Mga Balaod sa Diyos Maoy Alang sa Atong Kaayohan

“Gihigugma ko gayod ang imong balaod!”—SALMO 119:97.

1. Unsay komon nga tinamdan bahin sa pagtuman sa mga balaod sa Diyos?

 ANG pagtuman sa mga balaod sa Diyos dili popular karong panahona. Alang sa kadaghanan, ang pagpasakop sa usa ka dili-makita nga hataas nga awtoridad daw walay kapuslanan. Kita nagkinabuhi sa usa ka panahon nga ang mga sukdanan sa moral nagausab-usab, ang mga utlanan tali sa husto ug sayop dili-klaro, ug daghag situwasyon nga kuwestiyonable. (Proverbio 17:15; Isaias 5:20) Nagpabanaag sa kaisipan nga komon sa daghang katilingban nga dili na relihiyoso, usa ka surbi nga gihimo di pa dugay nag-ingon nga ang “kadaghanang Amerikano dili gustong but-an kon unsa ang husto, maayo ug makahuloganon.” Sila mas gustog “matinugoton nga Diyos. Sila mas gusto nga walay estriktong mga balaod nga pagasundon. Walay estriktong mga amo nga hataas ug baroganan sa moral o bisan unsang baroganan.” Usa ka analista sa katilingban miingon nga karon ang “mga tawo gidahom nga maoy magbuot sa ilang kaugalingon kon unsaon sa pagkinabuhi nga matul-id ug maligdong.” Siya mipadayon: “Kinahanglang ipasibo sa bisan unsang matang sa hataas nga awtoridad ang mga balaod niini sumala sa mga panginahanglan sa ordinaryong mga tawo.”

2. Sa unsang paagi ang unang paghisgot sa balaod diha sa Bibliya nalambigit gayod sa panalangin ug pag-uyon sa Diyos?

² Kay daghan man kaayo ang nagkuwestiyon sa importansiya sa mga balaod ni Jehova, kinahanglang atong palig-onon ang atong pagtuo nga ang mga sukdanan sa Diyos maoy alang sa atong kaayohan. Makaikag nga hisgotan ang asoy diin unang gihisgotan sa Bibliya ang balaod. Sa Genesis 26:5, atong mabasa ang mga pulong sa Diyos: “Si Abraham . . . nagpadayon sa pagtuman sa iyang mga obligasyon kanako, sa akong mga sugo, sa akong mga lagda, ug sa akong mga balaod.” Kining mga pulonga gipahayag sa wala pa si Jehova mohatag ug detalyadong kodigo sa balaod ngadto sa mga kaliwat ni Abraham. Sa unsang paagi gigantihan sa Diyos ang pagkamatinumanon ni Abraham, lakip na sa pagtuman sa Iyang mga balaod? Si Jehova nga Diyos nagsaad kaniya: “Pinaagi sa imong binhi ang tanang nasod sa yuta tinong mapanalanginan sa ilang kaugalingon.” (Genesis 22:18) Busa ang pagtuman sa mga balaod sa Diyos nalambigit gayod sa panalangin ug pag-uyon sa Diyos.

3. (a) Unsang pagbati ang gipahayag sa usa ka salmista bahin sa balaod ni Jehova? (b) Unsang mga pangutana ang angay natong tagdon?

³ Ang usa sa mga salmista—lagmit usa ka prinsipe sa Juda ug umaabot nga hari—mipahayag ug pagbati nga wala kaayoy kalambigitan sa balaod. Siya mipatugbaw ngadto sa Diyos: “Gihigugma ko gayod ang imong balaod!” (Salmo 119:97) Dili kini emosyonal nga pahayag lamang. Kini maoy usa ka ekspresyon sa paghigugma sa kabubut-on sa Diyos sumala sa gilatid diha sa iyang balaod. Si Jesu-Kristo, ang hingpit nga Anak sa Diyos, sama usab ug gibati. Si Jesus matagnaong gihubit nga nag-ingon: “Sa pagbuhat sa imong kabubut-on, Oh Diyos ko, ako nagakalipay, ug ang imong balaod ania sa akong kahiladman nga mga bahin.” (Salmo 40:8; Hebreohanon 10:9) Kita komosta? Malipay ba kitang motuman  sa kabubut-on sa Diyos? Kita kombinsido ba nga mapuslanon ug makahatag ug kaayohan ang mga balaod ni Jehova? Unsay dapit sa pagtuman sa mga balaod sa Diyos diha sa atong pagsimba, sa atong adlaw-adlawng pagkinabuhi, sa atong paghimog desisyon, ug sa atong relasyon sa uban? Aron mahigugma sa balaod sa Diyos, maayong atong masabtan kon nganong ang Diyos adunay katungod sa paghimo ug sa pagpatuman sa mga balaod.

