Ang Pagkab-ot sa mga Kinahanglanon sa Diyos Makahimaya Kang Jehova
Ang Pagkab-ot sa mga Kinahanglanon sa Diyos Makahimaya Kang Jehova
‘Pagahimayaon ko siya uban sa pagpasalamat.’—SALMO 69:30.
1. (a) Nganong takos himayaon si Jehova? (b) Sa unsang paagi atong himayaon siya uban sa pagpasalamat?
SI Jehova mao ang labing gamhanang Diyos, ang Soberano sa Uniberso, ang Maglalalang. Tungod niini, ang iyang ngalan ug mga katuyoan takos nga himayaon. Ang paghimaya kang Jehova nagkahulogan nga hatagan siya ug labing hataas nga pagtamod, dayegon ug bayawon siya sa pulong ug buhat. Aron mahimo kini “uban sa pagpasalamat” nagkinahanglan nga kita magmapasalamaton kanunay sa iyang gihimo alang kanato karon ug sa iyang pagahimoon unya sa umaabot. Ang tinamdan nga kinahanglan natong huptan gipakita diha sa Pinadayag 4:11, diin ang matinumanon nga espirituhanong mga linalang sa langit nag-ingon: “Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.” Sa unsang paagi atong himayaon si Jehova? Pinaagi sa pagtuon bahin kaniya ug dayon buhaton ang iyang gikinahanglan kanato. Angayng bation usab nato ang gibati sa salmista sa dihang siya miingon: “Tudloi ako sa pagbuhat sa imong kabubut-on, kay ikaw mao ang akong Diyos.”—Salmo 143:10.
2. Sa unsang paagi pakiglabotan ni Jehova kadtong naghimaya kaniya ug kadtong wala?
2 Pabilhan pag-ayo ni Jehova kadtong maghimaya kaniya. Maoy hinungdan kon nganong siya ang “tigganti sa mga matinuorong nagapangita kaniya.” (Hebreohanon 11:6) Unsa ang maong ganti? Si Jesus miingon diha sa pag-ampo ngadto sa iyang langitnong Amahan: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Oo, kadtong ‘maghimaya [kang Jehova] uban sa pasalamat’ mahimong “magapanag-iya sa yuta, ug sila magapuyo sa ibabaw niini hangtod sa kahangtoran.” (Salmo 37:29) Sa laing bahin, ‘ang daotan walay kaugmaon.’ (Proverbio 24:20) Ug niining kataposang mga adlaw, dinalian gayod ang panginahanglan sa paghimaya kang Jehova tungod kay sa dili madugay iyang pagalaglagon ang daotan ug luwason ang mga matarong. “Ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.”—1 Juan 2:17; Proverbio 2:21, 22.
3. Nganong angay natong hatagan ug pagtagad ang basahon ni Malaquias?
3 Ang kabubut-on ni Jehova makita diha sa Bibliya, kay “ang tibuok Kasulatan inspirado sa Diyos.” (2 Timoteo 3:16) Kanang maong Pulong sa Diyos nasudlan ug daghang asoy kon giunsa pagpanalangin ni Jehova kadtong naghimaya kaniya ug kon unsay mahitabo niadtong wala. Ang usa sa maong mga asoy adunay kalabotan sa nahitabo sa Israel sa panahon ni manalagnang Malaquias. Sa mga tuig 443 W.K.P., sa panahon sa pagkagobernador ni Nehemias sa Juda, gisulat ni Malaquias ang basahon nga nagdala sa iyang ngalan. Kining puwersado ug makaiikag nga basahon nasudlan ug impormasyon ug mga tagna nga “gisulat ingong pasidaan kanato nga naabtan sa mga kataposan sa mga sistema sa mga butang.” (1 Corinto 10:11) Ang paghatag ug pagtagad sa mga pulong ni Malaquias makatabang kanato sa pagpangandam alang sa “dako ug makalilisang nga adlaw ni Jehova,” sa dihang Iyang laglagon kining daotang sistema.—Malaquias 4:5.
