Giyahi ang Imong mga Lakang sa mga Prinsipyo sa Diyos
Giyahi ang Imong mga Lakang sa mga Prinsipyo sa Diyos
“[Si Jehova] nagtudlo kanimo aron ikaw makabaton ug kaayohan.”—ISAIAS 48:17.
1. Sa unsang paagi ang Maglalalang naggiya sa mga tawo?
SAMTANG ang mga siyentipiko naghago aron mahibaloan ang mga misteryo sa uniberso, sila natingala sa kadako sa enerhiya nga anaa sa uniberso palibot nato. Ang atong adlaw—usa ka bituon nga kasarangan ang gidak-on—magpatungha ug enerhiya nga sama ka puwersado sa “100 ka bilyong bomba nga idroheno nga nagbutobuto matag segundo.” Ang Maglalalang makakontrolar ug makagiya nianang dagkong mga butang sa langit pinaagi sa iyang walay-kinutobang gahom. (Job 38:32; Isaias 40:26) Komosta kitang mga tawo, nga gigasahan ug kagawasan sa pagpili, moral nga katakos, gahom sa pagpangatarongan, ug pagsabot sa espirituwal nga mga butang? Sa unsang paagi ang atong Magbubuhat mipili sa paggiya kanato? Siya mahigugmaong naggiya kanato pinaagi sa iyang hingpit nga mga balaod ug hamiling mga prinsipyo, duyog sa atong maayong pagkabansay nga konsensiya.—2 Samuel 22:31; Roma 2:14, 15.
2, 3. Sa unsang matang sa pagkamasinugtanon nga ang Diyos may kalipay?
2 Ang Diyos may kalipay diha sa intelihenteng mga linalang nga mopili sa pagsugot kaniya. (Proverbio 27:11) Inay kay giprograma kita nga mosugot nga binuta sama sa walay-hunahunang mga robot, gihatagan kita ni Jehova ug kagawasan sa pagpili aron makahimo kita ug mga desisyon pinasukad sa kahibalo aron sa paghimo kon unsay matarong.—Hebreohanon 5:14.
3 Si Jesus, kinsa hingpit nga nagsumbalik-silaw sa iyang Amahan, miingon sa iyang mga tinun-an: “Kamo akong mga higala kon inyong buhaton ang ginasugo ko kaninyo. Dili ko na kamo tawgon nga mga ulipon.” (Juan 15:14, 15) Sa karaang mga panahon, ang usa ka ulipon kinahanglang mosugot sa mga sugo sa iyang agalon. Sa laing bahin, ang panaghigalaay maugmad pinaagi sa pagpasundayag ug mga hiyas nga makapadani sa kasingkasing. Puwede kitang mahimong mga higala ni Jehova. (Santiago 2:23) Kini nga panaghigalaay gipalig-on sa gugma sa usag usa. Gilangkit ni Jesus ang pagkamasinugtanon sa Diyos uban sa gugma sa dihang siya miingon: “Kon ang usa nahigugma kanako, sundon niya ang akong pulong, ug higugmaon siya sa akong Amahan.” (Juan 14:23) Tungod kay si Jehova nahigugma kanato ug buot mogiya kanato sa luwas nga paagi, siya nag-awhag kanato sa pagkinabuhi sumala sa iyang mga prinsipyo.
Diyosnong mga Prinsipyo
4. Unsaon nimo paghubit ang mga prinsipyo?
4 Unsa may mga prinsipyo? Ang prinsipyo gihubit ingong “malangkobon o sukaranan nga kamatuoran: usa ka masangkaron ug sukaranan nga balaod, doktrina, o pagtuo nga niana ang ubang mga balaod ug mga doktrina gipasukad o gikuha.” (Webster’s Third New International Dictionary) Ang dulot nga pagtuon sa Bibliya magbutyag nga ang atong langitnong Amahan nagtagana ug sukaranang mga direktiba nga mapadapat sa lainlaing mga situwasyon ug mga bahin sa kinabuhi. Gibuhat niya kini alang sa atong dumalayong kaayohan. Nahiuyon kana sa gisulat sa maalamong Haring Solomon: “Pamati, anak ko, ug dawata ang akong mga pulong. Ug modaghan ang katuigan sa imong kinabuhi. Ako magatudlo kanimo sa dalan sa kaalam; palakton ko ikaw sa mga alagianan sa katul-id.” (Proverbio 4:10, 11) Ang sukaranang mga prinsipyo nga gitagana ni Jehova mag-apektar sa atong relasyon kaniya ug sa mga isigkatawo, sa atong pagsimba, ug sa atong adlaw-adlaw nga pagkinabuhi. (Salmo 1:1) Tagdon nato ang pipila niining sukaranang mga prinsipyo.