Si Jehova—Ang Takos nga Maghahatag-Balaod

4. Nganong si Jehova mao ang kinalabwan, may katungod nga Maghahatag-Balaod?

⁴ Ingong Maglalalang, si Jehova mao ang kinalabwan, may katungod nga Maghahatag-Balaod sa uniberso. (Pinadayag 4:11) Ang manalagnang si Isaias miingon: “Si Jehova mao ang atong Maghahatag-lagda.” (Isaias 33:22) Siya naghatag ug pisikal nga mga balaod nga naggiya sa buhi ug dili-buhi nga kalalangan. (Job 38:4-38; 39:1-12; Salmo 104:5-19) Kay usa ka linalang sa Diyos, ang tawo nailalom sa pisikal nga mga balaod ni Jehova. Ug bisan pag ang tawo maoy usa ka linalang nga may kagawasan sa pagpili, nga may kaugalingong katakos sa pagtimbangtimbang, siya magmalipayon lamang kon siya magpasakop sa moral ug espirituwal nga mga sukdanan sa Diyos.—Roma 12:1; 1 Corinto 2:14-16.

5. Sa unsang paagi ang prinsipyo sa Galacia 6:7 nahiuyon sa mga balaod sa Diyos?

⁵ Sumala sa ato nang nahibaloan, ang pisikal nga mga balaod ni Jehova dili mahimong lapason. (Jeremias 33:20, 21) Kon supakon sa usa ka tawo ang pisikal nga balaod, sama sa balaod sa grabidad, maagoman niya ang mga sangpotanan. Sa susama, ang moral nga mga balaod sa Diyos dili mahimong usbon ug dili mahimong likayan o lapason nga walay silot. Kini kinahanglang tumanon sama sa iyang mga balaod sa kinaiyahan, bisan pag ang sangpotanan tingali dili dayon mahitabo. “Ang Diyos dili kayagayagaan. Kay bisan unsay ginapugas sa usa ka tawo, kini usab iyang anihon.”—Galacia 6:7; 1 Timoteo 5:24.

Ang Nasakop sa Balaod ni Jehova

6. Unsa ka malukpanon ang mga balaod sa Diyos?

⁶ Ang usa ka talagsaong pagpasundayag sa balaod sa Diyos mao ang Balaod ni Moises. (Roma 7:12) Sa ngadtongadto, gipulihan ni Jehova nga Diyos ang Moisesnong Balaod sa “balaod ni Kristo.” a (Galacia 6:2; 1 Corinto 9:21) Kay ilalom man ang mga Kristohanon sa “hingpit nga balaod nga iya sa kagawasan,” atong nasabtan nga wala ilimite sa Diyos ang iyang mga sugo diha sa pipila ka bahin sa atong kinabuhi, sama sa doktrinal nga mga pagtulon-an o sa seremonyal nga mga rituwal. Ang iyang mga sukdanan nagkobre sa tanang bahin sa kinabuhi, apil ang mga kahikayan sa pamilya, mga pakiglabot sa negosyo, panggawi diha sa kaatbang nga sekso, tinamdan ngadto sa mga isigka-Kristohanon, ug pagpakigbahin sa matuod nga pagsimba.—Santiago 1:25, 27.

