Mga Pangutana Gikan sa mga Magbabasa

Husto ba nga moampo sa Diyos nga dili litokon ang ekspresyong “sa ngalan ni Jesus”?

Ang Bibliya nagpakita nga ang mga Kristohanon nga nagtinguhang moampo kang Jehova angayng mohimo niana sa ngalan ni Jesus. Giingnan ni Jesus ang iyang mga tinun-an: “Walay makaadto sa Amahan kon dili pinaagi kanako.” Siya midugang: “Bisan unsa nga inyong pangayoon sa akong ngalan, kini akong pagabuhaton, aron nga ang Amahan mahimaya maylabot sa Anak. Kon kamo mangayo ug bisan unsa sa akong ngalan, kini akong pagabuhaton.”—Juan 14:6, 13, 14.

Nagtumong sa talagsaong posisyon ni Jesus, ang Cyclopedia of Biblical, Theological, and Ecclesiastical Literature nag-ingon: “Ang tumong sa pag-ampo mao lamang ang Diyos, pinaagi ni Jesu-Kristo ingong Tigpataliwala. Busa, ang tanang pangamuyo nga gitumong ngadto sa mga santos o sa mga manulonda dili lang kay way-pulos, kondili mapasipalahon usab. Ang tanang pagsimba sa linalang, bisag unsa pa ka binayaw ang maong linalang, maoy idolatriya, ug gidili gayod sa sagradong balaod sa Diyos.”

Komosta man kon dunay tawo, nga human sa usa ka makapalipay kaayong kasinatian, moingong, “Salamat Jehova” nga dili sumpayan ug “sa ngalan ni Jesus”? Sayop ba kini? Dili. Pananglit ang usa ka Kristohanon mag-atubang ug kalit nga kapeligrohan ug moingon: “Jehova, tabangi ako!” Ang Diyos dili gayod modumili sa pagtabang tungod lang kay ang iyang alagad wala moingong “sa ngalan ni Jesus.”

Hinunoa, angayng matikdan nga ang pagpadayag lang sa gibati bisan ngadto sa Diyos dili matawag mismo ug usa ka pag-ampo. Pananglitan, human siya hukmi ni Jehova tungod sa pagpatay sa iyang igsoon nga si Abel, si Cain miingon: “Ang akong silot tungod sa sayop hilabihan ra kabug-at nga pas-anon. Ania, ikaw nagpapahawa kanako niining adlawa gikan sa nawong sa yuta, ug gikan sa imong nawong ako matago; ug ako mahimong usa ka latagaw ug kagiw sa yuta, ug tinong ang bisan kinsa nga makakaplag kanako magpatay kanako.” (Genesis 4:13, 14) Bisan tuod si Jehova ang gitumong ni Cain sa iyang gipamulong, ang pag-ulbo sa iyang emosyon maoy usa ka reklamo bahin sa mapait nga resulta sa sala.

Ang Bibliya nag-ingon kanato: “Ang Diyos magabatok sa mga mapahitas-on, apan siya magahatag ug dili-takos nga kalulot sa mga mapainubsanon.” Ang inato nga pagsangpit sa Labing Hataas nga morag siya usa lamang ka ordinaryong tawo nagpakita gayod ug kakulang sa pagpaubos. (Santiago 4:6; Salmo 47:2; Pinadayag 14:7) Maoy pagkadili-matinahoron usab nga bisag nahibalo na kita kon unsay giingon sa Pulong sa Diyos bahin sa papel ni Jesus, tinuyo gihapon kitang mag-ampo nga dili moila kang Jesu-Kristo.—Lucas 1:32, 33.

Wala kini magpasabot nga si Jehova nagdahom ug usa ka partikular nga estilo o gitakdang pormula sa dihang kita moampo. Ang labing hinungdanon mao ang kahimtang sa kasingkasing sa usa ka tawo. (1 Samuel 16:7) Sa unang siglo K.P., ang Romanong opisyal sa kasundalohan nga ginganlag Cornelio “padayong nangamuyo sa Diyos.” Ingong dili-tinuling Hentil, si Cornelio wala napahinungod kang Jehova. Bisan tuod wala gayod siya moampo sa ngalan ni Jesus, ang iyang mga pag-ampo “misaka ingong handomanan sa atubangan sa Diyos.” Ngano? Tungod kay ang “tig-usisa sa mga kasingkasing” nakakita nga si Cornelio maoy “usa ka debotadong tawo ug usa nga mahadlokon sa Diyos.” (Buhat 10:2, 4; Proverbio 17:3) Human makabatog kahibalo bahin kang “Jesus nga taga-Nasaret,” nadawat ni Cornelio ang balaang espiritu ug nahimong bawtismadong tinun-an ni Jesus.—Buhat 10:30-48.

Sa kataposan, dili iya sa tawo ang paghukom kon unsang mga pag-ampoa ang patalinghogan sa Diyos. Kon usahay ang usa ka Kristohanon nakigsulti sa Diyos ug wala makalitok sa ekspresyon sama sa “sa ngalan ni Jesus,” dili siya angayng mobating sad-an. Si Jehova nakahibalo gayod sa atong mga limitasyon ug buot motabang kanato. (Salmo 103:12-14) Makasalig kita nga kon magpasundayag kita ug pagtuo “sa Anak sa Diyos . . . , bisan unsay atong pangayoon sumala sa iyang kabubut-on, siya magpatalinghog kanato.” (1 Juan 5:13, 14) Apan, ilabina sa dihang maghawas sa uban diha sa publikong pag-ampo, ang matuod nga mga Kristohanon moila sa gilatid sa Kasulatan nga papel nga gihuptan ni Jesus diha sa katuyoan ni Jehova. Ug sila masinugtanong maningkamot sa pagpasidungog kang Jesus pinaagi sa pagtumong sa mga pag-ampo ngadto sa Diyos pinaagi kaniya.