5. Paghatag ug mga pananglitan sa pipila ka sukaranang mga prinsipyo.
5 Bahin sa atong relasyon kang Jehova, si Jesus nag-ingon: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.” (Mateo 22:37) Dugang pa, ang Diyos nagtagana ug mga prinsipyo nga dunay kalambigitan sa atong paggawi ngadto sa atong mga isigkatawo, sama sa Bulawanong Lagda: “Busa, ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.” (Mateo 7:12; Galacia 6:10; Tito 3:2) Maylabot sa pagsimba, kita gitambagan: “Magmahunahunaon kita sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom.” (Hebreohanon 10:24, 25) Kon bahin sa adlaw-adlawng mga kalihokan sa kinabuhi, si apostol Pablo nag-ingon: “Kon kamo magakaon o magainom o magabuhat sa bisan unsa, himoa ang tanang butang alang sa kahimayaan sa Diyos.” (1 Corinto 10:31) Aduna pay daghang prinsipyo diha sa Pulong sa Diyos.
6. Unsay kalainan sa mga prinsipyo ug mga balaod?
6 Ang mga prinsipyo maoy nagaobra, hinungdanon nga mga kamatuoran, ug ang maalamong mga Kristohanon angayng makakat-on sa paghigugma niana. Si Jehova nagdasig kang Solomon sa pagsulat: “Hatagig pagtagad ang akong mga pulong. Ikiling ang imong igdulungog sa akong mga pulong. Dili unta sila mahilayo gikan sa imong mga mata. Tipigi sila sa kinataliwad-an sa imong kasingkasing. Kay sila kinabuhi alang niadtong makakaplag kanila ug kahimsog alang sa ilang tibuok nga unod.” (Proverbio 4:20-22) Unsay kalainan sa mga prinsipyo ug mga balaod? Ang mga prinsipyo maoy pasikaranan sa mga balaod. Ang mga lagda, nga mas espesipiko, mahimong mapadapat sa usa ka linaing yugto o situwasyon, apan ang mga prinsipyo mapadapat bisag kanus-a. (Salmo 119:111) Ang mga prinsipyo sa Diyos dili mawala sa uso o mahanaw. Tinuod gayod ang inspiradong mga pulong ni manalagnang Isaias: “Ang lunhawng balili nalaya, ang bulak nalawos; apan kon bahin sa pulong sa atong Diyos, kini mohangtod sa panahong walay tino.”—Isaias 40:8.
Paghunahuna ug Paglihok Pinasukad sa mga Prinsipyo
7. Sa unsang paagi ang Pulong sa Diyos nagdasig kanato sa paghunahuna ug paglihok pinasukad sa mga prinsipyo?
7 Sa makadaghan, “ang pulong sa atong Diyos” nagdasig kanato sa paghunahuna ug paglihok pinasukad sa mga prinsipyo. Sa dihang gipasumaryo kang Jesus ang Balaod, mihimo siyag duha ka mugbong mga pahayag—ang usa nagpasiugda sa gugma alang kang Jehova, ug ang lain nagpasiugda sa gugma alang sa isigkatawo. (Mateo 22:37-40) Sa pagbuhat niana, sa bahin si Jesus mikutlo gikan sa unang mubo nga sumaryo sa pasikaranang mga prinsipyo sa Moisesnong Balaod, nga gipahayag diha sa Deuteronomio 6:4, 5: “Si Jehova nga atong Diyos maoy usa lamang ka Jehova. Ug higugmaon mo si Jehova nga imong Diyos sa bug-os mong kasingkasing ug sa bug-os mong kalag ug sa bug-os mong kusog.” Dayag nga diha usab sa hunahuna ni Jesus ang direktiba sa Diyos nga makita diha sa Levitico 19:18. Sa klaro, mubo, ug puwersado nga paniklop sa basahon sa Ecclesiastes, ang mga pulong ni Haring Solomon nagsumaryo sa daghang balaod sa Diyos: “Kini ang kataposan sa butang, ang tanan nadungog na: Kahadloki ang matuod nga Diyos ug tumana ang iyang mga sugo. Kay kini mao ang tibuok nga obligasyon sa tawo. Kay pagadad-on sa matuod nga Diyos ang tanang matang sa buhat ngadto sa paghukom maylabot sa tagsatagsa ka tinagong butang, maayo man kini o daotan.”—Ecclesiastes 12:13, 14; Miqueas 6:8.