4. Unsang unom ka punto ang gipasiugda kanato diha sa Malaquias kapitulo 1?
4 Sa unsang paagi ang basahon ni Malaquias, nga gisulat kapin na sa 2,400 ka tuig kanhi, makatabang kanato niining ika-21ng siglo sa pagpangandam alang nianang dako ug makalilisang nga adlaw ni Jehova? Gipasiugda kanato sa unang kapitulo ang labing menos unom ka punto nga hinungdanon sa atong paghimaya kang Jehova uban sa pagpasalamat aron atong mabatonan ang iyang pag-uyon ug ang kinabuhing walay kataposan: (1) Gihigugma ni Jehova ang iyang katawhan. (2) Kinahanglang ipakita nato nga kita nagpabili sa sagradong mga butang. (3) Si Jehova naglaom nga atong hatagan siya sa atong labing maayo. (4) Ang matuod nga pagsimba gipalihok sa dili-hakog nga gugma, dili sa kadalo. (5) Ang dalawaton nga pag-alagad sa Diyos dili maoy usa ka mabug-at nga tulumanon. (6) Ang matag usa kanato kinahanglang manubag sa Diyos. Busa, niining unang tulo ka artikulo bahin sa basahon ni Malaquias, atong hisgotan ang matag usa niining mga puntoha samtang atong tukion ang Malaquias kapitulo 1.
Gihigugma ni Jehova ang Iyang Katawhan
5, 6. (a) Nganong gihigugma ni Jehova si Jacob? (b) Kon atong sundogon ang pagkamatinumanon ni Jacob, unsay atong madahom?
5 Ang gugma ni Jehova klarong gipakita diha sa unang mga bersikulo sa Malaquias. Ang basahon gibuksan pinaagi sa mga pulong: “Usa ka pahayag: Ang pulong ni Jehova mahitungod sa Israel.” Dugang pa, ang Diyos nag-ingon: “Gihigugma ko kamo.” Mihatag ug usa ka pananglitan, diha sa mao gihapong bersikulo, si Jehova miingon: “Gihigugma ko si Jacob.” Si Jacob maoy usa ka tawo nga may pagtuo kang Jehova. Sa ulahi, giilisan ni Jehova ang ngalan ni Jacob ug Israel, ug siya nahimong kagikan sa nasod sa Israel. Tungod kay si Jacob usa man ka tawo sa pagtuo, siya gihigugma ni Jehova. Ang mga tawo sa nasod sa Israel nga nagpakita ug samag-Jacob nga tinamdan kang Jehova gihigugma usab Niya.—Malaquias 1:1, 2.
6 Kon atong higugmaon si Jehova ug mounong uban sa iyang katawhan, makahupay kanato ang mga pulong sa 1 Samuel 12:22: “Si Jehova dili motalikod sa iyang katawhan tungod sa iyang dakong ngalan.” Gihigugma ni Jehova ang iyang katawhan ug moganti kanila sa ulahi ug kinabuhing walay kataposan. Busa atong mabasa: “Salig kang Jehova ug buhata ang maayo; magpuyo ka sa yuta, ug makiglabot ka uban ang pagkamatinumanon. Magbaton ka usab ug tumang kalipay diha kang Jehova, ug ihatag niya kanimo ang mga hangyo sa imong kasingkasing.” (Salmo 37:3, 4) Ang atong paghigugma kang Jehova nalangkit sa ikaduhang punto nga gipatagad kanato sa Malaquias kapitulo 1.