7. Paghatag ug mga pananglitan sa hinungdanong mga balaod sa Diyos.

⁷ Pananglitan, ang Bibliya nag-ingon: “Walay mga makihilawason, ni mga tigsimbag idolo, ni mga mananapaw, ni mga lalaking gihuptan alang sa dili-kinaiyanhong mga katuyoan, ni mga lalaking makigdulog sa mga lalaki, ni mga kawatan, ni mga tawong dalo, ni mga palahubog, ni mga tigsultig pasipala, ni mga mangingilkil nga makapanunod sa gingharian sa Diyos.” (1 Corinto 6:9, 10) Oo, ang pagpanapaw ug pakighilawas dili kay “romantikong relasyon” lamang. Ang homoseksuwal nga mga buhat dili kay “kapilian nga paagi sa kinabuhi” lamang. Paglapas na kini sa balaod ni Jehova. Ug maingon man ang mga buhat sama sa pagpangawat, pagpamakak, ug pagdaot sa dungog. (Salmo 101:5; Colosas 3:9; 1 Pedro 4:15) Gihukman ni Santiago ang pagpanghambog, samtang gitambagan kita ni Pablo sa paglikay sa binuang nga sinultihan ug malaw-ayng pagpangomedya. (Efeso 5:4; Santiago 4:16) Alang sa mga Kristohanon, kining maong mga lagda sa panggawi maoy bahin sa hingpit nga balaod sa Diyos.—Salmo 19:7.

8. (a) Unsa ang kinaiyahan sa balaod ni Jehova? (b) Unsa ang paninugdang kahulogan sa Hebreohanong pulong nga “balaod”?

⁸ Ang maong paninugdan nga mga lagda sa Pulong ni Jehova nagpadayag nga ang iyang balaod maoy labaw pa kay sa mga talaan lamang sa dili matinagdanon sa pagbati, sobra ka estrikto nga kalagdaan. Kini nahimong basehanan sa timbang, mabungahong kinabuhi, nga dunay maayong epekto sa tanang bahin sa panggawi. Ang balaod sa Diyos makapalig-on, makahatag ug giya sa maayong pamatasan, ug matulon-anon. (Salmo 119:72) Ang pulong “balaod” sumala sa pagkagamit sa salmista  gihubad gikan sa Hebreohanong pulong nga toh·rahʹ. Usa ka eskolar sa Bibliya nag-ingon: “Kining pulonga naporma gikan sa berbo nga nagkahulogang pagtultol, paggiya, pagpunting, pagtiro. Nan, . . . ang kahulogan niini mahimong usa ka lagda sa panggawi.” Alang sa salmista ang balaod maoy usa ka gasa nga gikan sa Diyos. Dili ba angayng pabilhan usab nato kini, nga magpaimpluwensiya niini diha sa paagi sa atong pagkinabuhi?

9, 10. (a) Nganong nagkinahanglan kita ug kasaligang paggiya? (b) Sa unsang paagi lamang makabaton kitag malipayon ug malamposong kinabuhi?

⁹ Ang tanang linalang nagkinahanglan ug kasaligang paggiya. Maingon man gikinahanglan usab kini ni Jesus ug sa ubang mga manulonda, kinsa mas labaw kay sa tawo. (Salmo 8:5; Juan 5:30; 6:38; Hebreohanon 2:7; Pinadayag 22:8, 9) Kon kining hingpit nga mga linalang nakabaton ug kaayohan sa paggiya sa Diyos, nan, labaw na nga nagkinahanglan ug paggiya ang mga tawong dili-hingpit! Ang kasaysayan sa tawo ug ang atong kaugalingong kasinatian nagpamatuod nga tinuod ang giingon ni manalagnang Jeremias: “Ako nahibalo pag-ayo, Oh Jehova, nga dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.”—Jeremias 10:23.

¹⁰ Kon kita buot makabaton ug malipayon ug malamposong kinabuhi, kita kinahanglang magpagiya sa Diyos. Nakita ni Haring Solomon nga peligro ang pagkinabuhi nga magsunod sa kaugalingong mga sukdanan, nga bulag sa paggiya sa Diyos: “Adunay dalan nga matul-id atubangan sa usa ka tawo, apan ang kataposan niana mao ang dalan sa kamatayon.”—Proverbio 14:12.