8. Nganong usa ka proteksiyon ang bug-os nga pagsabot sa sukaranang mga prinsipyo sa Bibliya?
8 Ang pagkasabot sa bug-os nianang sukaranang mga prinsipyo makatabang kanato sa pagsabot ug pagpadapat pa sa espesipikong mga direktiba. Dugang pa, kon dili nato bug-os nga masabtan ug madawat ang sukaranang mga prinsipyo, basin dili kita makahimog maalamong mga desisyon ug ang atong pagtuo mahimong matarog dayon. (Efeso 4:14) Kon itisok nato pag-ayo ang maong mga prinsipyo diha sa atong hunahuna ug kasingkasing, andam kitang mogamit niana diha sa paghimog mga desisyon. Kon ipadapat nato kana uban ang pagsabot, kita magmalamposon.—Josue 1:8; Proverbio 4:1-9.
9. Nganong dili gayod sayon ang pagsabot ug pagpadapat sa mga prinsipyo sa Bibliya?
9 Ang pagsabot ug pagpadapat sa mga prinsipyo sa Bibliya dili sama ka sayon sa pagsunod sa usa ka hugpong sa mga balaod. Ingong mga tawong dili-hingpit basin dili nato buot nga maningkamot sa pagpangatarongan sumala sa mga prinsipyo. Basin mas gusto nato nga dunay espesipikong lagda nga ihatag kanato sa dihang kita mohimog desisyon o mag-atubang sa usa ka suliran. Usahay magpatabang tingali kita sa usa ka hamtong nga Kristohanon—tingali sa usa ka ansiyano sa kongregasyon—nga magdahom nga makadawat ug espesipikong lagda nga mapadapat sa atong situwasyon. Bisan pa niana, ang Bibliya o binase-sa-Bibliya nga mga publikasyon dili tingali mohatag ug tinong lagda, ug bisan pag gihatagan kitag lagda, basin dili kini aplikado sa tanang bahin o ilalom sa tanang situwasyon. Mahinumdoman tingali nimo nga ang usa ka tawo nangutana kang Jesus: “Magtutudlo, sultihi ang akong igsoon nga bahinan niya ako sa panulondon.” Imbes mohatag dayon ug balaod aron mahusay ang panagbingkil tali sa mga managsoon, si Jesus naghatag kaniya ug mas malangkobon nga prinsipyo: “Bukha kanunay ang inyong mga mata ug pagbantay batok sa tanang matang sa hakog nga pangibog.” Busa si Jesus naghatag ug lagda nga mapuslanon kaniadto ug karon usab.—Lucas 12:13-15.
10. Sa unsang paagi ang paggawi nato nga kaharmonya sa mga prinsipyo nagpadayag sa mga motibo sa atong kasingkasing?
10 Lagmit nakakita ka na ug mga tawo nga kontra-gustong mosugot sa mga balaod, tungod kay nahadlok nga silotan. Ang pagtahod sa mga prinsipyo magwagtang nianang tinamdana. Ang kinaiyahan sa mga prinsipyo magtukmod niadtong gigamhan niana sa pagsanong nga kinasingkasing. Gani, kadaghanang prinsipyo wala maglangkit sa dihadihang pagsilot niadtong dili mosunod niana. Naghatag kini kanato ug kahigayonan sa pagpadayag kon nganong gisugot nato si Jehova, kon unsa ang panukmod sa atong kasingkasing. Usa ka panig-ingnan nato si Jose sa pagdumili sa mga pagbirigbirig sa asawa ni Potipar. Bisag wala pa maghatag si Jehova ug sinulat nga balaod batok sa panapaw ug wala pay gibaod nga silot gikan sa Diyos batok sa pagpakigsekso sa asawa sa laing lalaki, si Jose nahibalo sa mga prinsipyo nga gihatag sa Diyos labot sa pagkamatinud-anon sa kaminyoon. (Genesis 2:24; 12:18-20) Masabtan nato gikan sa iyang tubag nga ang maong mga prinsipyo nakaimpluwensiya gayod kaniya: “Unsaon ko pagbuhat kining dakong pagkadaotan ug makasala gayod batok sa Diyos?”—Genesis 39:9.