Pagpakitag Pagpabili sa Sagradong mga Butang
7. Nganong gidumtan ni Jehova si Esau?
7 Samtang atong basahon ang Malaquias 1:2, 3, human nga si Jehova miingon, “gihigugma ko si Jacob,” siya miingon, “gidumtan ko si Esau.” Ngano man? Gihimaya ni Jacob si Jehova, apan ang iyang kaluha nga igsoon, si Esau, wala. Si Esau ginganlan usab ug Edom. Diha sa Malaquias 1:4, ang yuta sa Edom gitawag ug teritoryo sa pagkadaotan, ug ang molupyo niini mga hinukman. Ang ngalang Edom (nga nagkahulogang “Pula”) maoy gingalan kang Esau human nga gibaligya niya kang Jacob ang hamiling katungod sa pagkapanganay baylo sa pula nga sabaw. “Gitamay ni Esau ang katungod sa pagkapanganay,” nag-ingon ang Genesis 25:34. Giawhag ni apostol Pablo ang mga isigkamagtutuo nga magbantay “aron walay makihilawason ni si bisan kinsa nga wala magpabili sa sagradong mga butang, sama kang Esau, kinsa baylo sa usa ka pagkaon naghatag sa iyang mga katungod ingong panganay.”—Hebreohanon 12:14-16.
8. Unsay hinungdan nga gipakasama ni Pablo si Esau sa usa ka makihilawason?
8 Nganong gipakasama ni Pablo ang mga buhat ni Esau sa pakighilawas? Tungod kay ang pagbaton ug kaisipan nga sama kang Esau maghimo sa usa ka tawo nga dili mapabilhon sa sagradong mga butang. Kini sa baylo, mosangpot ug dagkong mga sala, sama sa pakighilawas. Busa, ang matag usa kanato mahimong makapangutana: ‘Ako ba matental usahay sa pagbaylo sa akong Kristohanong panulondon—kinabuhing walay kataposan—alang sa usa ka butang nga lumalabay sama sa usa ka panaksang sabaw nga lentihas? Tingali wala lang makaamgo niana, gidumtan ba nako ang sagradong mga butang?’ Si Esau naghigwaos sa pagtagbaw sa lawasnong kailibgon. Siya miingon kang Jacob: “Pagdali, palihog, pakan-a ako sa pula.” (Genesis 25:30) Makasubo, ang ubang mga alagad sa Diyos, sa samang paagi, nag-ingon: “Pagdali! Nganong maghulat pa ug dungganong kaminyoon?” Ang tinguha sa pagtagbaw sa seksuwal nga kailibgon bisan unsa pay mahitabo nahimong ilang panaksan sa sabaw nga lentihas.
9. Sa unsang paagi atong mahuptan ang matahaong kahadlok kang Jehova?
9 Hinaot nga dili nato tamayon ang sagradong mga butang pinaagi sa pagbiya sa kaputli, integridad, ug sa atong espirituwal nga panulondon. Hinunoa imbes sundogon si Esau, sundogon nato ang matinumanong si Jacob ug huptan ang matahaong kahadlok sa Diyos pinaagi sa pagpakitag lalom nga pagtahod sa sagradong mga butang. Sa unsang paagi atong mahimo kini? Pinaagi sa mabinantayon nga pagkab-ot sa mga kinahanglanon sa Diyos. Makataronganon nga motultol kini kanato ngadto sa ikatulong punto nga gipadayag sa Malaquias kapitulo 1. Unsa kana?
Ihatag Kang Jehova ang Atong Labing Maayo
10. Sa unsang paagi gitamay sa mga saserdote ang lamesa ni Jehova?
10 Ang mga saserdote sa Juda nga nag-alagad sa templo sa Jerusalem sa panahon ni Malaquias wala magtanyag kang Jehova sa labing maayong mga halad. Ang Malaquias 1:6-8 nag-ingon: “‘Ang anak nga lalaki, sa iyang bahin, nagpasidungog sa amahan; ug ang sulugoon, sa iyang dakong agalon. Busa kon ako usa ka amahan, hain man ang pasidungog kanako? Ug kon ako usa ka dakong agalon, hain man ang kahadlok kanako?’ Si Jehova sa mga panon miingon kaninyo, Oh mga saserdote nga nagtamay sa akong ngalan.” “Giunsa man namo sa pagtamay ang imong ngalan?” nangutana ang mga saserdote. “Pinaagi sa paghalad ug mahugaw nga tinapay ibabaw sa akong halaran,” mitubag si Jehova. “Sa unsang paagi kami naghugaw kanimo?” nangutana ang mga saserdote. Busa gisultihan sila ni Jehova: “Pinaagi sa inyong pag-ingon: ‘Ang lamesa ni Jehova talamayon.’” Ang maong mga saserdote nagpakita nga nagtamay sila sa lamesa ni Jehova matag higayon nga magtanyag sila ug may depekto nga mga halad, nga nag-ingon: “Kana dili daotan.”