Mga Katarongan sa Pagmahal sa Balaod ni Jehova

11. Nganong atong tinguhaon nga masabtan ang balaod sa Diyos?

¹¹ Maayong atong ugmaron ang tim-os nga tinguha nga masabtan ang balaod ni Jehova. Gipahayag sa salmista ang maong pangandoy sa dihang siya miingon: “Bukha ang akong mga mata, aron makatan-aw ako sa katingalahang nga butang gikan sa imong balaod.” (Salmo 119:18) Sa dihang mas magkalalom ang atong kahibalo sa Diyos ug sa iyang mga dalan, mas magkalalom ang atong pagsabot nga tinuod ang mga pulong ni Isaias: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan. Oh kon ikaw mamati lamang unta gayod sa akong mga sugo!” (Isaias 48:17, 18) Buot gayod ni Jehova nga ang iyang katawhan makalikay sa kalamidad ug makapahimulos sa kinabuhi pinaagi sa pagsunod sa iyang mga kasugoan. Atong susihon ang pipila ka dagkong katarongan kon nganong atong mahalon ang balaod sa Diyos.

12. Sa unsang paagi ang pagkahibalo ni Jehova kanato naghimo kaniya nga ang kinalabwang Maghahatag ug balaod?

¹² Ang diyosnong balaod nagagikan sa Usa nga mas labawng nakaila kanato. Kay si Jehova mao man ang atong Maglalalang, may katarongan nga makaila gayod siya sa mga tawo. (Salmo 139:1, 2; Buhat 17:24-28) Si Jehova mas nakaila pa kanato  kay sa atong suod nga mga higala, paryente, ug bisan mga ginikanan. Ngani, and Diyos mas nakaila pa kanato kay sa atong pagkaila sa atong kaugalingon! Ang atong Magbubuhat ang mas labawng nakasabot sa atong espirituwal, emosyonal, mental, ug pisikal nga mga panginahanglan. Sa dihang isentro niya ang iyang pagtagad kanato, siya nagapakita ug personal nga pagsabot sa atong pagkagama, sa atong mga tinguha, ug sa atong mga tingusbawan. Si Jehova nakasabot sa atong mga limitasyon, apan siya nasayod usab nga kita makahimo usab ug maayo. Ang salmista nag-ingon: “Siya nahibalo pag-ayo sa atong pagkaumol, nga nahinumdom nga kita abog.” (Salmo 103:14) Busa, mobati kita nga adunay espirituwal nga kasegurohan samtang kita maningkamot sa paglakaw diha sa iyang kabalaoran, nga andam magpasakop sa diyosnong paggiya.—Proverbio 3:19-26.

13. Nganong makasalig kita nga si Jehova tinuod nga matinagdanon gayod sa atong kaayohan?

¹³ Ang diyosnong balaod nagagikan sa Usa nga nahigugma kanato. Ang Diyos matinagdanon gayod sa atong walay kataposang kaayohan. Dili ba gisakripisyo niya ang iyang Anak ingong “usa ka lukat baylo sa daghan”? (Mateo 20:28) Dili ba nagsaad si Jehova nga ‘dili niya itugot nga matental kita nga labaw sa atong maantos’? (1 Corinto 10:13) Dili ba ang Bibliya nagpasalig kanato nga siya ‘nahingawa kanato’? (1 Pedro 5:7) Walay usa ang labaw nga interesado sa pagtaganag mapuslanong mga giya alang sa tawhanong kalalangan kay kang Jehova. Siya nahibalo kon unsa ang maayo alang kanato ug kon asa kutob ang utlanan tali nianang mohatag ug kalipay ug kaguol. Bisan tuod kita dili-hingpit ug masayop, kon kita magpadayon sa paglakaw diha sa pagkamatarong, iyang ipasundayag ang iyang gugma alang kanato diha sa mga paagi nga mosangpot ug kinabuhi ug mga panalangin.—Ezequiel 33:11.