11. Sa unsang mga bahin nga ang mga Kristohanon gustong magiyahan sa mga prinsipyo ni Jehova?
11 Karong adlawa, ang mga Kristohanon gustong magiyahan sa mga prinsipyo ni Jehova maylabot sa personal nga mga butang, sama sa pagpili ug mga kauban, kalingawan, musika, ug basahon. (1 Corinto 15:33; Filipos 4:8) Samtang mouswag ang atong kahibalo, pagsabot, ug pagpabili kang Jehova ug sa iyang mga sukdanan, ang atong konsensiya, atong moral nga pagbati, motabang kanato sa pagpadapat sa mga prinsipyo sa Diyos ilalom sa bisan unsang mga sirkumstansiya nga atong atubangon, bisan pa sa pribado gayong mga butang. Kay nagiyahan sa mga prinsipyo sa Bibliya, dili kita mangitag paagi nga makalusot sa mga balaod sa Diyos; ni mosundog kita niadtong mosulay kon asa taman nga sila makapadayon sa usa ka buhat nga dili sa aktuwal makasupak sa usa ka balaod. Maamgohan nato nga ang maong panghunahuna makapaluya sa kaugalingon ug makadaot.—Santiago 1:22-25.
12. Unsa ang usa ka kinahanglanon sa pagkahimong giniyahan sa diyosnong mga prinsipyo?
12 Ang hamtong nga mga Kristohanon moila nga ang usa ka kinahanglanon sa pagsunod sa diyosnong mga prinsipyo mao ang pagsusi kon unsay hunahuna ni Jehova bahin sa usa ka butang. “Oh kamong mga nahigugma kang Jehova,” nagtambag ang salmista, “dumti ninyo ang daotan.” (Salmo 97:10) Naglista sa pipila ka butang nga isipon sa Diyos nga daotan, ang Proverbio 6:16-19 nag-ingon: “Adunay unom ka butang nga ginadumtan ni Jehova; oo, pito ka butang ang dulumtanan sa iyang kalag: mapahitas-ong mga mata, bakakon nga dila, ug mga kamot nga nagaula ug inosenteng dugo, usa ka kasingkasing nga nagamugnag madaotong mga laraw, mga tiil nga nagadali sa pagdalagan ngadto sa pagkadaotan, usa ka bakakong saksi nga nagasabwag ug kabakakan, ug ang nagapahinabog panaglalis sa taliwala sa mga kaigsoonan.” Sa dihang ang atong kinabuhi magamhan sa tinguha sa pagsumbalik-silaw kon unsay hunahuna ni Jehova nianang sukaranang mga butang, ang pagkinabuhi sumala sa mga prinsipyo mahimo nang batasan.—Jeremias 22:16.
Gikinahanglan ang Maayong Motibo
13. Unsang matanga sa panghunahuna ang gihatagan ni Jesus ug dakong pagtagad diha sa iyang Wali sa Bukid?
13 Ang pagkahibalo ug pagpadapat sa mga prinsipyo manalipod usab kanato batok sa lit-ag sa walay pulos, seremonyal nga pagsimba. Dunay kalainan tali sa pagsunod sa mga prinsipyo ug sa estrikto ug hinobrang pagtuman sa mga lagda. Klarong gipakita ni Jesus kini diha sa Wali sa Bukid. (Mateo 5:17-48) Hinumdomi nga ang mga mamiminaw ni Jesus maoy mga Hudiyo, busa ang ilang panggawi angay untang magamhan sa Moisesnong Balaod. Apan sa pagkatinuod diha silay tinuis nga panglantaw sa Balaod. Gihatagan nilag dakong pagtagad ang estriktong diwa sa Balaod inay ang tinuod nga kahulogan niini. Ug ilang gipasiugda ang ilang mga tradisyon, nga nag-una niana kay sa pagtulon-an sa Diyos. (Mateo 12:9-12; 15:1-9) Tungod niana, ang mga tawo sa katibuk-an wala matudloi sa paghunahuna maylabot sa mga prinsipyo.