11. (a) Unsay giingon ni Jehova bahin sa talamayong mga halad? (b) Sa unsang paagi sad-an ang mga tawo sa katibuk-an?
11 Dayon si Jehova nangatarongan bahin sa maong talamayong mga halad: “Dad-a kana, palihog, ngadto sa imong gobernador. Mahimuot kaha siya kanimo, o magadawat kaha siya kanimo nga maluloton?” Dili, ang ilang gobernador dili mahimuot sa maong gasa. Labaw nang dili mahimuot sa maong may depekto nga mga gasa ang Soberano sa Uniberso! Ug dili lamang mga saserdote ang sad-an. Tinuod, gipakita gayod nila ang pagtamay kang Jehova pinaagi sa paghimo sa aktuwal nga mga paghalad. Apan ang mga tawo ba sa katibuk-an walay sala? Sad-an gayod sila! Sila mismo ang namili sa mga mananap nga buta, piang, ug masakiton ug nagdala niini ngadto sa mga saserdote aron kini ihalad. Pagkadako nga kasal-anan!
12. Sa unsang paagi kita gitabangan aron makahatag kang Jehova sa atong labing maayo?
12 Ang paghatag kang Jehova sa labing maayo nga atong maarangan maoy paagi sa pagpakita nga kita nahigugma gayod kaniya. (Mateo 22:37, 38) Dili sama sa daotang mga saserdote sa panahon ni Malaquias, ang organisasyon ni Jehova karon naghatag ug daghang maayong Kasulatanhong instruksiyon nga motabang kanato sa paghimaya kang Jehova uban sa pagpasalamat pinaagi sa pagkab-ot sa mga kinahanglanon sa Diyos. Nalangkit niini mao ang ikaupat nga hinungdanong punto nga mapupo gikan sa Malaquias kapitulo 1.
Ang Matuod nga Pagsimba Gipalihok sa Gugma, Dili sa Kadalo
13. Unsay gihimo sa mga saserdote nga nagpakita nga sila gipalihok tungod sa kadalo?
13 Ang mga saserdote sa panahon ni Malaquias maoy mga hakog, dili-mahigugmaon, ug dalo sa salapi. Sa unsang paagi kita nahibalo niini? Ang Malaquias 1:10 nag-ingon: “‘Kinsa ba usab taliwala kaninyo ang magasira sa mga pultahan? Ug kamo dili magpasiga sa akong halaran—sa walay kapuslanan. Ako wala mahimuot kaninyo,’ miingon si Jehova sa mga panon, ‘ug ako wala malipay sa halad nga gasa gikan sa inyong kamot.’” Oo, ang maong dalo nga mga saserdote nangayo ug bayad alang sa labing sayon nga pag-alagad sa templo, nga nangayog bayad alang sa pagsira sa mga pultahan ug sa pagdagkot ug kalayo diha sa halaran! Dili ikahibulong nga si Jehova wala malipay sa mga halad gikan sa ilang mga kamot!