14. Unsang hinungdanong paagi nga ang balaod sa Diyos lahi sa hunahuna sa tawo?

¹⁴ Ang balaod sa Diyos dili gayod mausab. Sa magubot nga panahon nga atong gikinabuhian, si Jehova sama sa bato nga dili-matarog ug malig-on, naglungtad gikan sa panahong walay kataposan ngadto sa panahong walay kataposan. (Salmo 90:2) Siya miingon bahin sa iyang kaugalingon: “Ako si Jehova; ako dili mausab.” (Malaquias 3:6) Ang mga sukdanan sa Diyos, sumala sa pagkarekord diha sa Bibliya, bug-os nga kasaligan—dili sama sa hunahuna sa tawo nga kanunayng nagbag-o-bag-o. (Santiago 1:17) Pananglitan, daghang tuig nang nagduso ang mga sikologo sa pagmatuto sa mga anak sa mapatuyangong paagi, apan sa ngadtongadto ang pipila nagbag-o sa ilang hunahuna ug miadmitir nga sayop ang ilang tambag. Ang mga sukdanan ug mga giya sa kalibotan bahin niining butanga nagpalingpaling nga morag gihampak sa hangin. Apan, ang Pulong ni Jehova dili-matarog. Daghang siglo na nga ang Bibliya naghatag ug tambag kon unsaon pagmatuto sa mga anak diha sa gugma. Si apostol Pablo nagsulat: “Mga amahan, ayaw palagota ang inyong mga anak, kondili magpadayon sa pagmatuto kanila sa disiplina ug sa pagdumala-sa-kaisipan ni Jehova.” (Efeso 6:4) Pagkamakapahupay ang pagkasayod nga kita makasalig sa mga sukdanan ni Jehova; nga kini dili mausab!

Mga Panalangin Alang Niadtong Motuman sa mga Balaod sa Diyos

15, 16. (a) Unsay moresulta kon atong ipadapat ang mga sukdanan ni Jehova? (b) Sa unsang paagi ang mga balaod sa Diyos napamatud-an nga usa ka maayong giya sa kaminyoon?

¹⁵ Pinaagi sa iyang manalagnang si Isaias, ang Diyos nag-ingon: ‘Ang akong pulong nga mogula gikan sa akong baba . . . tinong molampos.’ (Isaias 55:11) Tinuod kana, kon kita kinasingkasing nga maningkamot sa pagsunod sa mga sukdanan nga makaplagan diha sa iyang Pulong, kita makabaton ug kalamposan, makahimog maayo, ug makakaplag ug kalipay.

¹⁶ Palandonga kon sa unsang paagi ang mga balaod sa Diyos maoy maayong giya alang sa usa ka malamposon nga kaminyoon. “Himoa nga dungganon ang kaminyoon taliwala sa tanan,” nagsulat si Pablo, “ug ang higdaanan sa kaminyoon nga dili mahugawan, kay hukman sa Diyos ang mga makihilawason ug ang mga mananapaw.” (Hebreohanon 13:4) Ang mga kapikas sa kaminyoon gisugo nga magmatinahoron ug magmahigugmaon sa  usag usa: “Kinahanglang higugmaon gayod sa matag usa ang iyang asawa sama sa iyang kaugalingon; sa laing bahin, ang asawa angay nga adunay halawom nga pagtahod sa iyang bana.” (Efeso 5:33) Ang matang sa gugma nga gikinahanglan gihubit diha sa 1 Corinto 13:4-8: “Ang gugma hataas-ug-pailob ug maluloton. Ang gugma dili abughoan, kini dili manghambog, dili magpaburot, dili bastos, dili mangita sa kaugalingong kaayohan niini, dili mapasuko. Kini dili maghupot ug talaan sa kadaot. Kini dili magmaya sa pagkadili-matarong, apan magmaya uban sa kamatuoran. Kini moantos sa tanang butang, motuo sa tanang butang, molaom sa tanang butang, molahutay sa tanang butang. Ang gugma dili gayod mapakyas.” Ang kaminyoon nga gipasukad pinaagi niining matanga sa gugma dili mapakyas.

17. Unsay mga kaayohan ang mosangpot tungod sa pagsunod sa mga sukdanan ni Jehova bahin sa pag-inom ug alkoholikong ilimnon?