14. Sa unsang paagi gitabangan ni Jesus ang iyang mga sumusunod sa paghunahuna pinasukad sa mga prinsipyo?
14 Sa kasukwahi, gilakip ni Jesus diha sa Wali sa Bukid ang mga prinsipyo sa lima ka bahin sa moralidad: kasuko, kaminyoon ug diborsiyo, mga saad, panimalos, ug gugma ug pagdumot. Sa matag kaso, gipakita ni Jesus ang benepisyo sa pagsunod sa prinsipyo. Busa gipatas-an ni Jesus ang moral nga sukdanan alang sa iyang mga sumusunod. Pananglitan, bahin sa panapaw, siya naghatag kanato ug prinsipyo nga magbantay dili lamang sa atong mga lihok kondili usab sa atong mga hunahuna ug mga tinguha: “Ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.”—Mateo 5:28.
15. Sa unsang paagi malikayan nato ang kiling nga mahimong estrikto ug hinobrang magtuman sa mga lagda?
15 Kining maong panig-ingnan nag-ilustrar nga dili gayod angay nga makalimtan nato ang katuyoan ug tinuod nga kahulogan sa mga prinsipyo ni Jehova. Dili gayod angayng sulayan nato ang pag-angkon sa pabor sa Diyos pinaagi sa pagsubay konohay sa matarong nga kinabuhi. Giyagyag ni Jesus ang pagkasayop sa maong tinamdan pinaagi sa pagpunting sa kaluoy ug gugma sa Diyos. (Mateo 12:7; Lucas 6:1-11) Nga nagsunod sa mga prinsipyo sa Bibliya, likayan nato nga maningkamot sa pagkinabuhi (o magpugos sa uban nga magkinabuhi) sumala sa daghan kaayo ug estriktong hugpong sa mga lagda nga wala na mahiuyon sa mga pagtulon-an sa Bibliya. Mas maikagon kita bahin sa mga prinsipyo sa gugma ug pagkamasinugtanon ngadto sa Diyos kay sa seremonyal nga pagsimba.—Lucas 11:42.
Makapalipayng mga Resulta
16. Paghatag ug mga pananglitan sa mga prinsipyo luyo sa pipila ka balaod sa Bibliya.
16 Samtang maningkamot kita sa pagsugot kang Jehova, hinungdanon nga maamgohan nato nga ang iyang mga balaod gipasukad sa sukaranang mga prinsipyo. Pananglitan, ang mga Kristohanon kinahanglang maglikay sa idolatriya, seksuwal nga imoralidad, ug sayop nga paggamit sa dugo. (Buhat 15:28, 29) Unsay nagpaluyo sa Kristohanong baroganan nianang mga isyuha? Ang Diyos takos sa atong eksklusibong debosyon; kita angayng magmatinud-anon sa atong kapikas; ug si Jehova mao ang Maghahatag-Kinabuhi. (Genesis 2:24; Exodo 20:5; Salmo 36:9) Ang pagkasabot niining nagpaluyong mga prinsipyo makapasayon sa pagdawat ug pagsunod sa nalangkit nga mga balaod.
17. Unsay maayong mga resulta sa pagsabot ug pagpadapat sa mga prinsipyo sa Bibliya?
17 Samtang masabtan nato ang nagpaluyong mga prinsipyo ug ipadapat kana, atong maamgohan nga kini maoy alang sa atong kaayohan. Ang espirituwal nga mga panalangin nga natagamtam sa katawhan sa Diyos kasagarang duyogan sa aktuwal nga mga benepisyo. Pananglitan, kadtong naglikay sa pagtabako, nagsubay sa matarong nga kinabuhi, ug nagtahod sa pagkabalaan sa dugo makalikay nga mabiktima sa pipila ka mga sakit. Sa susama, ang pagkinabuhi nga kaharmonya sa kamatuoran sa Bibliya makabenepisyo kanato sa ekonomikanhon, katilingbanon, o pamilyahanon nga mga paagi. Ang bisan hain nianang aktuwal nga mga benepisyo magpamatuod sa pagkabililhon sa mga sukdanan ni Jehova, nga kini praktikal gayod. Apan ang pagkabaton nianang praktikal nga mga bentaha dili mao ang pangunang rason sa pagpadapat sa mga prinsipyo sa Diyos. Ang matuod nga mga Kristohanon mosugot kang Jehova tungod kay sila nahigugma kaniya, tungod kay siya takos nilang simbahon, ug tungod kay mao kanay angayng buhaton.—Pinadayag 4:11.