14. Nganong makaingon kita nga ang mga Saksi ni Jehova gipalihok sa gugma?
14 Ang kadalo ug kahakog sa makasasalang mga saserdote sa karaang Jerusalem makapahinumdom gayod kanato nga, sumala sa Pulong sa Diyos, ang mga tawong dalo dili makapanunod sa Gingharian sa Diyos. (1 Corinto 6:9, 10) Ang pagpamalandong sa mga dalan niadtong maong mga saserdote nga nag-alagad lamang sa kaugalingong kaayohan nagpasamot sa atong pagpabili sa tibuok-kalibotan nga buluhatong pagsangyaw nga gihimo sa mga Saksi ni Jehova. Kini kinabubut-on; kita dili gayod mangayo ug bayad alang sa bisan unsang bahin sa atong ministeryo. Dili, “kita dili mga tigbaligya sa pulong sa Diyos.” (2 Corinto 2:17) Sama kang Pablo, ang matag usa kanato matinud-anong makaingon: “Sa walay bayad malipayon kong gipahayag ang maayong balita sa Diyos kaninyo.” (2 Corinto 11:7) Matikdi nga si Pablo ‘malipayong nagpahayag sa maayong balita.’ Kana nagpunting sa ikalimang punto sa Malaquias kapitulo 1.
Ang Pag-alagad sa Diyos Dili Usa ka Mabug-at nga Tulumanon
15, 16. (a) Unsay tinamdan sa mga saserdote ngadto sa pagtanyag ug mga halad? (b) Sa unsang paagi gitanyag sa mga Saksi ni Jehova ang ilang mga halad?
15 Gilantaw sa walay-pagtuo nga mga saserdote sa karaang Jerusalem ang mga halad ingong usa ka makalaay nga tulumanon. Mabug-at kini alang kanila. Sumala sa gipahayag sa Malaquias 1:13, sila gisultihan sa Diyos: “Kamo miingon, ‘Tan-awa! Pagkamakapuol!’ ug kamo nangusmo diha niana.” Ang maong mga saserdote nangusmo, o nagtamay, sa sagradong mga butang sa Diyos. Mag-ampo gayod kita nga dili kita mahisama kanila. Hinunoa, hinaot nga atong ipakita kanunay ang tinamdan nga dayag sa mga pulong sa 1 Juan 5:3: “Kini ang kahulogan sa paghigugma sa Diyos, nga atong bantayan ang iyang mga sugo; ug bisan pa ang iyang mga sugo dili mabug-at.”
16 Angayng malipay kitang motanyag ug espirituwal nga mga halad ngadto sa Diyos, nga dili gayod mag-isip niini nga usa ka makalaay nga palas-anon. Hinaot nga atong patalinghogan ang matagnaong mga pulong: “Ingna [si Jehova], ninyong tanan, ‘Hinaot nga pasayloon mo ang kasaypanan; ug dawaton ang maayo, ug sa baylo ihalad ang mga toreyong baka sa among mga ngabil.’” (Oseas 14:2) Ang ekspresyong “mga toreyong baka sa among mga ngabil” nagtumong sa espirituwal nga mga halad nga mao ang mga pulong nga atong isulti sa pagdayeg kang Jehova ug sa iyang mga katuyoan. Ang Hebreohanon 13:15 nag-ingon: “Pinaagi [kang Jesu-Kristo] itanyag nato kanunay sa Diyos ang halad sa pagdayeg, nga mao, ang bunga sa mga ngabil nga naghimog pagpahayag sa dayag sa iyang ngalan.” Pagkamalipayon nato nga ang atong espirituwal nga mga halad dili kay mga tulumanon lamang, kondili bug-os kasingkasing nga mga pagpasundayag sa atong gugma alang sa Diyos! Kini moagak ngadto sa ikaunom nga punto nga mapupo sa Malaquias kapitulo 1.
Ang Matag Usa Kinahanglang Manubag
17, 18. (a) Nganong gitunglo ni Jehova “ang nagagawi nga malipatlipaton”? (b) Unsa ang wala isipa niadtong nagagawi nga malipatlipaton?