¹⁷ Laing pamatuod nga makahatag ug kaayohan ang mga sukdanan ni Jehova, mao ang kamatuoran nga gihukman niya ang paghuboghubog. Siya supak usab sa ‘pag-inom ug daghang bino.’ (1 Timoteo 3:3, 8; Roma 13:13) Daghan niadtong wala mosunod sa mga sukdanan sa Diyos niining bahina nag-antos sa sakit o kaha misamot ang sakit tungod sa sobrang pag-inom. Tungod sa pagsupak sa tambag sa Bibliya bahin sa pagkamakasaranganon, nahimo nang batasan sa uban ang pag-inom ug daghan kay kini “makaparelaks kanila.” Daghang problema ang mosangpot tungod sa sobrang pag-inom, apil na ang pagkawala sa pagtahod, pagkadaot sa relasyon sa pamilya o pagkabungkag sa pamilya, pag-usik sa kinitaan, ug pagkatangtang gikan sa trabaho. (Proverbio 23:19-21, 29-35) Dili ba ang mga sukdanan ni Jehova bahin sa pag-inom ug alkoholikong ilimnon maoy usa ka panalipod?

18. Ang mga balaod ba sa Diyos mapuslanon may kalabotan sa panalapi? Ipatin-aw.

¹⁸ Ang mga sukdanan sa Diyos mapuslanon usab bahin sa panalapi. Ang Bibliya nag-awhag  sa mga Kristohanon nga magmatinud-anon ug magmakugihon. (Lucas 16:10; Efeso 4:28; Colosas 3:23) Tungod sa ilang pagsunod niining tambaga, daghang Kristohanon ang gihatagan ug maayong puwesto sa trabaho o wala mataktak sa ilang trabaho samtang ang uban gipanangtang sa trabaho. May kaayohang pinansiyal usab ang mosangpot kon ang tawo maglikay sa dili-Kasulatanhong mga batasan ug pagkagiyan sama sa pagpanugal, pagtabako, ug pag-abuso sa droga. Segurado nga duna kay mahunahunaang ubang mga pananglitan sa pagkamapuslanon sa mga sukdanan sa Diyos may kalabotan sa panalapi.

19, 20. Nganong dalan sa kaalam ang pagdawat ug pagsunod sa mga balaod sa Diyos?

¹⁹ Ang mga tawong dili-hingpit daling maligas sa pagsunod sa mga balaod ug sa mga sukdanan sa Diyos. Hunahunaa ang mga Israelinhon diha sa Bukid sa Sinai. Ang Diyos miingon kanila: “Kon kamo hugot nga magasugot sa akong tingog ug magatuman gayod sa akong pakigsaad, nan kamo tinong mahimong akong linaing katigayonan gikan sa tanang ubang mga katawhan.” Sila mitubag: “Andam kami sa pagbuhat sa tanan nga gisulti ni Jehova.” Apan, pagkalahi nga dalan ang ilang gisubay! (Exodo 19:5, 8; Salmo 106:12-43) Sa kasukwahi, atong dawaton ug sundon ang mga sukdanan sa Diyos.

²⁰ Maalamon ug makahatag ug kalipay ang bug-os nga pagtuman sa walay-ikatandi nga mga balaod nga gitagana ni Jehova nga makatabang sa paggiya sa atong mga kinabuhi. (Salmo 19:7-11) Aron molampos sa pagsunod niini, kinahanglan usab nga masabtan nato ang pagkahinungdanon sa mga prinsipyo sa Diyos. Kini ang hisgotan sa sunod nga artikulo.

[Footnote]

Nahinumdom Ka Ba?

• Nganong makasalig kita nga alang sa atong kaayohan ang mga balaod sa Diyos?

• Tungod sa unsang mga katarongan nga atong mahalon ang balaod ni Jehova?

• Sa unsang mga paagi makahatag ug kaayohan ang mga balaod sa Diyos?

[Mga Pangutana sa Pagtuon]

[Hulagway sa panid 13]

Si Abraham dagayang gipanalanginan tungod sa pagtuman sa mga balaod ni Jehova

[Mga hulagway sa panid 15]

Ang mga kabalaka karon sa puliki nga kinabuhi nakapalinga sa daghan gikan sa pagtuman sa balaod sa Diyos

[Hulagway sa panid 17]

Sama sa usa ka parola diha sa dakong bato, ang balaod sa Diyos malig-on ug dili mausab