18. Kon buot natong mahimong malamposong mga Kristohanon, unsay angayng mogiya sa atong kinabuhi?
18 Ang pagtugot nato nga ang atong kinabuhi magiyahan sa mga prinsipyo sa Bibliya motultol ngadto sa maayo kaayong paagi sa pagkinabuhi, nga makapadani mismo sa uban ngadto sa dalan sa Diyos. Labing hinungdanon, ang atong dalan sa kinabuhi magpasidungog kang Jehova. Atong maamgohan nga si Jehova sa pagkatinuod maoy mahigugmaon nga Diyos nga nagtinguha sa labing maayo alang kanato. Kon mohimo kitag mga desisyon sumala sa mga prinsipyo sa Bibliya ug makakita kon giunsa kita pagpanalangin ni Jehova, mobati kitang mas suod pa kaniya. Oo, maugmad pa nato ang mahigugmaong relasyon uban sa atong langitnong Amahan.
Nahinumdom Ka Ba?
• Unsa may prinsipyo?
• Unsay kalainan sa mga prinsipyo ug mga balaod?
• Nganong mapuslanon nga kita maghunahuna ug molihok pinasukad sa mga prinsipyo?
[Mga Pangutana sa Pagtuon]
[Kahon sa panid 20]
Si Wilson, usa ka Kristohanon nga taga-Ghana, gipahibalo nga pipila na lang ka adlaw, palagpoton na siya gikan sa iyang trabaho. Sa iyang kataposang adlaw sa trabaho, giasayn siya sa paghugas sa pribadong awto sa nagadumalang direktor sa kompaniya. Sa dihang nakakita si Wilson ug kuwarta diha sa awto, giingnan siya sa iyang labaw nga ang Diyos nagpadala sa kuwarta tungod kay si Wilson ipalagpot na nianang adlawa. Apan, nga nagpadapat sa mga prinsipyo sa Bibliya bahin sa pagkamatinud-anon, giuli ni Wilson ang kuwarta ngadto sa direktor. Kay natingala ug nakadayeg, ang direktor wala lamang magtanyag kang Wilson ug permanenteng trabaho dihadiha kondili gipatas-an usab ang iyang posisyon diha sa kompaniya.—Efeso 4:28.
[Kahon sa panid 21]
Si Rukia maoy usa ka babayeng taga-Albania nga nag-edad ug mga 60 anyos. Tungod sa panagbingkil sa pamilya, nakigbungol siya sa iyang igsoong lalaki sulod sa kapin sa 17 ka tuig. Nagsugod siya pagtuon sa Bibliya uban sa mga Saksi ni Jehova ug nakakat-on nga ang matuod nga mga Kristohanon kinahanglang magmakigdaiton sa uban, nga dili maghambin ug kayugot. Nag-ampo siya sa tibuok gabii, ug nga nagkubakuba ang iyang dughan, miadto siya sa balay sa iyang igsoon. Ang iyang pag-umangkon nga babaye ang miabli sa pultahan. Kay natingala, gipangutana niya si Rukia: “Kinsa may namatay? Mag-unsa man ka dinhi?” Miingon si Rukia nga gusto niyang makigkita sa iyang igsoon. Kalmado niyang gisaysay nga ang pagkakat-on bahin sa mga prinsipyo sa Bibliya ug bahin kang Jehova mao ang nagtukmod kaniya sa pagpakigdait sa iyang igsoon. Human sa paghinilakay ug pagginaksanay, ilang gisaulog kining espesyal nga reunyon!—Roma 12:17, 18.
[Hulagway sa panid 23]
[Hulagway sa panid 23]
[Hulagway sa panid 23]
[Hulagway sa panid 23]
“Sa nakita niya ang mga panon sa katawhan mitungas siya sa bukid; ug human siya makalingkod ang iyang mga tinun-an miduol kaniya; ug siya mibungat sa iyang baba ug misugod sa pagtudlo kanila.”—MATEO 5:1, 2