Unsay Imong Gisaligan nga Makahatag Kanimo ug Seguridad?

Sa usa ka gamayng baryo sa Kasadpang Aprika, ang batan-ong si Josué nanamilit sa iyang pamilya ug mga higala. a Dayon siya mibiyahe paingon sa dakong siyudad sa pagpangitag pinansiyal nga seguridad. Apan, wala madugay human sa iyang pag-abot, mihanap ang iyang paglaom sa dihang iyang nakita nga ang siyudad dili diay usa ka dapit diin sayon nga mahimong adunahan.

SA PAGPAKIGBISOG nga makapahiangay sa kinabuhi sa siyudad, si Josué medyo nahigawad. Ang dakong siyudad dili gayod sama sa iyang paghanduraw niini. Sa kasamtangan, anaa sa kahiladman sa kasingkasing ni Josué ang pangandoy nga makapauli ngadto sa iyang pamilya ug mga higala didto sa kabos nga baryo nga iyang gibiyaan. Apan nahadlok siya nga yubiton sa ubang mga taga-baryo. ‘Moingon unya sila nga napakyas ko,’ siya nabalaka, ‘tungod kay wala ko magmalamposon sa siyudad.’

Labaw pang nakapabug-at kaniya mao ang kahigawad nga bation tingali sa iyang mga ginikanan. Sila nagsalig kaniya alang sa pinansiyal nga tabang. Samtang naningkamot sa pagsagubang niining bug-at nga pagbati, si Josué nagtrabahog daghang oras sa usa ka ubos nga trabaho ug mikita lag gamay kaayo kay sa iyang gidahom. Lapoy kaayo siya tungod sa sobrang pagtrabaho. Ug ang panahon nga nahibilin alang sa Kristohanong mga kalihokan, nga iyang gipabilhan pag-ayo, nagkagamay sa paglabay sa matag semana. Kay halayo kaayo sa kainit sa pagmahal sa iyang pamilya ug karaang mga higala, siya masulub-on ug nag-inusara. Iyang nakita nga ang siyudad wala makahatag sa seguridad nga iyang gitinguha pag-ayo.

Bisan nagkalainlain ang mga ngalan ug mga dapit, ang masubo nga kasinatian ni Josué kanunayng mahitabo. Wala magpasabot nga hakog si Josué tungod kay nagtinguha siya sa pagbalhin—nangita lang siya ug seguridad. Siya tim-os nga nagtuo nga mas dako ang iyang kahigayonan sa siyudad kay sa didto sa iyang gamayng baryo. Siyempre, usahay mapaarang-arang sa usa ka tawo ang iyang kahimtang sa materyal, apan wala kana magpasabot ug tinuod nga seguridad. Wala gayod kana mahitabo kang Josué, ni mahitabo kana sa kadaghanang uban pa nga lagmit mosulay sa pagbalhin ngadto sa siyudad. Tungod niini kita makapangutana, ‘Unsa bay seguridad?’

Ang seguridad gisabot sa lainlaing paagi sa lainlaing mga tawo. Ang usa ka diksiyonaryo nag-ingon nga ang seguridad maoy “kagawasan gikan sa kapeligrohan” o “kagawasan gikan sa kahadlok o kabalaka.” Nakita sa kadaghanang tawo nga ang bug-os nga “kagawasan gikan sa kapeligrohan” wala maglungtad karon. Matagbawon na sila basta gibati nila nga sila may seguridad, bisan pa tingalig peligroso ang mga kahimtang sa ilang palibot.

Komosta ang bahin kanimo? Asa ka nangitag seguridad? Makaplagan kaha kini diha sa siyudad kon itandi sa baryo, sama sa gituohan ni Josué? O makaplagan kaha kini diha sa salapi, way sapayan kon diin o sa unsang paagi nimo kini mabatonan? Basin makaplagan kini pinaagi sa pagpangandoy sa pagbaton ug mas taas nga kahimtang diha sa katilingban? Bisag unsa pa ang imong gisaligan nga makahatag kanimo ug seguridad, hangtod kanus-a molungtad ang maong seguridad alang kanimo ug sa imong pamilya?

Atong tagdon ang tulo ka paagi nga niana ang daghang tawo nangitag seguridad—dapit; salapi; posisyon, o kahimtang diha sa katilingban. Dayon atong susihon kon unsa ang makahatag ug tinuod, malungtarong seguridad.

[Footnote]