17 Ang mga tawo nga nabuhi sa panahon ni Malaquias dunay tulubagon sa ilang mga buhat, ug kita usab dunay samang tulubagon. (Roma 14:12; Galacia 6:5) Busa, ang Malaquias 1:14 nag-ingon: “Tinunglo ang nagagawi nga malipatlipaton sa dihang adunay [depektoso] nga hayop nga laki sa iyang panon, ug siya nanaad ug naghalad sa may-ikasaway nga hayop ngadto kang Jehova.” Ang tawo nga dunay panon sa mga hayop nakapanag-iya ug dili lamang usa ka hayop—ingnon ta, usa lamang ka karnero—busa dili siya makaingon nga siya walay kapilian. Sa dihang magpili ug usa ka hayop aron ihalad, dili siya mopili ug hayop nga buta, piang, o masakiton. Kon may depekto nga hayop ang iyang pilion, nagpakita kini nga gitamay niya ang kahikayan ni Jehova bahin sa paghalad, kay ang tawo nga dunay daghang hayop seguradong makakita ug usa ka hayop nga walay ingon niana nga mga depekto!
18 Nan, may maayong katarongan nga gitunglo ni Jehova ang tawo nga nagagawi nga malipatlipaton, kinsa adunay himsog nga laki nga hayop apan nagdala o tingali nagguyod ug buta, piang, o masakiton nga hayop ngadto sa saserdote aron ihalad. Apan, wala gayoy gipasumbingay nga dunay saserdote nga nagkutlo sa balaod sa Diyos nga nagpatin-aw nga talamayon ang mga hayop nga may depekto. (Levitico 22:17-20) Ang mga tawong makataronganon nahibalo nga may mahitabong dili maayo kanila kon sila mosulay sa paghatag sa malimbongong paagi ug ingon nianang matanga sa gasa ngadto sa ilang gobernador. Apan sa pagkatinuod sila nakiglabot sa Soberano sa Uniberso, si Jehova, kinsa, mas labaw kay ni bisan kinsang gobernador. Ang Malaquias 1:14 nag-ingon bahin niini: “‘Ako usa ka dakong Hari,’ miingon si Jehova sa mga panon, ‘ug ang akong ngalan mahimong makalilisang taliwala sa kanasoran.’”
19. Unsay atong ginapangandoy, ug unsay angay natong himoon?
19 Ingong maunongong mga alagad sa Diyos, atong gipangandoy ang adlaw sa dihang ang Dakong Hari nga si Jehova pagabayawon sa tanang katawhan. Niana unyang panahona, “ang yuta mapuno sa kahibalo kang Jehova ingon sa katubigan nga nagtabon sa dagat mismo.” (Isaias 11:9) Kasamtangan, maningkamot kita nga makab-ot ang mga kinahanglanon ni Jehova pinaagi sa pagsundog sa salmista kinsa miingon: ‘Pagahimayaon ko siya uban sa pagpasalamat.’ (Salmo 69:30) Alang niana, si Malaquias adunay dugang tambag nga mapuslanon kaayo. Busa, diha sa sunod nga duha ka artikulo, atong hatagan ug mainampingong pagtagad ang ubang mga bahin sa basahon ni Malaquias.
Nahinumdom Ka Ba?
• Nganong angay natong himayaon si Jehova?
• Nganong ang mga halad sa saserdote sa panahon ni Malaquias talamayon kang Jehova?
• Sa unsang paagi nagtanyag kita ug halad sa pagdayeg kang Jehova?
• Unsay angay natong motibo alang sa matuod nga pagsimba?
[Mga Pangutana sa Pagtuon]
[Hulagway sa panid 9]
Ang tagna ni Malaquias nagpunting sa atong panahon
[Hulagway sa panid 10]
Si Esau walay pagpabili sa sagradong mga butang
[Hulagway sa panid 11]
Ang mga saserdote ug mga tawo nagtanyag ug talamayong mga halad
[Hulagway sa panid 12]
Sa tibuok kalibotan, ang mga Saksi ni Jehova nagtanyag ug mga halad sa pagdayeg nga walay bayad