ebanghelikal, bisan ang atong mga pastor o mga propesor sa teolohiya, wala mahibalo sa tanang butang. Dili lang kana, kondili aduna pay daghan kaayong ubang mga butang nga angay natong makat-onan. . . . [Angay kitang] . . . magpakahilom ug mamati, nga dili maghunahuna nga nahibaloan na nato ang tanan, ug dili magsalikway kon unsay gitanyag nga atong susihon. Hinunoa, mamati, mamati, mamati.”

Kada tuig, libolibo ang namati sa mensahe sa Gingharian nga gidala sa mga Saksi ni Jehova ngadto sa ilang mga balay. Ang bukas-ug-hunahuna nga mga tawo sa tanang dapit nga uhaw sa mga kamatuoran sa Bibliya misanong sa imbitasyon ni Jesus: “Umari ka mahimong akong sumusunod.”—Marcos 10:17-21; Pinadayag 22:17.

[Footnote]

[Hulagway sa panid 28]

Si Propesor Daniele Rivoire

[Hulagway sa panid 29]

Si Giuseppe Banchetti

[Credit Line]

Banchetti: La Luce, Abril 14, 1926